መዝሙረ ዳዊት Psalm

እስመ ኀልቀ ከመ ጢስ መዋዕልየ፤
ወነቅጸ ከመ ሣዕር አዕጽምትየ፤
ተቀሠፍኩ ወየብሰ ከመ ሣዕር ልብየ።

ወንጌል Gospel

፴፰. ወእምዝ ሐዊሮሙ ቦኡ አሐተ ሀገረ ወተቀበለቶ አሐቲ ብእሲት በቤታ እንተ ስማ ማርታ። ፴፱. ወስመ እኅታ ማርያም እንተ ነበረት ኀበ እገሪሁ ለእግዚእ ኢየሱስ ወሰምዐቶ ነገሮ። ፵. ወማርታሰ ትሰርሕ በአስተደልዎ ብዙኀ፤ ወቆመት ወትቤሎ፦ እግዚእየ ኢያጽህቀከኑ ዘተኀድገኒ እኅትየ ባሕቲትየ አስተዳሉ? በላኬ ታርድአኒ። ፵፩. ወአውሥአ እግዚእ ኢየሱስ ወይቤላ፦ ማርታ፥ ማርታ፥ ትሰርሒ ብዙኀ ታስተዳልዊ። ፵፪. ወኅዳጥ የአክል፥ ወእመአኮ አሐቲ መክፈልት፥ ወማርያምሰ መክፈልተ ሠናየ ኀርየት፥ ላቲ ዘአልቦ ዘየሀይዳ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፳፰. ናእምር ከመ ይረድኦሙ እግዚአብሔር ለእለ ያፈቅርዎ ውስተ ኵሉ ሠናይ ለኅሩያኒሁ። ፳፱. እስመ ለእለ ቀደመ አእመሮሙ ኪያሆሙ ሠርዐ ይኩኑ በአምሳለ ወልዱ ከመ ይኩን ውእቱ በኵረ በላዕለ ብዙኃን አኀው። ፴. ወለእለሰ ሠርዐ ኪያሆሙ ጸውዐ ወለእለሰ ጸውዐ ኪያሆሙ አጽደቀ ወለእለ አጽደቀ ኪያሆሙ አክበረ። ፴፩. ምንተ እንከ ንብል እንበይነዝ ለእመ እግዚአብሔር ምስሌነ መኑ ይክለነ? ፴፪. ወልዶ ጥቀ ኢምሕከ እምኔነ አላ መጠዎ በእንተ ኵልነ ወምንትኑ ውእቱ እንከ ዘኢይጼግወነ። ፴፫. ወመኑ ውእቱ እንከ ዘይትዋቀሦሙ ለኅሩያነ እግዚአብሔር። ለእመ ለሊሁ ያጸድቅ። ፴፬. መኑ ዘይኴንን? ክርስቶስ ኢየሱስ ዘሞተ ወተንሥአ እምውታን ወሀሎ ይነብር በየማነ እግዚአብሔር ወይትዋቀሥ በእንቲአነ። ፴፭. መኑ ያኀድገነ ፍቅሮ ለክርስቶስ? ሕማምኑ፥ ምንዳቤኑ፥ ተሰዶኑ፥ ረኃብኑ፥ ዕርቃንኑ፥ መጥባሕትኑ፥ ጻዕርኑ? ፴፮. በከመ ይቤ መጽሐፍ፦ በእንቲአከ ይቀትሉነ ኵሎ አሚረ ወኮነ ከመ አባግዕ ዘይጠብሑ። ፴፯. ወባሕቱ በእንተዝ ንመውኦ ለኵሉ እስመ ውእቱ አፍቀረነ። ፴፰. እትአመን ባሕቱ ከመ አልቦ ዘያኀድገነ ፍቅሮ ለእግዚአብሔር በኢየሱስ ክርስቶስ እግዚእነ። ኢሞት ወኢሕይወት፥ ወኢመላእክት ወኢቀደምት፥ ወኢዘሀሎ ወኢዘይመጽእ፥ ወኢዘኀይል፥ ፴፱. ወኢዘልዑል ወኢጸድፍ፥ ወኢዳግም ልደት ዘመትሕት። አልቦ ዘይክል አኅድጎትነ ፍቅረ ክርስቶስ።

ዘካልእ መልእክት Universal Epistle

፲፪. አኀዊነ ኢታንክርዋ ለእንተ ትመጽአክሙ መከራ ከመ ዘነኪር ግብር ዘይከውን ብክሙ። ፲፫. ዳእሙ ከመ ትሳተፍዎ በሕማሙ ለክርስቶስ ወተፈሥሑ ከመ አመ ያስተርኢ በስብሐቲሁ ትትሐሠዩ ፍሡሓኒክሙ። ፲፬. ወእመሰቦ ዘተዐየሩክሙ በእንተ ስሙ ለክርስቶስ ብፁዓን አንትሙ እስመ ስብሐቲሁ ወኀይሉ ለእግዚአብሔር ወመንፈሱ ያዕርፍ ላዕሌክሙ። ፲፭. አልቦ ዘየሐምም እምውስቴትክሙ አው ከመ ቀታሊ አው ከመ ሰራቂ አው ከመ ዘእኩይ ምግባሩ አው ከመ ዘባዕደ ያፈቅር ወይፈቱ። ፲፮. ወእመሰ ከመ ክርስቲይናዊ ኢትኅፈሩ አላ ሰብሕዎ ለእግዚአብሔር በዝንቱ ስም። ፲፯. እስመ በጽሐ ጊዜሁ ለፍዳ ዘያቀድም እምነ ቤቱ ለእግዚአብሔር። ወእመሰ ኮነ እምኀቤነ አቅድሞቱ ምንተ እንከ ይከውን ደኃሪቶሙ ለእለ ይክሕድዎ ለወንጌሉ ለእግዚአብሔር? ፲፰. ወሶበ ጻድቅ እምዕፁብ ይድኅን፥ ኃጥእ ወዐማፂ በአይቴ ያስትርኢ ሀለዎ? ፲፱. ወእለኒ የሐምሙ በእንተ ፈቃዱ ለእግዚአብሔር ያማኅፅኑ ነፍሶሙ ኀበ ምእመን ፈጣሪ በገቢረ ሠናይ። ኦ አኃውየ ብቍዑኒ።

ግብረ ሃዋርያት Acts

፴. ወዘቀዲሙሰ መዋዕለ ኢያእምሮ አሰሰለ እግዚአብሔር። ወይእዜ ባሕቱ አዘዘ ለኵሉ ሰብእ ይነስሑ በኵለሄ። ፴፩. እስመ አቀመ ዕለተ እንተ ባቲ ይኴንን ዓለመ በጽድቅ ላዕለ እደዊሁ ለብእሲ ዘሠርዖ ወሚጦሙ ኀበ ሃይማኖት ለኵሉ ሰብእ ኪያሁ በአንሥኦ እሙታን። ፴፪. ወሰሚዖሙ ሕይወተ እሙታን መንፈቆሙሰ ሰሐቅዎ ወካልኣን ይቤልዎ፦ ናፀምአከ በእንተዝ ካልአ ጊዜ። ፴፫. ወወጽአ ጳውሎስ እማእከሎሙ። ፴፬. ወቦ ዕደው እለ አምኑ ወተለውዎ ወአሐዱ እምኔሆሙ ዲዮኒስዮስ እመኳንንት ዘአርዮስፋጎስ ወብእሲት እንተ ስማ ደማሪስ ወቦ ባዕዳንሂ እለ ምስሌሆሙ።

ስንክሳር Synaxarium

ዝርወተ ዓፅሙ ለጊዮርጊስ
ወያዕቆብ ዘንጽቢን ዘአጻዕደወ ሥእርቶን ለአንስት
ወተዝካሮን ለማርያም ወለማርታ

መዝሙር Psalm

ወእምኵሉ ያድኅኖሙ እግዚአብሔር፤
እግዚአብሔር የዐቅብ ኵሎ አዕፅምቲሆሙ፤
ወኢይትቀጠቀጥ አሐዱ እምውስቴቶሙ።

ወንጌል Gospel

፬. ወእንዘ ሀለዎ ይኅልፍ እንተ ሰማርያ። ፭. ወበጽሐ ሀገረ ሳምር እንተ ስማ ሲካር፥ ቅሩበ ዐጸደ ወይን ዘወሀቦ ያዕቆብ ለዮሴፍ ወልዱ። ፮. ወሀሎ ህየ ዐዘቅተ ማይ ዘያዕቆብ፤ ወደኪሞ እግዚእ ኢየሱስ በሐዊረ ፍኖት ነበረ ህየ ኀበ ውእቱ ዐዘቅት፤ ወቀትር ሶቤሃ ጊዜ ስሱ ሰዓት። ፯. ወናሁ መጽአት ብእሲት እምሰማርያ ከመ ትቅዳሕ ማየ፥ ወይቤላ እግዚእ ኢየሱስ፦ አስትይኒ ማየ። ፰. እስመ አርዳኢሁሰ ሖሩ ሀገረ ከመ ይሣየጡ ሲሳዮሙ። ፱. ወትቤሎ ይእቲ ብእሲት ሳምራዊት፦ እፎኑ እንዘ አይሁዳዊ አንተ ትስእል እምኀቤየ ትስተይ ማየ እንዘ ሳምራዊት አነ? እስመ ኢየኀብሩ ሕርመተ አይሁድ ምስለ ሳምራውያን፥ ወኢይትሐወሱ ወኢይዴመሩ። ፲. ወአውሥአ እግዚእ ኢየሱስ ወይቤላ፦ ሶበሰ ታአምሪ ጸጋሁ ለእግዚአብሔር ወመኑ ውእቱ ዘይስእለኪ ወይብለኪ፦ አስትይኒ ማየ፣ አንቲኒ ዓዲ እምሰአልኪዮ ወውእቱኒ እምወሀበኪ ማየ ሕይወት። ፲፩. ወትቤሎ ይእቲ ብእሲት፦ እግዚእየ፥ ማሕየብኒ አልብከ፥ ወዐዘቅቱኒ ዕሙቅ ውእቱ፥ እምአይቴ እንከ ለከ ማየ ሕይወት? ፲፪. አንተኑ ተዐቢ እምያዕቆብ አቡነ ዘወሀበነ ዘንተ ዐዘቅተ፣ ወውእቱኒ ሰትየ እምኔሃ፥ ወአንስትያሁኒ ወደቂቁኒ ወእንስሳሁኒ ወጥሪቱኒ? ዘየአምን በወልድ ቦ ሕይወት ዘለዓለም።

