መዝሙረ ዳዊት Psalm

ተከሉ ወይነ ወዘርኡ ገራውሀ፤
ወገብሩ ማእረረ እክል፤
ባረኮሙ ወበዝኁ ፈድፋደ።

ወንጌል Gospel

፩. ወአኀዘ ይመስል ሎሙ ወይቤሎሙ፦ ብአሲ ተከለ ወይነ ወፀቈኖ ወከረየ ምክያደ ወሐነጸ ማኅፈደ ውስቴቱ ወሤመ ሎቱ ገባረ ወዐቀብተ ወይን ወነገደ። ፪. ወፈነወ ገብሮ ኀበ ዐቀብተ ወይን በጊዜሁ ያምጽእ ሎቱ እምፍሬ ወይኑ። ፫. ወአኀዝዎ ወቀሠፍዎ ወፈነውዎ ዕራቆ። ፬. ወካዕበ ፈነወ ኀቤሆሙ ካልአ ገብሮ፥ ወኪያሁኒ ወገርዎ ወኰርዕዎ ወፈነውዎ አኅሲሮሙ። ፭. ወፈነወ ካልአኒ፥ ወኪያሁኒ ቀተልዎ፥ ወፈነወ ካልአነ አግብርተ ብዙኃነ፥ ቦ ዘቀሠፉ፥ ወቦ ዘቀተሉ። ፮. ወቦቱ አሐደ ወልደ ዘያፈቅር ወፈነዎ ኀቤሆሙ ድኅረ ኵሉ እንዘ ይብል፦ የኀፍርዎ ለወልድየሰ። ፯. ወይቤሉ ገባር ዝንቱ ውእቱ ወራሲ፥ ንዑ ንቅትሎ ወንርከብ ርስቶ። ፰. ወአኀዝዎ ወአውፅእዎ አፍአ እምዐጸደ ወይን ወቀተልዎ። ፱. ምንተ እንከ ይሬስዮሙ ባዕለ ወይኑ? ይመጽእ ወይቀትሎሙ ለእልክቱ ገባር ወይሁብ ወይኖ ለካልኣን። ፲. ወዘኒ ኢያንበብክሙኑ ውስተ መጽሐፍ፦ እብን እንተ መነንዊ ነደቅት ይእቲ ኮነት ውስተ ርእሰ ማዕዘንት። ፲፩. እምኀበ እግዚአብሔር ኮነት ዛቲ ወነካር ይእቲ ለአዕይንቲነ? ፲፪. ወፈቀዱ የአኀዝዎ ወፈርህዎሙ ለሕዝብ እስመ አእመሩ ከመ በእንቲአሆሙ ይቤ ዘንተ አምሳለ ወኀደግዎ ወሖሩ። ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፩. ወአንሰ አኀውየ ኢክህልኩ ምህሮተክሙ ከመ ዘመንፈሳውያን ዘእንበለ ከመ ዘበሕገ ሥጋ ወደም፥ ወከመ ዘለሕፃናት በሃይማኖተ ክርስቶስ። ፪. ሐሊበ ወጋዕኩክሙ ወአኮ መብልዐ ዘአብላዕኩክሙ፥ እስመ ዓዲክሙ ኢጸናዕክሙ፥ በሕግ ዘሥጋ ወደም ሀለውክሙ። ፫. ወእመሰ ትትቃንኡ ወትትጋአዙ፥ አኮኑ ዘሥጋ ወደም አንትሙ ወከመ እጓለ እመሕያው ተሐውሩ? ፬. እስመቦ እምውስቴትክሙ እለ ይብሉ፦ አነ ዘጳውሎስ፥ ወካልእ ይብል፦ አነ ዘአጵሎስ። ፭. ምንትኑ ጳውሎስ ወምንትኑ አጵሎስ? አኮኑ ሰብእ እሙንቱ ወበላዕሌሆሙ አመንክሙ ወለለአሐዱ በከመ ወሀቦ እግዚአብሔር። ፮. አነ ተከልኩ ወአጵሎስ ሰቀየ ወእግዚአብሔር አልሀቀ። ፯. ወይእዜኒ ወኢዘተከለ ወኢዘሰቀየ አልቦ ዘበቍዐ ዘእንበለ ዳእሙ እግዚአብሔር ዘአልሀቀ። ፰. ወዘሂ ተከለ ወዘሂ ሰቀየ አሐዱ እሙንቴ ወኵሎሙ ዐስቦሙ ይነሥኡ በአምጣነ ጻማሆሙ። ፱. እስመ ነኀብር በግብረ እግዚአብሔር ወላእካነ እግዚአብሔር ንሕነ ወአንትሙሰ ሕንጻ እግዚአብሔር አንትሙ።

