መዝሙረ ዳዊት Psalm

ህየ የሐውራ አሕማር፤
ከይሲ ዘፈጠርከ ይሳለቅ ላዕሌሆሙ፤
ወኵሉ ይሴፎ በኀቤከ።

ወንጌል Gospel

፳፪. ወበሳኒታ ሰብእ እለ ይቀውሙ ማዕዶተ ባሕር ርእዮሙ ከመ አልቦ ህየ ካልእ ሐመር ዘእንበለ አሐቲ ሐመር ወከመሂ ኢዐርገ እግዚእ ኢየሱስ ምስለ አርዳኢሁ ውስተ ሐመር፥ አላ አርዳኢሁ ባሕቲቶሙ ሖሩ። ፳፫. ወመጽኣ ካልኣትኒ አሕማር እምጥብርያዶስ ቅሩበ ብሔር ኀበ በልዑ ኅብስተ ዘባረከ እግዚእነ። ፳፬. ወሶበ ርእዩ እሙንቱ ሰብእ ከመ ኢሀሎ እግዚእ ኢየሱስ ህየ፥ ወኢአርዳኢሁ ዐርጉ ውስተ ውእቶን አሕማር ወበጽሑ ቅፍርናሆም ይኅሥሥዎ ለእግዚእ ኢየሱስ። ፳፭. ወሶበ ረከብዎ በማዕዶተ ባሕር ይቤልዎ፦ ረቢ፥ ማእዜ መጻእከ ወበጻሕከ ዝየ? ፳፮. ወአውሥአ እግዚእ ኢየሱስ ወይቤሎሙ፦ አማን አማን እብለክሙ፥ ከመ አኮ ዘተኀሥሡኒ በእንተ ዘርኢክሙ ተኣምራተ አላ በእንተ ዘበላዕክሙ ኅብስተ ወጸገብክሙ። ፳፯. ተገበሩ እንከሰ አኮ ለመብልዕ ኀላፊ፥ አላ ለመብልዕ ዘይነብር ለሕይወት ዘለዓለም ዘይሁበክሙ ወልደ እጓለ እመሕያው እስመ ለዝሰ እግዚአብሔር አብ ኀትሞ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፩. እምጳውሎስ ወጢሞቴዎስ አግብርተ ኢየሱስ ክርስቶስ ሉኵሉ ቅዱሳን በኢየሱስ ክርስቶስ እለ ሀለዉ ፊልጵስዩስ ምስለ ቀሳውስት ወዲያቆናት። ፪. ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ። ፫. አአኵቶ ለአምላክየ ዘልፈ በኵሉ ተዝካርክሙ። ፬. ወእጼሊ በኵሉ ጊዜ በእንቲአክሙ ወእገብር ጸሎተ ፍሥሓ። ፭. በእንተ ተሳትፎትክሙ ኪያየ በትምህርተ ወንጌል እምቀዳሚት ዕለት እስከ ይእዜ። ፮. እስመ እትአመን ከመ ውእቱ ዘወጠነ ለክሙ ግብረ ሠናየ ውእቱ ይፌጽሞ እስከ ዕለተ ኢየሱስ ክርስቶስ። ፯. እስመ ርቱዕ ሊተ ዘንተ አሐሊ በእንቲአክሙ እስመ ሀሎክሙ ውስተ ልብየ በመቀቅሕትየ ወበቅሥትየ ወበትምህርተ ጽድቅ እስመ ኀበርክሙ ምስሌየ በጸጋ። ፰. ወእግዚአብሔር ሰማዕትየ፥ በመ አፈቅረክሙ በፍቅረ ክርስቶስ። ፱. ወእጼሊ በእንተ ዝንቱ ከመ ይብዛኅ ወይፈድፍድ ተፋቅሮትክሙ በአእምሮ ወበኵሉ ጥበብ። ፲. ከመ ትፍትኑ ወታመክሩ ዘይኄይስ ግብረ ከመ ትኩኑ ቅዱሳን ዘእንበለ ዕቅፍት በዕለተ ክርስቶስ። ፲፩. እንዘ ምሉኣን አንትሙ ፍሬ ጽድቅ በኢየሱስ ክርስቶስ በስብሓተ እግዚአብሔር ወአኰቴቱ።

ዘካልእ መልእክት Universal Epistle

፩. ንዑ ይእዜኒ አብዕልት ወብክዩ እንዘ ትግዕሩ ላዕለ ሕርትምናክሙ እንተ ሀለወት ትምጽአክሙ። ፪. ብዕልክሙኒ ነቅዘ፥ ወአልባሲክሙኒ ቈንቈነ። ፫. ወርቅክሙኒ ወብሩርክሙኒ ዝሕለ ወዛሕሉኒ ስምዐ ይከውን ላዕሌክሙ ወይበልዖ ለሥጋክሙ ከመ እሳት፥ ዛቲ እንተ ገበርክሙ ለደኃሪ መዋዕል። ፬. ናሁ ዐስቦሙ ለገባር ለእለ ሐረስዋ ለምድርክሙ ወሄድክመ ወዐመፅክሙ ዐስቦሙ ወእለኒ ሄድክምዎመ የዐወይዉ ወገዓሮሙኒ ለዓፀድ ቦአ ውስተ እዘኒሁ ለእግዚአብሔር ፀባኦት ወበጽሐ። ፭. ወፈጋዕክሙ ላዕለ ምድር ወአስተትክሙ ወተደለውክሙ ወአስባሕክሙ ልበክሙ ከመ ዘያሰብሕ ላህመ ለዕለተ ጥብሕት። ፮. ወተዓደውክምዎ ወቀተልክምዎ ለጻድቅ ዘእንበለ ይትቃወመክሙ ወኦሆ ይቤሎክሙ።

ግብረ ሃዋርያት Acts

፩. ወይቤሎ አግሪጳ ለጳውሎስ፦ አባሕናከ ንግር በእንተ ርእስከ። ወእምዝ አንሥአ እዴሁ ጳውሎስ ወአኀዘ ይንግሮሙ፤ ፪. ወይቤ፦ በእንተ ኵሉ ዘይትኃሠሡኒ አይሁድ ኦአግሪጳ ንጉሥ ብፁዕ፥ አነ ዮም ዘበኀቤከ እትዋቀሥ። ፫. እስመ ታአምሮሙ ግዕዞሙ ወተኃሥሦቶሙ ለአይሁድ። ብቍዐኒ ተዐጊሠከ አፅምዐኒ። ፬. ንብረትየ ዘበንእስየ በውስተ ሕዝብየ ልህቁ በኢየሩሳሌም። ፭. ወያአምሩኒ ኵሎሙ አይሁድ እምትካት እመሰ ፈቀዱ ይኩኑ ሰምዐ ከመ በሕገ አበውየ እገብር እንዘ ፈሪሳዊ አነ። ፮. ወይእዜኒ በትውክልተ ተስፈ እንተ ቀዲሙ ኮነት እምኀበ እግዚአብሔር ለአበዊነ እቀውም ግሩር ለኵነኔ። ፯. እንተ ባቲ ዐሠርቱ ወክልኤቱ ሕዘበ ዚአነ መዐልተ ወሌሊተ እንዘ ይትቀነዩ ሎቱ ተሰፈዉ በጺሖታ። በእንተ ውእቱ ተስፋ ዘይትኃሠሡኒ አይሁድ ኦንጉሥ አግሪጳ። ፰. ምንተ ትፈትሑ አኮኑ ይደሉ ንእመን ከመ እግዚአብሔር ያሕይዎሙ ለምዉታን?