ቅዳሴ Liturgy :

መዝሙረ ዳዊት Psalm

ወአንሰ በምሕረትከ ተወከልኩ፤
ይትፌሥሐኒ ልብየ በአድኅኖትከ፤
እሴብሖ ለእግዚአብሔር ዘረድአኒ።

ወንጌል Gospel

፴፭. ወእንዘ ይትናገር ምስሌሃ መጽኡ ኀበ መጋቤ ምኵራብ ወይቤለዎ፦ ወለትከሰ ሞተት፥ ወኢታጻምዎ እንከ ለሊቅ። ፴፮. ወሰሚዖ እግዚእ ኢየሱስ እንዘ ይትናገርዎ ይቤሎ ለመጋቤ ምኵራብ፦ ኢትፍራህ፥ ተአመን ዳእሙ። ፴፯. ወከልአ አልቦ ዘይትልዎ ዘእንበለ ጴጥሮስ ወያዕቆብ ወዮሐንስ እኁሁ ለያዕቆብ። ፴፰. ወቦአ ቤቶ ለመጋቤ ምኵራብ ወረከቦሙ ይትሀወኩ ወይበክዩ ወያዐወይዉ ብዙኀ። ፴፱. ወቦአ ወይቤሎሙ፦ ለምንት ትትሀወኩ ወትበክዩ? ኢሞተት ሕፃንሰ አላ ትነውም። ፵. ወሠሐቅዎ። ወእምዝ ሰደደ ኵሎ ወነሥኦሙ ለአቡሃ ወለእማ ለሕፃን ወእለ ምስሌሆሙ ወቦአ ኀበ ሀለወት ሕፃን። ፵፩. ወአኀዛ እዴሃ ለሕፃን ወይቤላ፦ ጣቢታ ቁሚ፤ ተንሥኢ ወለትየ፥ ብሂል በትርጓሜሁ። ፵፪. ወተንሥአት ሶቤሃ ይእቲ ወለት ወአንሶሰወት ወዐሠርቱ ወክልኤቱ ክረምታ። ወደንገፁ ሶቤሃ ዐቢየ ድንጋፄ። ፵፫. ወገሠጾሙ ብዙኀ ከመ አልቦ ዘየአምር ዘንተ ወአዘዘ የሀብዋ ዘትበልዕ። ዘቦ እዝን ሰሚዐ ለይስማዕ።

መዝሙረ ዳዊት Psalm

ወባሕቱ መከሩ ይሥዐሩ ክብርየ፤
ወሮፅኩ በፅምእየ፤
በአፉሆሙ ይድኅሩ ወበልቦሙ ይረግሙ።

ወንጌል Gospel

፩. ወተጋብኡ ኀቤሁ ጸሐፍት ወፈሪሳውያን መጺኦሙ እምኢየሩሳሌም። ፪. ወርእይዎሙ ለአርዳኢሁ እንዘ ይበልዑ እክለ ዘእንበለ ይትኀፀቡ እደዊሆሙ። ፫. እስመ ፈሪሳውያንሰ ወኵሎሙ አይሁድ ለእመ በሕቁ ኢተኀፅቡ እደዊሆሙ ኢይበልዑ እክለ እስመ የዐቅቡ ሥርዐቶሙ ለረበናት። ፬. ወዘሂ እምሥያጥ ኢይበልዑ ለእመ ኢያጥመቅዎ በማይ። ወባዕደኒ ብዙኀ ሕርመተ ዘይትዐቀቡ ወያጠምቁ ጽዋዓተኒ ወኰሳኵሳተኒ ወጻህራተኒ ወዐራታተ። ፭. ወይቤልዎ ጸሐፍት ወፈሪሳውያን፦ ለምንት ኢየሐውሩ አርዳኢከ በከመ ሠርዑ ረበናት ወዘእንበለ ይትኀፀቡ እደዊሆሙ ይበልዑ እክለ? ፮. ወይቤሎሙ እግዚእ ኢየሱስ፦ ኦ መድልዋን ሠናየ ተነበየ ኢሳይያስ ላዕሌክሙ በከመ ጽሑፍ፦ ዝንቱ ሕዝብ በከናፍሪሆሙ ያከብሩኒ ወበልቦሙሰ ነዋኀ ይርሕቁ እምኔየ። ፯. ወከንቶ ያመልኩኒ ወይሜህሩ ሥርዐታተ ትእዛዛተ ሰብእ። ፰. ወየኀድጉ ትእዛዘ እግዚአብሔር ወየዐቅቡ ትእዛዛተ እጓለ እመሕያው ጥምቀታተ ኰሳኵሳት ወጸሀርታት ወጽዋዓት ወባዕደኒ ብዙኀ ዘይመስሎ ለዝንቱ። ፱. ወይቤሎሙ፦ ርቱዕኑ ትዕልዉ ትእዛዘ እግዚአብሔር ከመ ትዕቀቡ ትእዛዘ ርእስክሙ። ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፳፩. ወአንትሙሂ ትካት ፀሩ ወነኪሩ በልብክሙ ወበእከየ ምግባሪክሙ። ፳፪. ወይእዜሰ ተሣሀለክሙ በነፍስተ ሥጋሁ ወበሞቱ ከመ ይረሲክሙ ቅዱሳነ ወንጹሓነ ወኅሩያነ ለቅድሜሁ። ፳፫. ለእመ ጸናዕክሙ እንከ በሃይማኖት እንዘ ታጠብዑ ወኢያንቀለቅል ድደ መሰረትክሙ እምተስፋ ትምህርተ ወንጌል ዘሰማዕክሙ ዘተሰብከ በኵሉ ዓለም ዘመትሕተ ሰማይ። ዘሎቱ ተሠየምኩ አነ ጳውሎስ ዐዋዲ ወላእክሂ። ፳፬. ወይእዜኒ እትፌሣሕ በሕማምየ ወእፌጽም ሕጸጸ ሕማሙ ለክርስቶስ በሥጋየ በእንተ ሥጋሁ እንተ ይእቲ ቤተ ክርስቲያኑ። ፳፭. እንተ ላቲ ተሠየምኩ አነ ላእከ በሥርዐተ እግዚአብሔር ዘወሀበኒ በእንቲአክሙ ከመ እፈጽም ቃለ እግዚአብሔር። ፳፮. ወምክሮ ዘኅቡእ እምቅድመ ዓለም ወዘእንበለ ይትፈጠር ሰብእ። ወይእዜሰ አስተርአዮሙ ለቅዱሳኑ። ፳፯. ለእለ ፈቀደ እግዚአብሔር ይክሥት ሎሙ ብዕለ ስብሐቲሁ ለዝንቱ ምክሩ በላዕለ አሕዛብ፥ እስመ ውእቱ ክርስቶስ ዘላዕሌክሙ ተስፋ ስብሐቲነ። ፳፰. ዘንሜህር ንሕነ ወንጼውዕ ኀቤሁ ወንጌሥጽ ኵሎ ሰብአ ወንነግር ግብሮ በኵሉ ጥበብ ከመ ናቅሞ ለኵሉ ሰብእ ፍጹመ በኢየሱስ ክርስቶስ። ፳፱. ወበእንቲአሁ እሰርሕ ወእትጋደል በከመ ረድኤቱ ዘይረድአኒ በኀይሉ።

ዘካልእ መልእክት Universal Epistle

፲፬. ወዛቲ ይእቲ እንተ ብነ ገጽ በኀበ እግዚአብሔር እስመ ዘሰአልነ ኀቤሁ በስመ ዚአሁ ይሰምዐነ። ፲፭. ወእመሰ ርኢነ ከመ ዘሰአልናሁ ይሰምዐነ ናአምር እንከ ከመ ብነ ስእለት ዘሰአልነ በኀቤሁ። ፲፮. ወእመሰቦ ዘርእዮ ለካለኡ እንዘ ይኤብስ አበሳ ዘኢኮነ ለሞት ለይስአሎ ለእግዚአብሔር ከመ ያሕይዎ ለዘይኤብስ አበሳ ዘኢኮነ ለሞት። እስመቦ አበሳ ዘለሞት ወኢኮነ በእንቲአሁ ዘእብለ ከመ ይስአሉ ሎቱ። ፲፯. እስመ ኵሉ አበሳ ኃጢአት ይእቲ ወቦ ጌጋይ ዘኢኮነ ለሞት። ፲፰. ናአምር ከመ ኵሉ ዘተወልደ እምነ እግዚአብሔር ኢይኤብስ አላ ዘተወልደ እምእግዚአብሔር የዐቅብ ርእሶ ወእኩይኒ ኢይስሕጦ። ፲፱. ናአምር ከመ እምነ እግዚአብሔር ንሕነ ወዓልምሰ ኵሉ በእኪት ይቀውም። ፳. ወነአምር ከመ ወልደ እግዚአብሔር መጽአ ወወሀበነ ልበ ከመ ናእምሮ ለእግዚአብሔር ዘበጽድቅ። ወሀለውነ ዘበጽድቅ በወልደ እግዚአብሔር በኢየሱስ ክርስቶስ ውእቱ ዘበአማን እግዚአብሔር ወብነ ሕይወት ዘለዓለም። ፳፩. ባቲ ደቂቅየ ዕቀቡ ርእሰክሙ እምነ አማልክት። መልአት መልእክተ ዮሐንስ ቀዳሚት። ወስብሐት ለእግዚአብሔር፥ አሜን።