ዘካልእ መልእክት Universal Epistle

፭. ወከማሁ አንትሙሂ ወራዙት ተኰነኑ ለእለ ይልህቁክሙ ወኵልክሙ ተመሀርዋ ለአትሕቶ ርእስክሙ እስመ፦ እግዚአብሔር ያኀስሮሙ ለዕቡያን ወያከብሮሙ ለእለ ያቴሕቱ ርእሶሙ። ፮. አትሕቱ እንከ ርእስክሙ ታሕተ እዴሁ ለእግዚአብሔር ጽንዕት ከመ ያልዕልክሙ አመ ይሔውጸክሙ። ፯. ወኵሎ ሕሊናክሙ ግድፉ ላዕሌሁ እስመ ውእቱ ይሔሊ በእንቲአክሙ። ፰. ጥበቡ እንከ ወአጥብቡ ልበክሙ እስመ ጸላኢክሙ ጋኔን ይጥሕር ከመ አንበሳ ወየኀሥሥ ዘይውኅጥ። ፱. አጽንዑ ቀዊመ በሃይማኖትክሙ እንዘ ታአምሩ ከመ ሕማሙ ለዝ ዓለም ትረክቦሙ ለኵሎሙ አኀዊክሙ ወአጽንዕዋ ለተፋቅሮ። ፲. ወእግዚአብሔርሰ ዘበኵሉ ክብር ጸውዐክሙ ውስተ ዘለዓለም ስብሐቲሁ በኢየሱስ ክርስቶስ ወሕዳጠ ሐሚመክሙ ውእቱ ይፌጽም ለክሙ ወያጸንዐክሙ ወያሌብወክሙ። ፲፩. ውእቱ ዘሎቱ ስብሐት ወኀይለ ለዓለመ ዓለም አሜን። ፲፪. ምስለ ሰልዋኖስ እኁነ ምእመን በከመ ሐለይኩ ሕዳጠ ጸሐፍኩ ለክሙ እንዘ አስተበቍዐክሙ ወእከውን ስምዐ ከመ በአማን ስብሐቲሁ ለእግዚአብሔር ዛቲ እንተ ባቲ ትቀውሙ። ፲፫. ትኤምኀክሙ ቤተ ክርስቲያን ኅሪት እንተ ውስተ ባቢሎን ወማርቆስ ወልድየ። ፲፬. ተአምኁ በበይናቲክሙ በአምኃ ተፋቅሮ ወተሰናአዉ ኵልክሙ እለ በክርስቶስ ሀሎክሙ። ጸጋ ምስለ ኵልክሙ። መልአት መልእክተ ጴጥሮስ ቀዳሚት። ወስብሐት ለእግዚአብሔር፥ አሜን።

ግብረ ሃዋርያት Acts

፩. ወእምድኅረ ኀልቀ ሀከክ ጸውዐ ጳውሎስ አርዳኢሁ ወመሀሮሙ ወሰዐሞሙ ወወጽአ ወሖረ መቄዶንያ። ፪. ወኀለፈ እንተ ውእቱ በሐውርት ወብዙኀ መሀሮሙ በቃሉ ወእምዝ ሖረ ኤለዳ። ፫. ወነበረ በህየ ሠለስተ አውራኀ ወተማከሩ አይሁድ ዲቤሁ ወፈቀደ ይሑር ብሔረ ሶርያ መከረ ይሠወጥ መቄዶንያ። ፬. ወሖረ ምስሌሁ ሶጴጥሮስ ዘሀገረ ቤርያ ወእምተሰሎንቄ ኦርስጠርኮስ ውሲኮንዱስ ወጋይዮስ ደርቤያዊ ወጢሞቴዎስ። ወእምእስያ ቲኪቆስ ወጥሮፊሞስ። ፭. ወእሙንቱ ሖሩ ቅድሜነ ወጸንሑነ ውስተ ጢሮአዳ። ፮. ወንሕነሰ ነገድነ እምድኅረ ፋሲካ እምፊልጶስ ወበጻሕነ ኀቤሆሙ ውስተ ጢሮአዳ በባሕር በኀምስት ዕለት ወነበርነ ህየ ሰቡዐ መዋዕለ።