ስንክሳር Synaxarium

እለእስክንድሮስ
ወእንድራኒቆስ ዲያቆን

መዝሙር Psalm

አጽንዕዋ ለጥበብ ከመ ኢይትመዓዕ እግዚአብሔር፤
ወኢትትሐጐሉ እምፍኖተ ጽድቅ፤
ሶበ ነደት ፍጡነ መዐቱ።

ወንጌል Gospel

፮. ወሰዐርክሙ ቃሎ ለእግዚአብሔሮ በእንተ ሥርዐትክሙ። ፯. ኦ መድልዋን፥ ሠናየ ተነበየ ኢሳይያስ ላዕሌክሙ እንዘ ይብል፦ ፰. ዝሕዝብ በከናፍሪሆሙ ያከብሩኒ ወበልቦሙሰ ነዋኀ ይርሕቁ እምኔየ። ፱. ወከንቶ ያመልኩኒ እንዘ ይሜህሩ ትምህርተ ሥርዐታተ ሰብእ። ፲. ወጸውዖሙ ለሕዝብ ወይቤሎሙ፦ ስምዑ ወለብዉ። ፲፩. ከመ አኮ ዘይበውእ ውስተ አፍ ዘያረኵሶ ለሰብእ፥ አላ ዘይወፅእ እምውስተ አፍ ውእቱ ያረኵሶ ለሰብእ። ፲፪. ወእምዝ ቀሪቦሙ አርዳኢሁ ይቤልዎ፦ ታአምርሁ ከመ ፈሪሳውያን ሰሚዖሙ ቃለከ አንጐርጐሩ? ፲፫. ወአውሥአ ወይቤ፦ ኵሉ ተክል እንተ ኢተከላ አቡየ ሰማያዊ ትሤረው። ፲፬. ኅድግዎሙ፤ ዕዉራን እሙንቱ አምርሕተ ዕዉራን፤ ዕዉር ለዕዉር ለእመ መርሖ ክልኤሆሙ ይወድቁ ውስተ ግብ። ፲፭. ወአውሥአ ጴጥሮስ ወይቤሎ፦ ንግረነ ዘንተ ምሳሌ። ፲፮. ወይቤሎሙ እግዚእ ኢየሱስ፦ ዓዲሁ አንትሙኒ ኢለባውያን አንትሙ። ፲፯. ኢታአምሩኑ ከመ ኵሉ ዘይበውእ ውስተ አፍ ውስተ ከርሥ ይትገመር ወጽመ ይትገደፍ? ፲፰. ወዘሰ ይወፅእ እምውስተ አፍ እምልብ ይወፅእ ወእሙንቱ ይረኵስዎ ለሰብእ። ፲፱. እስመ እምውስተ ልብ ይወፅእ ሕሊና እኩይ ቀቲል ማሕዘን ዝሙት ስርቅ ስምዕ በሐሰት ወፅርፈት። ፳. እሎኬ ዘያረኵስዎ ለሰብእ ወዘእንበለ ተኀፅቦ እደውሰ በሊዕ ኢያረኵሶ ለሰብእ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

እግዚአብሔር መኰንነ ጽድቅ፤
ኃያል ወመስተዓግሥ፤
ወኢያመጽእ መንሱተ ኵሎ አሚረ።

ወንጌል Gospel

፲፬. ወእምድኅረ አኀዝዎ ለዮሐንስ መጽአ እግዚእ ኢየሱስ ገሊላ ወሰበከ ወንጌለ መንግሥተ እግዚአብሔር። ፲፭. ወይቤ፦ በጽሐ ጊዜሁ ወቀርበት መንግሥተ ሰማያት፥ ነስሑ ወእመኑ በወንጌል። ፲፮. ወእንዘ የኀልፍ መንገለ ባሕረ ገሊላ ረከቦሙ ለስምዖን ወለእንድርያስ እኁሁ እንዘ ያሤግሩ ውስተ ባሕር እስመ መሠግራን እሙንቱ። ፲፯. ወይቤሎሙ እግዚእ ኢየሱስ፦ ንዑ ትልዉኒ፥ ወእሬስየክሙ መሠግራነ ሰብእ። ፲፰. ወኀደጉ መሣግሪሆሙ ወተለውዎ ሶቤሃ። ፲፱. ወኀሊፎ እምህየ ሕቀ ረከቦሙ ለያዕቆብ ወለዮሐንስ እኁሁ ደቂቀ ዘብደዎስ ወለሊሁኒ ምስሌሆሙ ውስተ ሐመር ያስተሣንዩ መሣግሪሆሙ። ፳. ወጸውዖሙ ወኀደጉ ዘብዴዎስሃ አባሆሙ ምስለ ዐሳቡ ውስተ ሐመር ወሖሩ ወተለውዎ። ፳፩. ወሖሩ ቅፍርናሆም ወቦአ በሰንበት ምኵራበ ወአኀዘ ይምሀሮሙ። ፳፪. ወአንከርዎ ምህሮቶ እስመ ከመ መኰንን ይሜህሮሙ ወአኮ ከመ ጸሐፍቶሙ። ዘቦ እዝን ሰሚዐ ለይስማዕ።

መዝሙረ ዳዊት Psalm

እስመ ጽልመትኒ ኢይጸልም በኀቤከ፤
ወሌሊትኒ ብሩህ ከመ መዓልት፤
በአምጣነ ጽልመታ ከማሁ ብርሃና።

ወንጌል Gospel

፴፭. ወይቤሎሙ እግዚእ ኢየሱስ፦ ዓዲ ኅዳጠ መዋዕለ ሀሎ ምስሌክሙ ብርሃን። አንሶስዉ እንዘ ብክሙ ብርሃነ ዘእንበለ ይርከብክሙ ጽልመት እስመ ዘየሐውር ውስተ ጽልመት ኢየአምር ኀበ የሐውር። ፴፮. አምጣነ እንዘ ብክሙ ብርሃነ እመኑ በብርሃን ከመ ትኩኑ ውሉደ ብርሃን። ወዘንተ ብሂሎ እግዚእ ኢየሱስ ሖረ ወተኀብኦሙ። ፴፯. ወእንዘ መጠነዝ ተኣምረ ይገብር በቅድሜሆሙ ኢአምኑ ቦቱ። ፴፰. ከመ ይብጻሕ ቃለ ኢሳይያስ ነቢይ ዘይቤ፦ እግዚኦ መኑ የአምነነ ስምዐነ? ወለመኑ ተከሥተ መዝራዕቱ ለእግዚአብሔር? ፴፱. ወበእንተ ዝንቱ ስእኑ አሚነ እስመ ካዕበ ይቤ ኢሳይያስ፦ ፵. ዖሩ አዕይንቲሆሙ ወገዝፋ አልባቢሆሙ ከመ ኢይርአዩ በአዕይንቲሆሙ ወኢይለብዉ በአልባቢሆሙ ወከመ ኢይትመየጡ ወኢይሣሀሎሙ። ፵፩. ወዘንተ ይቤ ኢስይያስ እስመ ርእየ ስብሓቲሁ ወነገረ በእንቲአሁ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፰. ወይእተ አሚረ ይትከሠት ወልደ ዐመፃ ኃጥእ ዘሀለዎ ያጥፍኦ መንፈሱ ለእግዚእነ ኢየሱስ ወይስዕሮ በአስተርእዮተ ምጽአቱ። ፱. ወምጽአቱሰ ለዝንቱ በኀይለ ሰይጣን በኵሉ ኀይል ወትእምርት ወመንክር ዘሐሰት። ፲. ወበኵሉ አስሕቶ ዘኃጢአት ለሕርቱማን እበስመ ኢተወክፉ ፍቅረ ጽድቅ በዘየሐይዉ። ፲፩. ወበእንተዝ ይፌኑ ሎሙ እግዚአብሔር ኀይለ መስሕተ ከመ ይእምኑ በሐሰት። ፲፪. ከመ ይትኰነኑ ኵሎሙ እለ ኢየአምኑ በጽድቅ ወየኀብሩ በዐመፃ። ፲፫. ወንሕነሰ አኀዊነ ርቱዕ ናእኵቶ ለእግዚአብሔር ዘልፈ በእንቲአክሙ እለ አፍቀረክሙ እግዚአብሔር፥ እስመ ኀረየክሙ ወተሣሀለክሙ እግዚአብሔር ርእሰ ሕይወት በተቀድሶ መንፈስ ወበሃይማኖተ ጽድቅ። ፲፬. ዘበእንቲአሁ ጸውዐክሙ በትምህርተ ወንጌል፥ ከመ ትሕየዉ በስብሐቲሁ ለእግዚእነ ኢየሱስ ክርስቶስ። ፲፭. ወይእዜኒ አኀዊነ ቁሙ ወዕቀቡ ትእዛዘ ዘመሀሩክሙ ወሠርዑክሙ ዘበቃልነ ወዘበመጽሐፍነ። ፲፮. ወውእቱ እግዚእነ ኢየሱስ ክርስቶስ ወእግዚአብሔር አቡነ ዘአፍቀረነ ወወሀበነ ፍሥሓ ዘለዓለም ወተስፋ ሠናየ ጸጋሁ። ፲፯. ጸጋሁ ውእቱ ያስተፍሥሕክሙ ልበክሙ ወያጽንዕክሙ በኵሉ ምግባር ወበኵሉ ቃል ሠናይ።

ዘካልእ መልእክት Universal Epistle

፭. ወእሙንቱሰ እምነ ዓለም እሙንቱ። ወበእንተ ዝንቱ እምነ ዓለም ይነብቡ ወዓለምኒ ይሰምዖሙ። ፮. ወንሕነሰ እምነ እግዚአብሔር ንሕነ ወዘያአምሮ ለእግዚአብሔር ይሰምዐነ። ወዘኢኮነ እምእግዚአብሔር ኢይሰምዐነ። ወበዝንቱ ናአመራ ለመንፈሰ ጽድቅ ወለመንፈሰ ሐሰት። ፯. አኀዊነ ለንትፋቀር በበይናቲነ እስመ ተፋቅሮ እምነ እግዚአብሔር ውእቱ። ወኵሉ ዘይትፋቀር እምነ እግዚአብሔር ውእቱ ተወልደ ወያአምሮ ለእግዚአብሔር። ፰. ወዘሰ ኢያፈቅር ቢጾ ኢያአምሮ ለእግዚአብሔር፥ እስመ እግዚአብሔር ፍቅር ውእቱ። ፱. ወበዝንቱ ተዐውቀ ፍቅሩ ለእግዚአብሔር ላዕሌነ እስመ ለወልዱ ዋሕድ ፈነዎ ውስተ ዓለም ከመ ንሕዮ በእንቲአሁ።