ግብረ ሃዋርያት Acts

፭. ወቀንኡ አይሁድ ላዕሌሆሙ ወአስተጋብኡ ሰብአ ምሥያጥ ቢጽ እኩያን ወበጽሑ ወሆክዋ ለሀገር ወኀሠሥዎሙ ወደበዩ ቤተ ኢያሶን ወፈቀዱ ያውፅእዎሙ ኀበ ሕዝብ። ፮. ወኀጢኦሙ ሰሐብዎ ለኢያሶን ወለቢጹሂ እለ ሀለዉ ህየ። ወወሰድዎሙ ኀበ መኳንንት እንዘ የዐወይዉ ወይብሉ፦ እሉ እሙንቱ እለ የሀውክዋ ለዓለም ወመጽኡ ዝየኒ። ፯. ወተወክፎሙ ዝኢያሶን ወእሙንቱ ይገብሩ ማዕሌተ ቄሳር ወይሜህሩ ካልአ ሕገ ወይቤሉ ኢየሱስ ካልእ ንጉሥ። ፰. ወተሀውከ ሕዝብ ወመኳንንት ዘንተ ሰሚዖሙ። ፱. ወብዙኀ ተሐልዮሙ እምኀበ ኢያሶን ወእምኀበ ቢጹ ኀደግዎሙ። ፲. ወቢጾሙሰ ፈነውዎሙ በሌሊት ለጳውሎስ ወለሲላስ ውስተ ቤርያ። ወቦኡ ምኵራበ አይሁድ። ፲፩. ወእሙንቱ ይኄይሱ እምእለ በተሰሎንቄ ወተወክፉ ቃሎሙ በኵሉ ትፍሥሕት። ወኵሎ አሚረ የኀሥሡ በውስተ መጻሕፍት ለእመ ከማሁ ውእቱ። ፲፪. ወብዙኃን እምውስቱቶሙ እለ አምኑ ወአንስትኒ ብዙኃት አረማውያት ኄራት ወዕደውኒ ብዙኃን።

ስንክሳር Synaxarium

ርክበተ ሥጋሆሙ ለአባ ብስራ ወዝኁራ ወእሞሙ ኔራ
ወበልስጢና
ወያፈቅረነ እግዚእ
ወቅዳሴ ቤቶሙ ለሰማዕታተ አስና

መዝሙር Psalm

ወምእመኖሙ ውእቱ ለኵሎሙ እለ ይትዌከሉ ቦቱ፤
መኑ ውእቱ አምላክ ዘእንበለ እግዚአብሔር፤
ወመኑ እግዚአብሔር ዘእንበለ አምላክነ።

ወንጌል Gospel

፴፬. ወአውሥአ እግዚእ ኢየሱስ ወይቤሎሙ፦ አኮኑ ጽሑፍ ውስተ ኦሪትክሙ፦ አንሰ እቤ አማልክት አንትሙ? ፴፭. ወሶበ ለእልክቱ አማልክት ይቤሎሙ እለ ኮነ ቃለ እግዚአብሔር ኀቤሆሙ፤ ወኢይትከሀል ይትነሠት ቃለ መጽሐፍ። ፴፮. ወዘሰ ቀደሶ አብ ወፈነዎ ውስተ ዓለም እፎ እንከ ትብሉኒ፦ ትፀርፍ፥ ለእመ እቤለክሙ፦ ወልደ እግዚአብሔር አነ? ፴፯. ወእመሰ ኢይገብር ግብሮ ለአቡየ ኢትእመኑ ብየ። ፴፰. ወእመሰ እገብር ለእመ ኪያየ ኢአመንክሙ ለግብርየ፥ እመኑ ከመ ታእምሩ ወትጠይቁ ከመ አነ በአብ ወአብ ብየ። ፴፱. ወየኀሥሡ ካዕበ የአኀዝዎ ወአምሰጠ እምእዴሆሙ። ፵. ወሖረ ካዕበ ማዕዶተ ዮርዳኖስ ብሔረ ኀበ አጥመቀ ዮሐንስ ቀዲሙ ወነበረ ህየ። ፵፩. ወብዙኃን ሖሩ ኀቤሁ ወይቤሉ፦ ዮሐንስ አልቦ ዘገብረ ተኣምረ ወኢምንተኒ፤ ወባሕቱ ኵሉ ዘይቤ ዮሐንስ በእንተዝ ብእሲ እሙነ ኮነ። ፵፪. ወብዙኃን እለ አምኑ ቦቱ በህየ። ዘየአምን በወልድ ቦ ሕይወት ዘለዓለም።

ቅዳሴ Liturgy :

መዝሙረ ዳዊት Psalm

አዕርክቲየኒ ወቢጽየኒ ዕድወ ኮኑኒ ሮዱኒ ወደበዩኒ፤
ወአዝማድየኒ ቀብፁኒ ወተናከሩኒ፤
ወተኃየሉኒ እለ የኃሥሥዋ ለነፍስየ።

ወንጌል Gospel

፲፰. ወመጽአ ካልኡሂ ወይቤሎ፦ አግዚኦ ምናንከ ኀምስቱ ወኀምስተ ምናናተ ረባሕኩ። ፲፱. ወይቤሎ ሎቱኒ፦ አንተኒ ተሠየም ላዕለ ኀምስቱ አህጉር። ፳. ወመጽአ ሣልሱኒ ወይቤሎ፦ እግዚኦ ነያ ምናንከ እንተ ኀቤየ አንበርክዋ ውስተ ሰበንየ። ፳፩. እስመ ፈራህኩከ እስመ አአምረከ ከመ ዕፁብ ብእሲ አንተ ወትነሥእ ዘኢያንበርከ ወተአርር ዘኢዘራዕከ ወታስተጋብእ ዘኢዘረውከ። ፳፪. ወይቤሎ እግዚኡ፦ በከመ ቃልከ እኴንነከ ገብር እኩይ ወሀካይ። ታአምረኒ ከመ ብእሲ ዕፁብ አነ እነሥእ ዘኢያንበርኩ ወአአርር ዘኢዘራዕኩ ወአስተጋብእ ዘኢዘረውኩ። ፳፫. ወለምንት ኢያግባእከ ወርቅየ ውስተ ማእድ ወለሊየ አነ አቲውየ እምአስተገበርክዎ በሲሳይ? ፳፬. ወይቤሎሙ ለእለ ይቀውሙ፦ ህየ ንሥኡ እምላዕሌሁ ዘንተ ምናነ ወሀብዎ ለዘቦ ዐሠርተ ምናናተ። ፳፭. ወይቤልዎ፦ እግዚኦ አኮኑ ቦቱ ዐሠርተ ምናናተ። ፳፮. ወይቤሎሙ፦ እብለክሙ ለኵሉ ዘቦ ይሁብዎ ወይዌስክዎ ወለዘሰ አልቦ እለሂቦ የሀይድዎ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ሕጽበኒ ወአንጽሐኒ እምኃጢአትየ፤
ወእምአበሳየኒ አንጽሐኒ፤
እስመ ለልየ አአምር ጌጋይየ።