ስንክሳር Synaxarium

ተዝካረ ተአምሪሁ ወስደቱ ለሳዊሮስ ሊቀ ጳጳሳት
ወቴክላ ሰማዕት
ወሕርያቆስ

መዝሙር Psalm

በእግዚአብሔር ተወከልኩ እፎ ትብልዋ ለነፍስየ፤
አዐይል ውስተ አድባር ከመ ዖፍ፤
እስመ ናሁ ኃጥአን ወሰቁ ቀስቶሙ።

ወንጌል Gospel

፲. ብፁዓን እለ ይሰደዱ በእንተ ጽድቅ፥ እስመ ሎሙ ይእቲ መንግሥተ ሰማያት። ፲፩. ብፁዓን አንትሙ ሶበ ይሰድዱክሙ ወይዘነጕጉክሙ ወይነቡ ኵሎ እኩየ ላዕሌክሙ እንዘ የሔስዉ በእንቲአየ። ፲፪. ተፈሥሑ ወተሐሠዩ እስመ ብዙኅ ዕሤትክሙ በሰማያት፤ እስመ ከመዝ ይሰደድዎሙ ለነቢያት እለ እምቅድሜክሙ። ፲፫. አንትሙ ውእቱ ጼው ለምድር ወእመሰ ጼው ለስሐ በምንትኑ ይትቄሰምዎ? አልቦኬ እንከ ዘይበቍዕ ዘእንበለ ዘይገድፍዎ አፍኣ ወይከይድዎ ሰብእ በእግሪሆሙ። ፲፬. አንትሙ ውእቱ ብርሃኑ ለዓለም፤ ኢትክል ተከብቶ ሀገር እንተ ተሐንጸት መልዕልተ ደብር። ፲፭. ወኢያኅትዉ ማኅቶተ ከመ ያንብርዋ ታሕተ ከፈር አላ ያነብርዋ ዲበ ተቅዋማ ወታበርህ ለኵሎሙ እለ ውስተ ቤት። ፲፮. ከማሁኬ ይብራህ ብርሃንክሙ በቅድመ ሰብእ ከመ ይርአዩ ምግባሪክሙ ሠናየ ወይሰብሕዎ ለአቡክሙ ዘበሰማያት። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ፍድዮሙ ፍዳሆሙ ለዕቡያን፤
እስከ ማዕዜኑ ኀጥአን እግዚኦ፤
እስከ ማዕዜኑ ይዜኃሩ ኃጥአን።

ወንጌል Gospel

፳፰. ወምንተ ትብሉ? ብእሲ ቦቱ ክልኤተ ውሉደ አኀወ። ወይቤሎ ለቀዳማዊ ወልድየ፦ ሑር፥ ተቀነይ ዮም ውስተ ዐጸደ ወይንየ። ፳፱. ወአውሥአ ወይቤ፦ እንብየ፤ ወእምድኅረዝ ተነስሐ ወሖረ። ፴. ወለካልኡኒ ይቤሎ ከማሁ፤ ወአውሥአ ወይቤ፦ ኦሆ እግዚእየ፤ ወኢሖረ። ፴፩. መኑ እንከ እምክልኤሆሙ ዘገብረ ፈቃደ አቡሁ? ወይቤልዎ፦ ቀዳማዊ። ወይቤሎሙ እግዚእ ኢየሱስ፦ አማን እብለክሙ፥ ከመ መጸብሓውያን ወዘማውያት ይቀድሙክሙ ውስተ መንግሥተ እግዚአብሔር። ፴፪. እስመ መጽአ ኀቤክሙ ዮሐንስ በፍኖተ ጽድቅ ወኢአመንክምዎ፥ ወመጸብሓወያንሰ ወዘማውያት አምንዎ። ወአንትሙሰ ርእየክሙሂ ኢነሳሕክሙ ጥቀ እምድኅረ ለአሚን ቦቱ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ተከልከ ሥረዊሃ ወመልአት ምድረ፤
ወከደነ አድባረ ጽላሎታ፤
ወአዕፁቂሃኒ ከመ አርዘ እግዚአብሔር።