ግብረ ሃዋርያት Acts

፴፭. ወጸቢሖ ለአኩ መኳንንት ወዓሊሆሙ እንዘ ይብሉ ፍትሕዎሙ ለእሉ ዕደው ወኅድግዎሙ ይሑሩ። ፴፮. ወሰሚዖ ዐቃቤ ቤተ ሞቅሕ ነገሮሙ ዘነገረ ለጳውሎስ ወለሲላስ ከመ ለአኩ መኳንንት ይኅድግዎሙ፥ ወይቤሎሙ ይእዜኒ፦ ሑሩ በሰላም። ፴፯. ወይቤልዎ ቀሠፉነ ገሃደ ዘአልብነ አበሳ እንዘ ሰብአ ሮሜ ንሕነ ወሞቅሑነ፥ ወይእዜኒ ጽሚተ ያውፅኡነ ይፈቅዱ? አበይነ። ይምጽኡ ለሊሆሙ ያውፅኡነ። ፴፰. ወሖሩ ወነገርዎሙ ወዓልያኒሆሙ ዘንተ ነገረ ለመኳንንት፥ ወፈርሁ ሰሚዖሙ ከመ ሰብአ ሮሜ እሙንቱ። ፴፱. ወመጽኡ ወአስተብቍዕዎሙ ከመ ይፃኡ እምብሔሮሙ። ፵. ወወፂኦሙ እሞቅሕ ቦኡ ቤተ ልድያ ወረከቡ ቢጾሙ ወመሀርዎሙ ወወፅኡ።

ስንክሳር Synaxarium

ፍልሰተ ሥጋሁ ለአባ መቃርስ
ወፊንሐስ

መዝሙር Psalm

በእግዚአብሔር እሴብሕ ቃልየ፤
በእግዚአብሔር ይከብር ዘነበብኩ፤
ወበእግዚአብሔር ተወከልኩ ኢይፈርህ ምንተ ይሬስየኒ ሰብእ።

ወንጌል Gospel

፲፪. ወእምዝ ቀሪቦሙ አርዳኢሁ ይቤልዎ፦ ታአምርሁ ከመ ፈሪሳውያን ሰሚዖሙ ቃለከ አንጐርጐሩ? ፲፫. ወአውሥአ ወይቤ፦ ኵሉ ተክል እንተ ኢተከላ አቡየ ሰማያዊ ትሤረው። ፲፬. ኅድግዎሙ፤ ዕዉራን እሙንቱ አምርሕተ ዕዉራን፤ ዕዉር ለዕዉር ለእመ መርሖ ክልኤሆሙ ይወድቁ ውስተ ግብ። ፲፭. ወአውሥአ ጴጥሮስ ወይቤሎ፦ ንግረነ ዘንተ ምሳሌ። ፲፮. ወይቤሎሙ እግዚእ ኢየሱስ፦ ዓዲሁ አንትሙኒ ኢለባውያን አንትሙ። ፲፯. ኢታአምሩኑ ከመ ኵሉ ዘይበውእ ውስተ አፍ ውስተ ከርሥ ይትገመር ወጽመ ይትገደፍ? ፲፰. ወዘሰ ይወፅእ እምውስተ አፍ እምልብ ይወፅእ ወእሙንቱ ይረኵስዎ ለሰብእ። ፲፱. እስመ እምውስተ ልብ ይወፅእ ሕሊና እኩይ ቀቲል ማሕዘን ዝሙት ስርቅ ስምዕ በሐሰት ወፅርፈት። ፳. እሎኬ ዘያረኵስዎ ለሰብእ ወዘእንበለ ተኀፅቦ እደውሰ በሊዕ ኢያረኵሶ ለሰብእ። ፳፩. ወወፂኦ እግዚእ ኢየሱስ እምህየ፥ ተግሕሠ ውስተ ደወለ ጢሮስ ወሲዶና። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወያዓብይዎ በማኅበረ አሕዛብ፤
ወይሴብሕዎ በመንበረ ሊቃውንት፤
ወረሰዮሙ ለአፍላግ በድወ።

ወንጌል Gospel

፴፱. ወቦ እምፈሪሳውያን እምሕዝብ እለ ይቤልዎ፦ ሊቅ ገሥጾሙ ለአርዳኢከ። ፵. ወአውሥኦሙ ወይቤሎሙ፦ እብለክሙ ለእመ አርመሙ እሉ እላንቱ አእባን ይኬልሑ። ፵፩. ወበጺሖ ርእይ ለሀገር ወበከየ ላዕሌሃ። ፵፪. ወይቤላ፦ ሶበ ታአምሪ ዮም ሰላመኪ አንቲኒ ወባሕቱ እምይእዜሰ ተሰወረ እምአዕይንትኪ። ፵፫. ወይበጽሐኪ መዋዕል አመ የዐግቱኪ ፀርኪ ወይትዐየኑኪ ወየኀጽሩኪ ወያስተጋብኡኪ እምኵልሄ። ፵፬. ወይነፅኁኪ ወለውሉድኪኒ ምስሌኪ ወኢየኀድጉ እብነ ዲበ እብን በውስቴተኪ። እስመ ኢያእመርኪ መዋዕለ ሣህልኪ። ፵፭. ወቦአ ምኵራበ ወሰደደ ኵሎሙ እለ ይሠይጡ ወይሣየጡ በህየ በቤተ መቅደስ፥ ወገፍትአ ማእዳቲሆሙ ለመወልጣን፥ ወመናብርቲሆሙ ለእለ ይሠይጡ ርግበ። ፵፮. ወይቤሎሙ፦ ጽሑፍ ዘይብል፦ ቤትየሰ ቤተ ጸሎት ይሰመይ፥ ወአንትሙሰ ረሰይክምዎ በአተ ፈያት ወሰረቅት። ፵፯. ወኵሎ አሚረ ይሜህሮሙ በምኵራብ ወየኀሥሡ ሊቃነ ካህናት ወጸሐፍት ወሊቃናተ ሕዝብ በዘይቀትልዎ። ፵፰. ወኀጥኡ ዘይሬስይዎ እስመ ኵሎሙ ሕዝብ ይሰቀሉ በአፅምኦቱ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

አንተ ረዳእየ ወኃይልየ፤
ምላእ አፉየ ስብሐቲከ፤
ከመ እሰብሕ አኰቴተከ።

ወንጌል Gospel

፴፬. ወእሙንቱሰ አልቦ ዘለበዉ እንዘ ይብሎሙ ወስዉር ውእቱ ዝነገር እምኔሆሙ። ፴፭. ወእምዝ አልጺቆሙ ኢያሪኮ ሀሎ አሐዱ ዕዉር ይነብር ውስተ ፍኖት ወይስእል። ፴፮. ወሰሚዖ ድምፀ ሰብእ ዘየኀልፍ ይቤ፦ ምንትኑዝ። ፴፯. ወይቤልዎ፦ ኢየሱስ ናዝራዊ የኀልፍ። ፴፰. ወዐውየወ ወይቤ፦ ኢየሱስ ወልደ ዳዊት፥ ተሣሀለኒ። ፴፱. ወገሠጽዎ እለ ይመርሕዎ ከመ ያርምሞ ወዐውየወ ፈድፋደ ወይቤ፦ ወልደ ዳዊት ተሣሀለኒ። ፵. ወቆመ እግዚእ ኢየሱስ ወአዘዘ ያምጽእዎ ኀቤሁ ወበጺሖ ኀቤሁ ይቤሎ፦ ፵፩. ምንተ ትፈቅድ እግበር ለከ? ወይቤሎ፦ እግዚኦ፥ ከመ ይርአያ አዕይንትየ። ፵፪. ወይቤሎ እግዚእ ኢየሱስ፦ ርእይ፥ ሃይማኖትከ አሕየወተከ። ፵፫. ወረአየ ሶቤሃ ወተለዎ ወአእኰቶ ለእግዚአብሔር ወርእዮሙ ኵሉ ሕዝብ ሰብሕዎ ለእግዚአብሔር። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፰. ወእመኒቦ ዘተመካሕኩ ፈድፋደ በሢመትክሙ እንተ ወሀበኒ እግዚአብሔር ለተሐንጾትክሙ ወአኮ ለተነሥቶ ኢይትኀፈር። ፱. ወባሕቱ እምህክ ዘንተ ከመ ኢይምሰሎ ለዘይትሔዘብ ከመ ዘእጌርመክሙ በመጻሕፍትየ። ፲. እስመቦ እምሰብእ ዘይብል፦ እስመ መጻሕፍትሰ ክቡዳት ወዕፁባት፥ ወሀልዎሰ በሥጋ ድኩም ውእቱ ወነገሩሂ ሕጹር። ፲፩. ወባሕቱ ዘንተ ያእምር ዘይብል ዘንተ ነገረ ከመ በቃልነ በውስተ መጻሕፍት አመ ኢሀለውነ ከማሁ በምግባሪነሂ አመ ሀለውነ። ፲፪. ወኢንትኀበል ናጥብዕ ነሐሊ ርእሰነ ለሊነ ከመ እለ ይንእዱ ርእሶሙ በዘአመከሩ ወዐየኑ ለሊሆሙ ወኢያአምሩ ፍካሬሁ ዘለሊሆሙ ይነብቡ። ፲፫. ወንሕነሰ ኢንትሜካሕ ፈድፋደ እምዐቅምነ ዘእንበለ በመሥፈርት ወሕግ ዘዐቀመ ለነ እግዚአብሔር እስከ ንበጽሕ ኀቤክሙ። ፲፬. እስመ እኮ ዘንዌድሰ ርእሰነ ከመ ዘኢበጻሕነ ኀቤክሙ ዳእሙ በጻሕነ ውስተ ትምህርተ ክርስቶስ። ፲፭. ወንሕነሰ ኢንትሜካሕ በዘኢይረትዕ በጻማ ነኪር። ወባሕቱ እሴፎ ትብዛኅ ሃይማኖትክሙ ወትዕበይ በላዕሌክሙ በሕገ ሥርዐትክሙ። ፲፮. ወፈድፋደ ንሜህረክሙ ወአሜሃ የዐቢ ምስሌሁ አምጣንነ። ወንሕነሰ ኢንትሜካሕ በዘኢይረትዕ ወበዘኢድልው። ፲፯. ወዘሰ ይትሜካሕ በእግዚአብሔር ለይትመካሕ። ፲፰. ወአኮ ዳእሙ ዘርእሶ ንእደ ኅሩየ ይከውን፥ አኮኑ ዘእግዚአብሔር ንእዶ ክመ።