ወንጌል Gospel

፳፱. ወአመ ሳኒታ ርእዮ ዮሐንስ ለእግዚእ ኢየሱስ እንዘ ይመጽእ ኀቤሁ ወይቤ፦ ነዋ በግዑ ለእግዚአብሔር ዘያአትት ወያሴስል ኅጢአተ ዓለም። ፴. ዝንቱ ውእቱ ዘእቤለክሙ አነ በእንቲአሁ፦ ይመጽእ እምድኅሬየ ብእሲ ዘህሎ አምቅድሜየ እስመ አምቅድሜየ ውእቱ ኮነ። ፴፩. ወአንሰ ኢያአምሮ ዳእሙ ከመ ያእምርዎ እስራኤል በእንተዝ መጻእኩ አነ ከመ አጥምቅ በማይ። ፴፪. ወነገረ ስምዖ ዮሐንስ ወይቤ፦ ርኢኩ መንፈሰ ቅዱስ እንዘ ይወርድ እምሰማይ ከመ እንተ ርግብ ወነበረ ዲቤሁ። ፴፫. ወአንሰ ኢያአምሮ ወባሕቱ ዘፈነወኒ ከመ አጥምቅ በማይ ውእቱ ይቤለኒ፦ ዲበ ዘርኢክ ይወርድ መንፈስ ቅዱስ ወይነብር ዲቤሁ፥ ውእቱኬ ዘያጠምቅ በመንፈስ ቅዱስ። ፴፬. ወለሊየ ርኢኩ ወአነ ሰማዕቱ ከመ ዝንቱ ውእቱ ወልዱ ለእግዚአብሔር። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፲፪. ወበከመ አሐዱ ሥጋነ ወብዙኅ መለያልይነ እንዘ እሐዱ ሥጋነ ከማሁ ክርስቶስኒ። ፲፫. ወንሕነ በአሐዱ መንፈስ ወበአሐዱ ሥጋ ተጠመቅነ ኵልነ እለሂ እምአይሁድ ወእለሂ እምአረሚ። ወእመኒ ነባሪ ወእመኒ አግዓዚ። ኵልነ አሐደ መንፈሰ ሰተይነ። ፲፬. ወለሥጋነሂ ብዙኅ መለያልዩ ወአኮ አሐዱ። ፲፭. እመኒ ትቤ እግር፦ አንሰ ኢኮንኩ እደ ወኢኮንኩ እምውስተ ነፍስት አኮ ዘንተ ብሂላ ዘኢትከውን እምውስተ ነፍስት። ፲፮. ወእመኒ ትቤ እዝን፦ አንሰ ኢኮንኩ ዐይነ ወኢኮንኩ እምውስተ ነፍስት፥ አኮ ዘንተ ብሂላ ዘኢትከውን እምነፍስት። ፲፯. ወእመሰ ኵሉ ነፍስትነ ዐይን፥ ውእቱ አይቴ እምኮነ እዝን? ወእመሰ ኵሉ ነፍስትነ እዝን፥ አይቴ እምኮነ አንፍ? ፲፰. ወይእዜኒ አስተናበሮ እግዚአብሔር ወሠርዖ ለመለያልይነ ዘዘዚአሁ በውስተ ነፍስትነ በከመ ፈቀደ። ፲፱. ወእመሰ ኵሉ መሌሊት አሐዱ፥ ወአይቴ እምኮነ ነፍስት? ፳. ወይእዜኒ መሌሊቱ ብዙኅ፥ ወነፍስቱ አሐዱ። ፳፩. ወኢትክል ዐይን ትበላ ለእድ፦ ኢይፈቅደኪ፥ ወካዕበ ኢትክል ርእስ ትበላ ለእግር፦ ኢይፈቅደኪ።

ዘካልእ መልእክት Universal Epistle

፯. እስመ ቀርበ ማኅለቅቱ ለኵሉ አንጽሑ ልበክሙ ወጸሐዉ ለጸሎት። ፰. ወእምኵሉሰ ዘይቀድም ተሩቀሩ በበይናቲክሙ በምልአ ልብክሙ እስመ ተፋቅሮ ይደመስሶን ለኵሎን ኃጣውእ። ፱. ወአፍቅሩ ነግደ እንዘ ኢታስተዓፅቡ። ፲. ወኵልክሙ በከመ ነሣእክሙ ፍቶ ለእግዚአብሔር በበይናታክሙ ተለአኩ ከመ ኄር ላእክ። እስመ ለለአሐዱ ዘዘዚአሁ ዕሤቱ እምኀበ እግዚአብሔር። ፲፩. ወለእለሂ ትሜህሩ መሀሩ ቃሎ ለእግዚአብሔር ወዘኒ ይትለአክ ለይትለአክ በኀይለ እግዚአብሔር ዘወሀቦ ከመ በኵሉ ይሰባሕ እግዚአብሔር በኢየሱስ ክርስቶሰ ዘሎቱ ስብሐት ለዓለመ ዓለም አሜን። ፲፪. አኀዊነ ኢታንክርዋ ለእንተ ትመጽአክሙ መከራ ከመ ዘነኪር ግብር ዘይከውን ብክሙ።

ግብረ ሃዋርያት Acts

፫. ኅረዩ እምውስቴትክሙ ሰብዐተ ዕደወ እለ ምሉኣን መንፈስ ቅዱስ ወጥበብ እለ ንሠይም ዲበ ዝግብር። ፬. ወንሕነሰ ንፀመድ ጸሎተ ወመልእክተ ቃል። ፭. ወኀብሩ ኵሎሙ ሕዝብ። ወሠናየ ኮነ ዝነገር በኀቤሆሙ ወኀረዩ እስጢፋኖስሃ ብእሴ ዘምሉእ ሃይማኖተ ወመንፈስ ቅዱስ፥ ወፊልጶስ፥ ወጰሮኮሮን፥ ወኒቃኖራ፥ ወጢሞና፥ ወጰርሜና፥ ወኒቃሊዎን ፈላሴ ዘሀገረ አንጾኪያ። ፮. ወአቀምዎሙ ቅድመ ሐዋርያት። ወጸለዩ ወወደዩ እደዊሆሙ ላዕሌሆሙ። ፯. ወዐብየ ቃለ እግዚአብሔር ወበዝኁ ሕዝብ በኢየሩሳሌም ፈድፋደ ወብዙኃን እምውስተ ካህናት እለ አምኑ።

ስንክሳር Synaxarium

አብሮኮሮስ ፩ እም፸፪ አርድእት ወ፯ ዲያቆናት
ወአባ አክሎግ ቀሲስ ወወንጌሉ ዘወርቅ
ወዮሐንስ
ወብህኑ
ወአባ ኖህ
ወቅዳሴ ቤቱ ለመርምህናም
ወስልዋኖስ
ወአባ አብዩድ
ወአባ ብንዋህ
ወጥንተ ጾመ ነነዌ

መዝሙር Psalm

ወአግረረ ሊተ አሕዛበ በመትሕቴየ፤
ዘይባልሐኒ እምጸላእትየ ምንስዋን፤
ወዘያሌዕለኒ እምእለ ቆሙ ላዕሌየ።

ወንጌል Gospel

፲፪. እብለክሙ ከመ ሰዶም ትኄይስ ወትረክብ ሣህለ ፈድፋደ እምይእቲ ሀገር በዕለተ ደይን። ፲፫. አሌ ለኪ ኰራዚ አሌ ለኪ ቤተ ሳይዳ ሶበ በጢሮስ ወበሲዶና ተገብረ ኀይል ዘተገብረ በውስቴትክን ሠቀ እምለብሱ ወውስተ ሐመድ እምነበሩ ወእምነስሑ። ፲፬. ወባሕቱ ጢሮስ ወሲዶና ይኄይሳ እምኔክን በዕለተ ደይን። ፲፭. ወአንቲኒ ቅፍርናሆም፥ ይመስለኪኑ እስከ ሰማይ ትትሌዐሊ? እስከ ሲኦለ ትወርዲ። ፲፮. ዘኪያክሙ ሰምዐ ኪያየ ሰምዐ ወዘለክሙ አበየ ሊተ አበየ ወዘሊተ አበየ አበዮ ለዘፈነወኒ ወዘኪያየ ሰምዐ ሰምዖ ለዘፈነወኒ። ፲፯. ወተመይጡ እልክቱ ሰብዓ እንዘ ይትፌሥሑ ወይብሉ እግዚኦ አጋንንትሂ ይትኤዘዙ ለነ በስምከ። ፲፰. ወይቤሎሙ፦ ርኢክዎ ለሰይጣን ከመ መብረቅ ወድቀ እምሰማይ። ፲፱. ወናሁ ወሀብኩክሙ ሥልጣነ ትኪዱ ዲበ ዐቃርብት ወዲበ አራዊት ምድር ወዲበ ኵሉ ኀይለ ጸላኢ ወአልቦ ዘይነክየክሙ። ፳. ወባሕቱ በዝሰ ኢትትፈሥሑ እስመ አጋንንት ይገንዩ ለክሙ ተፈሥሑሰ ባሕቱ እስመ ተጽሕፈ አስማቲክሙ በሰማያት። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወሕገከሰ ኢረሳዕኩ፤
መንፈቀ ሌሊት እትነሣእ፤
ከመ እግነይ ለከ በእንተ ኵነኔ ጽድቅከ።

ወንጌል Gospel

፲፯. እምይእቲ ዕለት አኀዘ እግዚእ ኢየሱስ ይስብክ ወይበል፦ ነስሑ እስመ ቀርበት መንግሥት ሰማያት። ፲፰. ወእንዘ ያንሶሱ መንገለ ባሕረ ገሊላ ርእየ ክልኤተ አኀወ፥ ስምዖንሃ ዘተሰምየ ጴጥሮስ፥ ወእንድርያስሃ እኅዋሁ እንዘ ያወርዱ መርበብቶሙ ውስተ ባሕር እስመ መሠግራን እሙንቱ። ፲፱. ወይቤሎሙ እግዚእ ኢየሱስ፦ ንዑ ትልዉኒ ድኅሬየ ወእሬስየክሙ ትኩኑ መሠግራነ ሰብእ። ፳. ወበጊዜሃ ኀደጉ መሣግሪሆሙ ወተለውዎ። ፳፩. ወኅሊፎ ሕቀ እምህየ ርእየ ካልኣነ ክልኤተ አኀወ ያዕቆብሃ ወልደ ዘብዴዎስ ወዮሐንስሃ እኅዋሁ ውስተ ሐመር ምስለ ዘብዴዎስ አቡሆሙ ይሠርዑ ወያስተሣንዩ መሣግሪሆሙ ወጸውዖሙ። ፳፪. ወበጊዜሃ ኀደጉ ሐመሮሙ ወአባሆሙ ወተለውዎ። ፳፫. ወአንሶሰወ እግዚእ ኢየሱስ ውስተ ኵሉ ገሊላ እንዘ ይሜህር በምኵራባቲሆሙ ወይሰብክ ወንጌለ መንግሥት ወይፌውስ ኵሎ ደዌ ወኵሎ ሕማመ ዘውስተ ሕዝብ። ፳፬. ወወጽአ ስሙዓተ ነገሩ ውስተ ኵላ ሶርያ ወአምጽኡ ኀቤሁ ኵሎ ድዉያነ ወኵሎ ሕሙማነ ዘለለዚአሁ ሕማሞሙ ወጽዑራነ ወእለሂ አጋንንት ወወርኃውያነ ወእለሂ ነገርጋር ወመፃጕዓነ ወያሐይዎሙ ለኵሎሙ። ፳፭. ወተለውዎ ብዙኃን አሕዛብ እምገሊላ ወእምዓሡሩ አህጉር ወእምኢየሩሳሌም ወእምይሁዳ ወእማዕዶተ ዮርዳኖስ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ትሴብሖ ኢየሩሳሌም ለእግዚአብሔር፤
ወሰብሕዮ ለአምላክኪ ጽዮን፤
እስመ አጽንዐ መናሥግተ ኆኃትኪ።

ወንጌል Gospel

፩. ወኮነ በውእቱ መዋዕል ወጽአ ትእዛዝ እምኀበ ቄሳር ንጉሥ ከመ ይጸሐፍ ኵሉ ዓለም። ፪. ወውእቱ ጸሐፍ ቀዳሚ ውእቱ አመ ቄሬኔዎስ መስፍን ለሶርያ። ፫. ወሖረ ኵሉ ሰብእ ይጸሐፍ በበ ሀገሩ። ፬. ወዐርገ ዮሴፍኒ እመገሊላ እምሀገረ ናዝሬት መንገለ ይሁዳ ኀበ ሀገረ ዳዊት እንተ ስማ ቤተ ልሔም እስመ እምሀገረ ዳዊት ወእምአዝማደ ቤቱ ውእቱ። ፭. ወሖረ ይጸሐፍ ምስለ ማርያም እንተ ፈሐሩ ሎቱ ብእሲተ እንዘ ፅንስት ይእቲ። ፮. ወእምዝ እንከ እንዘ ሀለዉ ህየ በጽሐ ዕለተ ወሊደታ። ፯. ወወለደት ወልደ ዘበኵራ ወአሰረቶ መንኮብያቲሁ ወአስከበቶ ውስተ ጎል እስመ አልቦሙ መካነ ውስተ ማኅደሮሙ። ፰. ወሀለዉ ኖሎት ውስተ ውእቱ ብሔር ወይተግሁ ወይሔልዉ ወየዐቅቡ መራዕዪሆሙ ሌሊተ። ፱. ወናሁ ቆመ መልአከ እግዚአብሔር ኀቤሆሙ ወስብሓተ እግዚአብሔር በረቀ ላዕሌሆሙ ወፈርሁ ዐቢየ ፍርሀተ። ፲. ወይቤሎሙ መልአክ፦ ኢትፍርሁ እስመ ናሁ እዜንወክሙ ዐቢየ ዜና ፍሥሓ ዘይከውን ለኵሉ ሕዝብ። ፲፩. እስመ ናሁ ተወልደ ለክሙ ዮም መድኅን ዘውእቱ ክርስቶስ እግዚእ ቡሩክ በሀገረ ዳዊት። ፲፪. ወከመዝ ትእምርቱ ለክሙ ትረክቡ ሕፃነ እሱረ መንኮብያቲሁ ወስኩበ ውስተ ጎል። ፲፫. ወግብተ መጽኡ ምስለ ውእቱ መልአክ ብዙኅ ሐራ ሰማይ ይሴብሕዎ ለእግዚአብሔር ወይብሉ፦ ፲፬. ስብሓት ለእግዚአብሔር በሰማያት ወሰላም በምድር ለእጓለ እመሕያው ሥምረቱ። ፲፭. ወእምዝ ዐሪጎሙ መላእክት እምኀቤሆሙ ውስተ ሰማይ ወይቤሉ እሙንቱ ሰብእ ኖሎት በበይናቲሆሙ፦ ንሑር ናንሶሱ እስከ ቤተ ልሔም ወናእምር ዘንተ ነገረ ዘአርአየነ እግዚአብሔር። ፲፮. ወሖረ ፍጡነ ወረከብዎሙ ለማርያም ወለዮሴፍ ወለሕፃንኒ ይሰክብ ውስተ ጎል። ፲፯. ወርእዮሙ አእመሩ በእንተ ሕፃን ዘነገርዎሙ። ፲፰. ወኵሎሙ እለ ሰምዑ አንከሩ ዘነገርዎሙ ኖሎት። ፲፱. ወማርያምሰ ተዐቅብ ዘንተ ኵሎ ነገረ ወትወድዮ ውስተ ልባ። ፳. ወተመይጡ ኖሎት እንዘ ይሴብሕዎ ወያአኵትዎ ለእግዚአብሔር በእንተ ኵሉ ዘርእዩ ወሰምዑ ዘከመ ይቤልዎሙ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ወባሕቱ እብል አምጣነሰ ሕፃን ውእቱ ወራሲ አልቦ ዘይኄይስ እምነባሪ እንዘ እግዚእ ውእቱ ለኵሉ። ፪. ወባሕቱ ላዕለ እምሔው ወላዕለ መገብት ይትዐቀብ እስከ ዕድሜ ዘዐደመ አቡሁ። ፫. ከማሁ ንሕነኒ አመ ሕፃናት ንሕነ ተቀነይነ ለስሒተ ዝዓለም። ፬. ወአመ በጽሐ ዕድሜሁ ፈነወ እግዚአብሔር ወልዶ ወተወልደ እምብእሲት ወገብረ በሕገ ኦሪት። ፭. ከመ ይሣየጦሙ ለእለ ውስተ ኦሪት ከመ ንርከብ ትርሲተ ውሉድ። ፮. ወከመሰ ውሉድ አንትሙ ናሁ ፈነወ እግዚአብሔር መንፈሰ ወልዱ ውስተ ልብክሙ ውእቱ ዘይጼውዕ ወይብል፦ አባ፥ ወአቡየ። ፯. እንከሰኬ ወልድ አንተ ወኢኮንከ ገብረ ወእመሰኬ ወልድ አንተ ወራሲሁኬ ለእግዚአብሔር አንተ በኢየሱስ ክርስቶስ። ፰. ወባሕቱ ትካትሰ በኢያእምሮትክሙ ተቀነይክሙ ለእለ ኢኮኑ አማልክተ። ፱. ወይእዜሰ አእመርምዎ ለእግዚአብሔር ወፈድፋደ ውእቱ አእመረክሙ፥ እፎ ካዕበ ኀበ ዝኩ ድኩም ወጽኑስ ጣዖተ ዝዓለም ትፈቅድ ፈጠራ ትትቀነዩ ሎሙ? ፲. ወትትዓቀቡ ዕለተ ወርኀ ወጊዜ ዓመታት። ፲፩. እፈርሀክሙ እንዳዒ ለእመ ለከንቱ ጻመውኩ በእንቲአክሙ።

ዘካልእ መልእክት Universal Epistle

፩. እምነ ቀሲስ ለኅሪት ወለእግዝእት ወለደቂቃ ለእንተ አነ አፈቅራ በጽድቅ ወበእንተ ዛቲ ጽድቅ ወአኮ አነ ባሕቲትየ አላ ወእለኒ የአምርዋ ለጽድቅ ኵሎሙ። ፪. ወበእንተ ዛቲ ጽድቅ እንተ ትነብር ኀቤነ ወትሄሉ ምስሌነ፥ ወምስሌነ ይእቲ ለዓለም፥ ወትሄሉ ምስሌነ። ፫. ሞገስ ወምሕረት ወሰላም እምኀበ እግዚአብሔር አብ ወእምኀበ ኢየሱስ ክርስቶስ ወልዱ ለአብ እግዚአብሔር በጽድቅ ወበተፋቅሮ። ፬. ተፈሣሕኩ ጥቀ እስመ ረከብኩ እምደቂቅኪ እለ የሐውሩ በጽድቅ በከመ ነሣእነ ትእዛዞ እምኀበ አብ። ፭. ወይእዜኒ እስእለኪ ኦ እግዝእት ወአኮ ትእዛዘ ሐዲሰ ዘእጽሕፍ ለኪ አላ ትእዛዘ ብሊተ እንተ ብን ትካት ከመ ንትፋቀር በበይናቲነ። ፮. ወዛቲ ይእቲ ተፋቅሮትነ ከመ ንሑር በትእዛዙ፥ ወዛቲ ይእቲ ትእዛዝ ከመ ንሑር በዛቲ እንተ ሰማዕክሙ ትካት። ፯. እስመ ብዙኃን መስሕታን እለ መጽኡ ውስተ ዓለም፥ እለ ኢየአምኑ በኢየሱስ ክርስቶስ ከመ መጽአ በሥጋ። ወዝውእቱ መስሐቲ ሐሳዌ መሲሕ።

ግብረ ሃዋርያት Acts

፴. ወተፈጺሞ አርብዓ ዓመት አስተርአዮ በገዳም በደብረ ሲና መልአከ እግዚአብሔር በነደ እሳት። ፴፩. ወርኢዮ ሙሴ አንከረ ግርማሁ ወቀርበ ይጠይቆ። ፴፪. ወነበቦ እግዚአብሔር ወይቤሎ፦ አነ ውእቱ እግዚአብሔር አምላከ አበዊከ አምላከ አብርሃም ወአምላከ ይስሐቅ ወአምላከ ያዕቆብ። ወርዕደ ሙሴ ወስእነ ጠይቆ። ፴፫. ወይቤሎ እግዚአብሔር፦ ፍቱሕ አሣእኒከ እምእገሪከ እስመ ምድር ኀበ ትከይድ ቅድስት ይእቲ። ፴፬. ርእየ ርኢኩ ሕማሞሙ ለሕዝብየ ወሰማዕኩ ገዓሮሙ ወወረድኩ አድኅኖሙ። ወይእዜኒ ነዓ እፈኑከ ብሔረ ግብፅ።