ዘካልእ መልእክት Universal Epistle

፲፩. ወኢትትሐመዩ በበይናቲክሙ አኀዊነ፥ እስመ ዘሐመዮ ለካልኡ ሐመዮ ለሕገ እግዚአብሔር ወዘይግእዝ ካልኦ ሕገ እግዚአብሔር ገአዘ። ወእመሰ ሕጎ ትግእዝ ኢኮንከ ገባሬ ሕገ አላ ኮንከ ገኣዚሃ ለሕግ። ፲፪. እስመ አሐዱ ውእቱ ወሃቢሃ ለሕግ ወመኰንና ለሕግ ዘውእቱ ይክል አማስኖሂ ወአድኅኖሂ። አንተኬ ምንትኑ አንተ ዘትግእዞ ለካልእከ? ፲፫. ከመ እለ ይብሉ፦ ዮም አው ጌሠመ ነሐውር ውስተ እንታክቲ ሀገር ወንነብር ውስቴታ ወንትጌበር ወንረብሕ። ፲፬. ወኢይአምሩ ዘይከውን ጌሠመ። ምንትኑመ ሕይወትክሙ? አኮኑ ጢስ አንትሙ ዘለምዕር ያስተርኢ ወእምድኅሬሁ ይማስን። ፲፭. ዘእምትቤሉ፦ እመ ሠምረ እግዚአብሔር ወሐየውነ ንገብር ዘንተ አው ዝክተ። ፲፮. ወይእዜሰ ትትሜክሑ በምግባሪክሙ። ኵሉ ትምክሕት እንተ ከመዝ እኪት ይእቲ። ፲፯. ወዘየአምር ገቢሮታ ለሠናይት ወኢይገብራ ኃጢአተ ትከውኖ።

ግብረ ሃዋርያት Acts

፱. ወሶበ ርእዩ ዘገብረ ዘንተ አምጽኡ ኀቤሁ ኵሎ ድዉያነ ዘውስተ ውእቱ ደሴት ወአሕየዎሙ። ፲. ወአክበሩነ ፈድፋደ ዐቢየ ክብረ ወሶበ ወፃእነ ሥአነቁነ በሑረትነ እምኀቤሆሙ። ፲፩. ወእምድኅረ ሠለስቱ ወርኅ ዐረግነ ዲበ ሐመረ ሰበአ እስክንድርያ ዘከረመ በይእቲ ደሴት ወባቲ ላዕሌሃ ለይእቲ ሐመር ትእምርተ ዲዮስ ቆሮስ ዘውእቱ አምላከ ኖትያት። ፲፪. ወነገድነ ወበጻሕነ ሰራኩስ ወነበርነ ህየ ሠሉሰ መዋዕለ። ፲፫. ወነገድነ እምህየ ወበጻሕነ ለሀገረ ራቅዩን ወበሳኒታ ወፃእነ ወእምድኅረ አሐቲ ዕለት ነፍኀ ነፋስ እምገቦሃ ወወሰደነ ክልኤተ ዕለተ እስከ አብጽሐነ ፑቲዮሉስ እንተ ሀገረ ኢጣሊያ። ፲፬. ወረከብነ በህየ አኀዊነ ወአእተዉነ ወነበርነ ኀቤሆሙ ሰቡዐ መዋዕለ ወእምዝ ሖርነ ወበጻሕነ ሮሜ። ፲፭. ወሶበ ሰምዑ አኀዊነ እለ ሀለዉ ህየ ወወፅኡ ወተቀበሉነ ለምሥያጥ ዘስሙ አፍዩስ ፉሩስ ወእስከ ሠለስቱ ከዋኒት። ወሶበ ርእዮሙ ጳውሎስ አእኰተ እግዚአብሔርሃ ወተጸናዐነ። ፲፮. ወቦእነ ሮሜ ወአብሖ ሐቢ ለጳውሎስ ከመ ይንበር ኀበ ፈቀደ። ወባሕቱ ዐቃቢሁሰ ምስሌሁ።

ስንክሳር Synaxarium

አባ ስላማ ካልእ መተርጉመ መጻሕፍት
ወ፯ ደቂቁ እለ ኖሙ ፫፻፸ወ፪ኤተ ዓመተ

መዝሙር Psalm

ነጽረኒ ወስምዐኒ እግዚኦ አምላኪየ፤
አብርሆን ለአዕይንትየ ከመ ኢይኑማ ለመዊት፤
ወከመ ኢይበሉኒ ጸላእትየ ሞእናሁ።

ወንጌል Gospel

፳፫. ወበይእቲ ዕለት መጽኡ ኀቤሁ ሰዱቃውያን እለ ይብሉ አልቦ ትንሣኤ ምዉታን። ፳፬. ወተስእልዎ እንዘ ይብሉ፦ ሊቅ፥ ሙሴ ይቤ፦ እመቦ ዘሞተ እኁሁ እንዘ አልቦ ውሉደ ያውስብ ብእሲተ እኁሁ ወያቅም ውሉደ ለእኁሁ። ፳፭. ሀለዉ እንከ ኀቤነ ሰብዐቱ አኀው ወዘይልህቅ አውሰበ ወሞተ ወእስመ አልቦ ውሉደ ኀደገ ብእሲቶ ለእኁሁ። ፳፮. ወከማሁ ካልኡኒ፥ ወሣልሱሂ፥ እስከ ሰብዐቲሆሙ። ፳፯. ወድኅረ ኵሎሙ ሞተት ይእቲ ብእሲት። ፳፰. አመ ይትነሥኡ እንከ ምዉታን፥ ለመኑ እምሰብዐቲሆሙ ትከውን ብእሲተ? እስመ ኵሎሙ አውሰብዋ። ፳፱. ወአውሥአ እግዚእ ኢየሱስ ወይቤሎሙ፦ ትስሕቱ በኢያእምሮ መጻሕፍት ወኢኀይለ እግዚአብሔር። ፴. አመሰ የሐይዉ ምዉታን ኢያወስቡ ወኢይትዋሰቡ አላ ከመ መላእክተ እግዚአብሔር በሰማያት እሙንቱ። ፴፩. ወበእንተ ትንሣኤ ምዉታንሰ፥ ኢያንበብክሙሁ ዘተብህለ ለክሙ እምኀበ እግዚአብሔር ዘይቤ፦ ፴፪. አነ እግዚአብሔር አምላከ አብርሃም ወአምላከ ይስሐቅ ወአምላከ ያዕቆብ? አምላከ ሕያዋንኬ ውእቱ ወአኮ አመላከ ምዉታን። ፴፫. ወሰሚዖሙ ሕዝብ አንከሩ ምሂሮቶ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ሰብሕዎ ለእግዚአብሔር ስብሐተ ሐዲሰ፤
ሰብሕዎ ለእግዚአብሔር ኵላ ምድር፤
ሰብሕዎ ለእግዚአብሔር ወባርኩ ለስሙ።