ስንክሳር Synaxarium

በዓለ ዕረፍታ ለእግዝእትነ ማርያም
ወኢላርያ ቅድስት
ወጎርጎርዮስ
ወኤርምያስ
ወጳውሎስ መኮንን
ወሲላስ ካህን
ወቀውስጦስ
ወዮሐንስ
ወአባ እስክንድርያ
ወአስተርእዮተ እግዝእትነ በደብረ ማኅው ምስለ ዮሐንስ

መዝሙር Psalm

ወትቀውም ንግሥት በየማንከ፤
በአልባሰ ወርቅ ዑጽፍት ወሑብርት፤
ስምዒ ወለትየ ወርእዪ ወአጽምዒ ዕዝነኪ።

ወንጌል Gospel

፵፮. ወትቤ ማርያም፦ ታዐብዮ ነፍስየ ለእግዚአብሔር። ፵፯. ወትትሐሠይ መንፈስየ በአምላክየ ወመድኀኒየ። ፵፰. እስመ ርእየ ሕማማ ለአመቱ ወናሁ እምይእዜሰ ያስተበጽዑኒ ኵሉ ትውልድ። ፵፱. እስመ ገብረ ሊተ ኀይለ ዐቢያተ ወቅዱስ ስሙ። ፶. ወሣህሉኒ ለትውልደ ትውልድ ለእለ ይፈርህዎ። ፶፩. ወገብረ ኀይለ በመዝራዕቱ ወዘረዎሙ ለእለ ያዐብዩ ሕሊና ልቦሙ። ፶፪. ወነሠቶሙ ለኀያላን እመናብርቲሆሙ ወአዕበዮሙ ለትሑታን። ፶፫. ወአጽገቦሙ በረከቶ ለርኁባን ወፈነዎሙ ዕራቆሙ ለብዑላን። ፶፬. ወተወክፎ ለእስራኤል ቍልዔሁ ወተዘከረ ሣህሎ። ፶፭. ዘይቤሎሙ ለአበዊነ ለአብርሃም ወለዘርኡ እስከ ለዓለም። ፶፮. ወነበረት ማርያም ኀቤሃ መጠነ ሠለስቱ አውራኅ ወእምድኅሬሁ አተወት ቤታ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወጸብዑኒ በከንቱ፤
ዘእምአፍቀሩኒ አስተዋደዩኒ፤
ወአንሰ እጼሊ።

ወንጌል Gospel

፵. ወረፈቁ በበ ምርፋቃቲሆሙ በበ ምእት ወበበ ኀምሳ። ፵፩. ወነሥኦን ለኃምስ ኅብስት ወለክልኤቲ ዓሣት ወነጸረ ሰማየ ወባረከ ወፈተተ ኅብሰተ ወወሀቦሙ ለአርዳኢሁ ያቅርቡ ሎሙ፤ ወከፈሎሙ ለኵሎሙ እምክልኤቲ ዓሣትኒ። ፵፪. ወበልዑ ኵሎሙ ወጸግቡ፤ ፵፫. ወዘአግሐሡ ዘተርፈ ፍተታተ መልአ ዐሠርተ ወክልኤተ መሣይምተ ወእምዓሣሁኒ። ፵፬. ወእለሰ በልዕዎ ለውእቱ ኅብስት ዕደው ኀምሳ ምእት። ፵፭. ወአገበሮሙ ሶቤሃ ለአርዳኢሁ ይዕረጉ ሐመረ ወይቅድምዎ ማዕዶተ ቤተ ሳይዳ እስከ ሶበ ይስዕሮሙ ለሕዝብ። ፵፮. ወፈነዎሙ ወኀለፈ እምህየ ወዐርገ ደብረ ከመ ይጸሊ። ዘቦ እዝን ሰሚዐ ለይስማዕ።

መዝሙረ ዳዊት Psalm

አብርህ ገጸከ ላዕለ ገብርከ፤
ወአድኅነኒ በእንተ ምሕረትከ፤
ወኢይትኀፈር እግዚኦ እስመ ጸዋዕኩከ።

ወንጌል Gospel

፳፭. በውእቱ መዋዕል አውሥአ እግዚእ ኢየሱስ ወይቤ፦ እሴብሐከ አባ እግዚአ ሰማይ ወምድር፤ እስመ ኀባእከ ዘንተ እምጠቢባን ወእማእምራን ወከሠትኮን ለሕፃናት። ፳፮. እወ አባ፥ እስመ ከመዝ ኮነ ሥምረትከ በቅድሜከ። ፳፯. ኵሉ ተውህበኒ እምኀበ አቡየ፥ ወአልቦ ዘያአምሮ ለወልድ ዘእንበለ አብ። ወለአብኒ አልቦ ዘያአምሮ ዘእንበለ ወልድ ወለዘ ፈቀደ ወልድ ይክሥት ሎቱ። ፳፰. ንዑ ኀቤየ ኵልክሙ ሰሩሓን ወጽዉራን ወአነ አዐርፈክሙ። ፳፱. ንሥኡ አርዑትየ ዲቤክሙ ወአእምሩ እምኔየ ከመ የዋህ አነ ወትሑት ልብየ ወትረክቡ ዕረፍተ ለነፍስክሙ። ፴. እስመ አርዑትየ ሠናይ ወጾርየ ቀሊል ውእቱ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲. እንከሰ ጽንዑ በእግዚአብሔር ወበጽንዐ ኀይሉ። ፲፩. ወልበሱ ወልታ እግዚአብሔር በዘትክሉ ተቃውሞቶ ለመናግንተ ሰይጣን። ፲፪. እስመ ቀትልክሙ ኢኮነ ምስለ ዘሥጋ ወደም፥ ዘእንበለ ምስለ መኳንንተ ጽልመት ወአጋንንት እኩያን እለ መትሕተ ሰማይ። ፲፫. ወበእንተዝ ንሥኡ ወልታ እግዚአብሔር ከመ ትክሀሉ ተቃውሞታ ለዕለት እኪት፥ ወከኁ ድልዋነ በኵሉ ከመ ትጽንዑ። ፲፬. ቁሙ እንከ ቀኒተክሙ ሐቌክሙ በጽድቅ ወልበሱ ልብሰ ኀጺን ዘጽድቅ። ፲፭. ተሥኢነክሙ ኀይለ ወንጌል ዘበሰላም። ፲፮. ወምስለዝ ኵሉ ንሥኡ ንዋየ ሐቅል ዘሃይማኖት በዘትክሉ አጥፍኦተ ኵሉ አሕጻሁ ለእኩይ ርሱን። ፲፯. ወንሥኡ ጌራ መድኀኒት ወሰይፈ ዘመንፈስ ቅዱስ ዘውእቱ ቃለ እግዚአብሔር። ፲፰. በኵሉ ጸሎት ወስእለት እንዘ ትጼልዩ በኵሉ ጊዜ በመንፈስ ወምስሌሁ ትግሁ ወተፀመዱ በኵሉ ጸሎት በእንተ ኵሎሙ ቅዱሳን።

ዘካልእ መልእክት Universal Epistle

፬. ወአንትሙሰ እምነ እግዚአብሔር አንትሙ ደቂቅየ ወሞእክምዎ ለእኩይ እስመ የዐቢ ዘሀሎ ምስሌክሙ እምነ ዘውስተ ዓለም ሀሎ። ፭. ወእሙንቱሰ እምነ ዓለም እሙንቱ። ወበእንተ ዝንቱ እምነ ዓለም ይነብቡ ወዓለምኒ ይሰምዖሙ። ፮. ወንሕነሰ እምነ እግዚአብሔር ንሕነ ወዘያአምሮ ለእግዚአብሔር ይሰምዐነ። ወዘኢኮነ እምእግዚአብሔር ኢይሰምዐነ። ወበዝንቱ ናአመራ ለመንፈሰ ጽድቅ ወለመንፈሰ ሐሰት። ፯. አኀዊነ ለንትፋቀር በበይናቲነ እስመ ተፋቅሮ እምነ እግዚአብሔር ውእቱ። ወኵሉ ዘይትፋቀር እምነ እግዚአብሔር ውእቱ ተወልደ ወያአምሮ ለእግዚአብሔር። ፰. ወዘሰ ኢያፈቅር ቢጾ ኢያአምሮ ለእግዚአብሔር፥ እስመ እግዚአብሔር ፍቅር ውእቱ። ፱. ወበዝንቱ ተዐውቀ ፍቅሩ ለእግዚአብሔር ላዕሌነ እስመ ለወልዱ ዋሕድ ፈነዎ ውስተ ዓለም ከመ ንሕዮ በእንቲአሁ። ፲. ወዝንቱ ውእቱ ፍቅሩ ለእግዚአብሔር አኮ ንሕነ ዘአፍቀርናሁ አላ ውእቱ አፍቀረነ ወፈነዎ ላወልዱ ይኅድግ ለነ ኃጣውኢነ። ፲፩. አኀዊነ እመሰ ከመዝ አፍቀረነ እግዚአብሔር ወንሕነኒ ይደልወነ ንትፋቀር በበይናቲነ።

ግብረ ሃዋርያት Acts

፩. ወቦ እለ ወረዱ እምብሔረ ይሁዳ ወመሀርዎሙ ለሕዝበ ወይቤልዎሙ፦ እምከመ ኢትትገዘሩ በሕገ ሙሴ፥ ኢትክሉ ሐይወ። ፪. ወተሀውኩ ሕዝብ ፈድፋደ ወተዋቀሥዎሙ ለጳውሎስ ወለበርናባስ ወመከሩ ከመ ይፈንውዎሙ ለጳውሎስ ወለበርናባስ ወለቢጾሙኒ ኀበ ሐዋርያት ወቀሲሳን እለ በኢየሩሳሌም በእንተዝ ነገር። ፫. ወተፈኒዎሙ እምቤተ ክርስቲያን በጽሑ ፊኒቄ ወሰማርያ ወነገርዎሙ ዘከመ ተመይጡ አሕዛብ ወገብሩ ዐቢየ ፍሥሐ ምስለ ኵሎሙ ቢጾሙ። ፬. ወበጺሖሙ ኢየሩሳሌም ተቀበልዎሙ ቤተ ክርስቲያን ወሐዋርያት ወቀሲሳን ወዜነውዎሙ ኵሎ ዘከመ ገብረ ሎሙ እግዚአብሔር በውስተ አሕዛብ። ፭. ወቦ እለ ተንሥኡ ሕዝበ ፈሪሳውያን ቢጽ እለ አምኑ ወይቤልዎሙ፦ ርቱዕ ይትገዘሩ ወነአዝዞሙ ይዕቀቡ ሕገ ሙሴ። ፮. ወአንገለጉ ሐዋርያት ወቀሲሳን ከመ ይርአዩ ዘይገብሩ በእንተዝ ነገር።

ስንክሳር Synaxarium

እንጦንስ አበ መነኮሳት
ወአባ ሚናስ ኤጲስ ቆጶስ ዘማሩን

መዝሙር Psalm

ጻድቅሰ ከመ በቀልት ይፈሪ፤
ወይበዝኅ ከመ ዘግባ ዘሊባኖስ፤
ትኩላን እሙንቱ ውስተ ቤተ እግዚአብሔር።

ወንጌል Gospel

፭. ወሶበሂ ትጼልዩ ኢትኩኑ ከመ መድልዋን እስመ እሙንቱ ያፈቅሩ በመኳርብት ወውስተ መዓዝነ መራኅብት ቀዊመ ወጸልዮ ከመ ያስተርእዩ ለሰብእ፤ አማን እብለክሙ ኅጕሉ ዕሤቶሙ። ፮. ወአንተሰ ሶበ ትጼሊ ባእ ቤተከ ወዕፁ ኆኅተከ ወጸሊ ለአቡከ ሰማያዊ በኅቡእ፤ ወአቡከ ዘይሬእየከ በኅቡእ የዐሥየከ ክሡተ። ፯. ወእንዘ ትጼልዩ ኢትዘንግዑ ከመ አሕዛብ፥ እስመ ይመስሎሙ በአብዝኆ ንባቦሙ ዘይሰምዖሙ። ፰. ኢትትመሰልዎሙኬ፥ እስመ የአምር አቡክሙ ሰማያዊ ዘትፈቅዱ ዘእንበለ ትስአልዎ። ፱. አንትሙሰ ሶበ ትጼልዩ ከመዝ በሉ፦ አቡነ ዘበሰማያት፥ ይትቀደስ ስምከ፤ ፲. ትምጻእ መንግሥትከ፤ ወይኩን ፈቃደከ በከመ በሰማይ ከማሁ በምድር። ፲፩. ሲሳየነ ዘለለ ዕለትነ ሀበነ ዮም። ፲፪. ኅድግ ለነ አበሳነ ወጌጋየነ፥ ከመ ንሕነኒ ንኀድግ ለዘአበሰ ለነ። ፲፫. ኢታብአነ እግዚኦ ውስተ መንሱት አላ አድኅነነ ወባልሐነ እምኵሉ እኩይ፤ እስመ ዚአከ ይእቲ መንግሥት ኀይል ወስብሐት ለዓለመ ዓለም አሜን። ፲፬. እስመ ለእመ ኀደግሙ ለሰብእ አበሳሆሙ የኀድግ ለክሙኒ አቡክሙ ሰማያዊ አበሳክሙ። ፲፭. ወእመሰ ኢኀደግሙ ለሰብእ አበሳሆሙ አቡክሙኒ ሰማያዊ ኢየኀድግ አበሳክሙ። ፲፮. ወሶበሂ ትጸውሙ፥ ኢትኩኑ ከመ መደልዋን እስመ እሙንቱ ይትመጸለዉ ወይቈጽሩ ገጾሙ ወያማስኑ ከመ ያእምር ሰብእ ከመ ጾሙ፤ አማን እብለክሙ ነሥኡ ዕሤቶሙ። ፲፯. ወአንትሙሰ ሶበ ትጸውሙ ቅብኡ ርእስክሙ ወሕጽቡ ገጸክሙ። ፲፰. ከመ ኢያእምር ሰብእ ከመ ጾምክሙ፥ ዘእንበል አቡክሙ ማእመረ ኅቡአት፥ ወአቡክሙ ዘይሬእየክሙ በኅቡእ የዐስየክሙ ክሡተ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ቃለ እግዚአብሔር ያፀንዖሙ ለኃየላት፤
ወይከሥት አእዋመ፤
ወበጽርሑሰ ኵሉ ይብል ስብሐት።

ወንጌል Gospel

፴፩. እስመ ዘእምላዕሉ መጽአ መልዕልተ ኵሉ ውእቱ፥ ወዘእምድርሰ ምድራዊ ውእቱ ወዘበምድር ይነግር፤ ወዘሰ እምሰማይ መጽአ መልዕልተ ኵሉ ውእቱ። ፴፪. ወበዘርእየ ወበዘሰምዐ ሰማዕተ ይከውን፥ ወስምዖሰ አልቦ ዘይትዌክፎ። ፴፫. ወለዘሰ ተወክፎ ስምዖ ዐተቦ እግዚአብሔር፥ እስመ ጻድቅ ውእቱ። ፴፬. ወዘእግዚአብሔር ፈነዎ ቃለ እግዚአብሔር ይነግር፥ እስመ አኮ በመሥፈርት ዘይሁብ እግዚአብሔር መንፈሶ። ፴፭. አብሰ ያፈቅር ወልዶ ወኵሎ ኵነኔሁ አወፈዮ ውስተ እዴሁ። ፴፮. ዘየአምን በወልድ ቦ ሕይወተ ዘለዓለም ወዘሰ ኢየአምን በወልድ ኢይሬእያ ለሕይወት ዘለዓለም፤ አላ መቅሠፍተ መዓቱ ለእግዚአብሔር ይነብር ላዕሌሁ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

እግዚኦ በኀይልከ ይትፌሣሕ ንጉሥ፤
ወብዙኀ ይትሐሠይ በአድኅኖትከ፤
ፍትወተ ነፍሱ ወሀብኮ።
 

ወንጌል Gospel

፲፭. ወእምዝ ወጺኦሙ ፈሪሳውያን ወተማከሩ ላዕለ እግዚእ ኢየሱስ ከመ ያስሕትዎ በቃሉ። ፲፮. ወፈነዉ ኀቤሁ አርዳኢሆሙ ምስለ ሰብአ ሄሮድስ፤ ወይቤለዎ፦ ሊቅ፥ ናአምር ከመ ራትዕ አንተ ወበጽድቅ ትሜህር ፍኖተ እግዚአብሔር ወኢተሐስብ መነሂ ወኢታደሉ ለገጸ ሰብእ። ፲፯. ንግረነኬ እንከ ዘይረትዐከ? ይብውንሁ ውሂበ ጸባሕተ ዲናር ለንጉሥ ወሚመ ኢይከውንኑ? ፲፰. ወአእሙሮሙ እግዚእ ኢየሱስ እከዮሙ ወይቤሎሙ፦ ምንተ ታሜክሩኒ መድልዋን? ፲፱. አርእዩኒ አላደ ዲናር። ወአምጽኡ ሎቱ ዲናረ። ፳. ወይቤሎሙ እግዚእ ኢየሱስ፦ ዘመኑ ዝንቱ መልክዑ ወመጽሐፉ? ፳፩. ወይቤሎዎ፦ ዘነጋሢ። ወይቤሎሙ፦ ሀቡ ዘነጋሢ ለነጋሢ ወዘእግዚአብሔር ለእግዚአብሔር። ፳፪. ወሰሚዖሙ አንከሩ ወኀደግዎ ወኀለፉ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. እምጳውሎስ ሐዋርያሁ ለኢየሱስ ክርስቶስ በፈቃደ እግዚአብሔር ወበተስፋ ሕይወት እንተ በኢየሱስ ክርስቶስ። ፪. ለጢሞቴዎስ ወልድየ ዘአፈቅር፣ ሰላም ለከ ወሣህል ወጸጋ እግዚአብሔር አቡነ ወእግዚእነ ኢየሱስ ክርስቶስ። ፫. አአኵቶ ለእግዚአብሔር ዘኪያሁ አመልክ በልብ ንጹሕ እምፍጥረትየ ወዘልፈ እዜከረከ በጸሎትየ መዐልተ ወሌሊተ። ፬. ወእፈቱ እርአይከ ወእዜከር አንብዐከ። ፭. ወእትፌሣሕ ተዘኪርየ ሃይማኖተከ ዘአልቦ ኑፋቄ እንተ ኀደረት ላዕለ እምከ አውኒቄ ወእምሔውትከ ሎይድ እፌጽም ፍሥሐየ ወእትአመን ከመ ላዕለከኒ። ፮. ወበእንተዝ እዜከረከ ከመ ይትሐደስ ጸጋሁ ለእግዚአብሔር ዘረከብከ በሢምተ እዴየ ላዕሌከ። ፯. እስመ አኮ መንፈሰ ፍርሀት ዘወሀበነ እግዚአብሔር ዘእንበለ መንፈሰ ኀይል ወንጽሕ ወተፋቅር ወጥበብ። ፰. ወኢትኅፈር እንከ በእንተ ስምዑ ለእግዚእነ ወኢታስተኀፍረኒ ኪያየ ሙቁሑ ዳእሙ ጻሙ ለምህሮ በኀይለ እግዚአብሔር። ፱. ዘአድኀነነ ወጸውዐነ በጽዋዔሁ ቅዱስ፥ ወአኮ በከመ ምግባሪነ ዳእሙ በከመ ፈቃዱ ወጸጋሁ ዘተውህበ ለነ በኢየሱስ ክርስቶስ እምቅድመ ዓለመ። ፲. ወአስተርአየ ይእዜ በምጽአቱ ለእግዚእነ ኢየሱስ ክርስቶስ መድኀኒነ ዘሰዐሮ ለሞት ወአብርሃ ለሕይወት ወለሰሰለ ሙስና በትምህርተ ወንጌሉ።