ወንጌል Gospel

፲፩. ወእምዝ እንዘ የሐውር ኢየሩሳሌም ኀለፈ ማእከለ ሰማርያም ወገሊላ። ፲፪. ወእንዘ ይበውእ አሐተ ሀገረ ተቀበልዎ ዐሠርቱ እለ ለምጽ ዕደው እለ ቆሙ እምርሑቅ። ፲፫. ወዐውየዉ ወይቤሉ፦ ኢየሱስ ሊቅ ተሣሀለነ። ፲፬. ወርእዮሙ ወይቤሎሙ፦ ሑሩ ኀበ ካህን ወአፍትኑ ርእሰክሙ፤ ወእንዘ የሐውሩ ነጽሑ። ፲፭. ወርእዮ አሐዱ እምኔሆሙ ከመ ነጽሐ ተመይጠ እንዘ ያአኵቶ ለእግዚአብሔር በዓቢይ ቃል። ፲፮. ወሰገደ ታሕተ እገሪሁ ለእግዚእ ኢየሱስ በገጹ ወአእኰቶ ወሳምራዊ ብእሲሁ። ፲፯. ወአውሥአ እግዚእ ኢየሱስ ወይቤሎ፦ አኮኑ ዐሠርቱ እሙንቱ እለ ነጽሕክሙ? አይቴኑ እንከ ትስዐቱ? ፲፰. ሎሙሰ ተስእኖሙ ተመይጦ ወኣእኵቶ ለእግዚአብሔር ዘእንበለ ዝንቱ ዘካልእ ሕዝቡ? ፲፱. ወይቤሎ፦ ተንሥእ ወሑር፥ ሃይማኖትከ አሕየወተከ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ወንግርዎሙ ለአሕዛብ ስብሐቲሁ፤
ወለኵሎሙ አሕዛብ ተአምሪሁ፤
እስመ ዓቢይ እግዚአብሔር ወብዙኅ አኰቴቱ።

ወንጌል Gospel

፳፬. ወአውሥአ እግዚእ ኢየሱስ ወይቤሎሙ፦ አኮኑ በእንተ ዝንቱ ትስሕቱ፥ በኢያእምሮ መጻሕፍት፥ ወኢኀይለ እግዚአብሔር? ፳፭. አመሰ የሐይዉ ምዉታን ኢይወስቡ ወኢይትዋሰቡ አላ ከመ መላእክተ እግዚአብሔር እሙንቱ በሰማያት። ፳፮. ወከመሰ የሐይዉ ምዉታን ኢያንበብክሙኑ በውስተ መጽሐፈ ሙሴ ዘይቤሎ እግዚአብሔር በኀበ ዕፀ ጳጦስ እንዘ ይብል፦ አነ ውእቱ እግዚአብሔር አምላክከ፥ አምለከ አብርሃም፥ ወአምላከ ይስሐቅ፥ ወአምላከ ያዕቆብ? ፳፯. ኢኮነኬ አምላከ ምዉታን አላ አምላከ ሕያዋን ውእቱ። ወአንትሙሰ ብዙኀ ትጌግዩ። ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፲፰. ወአለቦ ዘያስተአብድክሙ በእንተ ሥጋሁ ለክርስቶስ ፈቀዶ በተየውሆ ወበተናሕስዮ ርእስ ከመ ትትአዘዙ ለሕርመተ መላእክት በዘኢርእየ ወይትሜካሕ በከንቱ በምክረ ሥጋሁ። ፲፱. ወኢያጸንዕ በርእስ ዘቦቱ የኀድር ኵሉ ሥጋ ወይትዋደድ በአሥራው ወመሌሊት ወይልህቅ ወይጸንዕ ወይበዝኅ ወይመልእ በእግዚአብሔር። ፳. ወእመ ሞትክሙ ምስለ ክርስቶስ እምንብረተ ዝዓለም በእፎ ካዕበ ከመ ዘሕያዋን ውስተ ዓለም ትገብሩ። ፳፩. ወይቤሉክሙ፦ ኢትግስስ፥ ወኢትልክፍ፥ ወኢትጥዐም ዘንተ። ፳፪. እስመ ዝንቱ ኵሉ ለሙስና በከመ ትእዛዘ ሰብእ? ፳፫. ዘያመስልዎ ጥበበ በእንተ ትሕትና ልብ ወፍርሀተ እግዚአብሔር። ወኢምሒከ ሥጋ አልቦቱ ክብር ምንተነ። አላ ውእቱ ዘመልዕልተ ሥጋ።

ዘካልእ መልእክት Universal Epistle

፩. እምነ ቀሲስ ለኅሪት ወለእግዝእት ወለደቂቃ ለእንተ አነ አፈቅራ በጽድቅ ወበእንተ ዛቲ ጽድቅ ወአኮ አነ ባሕቲትየ አላ ወእለኒ የአምርዋ ለጽድቅ ኵሎሙ። ፪. ወበእንተ ዛቲ ጽድቅ እንተ ትነብር ኀቤነ ወትሄሉ ምስሌነ፥ ወምስሌነ ይእቲ ለዓለም፥ ወትሄሉ ምስሌነ። ፫. ሞገስ ወምሕረት ወሰላም እምኀበ እግዚአብሔር አብ ወእምኀበ ኢየሱስ ክርስቶስ ወልዱ ለአብ እግዚአብሔር በጽድቅ ወበተፋቅሮ። ፬. ተፈሣሕኩ ጥቀ እስመ ረከብኩ እምደቂቅኪ እለ የሐውሩ በጽድቅ በከመ ነሣእነ ትእዛዞ እምኀበ አብ። ፭. ወይእዜኒ እስእለኪ ኦ እግዝእት ወአኮ ትእዛዘ ሐዲሰ ዘእጽሕፍ ለኪ አላ ትእዛዘ ብሊተ እንተ ብን ትካት ከመ ንትፋቀር በበይናቲነ። ፮. ወዛቲ ይእቲ ተፋቅሮትነ ከመ ንሑር በትእዛዙ፥ ወዛቲ ይእቲ ትእዛዝ ከመ ንሑር በዛቲ እንተ ሰማዕክሙ ትካት። ፯. እስመ ብዙኃን መስሕታን እለ መጽኡ ውስተ ዓለም፥ እለ ኢየአምኑ በኢየሱስ ክርስቶስ ከመ መጽአ በሥጋ። ወዝውእቱ መስሐቲ ሐሳዌ መሲሕ።

ግብረ ሃዋርያት Acts

፲፯. ወእምዝ ተሐገዝነ ወአጽናዕናሃ በአሕባል ወእምዝ ሶበ ፈርሁ ከመ ኢይደቁ ውስተ ልጐተ ባሕር አውረዱ ሥራዓ ወረሰይነ ንሑር ከማሁ። ፲፰. ወበሳኒታ ጸንዓ ላዕሌነ መዋግድ ወገደፍነ አልባሲነ ውስተ ባሕር። ፲፱. ወበሣልስታሂ ገደፍነ ኵሎ ዘውስተ ሐመር ዲበ ባሕር በእደዊነ። ፳. ወነበረ ይዘንም ላዕሌነ ጕንዱየ ዕለተ እንዘ ኢንሬኢ ፀሓየ ወወርኀ ወኢከዋክብተ ወቀበጽነ ሐይወ። ፳፩. ወአልቦ ዘበልዐ መብልዐ እምኔነ፥ ወተንሥአ ጳውሎስ ወቆመ ማእከለ ወይቤሎሙ፦ ሶበ ሰማዕክሙኒ ቀዲሙ አኀውየ ወኢወፃእክሙ እምአቅሬጥስ እምድኅንክሙ እምዝ ሐጕል ወሕማም። ፳፪. ወይእዜኒ እብለክሙ ኢትፍርሁ እስመ አልቦ ዘይትሐጐል አሐዱ ነፍስ እምኔነ ዘእንበለ ዳእሙ ሐመርነ።

ስንክሳር Synaxarium

በዓለ እግዝእትነ ማርያም
ወኄራኒ ሰማዕት

መዝሙር Psalm

አዋልደ ነገሥት ለክብርከ፤
ወትቀውም ንግሥት በየማንከ፤
በአልባሰ ወርቅ ዑጽፍት ወሑብርት።

ወንጌል Gospel

፩. አሜሃ ትመስል መንግሥተ ሰማያት ዐሥሩ ደናግለ እለ ነሥኣ መኃትዊሆን ወወፅኣ ውስተ ቀበላ መርዓዊ። ፪. ወኃምስ እምውስቴቶን አብዳት እማንቱ ወኃምስ ጠባባት። ፫. ወአብዳትሰ ነሢኦን መኃትዊሆን ኢነሥኣ ቅብአ ምስሌሆን። ፬. ወጠባባትሰ ነሥኣ ቅብአ በገማዕይሆን ምስለ መኃትዊሆን። ፭. ወጐንድዮ መርዓዊ ደቀሳ ኵሎን ወኖማ። ፮. ወማእከለ ሌሊት ውውዓ ኮነ፦ ናሁ መርዓዊ መጽአ ፃኡ ውስተ ቀበላሁ። ፯. ወእምዝ ተንሥኣ እልኩ ደናግል ኵሎን ወአሠነያ መኃትዊሆን። ፰. ወእልኩ አብዳት ይቤላሆን ለጠባባት፦ ሀባነ እምቅብእክን እስመ መኃትዊነ ጠፍኣ። ፱. ወአውሥኣሆን ጠባባት እንዘ ይብላ፦ እመቦ ከመ ኢየአክለነ ለነ ወለክን? ሑራ ኀቤሆሙ ለእለ ይሠይጡ ወተሣየጣ ለክን። ፲. ወሐዊሮን ይሣየጣ በጽሐ መርዓዊ ወቦኣ ምስሌሁ እልኩ ድልዋት ውስተ ከብካብ ወተዐጽወ ኆኅት። ፲፩. ወድኅረ መጽኣ እልክቱሂ ደናግል ወይቤላ፦ እግዚኦ፥ እግዚኦ፥ አርኅወነ። ፲፪. ወአውሥኦን ወይቤ፦ አማን እብለክን፥ ከመ ኢያአምረክን። ፲፫. ትግሁኬ እስመ ኢታአምሩ ዕለታ ወሰዓተታ፥ እንተ ባቲ ይመጽእ ወልደ ዕጓለ እመሕያው።ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ስብሐተ እግዚአብሔር ይነግር አፉየ፤
ወኵሉ ዘሥጋ ይባርክ ለስሙ ቅዱስ፤
ለዓለም ወለዓለመ ዓለም።

ወንጌል Gospel

፴፩. ወወፂኦ ውእተ ጊዜ ይቤሎሙ እግዚእ ኢየሱስ፦ ይእዜኬ እንከ ተሰብሐ ወልደ እጓለ እመሕያው ወእግዚአብሔርኒ ተሰብሐ ቦቱ። ፴፪. ወእመሰ እግዚአብሔር ተሰብሐ ቦቱ እግዚአብሔርኒ ይሴብሖ ወሶቤሃ ይሴብሖ። ፴፫. ደቂቅየ ዓዲ ኅዳጠ መዋዕለ ሀሎኩ ምስሌክሙ ወተኀሥሡኒ ወበከመ እቤሎሙ ለእይሁድ፦ ኀበ አነ አሐውር አንትሙ ኢትክሉ መጺአ፥ ወለክሙኒ ይእዜ እነግረክሙ። ፴፬. ወእሁበክሙ ሐዲሰ ትእዛዘ ከመ ትትፋቀሩ በበይናቲክሙ። በከመ አነ አፍቀርኩክሙ ከማሁ አንትሙኒ ተፋቀሩ በበይናቲክሙ። ፴፭. ወበዝንቱ ያአምረክሙ ኵሉ ከመ አርዳእየ አንትሙ እምከመ ተፋቀርክሙ በበይናቲክሙ። ፴፮. ወይቤሎ ስምዖን ጴጥሮስ፦ እግዚኦ፥ አይቴኑ ተሐውር? ወአውሥአ እግዚእ ኢየሱስ ወይቤሎ፦ ኀበሰ አነ አሐውር ኢትክል ተሊዎትየ ይእዜ ወባሕቱ ድኅረሰ ትተልወኒ። ፴፯. ወይቤሎ ጴጥሮስ፦ እግዚኦ፥ በእንተ ምንት ኢይክል ተሊዎተከ ይእዜ? ወአነ ነፍስየ ጥቀ እሜጡ በእንቲአከ። ፴፰. ወአውሥአ እግዚእ ኢየሱስ ወይቤሎ፦ ነፍሰከኑ ትሜጡ በአንቲአየ? አማን አማን እብለከ፥ ኢይነቁ ዶርሆ እስከ ሥልሰ ትክሕደኒ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

ኢይቀሥፍ ወትረ ወኢይትመዓዕ ዘልፈ፤
አኮ በከመ ኃጢአትነ ዘገብረ ለነ፤
ወኢፈደየነ በከመ አበሳነ።

ወንጌል Gospel

፩. ወባሕቱ ዑቁ ምጽዋተክሙ ኢትግበሩ ለዐይነ ሰብእ ከመ ታስተርእዩ ሎሙ፥ ወእመ አኮሰ ዐስበ አልብክሙ በኀበ አቡክሙ ዘበሰማያት። ፪. ወሶበሂ ትገብሩ ምጽዋተክሙ ኢትንፋሑ ቀርነ ቅድሜክሙ በከመ ይገብሩ መደልዋን በመኳርብት ወበአስኳት ወበፍናው ከመ ይትአኰቱ እምኀበ ሰብእ፤ አማን እብለክሙ ኅጕሉ ዕሤቶሙ። ፫. ወአንተሰ ሶበ ትገብር ምጽዋተከ ኢታእምር ጸጋምከ ዘትገብር የማንከ። ፬. ከመ በኅቡእ ይኩን ምጽዋትከ ወአቡከ ዘይሬእየከ በኅቡእ የዓሥየከ ክሡተ። ፭. ወሶበሂ ትጼልዩ ኢትኩኑ ከመ መድልዋን እስመ እሙንቱ ያፈቅሩ በመኳርብት ወውስተ መዓዝነ መራኅብት ቀዊመ ወጸልዮ ከመ ያስተርእዩ ለሰብእ፤ አማን እብለክሙ ኅጕሉ ዕሤቶሙ። ፮. ወአንተሰ ሶበ ትጼሊ ባእ ቤተከ ወዕፁ ኆኅተከ ወጸሊ ለአቡከ ሰማያዊ በኅቡእ፤ ወአቡከ ዘይሬእየከ በኅቡእ የዐሥየከ ክሡተ። ፯. ወእንዘ ትጼልዩ ኢትዘንግዑ ከመ አሕዛብ፥ እስመ ይመስሎሙ በአብዝኆ ንባቦሙ ዘይሰምዖሙ። ፰. ኢትትመሰልዎሙኬ፥ እስመ የአምር አቡክሙ ሰማያዊ ዘትፈቅዱ ዘእንበለ ትስአልዎ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፳፭. ወእፈቅድ ለክሙ አኃዊነ ታእምሩ ዘንተ ምክረ ከመ ኢትበሉ ጠቢባን ንሕነ። እስመ ዑረተ ልብ ረከቦሙ ለእስራኤል መክፈልቶሙ እስከ አመ ይበውኡ ኵሉ አሕዛብ። ፳፮. ወእምዝ የሐይዉ ኵሉ እስራኤል በከመ ይቤ መጽሐፍ፦ እምጽዮን ይወፅእ መድኅን ወየአትት ኃጢአተ እምያዕቆብ። ፳፯. ወቦቱ ይረክቡ ተስፋሆሙ አመ አእተትኩ ኃጢአቶሙ። ፳፰. እመንገለ ወንጌልሰ ፀርነ እሙንቱ በእንቲአክሙ ወእመንገለ ኅሬሰ አኀዊነ እሙንቱ በእንተ አበዊነ። ፳፱. እስመ አልቦ ንስሓ በጸጋ እግዚአብሔር። ፴. በከመ አንትሙ ቀዲሙ ዐለውክምዎ ለእግዘአብሔር ወይእዜሰ ተሣሀለክሙ እስመ ዐለውዎ እሙንቱ። ፴፩. ከማሁ እሙንቱሂ ዐለውዎ ይእዜ ከመ ሎሙኒ ይሣሀሎሙ። ፴፪. እስመ እግዚአብሔር ዘግሖ ለኵሉ ውስተ ኃጢአት ከመ ይሣሀሎ ለኵሉ። ፴፫. ኦ ዕመቂሁ ለብዕለ ጥበቢሁ ወአእምሮቱ ለእግዚአብሔር ወአልቦ አሰር ለፍኖቱ ወአልቦ ዘያአምሮ ለፍትሑ። ፴፬. ወመኑ የአምር ሕሊናሁ ለእግዚአብሔር? ወመኑ ተማከሮ? ፴፭. ወመኑ ለቅሖ ወተፈድዮ? ፴፮. እስመ ኵሉ እምኔሁ ወኵሉ በእንቲአሁ ወኵሉ ቦቱ ወሎቱ ሰብሓት ለዓለመ ዓለም። አሜን።

ዘካልእ መልእክት Universal Epistle

፲፱. ወብነ ዓዲ ዘእምዝኒ ይቀድም ቃለ ነቢያት ዘያዐውቅ ዘንተ፥ ወእምከመ ጥቀ ታሤንዩ ገቢረ ወትኔጽርዎ ይከውንለክሙ ከመ ማኅቶት አንተ ታበርህ ውስተ መካነ ጽልመት እስከ ታበርህ ለክሙ ዕለት ወይሠርቅ ለክሙ ቤዝ ውስተ ልብክሙ ዘያበርህ። ፳. ወዘንተ ባሕቱ ቅድሙ አእምሮ ከመ ኵሉ ተነብዮ ዘውስተ መጽሐፍ አልቦ ላዕሌሁ ፍካሬሁ። ፳፩. ወኢይከውን ተነብዮ ግሙራ እምፈቃደ ሰብእ ወኢእምሥምረተ እጓለ እመሕያው፥ አላ በመንፈስ ቅዱስ ነበቡ ቅዱሳን ሰብእ ተፈኒዎሙ እምእግዚአብሔር።