ዘካልእ መልእክት Universal Epistle

፲፫. ወመኑ ውእቱ ዘእኪተ ይፈቅድ ለክሙ እመ ትቀንኡ ለገቢረ ሠናይ? ፲፬. ወእመሰ በገቢረ ጽድቅ ተሐምሙ ብፁዓን አንትሙ ወዘሰ፦ ይጌርመክሙ ኢትፍርሁ ወኢትደንግፁ። ፲፭. አላ ለእግዚአብሔር ቀድስዎ በኵሉ ልብክሙ ወድልዋኒክሙ ሀልዉ በኵሉ ጊዜ ከመ ታውሥእዎሙ ቃለ ለእለ ይሴአሉክሙ በእንተ ዛቲ ተስፋክሙ። ፲፮. ወበየውሀትክሙ ወበፍርሀተ እግዚአብሔር አሠንዩ ግዕዘክሙ ከመ እመቦ እለ ይሔምዩክሙ ከመ ዘእኩይ ምግባሪክሙ ይትኀፈሩ እለ ይሔምዩክሙ እምሥነ ምግባሪክሙ ዘበእንተ ክርስቶስ። ፲፯. እስመ ይኄይስ እንዘ ሠናየ ትገብሩ ወትፈቅዱ ፈቃዶ ለእግዚአብሔር ትሕምሙ እምነ እንዘ እኪተ ትገብሩ።

ግብረ ሃዋርያት Acts

፩. ወበጽሐ ሀገረ ደርቤን ወልስጥራን ወረከበ አሐደ ረድአ ዘስሙ ጢምቴዎስ። ወእሙሰ አይሁዳዊት ወአምነት ወአቡሁሰ አረማዊ። ፪. ወይንእድዎ ኵሉ ቢጾሙ እለ በልስጥራን ወደርቤን ወኢቆንዮን። ፫. ወአፍቀረ ጳውሎስ ይንሥኦ ምስሌሁ ወይሑር። ወነሥኦ ወገዘሮ በእንተ አይሁድ እለ ውስተ ውእቱ ብሔር እስመ የአምርዎ ኵሎሙ ከመ አረማዊ አቡሁ። ፬. ወሖሩ አህጉረ ወመሀርዎሙ ሥርዓተ ሐዋርያት ዘአዘዙ ኀቢሮሙ በኢየሩሳሌም ምስለ ቀሲሳን። ፭. ወጸንዑ አብያተ ክርስቲያናት በሃይማኖት ወእንተ ጸብሐት ይበዝኁ ሕዝብ። ፮. ወሖሩ ብሔረ ፍርግያ ወብሔረ ገላትይ ወከልኦሙ መንፈስ ቅዱስ ኢይንግሩ ቃለ እግዚአብሔር በእስያ። ፯. ወበጺሖሙ ሚስያ ፈቀዱ ይሑሩ ቢታንያ ወኢያብሖሙ መንፈሱ ለኢየሱስ። ፰. ወኀሊፎሙ እምነ ሚስያ ወረዱ ጢሮአዳ። ፱. ወአስተርአዮ ለጳውሎስ በሌሊት ብእሲ መቄዶናዊ ይቀውም ወያስተበቍዖ ወይቤሎ፦ ኅልፍ እንተ መንገሌነ ለመቄዶንያ ወርድአነ። ፲. ወርእዮ ዘንተ ፈቀድነ ንሑር እንተ መቄዶንያ እስመ መሰለነ ዘጸውዐነ እግዚአብሔር ንመሀሮሙ። ፲፩. ወወፂአነ እምጢሮአዳ ወአፍጠነ ወበጻሕነ ሰሞትራቄ ወበሳኒታ ሖርነ ሀገረ እንተ ስማ ናጱሌ። ፲፪. ወእምህየ ፊልጱስ እንተ ይእቲ ቀዳሚት ዘመቄዶንያ ወይእቲ ሀገር ቆሎንያ። ወነበርነ በይእቲ ሀገር ኅዳጠ መዋዕለ።

ስንክሳር Synaxarium

ጢሞቴዎስ ሰማዕት
ወለሐዊኖስ
ወቴዎድስዮስ ንጉሥ

መዝሙር Psalm

ተንሥእ እግዚኦ አፅምእ ፍትሕየ፤
አምላኪየ ወእግዚእየ ውስተ ቅሥትየ፤
ፍታሕ ሊተ እግዚኦ አምላኪየ በከመ ጽድቅከ።

ወንጌል Gospel

፲፭. ወአእሚሮ እግዚእ ኢየሱስ ተግሕሠ እመህየ ወተለውዎ ብዙኃን ሰብእ ወአሕየዎሙ ለኵሎሙ። ፲፮. ወገሠጾሙ ከመ ኢያግህድዎ። ፲፯. ከመ ይትፈጸም ዘተብህለ በኢሳይያስ ነቢይ እንዘ ይብል፦ ፲፰. ናሁ ወልድየ ዘኀረይኩ ፍቁርየ ዘሠምረት ነፍስየ። ኣነብር መንፈስየ ላዕሌሁ ወኵነኔ ለአሕዛብ ይነግር። ፲፱. ኢይደምፅ ወኢይጸርኅ ወአልቦ ዘይሰምዕ በጽጕ ቃሎ። ፳. ብርዐ ቅጥቁጠ ኢይሰብር ወሱዐ ዘይጠይስ አያጠፍእ እስከ ያገብእ ፍትሐ ለመዊእ። ፳፩. ወበስመ ዚአሁ አሕዛብ ይትአመኑ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወረሰዩ ትእምርቶሙ ትእምርተ ዘኢያእመሩ፤
ከመ ዘውስተ ላዕላይ ፍኖት፤
ወከመ ዕፀወ ገዳም በጕድብ ሰበሩ ኆኃቲሃ።
 

ወንጌል Gospel

፭. ወይቤልዎ ጸሐፍት ወፈሪሳውያን፦ ለምንት ኢየሐውሩ አርዳኢከ በከመ ሠርዑ ረበናት ወዘእንበለ ይትኀፀቡ እደዊሆሙ ይበልዑ እክለ? ፮. ወይቤሎሙ እግዚእ ኢየሱስ፦ ኦ መድልዋን ሠናየ ተነበየ ኢሳይያስ ላዕሌክሙ በከመ ጽሑፍ፦ ዝንቱ ሕዝብ በከናፍሪሆሙ ያከብሩኒ ወበልቦሙሰ ነዋኀ ይርሕቁ እምኔየ። ፯. ወከንቶ ያመልኩኒ ወይሜህሩ ሥርዐታተ ትእዛዛተ ሰብእ። ፰. ወየኀድጉ ትእዛዘ እግዚአብሔር ወየዐቅቡ ትእዛዛተ እጓለ እመሕያው ጥምቀታተ ኰሳኵሳት ወጸሀርታት ወጽዋዓት ወባዕደኒ ብዙኀ ዘይመስሎ ለዝንቱ። ፱. ወይቤሎሙ፦ ርቱዕኑ ትዕልዉ ትእዛዘ እግዚአብሔር ከመ ትዕቀቡ ትእዛዘ ርእስክሙ። ፲. ወሙሴ ይቤለክሙ፦ አክብር አባከ ወእመከ ወዘአሕሠመ ቃለ ላዕለ አቡሁ ወእሙ ሞተ ለይሙት። ፲፩. ወአንትሙሰ ትብሉ፦ ዘይቤሎ ለአቡሁ፦ አው ለእሙ ቍርባን ዘረባሕከ እምኔየ ብሂል። ፲፪. ኢታበውሕዎ ምንተኒ እንከ ይግበር ለአቡሁ ወለእሙ። ፲፫. ወትስዕሩ ቃለ እግዚአብሔር በእንተ ትእዛዝክሙ ዘሠራዕክሙ ወዓዲ ብዙኀ ዘአምሳለ ዝንቱ ዘትገብሩ። ዘቦ እዝን ሰሚዐ ለይስማዕ።