ግብረ ሃዋርያት Acts

፵፰. ወአኮሰ ዘየኀድር ልዑል ውስተ ግብረ እደ ሰብእ እስመ ከመዝ ይቤ ነቢይ፦ ፵፱. ሰማይኒ መንበርየ ወምድርኒ መከየደ እገርየ፤ አየኑ ቤተ ተሐንጹ ሊተ? ይቤ እግዚአብሔር፦ ወአይኑ መካን ውእቱ መካነ ምዕራፍየ? ፶. አኮኑ እደውየ ገብራ ዝኵሎ? ፶፩. ኦ ጽኑዓነ ክሳድ ወጽሉላነ ልብ ወጽሙማነ እዝን እለ ዘልፈ ተቃወምክምዎ ለመንፈስ ቅዱስ ከመ አበዊክሙ አንትሙሂ። ፶፪. መኑ እምነቢያት ዘኢሰደድዎ ወኢቀተልዎ አበዊክሙ? ወቀተልዎሙ ለእለ አቅደሙ ወዜነውዎሙ በእንተ ምጽአቱ ለጻድቅ ዘአንትሙ ዓሎክምዎ ወቀተልክምዎ። ፶፫. ወነሣአክሙ ኦሪተ በሥርዓተ መላእክት ኢዓቀብክሙ። ፶፬. ወዘንተ ሰሚዖሙ ተምዕዑ ወአብደ ልቦሙ ወሐቀዩ ስነኒሆሙ ላዕሌሁ።

ስንክሳር Synaxarium

ሚክያስ ነቢይ ፩ እምደቂቀ ነቢያት

መዝሙር Psalm

ወገሠጸ ነገሥተ በእንቲአሆሙ፤
ኢትግስሱ መሲሓንየ፤
ወኢታሕሥሙ ዲበ ነቢያትየ።

ወንጌል Gospel

፩. ወተወሊዶ እግዚእ ኢየሱስ በቤተ ልሔም ዘይሁዳ በመዋዕለ ሄሮድስ ንጉሥ፥ ናሁ መጽኡ መሰግላን እምብሔረ ጽባሕ ወበጽሑ ውስተ ኢየሩሳሌም። ፪. እንዘ ይብሉ፦ አይቴ ሀሎ ዘተወልደ ንጉሠ አይሁድ? እስመ ርኢነ ኮከበ ዚአሁ በምሥራቅ ወመጻእነ ከመ ንስግድ ሎቱ። ፫. ወሰሚዖ ሄሮድስ ንጉሥ ደንገፀ ወተሀውከ ወኵላ ኢየሩሳሌሙ ምስሌሁ። ፬. ወአስተጋብኦሙ ሄሮድስ ለኵሎሙ ሊቃነ ካህናት ወጸሐፍተ ሕዝብ ወተስእሎሙ ወይቤሎሙ፦ በአይቴ ይትወለድ ክርስቶስ? ፭. ወይቤልዎ፦ በቤተ ልሔም ዘይሁዳ፥ እስመ ከማሁ ጽሑፍ በነቢይ፦ ፮. ወአንቲኒ ቤተ ልሔም ምድረ ኤፍራታ፥ ኢትቴሐቲ እምነገሥተ ይሁዳ፤ እስመ እምኔኪ ይወፅእ ንጉሥ፥ ዘይርዕዮሙ ለሕዝብየ እስራአል። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ኀቤከ እግዚኦ ጸራሕኩ አምላኪየ ወኢትጸመመኒ፤
እመሰ ተጸመምከኒ እከውን ከመ እለ ይወርዱ ውስተ ግብ፤
ስምዐኒ እግዚኦ ቃለ ስእለትየ ዘጸራሕኩ ኀቤከ።

ወንጌል Gospel

፴፱. ወመሰለ ሎሙ ወይቤሎሙ፦ ይክልኑ ዕዉር ለዕዉር መሪሖቶ? አኮኑ ክልኤሆሙ ይወድቁ ውስተ ግብ? ፵. አልቦ ረድእ ዘየዐቢ እምሊቁ፥ መጠኑ ለኵሉ ይኩን ከመ ሊቁ። ፵፩. ምንተኑ ትኔጽር ሐሠረ ዘውስተ ዐይነ ቢጽከ ወኢትሬኢ ሠርዌ ዘውስተ ዐይንከ? ፵፪. ወእፎ ትክል ብሂሎቶ ለቢጽከ ተዐገሥ እኁየ አውፅእ ሐሠረ እምዐይንከ ወአንተሰ ኢትሬኢ ሠርዌ ዘውስተ ዐይንከ? መድልው፥ አውፅእ ቅድመ ሠርዌ እምዐይንከ ወእምዝ ትኔጽር ታውፅእ ሐሠረ እምዐይነ ቢጽከ። ፵፫. አልቦ ዕፅ ሠናይ ዘይፈሪ እኩየ፥ ወአልቦ ዕፅ እኩይ ዘይፈሪ ሠናየ። ፵፬. ወኵሉ ዕፅ እምፍሬሁ ይትዐወቅ፤ ወኢየአርሩ በለሰ እምአስዋክ፥ ወኢይቀሥሙ አስካለ እምአሜከላ። ፵፭. ኄር ብእሲ እምሠናይ መዝገበ ልቡ ያወፅኣ ለሠናይት፥ ወእኩይሰ ብእሲ እመእኩይ መዝገበ ልቡ ያወፅኣ ለእኪት፤ እስመ እምተረፈ ልብ ይነብብ አፍ። ፵፮. ለምንትኑ እንከ ትብሉኒ፦ እግዚኦ፥ እግዚኦ፥ ወኢትገብሩ ዘእቤለክሙ? ፵፯. ኵሉ ዘይመጽእ ኀቤየ ወይሰምዐኒ ቃልየ ወይገብሮ አርእየክሙ ዘይመስል፤ ፵፰. ይመስል ብእሴ ዘሐነጸ ቤቶ ወከረየ ወአዕመቀ ወሳረረ መሰረቶ ዲበ ኰኵሕ። ወብዙኃን አፍላግ መጺኦሙ ገፍዕዎ ወሓይዝት ለውእቱ ቤት ወስእንዎ አንቀልቅሎቶ እስመ ዲበ ኰኵሕ ተሳረረ። ፵፱. ወዘሰ ይሰምዐኒ ቃልየ ወኢይገብሮ ይመስል ብእሴ ዘሐነጸ ቤቶ መልዕልተ ምድር ዘእንበለ መሰረት፤ ወገፍዕዎ ወሓይዝት ወወድቀ ሶቤሃ ወኮነ ድቀቱ ዐቢየ ለውእቱ ቤት። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ወአግባእከነ ድኅሬነ ኀበ ፀርነ፤
ወተማሰጡነ ጸላእትነ፤
ወወሀብከነ ይብልዑነ ከመ አባግዕ።
 

ወንጌል Gospel

፩. ዘንተ ነገርኩክሙ ከመ ኢትትዐቀፉ። ፪. እስመ እምኵራባቲሆሙ ያወፅኡክሙ ወባሕቱ ትመጽእ ሰዓት ከመ ኵሉ ዘይቀትለክሙ ይመስሎ ከመ ዘመሥዋዕተ ያበውእ ለእግዚአብሔር። ፫. ወዘንተኒ ዘይገብሩ ላዕሌክሙ እስመ ኢየአምርዎ ለአብ ወኢኪያየ። ፬. ወባሕቱ ዘንተሰ ነገርኩክሙ ከመ ትዘከርዎ አመ በጽሐ ጊዜሁ ከመ አነ እቤለክሙ። ወቀዲሙሰ ኢነገርኩክሙ ዘንተ እስመ ሀሎኩ ምስሌክሙ። ፭. ወይእዜሰ ባሕቱ አሐውር ኀበ አብ ዘፈነወኒ። ወኢአሐዱሂ እምኔክሙ ኢትብሉኒ፦ አይቴ ተሐውር? ፮. ወባሕቱ እስመ ዘንተ ነገርኩክሙ ሐዘን መልአ ውስተ ልብክሙ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፩. ወእመኒ አእመርኩ ነገረ ኵሉ ሰብእ ወነገረ ኵሉ መላእክት፥ ወተፋቅሮ አልብየ ኮንኩ ከመ ድምፀ ብርት ዘይነቁ ወእመ አኮ ከመ ከበሮ ዘይዘበጥ። ፪. ወእመኒ ተነበይኩ ወአእመርኩ ኵሎ ዘኅቡእ ወኵሎ ጥበበ ወእመኒ ብየ ኵሉ ሃይማኖት እስከ አፈልስ አድባረ፥ ወተፋቅሮ አልብየ ከንቶ ኮንኩ። ፫. ወእመሂ ወሀብኩ ለምጽዋት ኵሎ ንዋይየ ወዓዲ ሥጋየነ ለውዕየተ እሳት፦ ወተፋቅሮ አልብየ ወአልቦ ዘረባሕኩ። ፬. ተፋቅሮ ያስተዔግሥ፥ ተፋቅሮ ያስተማሕር፥ ተፋቅሮ ኢያስተቃንእ፥ ወኢያስተኃፍር፥ ወኢያስተዔቢ ልበ። ፭. ወኢየኀሥሥ ተድላ ለባሕቲቱ፥ ኢያስተማዕዕ፥ ወኢይሔሊ እኩየ። ፮. ወኢያስተፌሥሕ በግፍዕ፥ ወያስተፌሥሕ በጽድቅ። ፯. በኵሉ ያስተማሕር፥ ወበኵሉ ያስተዔግሥ፥ ወበኵሉ ያስተአምን፥ ወበኵሉ ያስተዌክል። ፰. ተፋቅሮ ለዝሉፉ ኢያስተኃስር ወኢያወድቅ። ወዘሂ ተነበየ ኀላፊ ወይሰዐር፥ ወዘሂ ነበበ በነገረ በሐውርት ኀላፊ፥ ወይትፌጸም ወዘሂ ጠበበ ኀላፊ፥ ወይሰዐር። ፱. እስመ ናአምር ንስቲተ፥ ወንትኔበይ ንስቲተ በበገጹ። ፲. ወአመ በጽሐ ፍጻሜሁ ሎቱ ይሰዐር ውእቱኒ። ፲፩. ወአመሰ ደቂቅ አነ ተናገርኩ ከመ ደቂቅ፥ ወሐለይኩ ከመ ደቂቅ ወመከርኩ ከመ ደቂቅ፥ ወአመሰ ልህቁ ወሰዐርኩ ኵሎ ሕገ ደቂቅ። ፲፪. ወይእዜሰ ተዐውቀኒ ወአስተርአየኒ ክሡተ፥ እስመ በተሐዝቦ ንሬኢ፥ ከመ ዘበመጽሄት፥ ወአሜሃሰ ንሬኢ ገጸ በገጽ፥ ወይእዜሰ አአምር እምአሐዱ ኅብር፥ ወድኅረሰ አአምር ኵሎ ዘከመ ተዐውቀኒ። ፲፫. ወይእዜኒ እሉ ሠለስቱ ዘይነብሩ እሙንቱ፦ ሃይማኖት፥ ወትውክልት፥ ወተፋቅሮ፥ ወእምኵሉ የዐቢ ተፋቅሮ።

ዘካልእ መልእክት Universal Epistle

፲፬. ወምሉእ ውስተ አዕይንቲሆሙ ዝሙት ወኀጢአት እንተ አልባቲ ዘይገሀግሃ። ወይደነግፁ ነፍሰ ሰብእ እለ ስጡሕ ልቦሙ ወትዕግልት ምግባሮሙ ወየኀድጉ መርገመ ለውሉዶሙ። ፲፭. ወስሕትዋ ለፍኖተ ጽድቅ ወተለውዋ ለፍኖተ በለዓም ወልደ ባሶር ዘአፍቀራ ለዐስበ ዐመፃ። ፲፮. ወተዛለፎ ለበለዓም በኀጢአቱ። ዘኢይነብብ አድግ በቃለ እጓለ እመሕያው ተናገረ ወከልኦ ለነቢይ እበዲሁ። ፲፯. እሉ እሙንቱ ዐዘቅት ንጽፍት ወጊሜ ዘነፋስ ይዘርዎ እለ ለደይኒ ጽልመት ዘለዓለም የዐቅብዎሙ። ፲፰. እስመ ዓበይት ጌጋይ ነበቡ ወያደነግፁ በእንተ ፍትወተ ዝሙቶሙ ዘሥጋሆሙ ሰብአ እለ ኅዳጠ አምሰጡ ወገብኡ ውስተ ጌጋይ። ፲፱. እለ ሕገ ግዕዛን ይሜህሩ ወለሊሆሙኒ ቅኑያን ለሕርትምና እስመ ኵሉ ለዘትአዘዘ ውእቱ ይትቀነይ። ፳. እስመ ለእመ ጐዩ እምኃጢአቱ ለዝንቱ ዓለም በአእምሮቱ ለእግዚእነ ወመድኀኒነ ኢየሱስ ክርስቶስ፥ ወገብኡ ዳግመ ወተጸፍሩ ወተቀንዩ ሎቱ ወይከውኖሙ ደኃሪ ጌጋዮሙ እምነ ቀዲሙ ዘየአክዮሙ። ፳፩. እምኀየሶሙ ሶበ ኢያእመርዋ ለፍኖተ ጽድቅ እምያእምርዋ ወይግብኡ ድኅሬሆሙ እምእንተ ተውህበት ሎሙ ትእዛዝ ቅድስት። ፳፪. ወበጽሐቶሙ አምሳል እንተ መሰሉ በጽድቅ እንተ ይቤ፦ ከልብ ገብአ ዲበ ቅያኡ፥ ወሐራውያኒ ተኀፂባ ገብአት ዲበ ጸብር።

ግብረ ሃዋርያት Acts

፴፱. ወጸቢሖ መዐልተ ኢፈለጡ ኖትያት ውስተ ምድር ወኢያአምሩ ዘየሐውሩ። ወባሕቱ ርእዩ አድባረ ደሴት ዘቅሩብ ለሐይቀ ባሕር ወፈቀዱ ያብጽሑ ሐመሮሙ ህየ። ፵. ወመተሩ መልሕቀ ወተኀድጉ ውስተ ባሕር ወአሠነዩ ምቅዋመ ወሰቀሉ ሥራዓ ዘይንእስ በከመ ንፍኀተ ነፋስ ወሖርነ መንገለ ሐይቀ ባሕር። ፵፩. ወተለክአት ሐመር ማእከለ እብን ልዑላት ወባሕሩ ዕሙቅ ወተአኀዘት ወተሰብረት ወተመትረት ገቦሃ ዘድኅር እማገድ ወእምቅድሜሃሰ ኢክህሉ። ፵፪. ወተማከሩ ሠገራት ከመ ይቅትሉ ሙቁሓነ ከመ ኢይጽብቱ ወኢያምሥጡ። ፵፫. ወከልኦሙ ሐቢ እስመ ፈቀደ ያድኅኖ ለጳውሎስ። ወለእለ ያአምሩ ጸቢተ አዘዞሙ ይጽብቱ ወይፃኡ ለሐይቅ። ፵፬. ወእለ ተርፉ ዐደዉ ላዕለ ዕፅ ወስላድው ወካልኣን ዐደዉ በአሕባለ ሐመር። ወወፅኡ ኵሎሙ ወበጽሑ መድረ በዘከመዝ ግብር።

ስንክሳር Synaxarium

፫፻ ሰማዕታት
ወድምያኖስ
ወአብርሃም ሶርያዊ
ወበዓለ እግዝእትነ በዘአፍለሰታ ለዕቆና

መዝሙር Psalm

ወለእመኒ ፈለሱ አድባር ውስተ ልበ ባሕር፤
ደምፁ ወተሐመጉ ማያቲሆሙ፤
ወአድለቅለቁ አድባር እምኀይሉ።

ወንጌል Gospel

፲፰. ወጸቢሖ እንዘ የዐርግ እግዚእ ኢየሱስ ሀገረ ርኅበ። ፲፱. ወርእየ ዕፀ በለስ በመንገድ ወሖረ ኀቤሃ ወአልቦ ዘረከበ ውስቴታ ዘእንበለ ቈጽል ባሕቲቱ። ወይቤላ፦ ኢይኩን እንከ ፍሬ እምውስቴትኪ ለዓለም፤ ወየብሰት በጊዜሃ ይእቲ በለስ። ፳. ወርእዮሙ አርዳኢሁ አንከሩ ወይቤሉ፦ እፎ በጊዜሃ የብሰት በለስ? ፳፩. ወአውሥአ እግዚእ ኢየሱስ ወይቤሎሙ፦ አማን እብለክሙ፥ እመ ብክሙ ሃይማኖተ ወኢትናፍቁ አኮ ከመ ዘበለስ ዘትገብሩ ዓዲ ለዝንቱ ደብር እመ ትብልዎ፦ ተንሥእ ወተወረው ውስተ ባሕር፤ ይትገበር። ፳፪. ወኵሎ ዘስአልክሙ በጸሎት እንዘ ተአምኑ ትነሥኡ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ስምዓኒ ሕዝብየ ወእንግርከ፤
እስራኤል አሰምዕ ለከ፤
እመሰ ሰማዕከኒ ኢይከውነከ አምላከ ግብት።
 

ወንጌል Gospel

፩. ወጸውዖሙ ለዐሠርቱ ወክልኤቱ ሐዋርያት ወወሀቦሙ ኀይለ ወአብሖሙ ላዕለ ኵሉ አጋንንት ወያሕይዉ ድዉያነ። ፪. ወፈነዎሙ ይስብኩ መንግሥተ እግዚአብሔር ወይፈውሱ ድዉያነ ወኵሎ ሕሙማነ። ፫. ወይቤሎሙ፦ ኢትንሥኡ ለፍኖት ወኢበትረ ወኢጽፍነተ ወኢእክለ ወኢወርቀ ወኢክልኤ ክዳናት። ፬. ወቤተ ኀበ ቦእክሙ ህየ ኅድሩ ወኢትፃኡ እምህየ እስከ ተኀልፉ። ፭. ወዘሰ ኢትወክፈክሙ ወፂአክሙ እምይእቲ ሀገር ንግፉ ጸበለ እገሪክሙ ከመ ይኩን ስምዐ ላዕሌሆሙ። ፮. ወወፂኦሙ ዖዱ አህጉረ አድያም ወሰበኩ ወፈወሱ በኵልሄ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።