ወንጌል Gospel

፭. አነ ውእቱ ጕንደ ወይን ወአንትሙሂ አዕጹቂሁ። ዘነበረ ብየ ወአነሂ ቦቱ ውእቱኬ ዘይፈሪ ብዙኀ። እስመ ዘእንበሌየሰ አልቦ ዘትክሉ ገቢረ ወኢምንተኒ። ፮. ወእመቦ ዘኢነበረ ብየ ይገድፍዎ አፍአ ከመ ዐጽቅ ይቡስ ወያስተጋብእዎ ወያውዕይዎ በእሳት። ፯. ወእመሰ ነበርክሙ ብየ ወነበረ ቃልየ ኀቤክሙ ወዘፈቀድክሙ ስእሉ ወይከውን ለክሙ። ፰. ወበዝንቱ ይሴባሕ አቡየ እምከመ ብዙኀ ፍሬ ትፈርዩ ወትከውኑኒ አርዳእየ። ፱. ወበከመ አፍቀረኒ አብ ከማሁ አነሂ አፍቀርኩክሙ። ንበሩ በፍቅረ ዚአየ። ፲. ወእመሰ ታፈቅሩኒ ዕቀቡ ትእዛዝየ ወትነብሩ በፍቅረ ዚአየ በከመ ዐቀብኩ አነ ትእዛዞ ለአቡየ ወእነብር በፍቅሩ። ፲፩. ወነገርኩክሙ ዘንተ ከመ የሀሉ ፍሥሓየ ኀቤክሙ ከመ ፍጹመ ይኩን ፍሥሓክሙ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፩. ወአንተሰ ንግር ዘይደልው ለትምህርተ ሕይወት። ፪. ሊቃውንትኒ ይኩኑ ንጹሓነ እምዝሙት ወንቁሃነ ወጠቢባነ። ወኢይናፍቁ በሃይማኖት ይትፋቀሩ ወይለብዉ ወይትዓገሡ። ፫. ልሂቃትሂ ከማሁ ይትቀደሳ ወያሠንያ ግዕዞን ኢያስተሐውራ ነገረ ወኢይትነያ ለስቴ ወኢይሰጠያ ውስተ ስካር ዳእሙ ይገሥጻ ወይምሀራ ሠናየ ትምህርተ ለአንስት ከመ ያንጽሓ ርእሶን። ፬. ወንኡሳትሂ ይፍቅራ አምታቲሆን ወውሉዶን። ፭. ኢይዘምዋ ወይግበራ ሠናየ ወያሠንያ ግዐዞን ወሥርዓተ ቤቶን ወይትአዘዛ ለአምታቲሆን ከመ ኢይፅርፍ አሐዱሂ ላዕለ ቃለ እግዚአብሔር። ፮. ወለወራዙትኒ ገሥጾሙ ያንጽሑ ርእሶሙ ወይኩኑ ጠቢባነ። ፯. ወኩኖሙ አርአያ ለኵሎሙ በምግባረ ሠናይ፥ ወይኩን ነገርከ ወትምህርትከ በንጹሕ። ፰. በሥሩዕ ነገር ዘአልቦ ነውር ዘኢይሜንኖ አሐዱኒ ከመ ይትኀፈር ጸላኢ ወይኅጣእ ዘይነብብ ላዕሌነ ሕሡመ።

ዘካልእ መልእክት Universal Epistle

፰. ወንሕነሰ አኀዊነ ይደልወነ ንትቀበሎሙ ለእለ ከመዝ ከመ ንኩን ሱታፎ ለጽድቅ። ፱. ወጸሐፍኩ ለቤተ ክርስቲያን ወአቅደምኩ ወባሕቱ ዲዮጥራፊስ ዘይፈቅድ ይኩን ሊቀ ላዕሌሆሙ ኢይሰጠወነ። ፲. ወበእንተ ዝንቱ አመ መጻእኩ አነ አዜክር ሎሙ ምግባሮ ዘይገብር እስመ ኢየአክሎ ዘይነብብ ንባበ እኩየ ላዕሌነ እስከ ኢይትቀበሎሙ ለአኀዊነ ወለእለኒ ይፈቅዱ ተቀብሎቶሙ ይከልእ ወያወፅኦሙ እምቤተ ክርስቲያን። ፲፩. ኦእኁየ ኢትኩን ከመ ገባሬ እኪት አላ ከመ ገባሬ ሠናይት እስመ ገባሬ ሠናይት እምእግዚአብሔር ውእቱ ወገባሬ እኪትሰ ኢይሬእዮ ለእግዚአብሔር። ፲፪. ወበእንተኒ ድሜጥሮስ ስምዐ ኮነ ኵሉ ወለሊሃኒ ጽድቅ፥ ወንሕነኒ ስምዐ ኮነ ሎቱ ወታአምሩ ከመ ርትዕት ይእቲ ስምዕነ። ፲፫. ወብዙኅ ብየ ዘእጽሕፍ ለከ አላ ኢይፈቅድ በማየ ሕመት ወበቀለም እጽሕፍ ለከ። ፲፬. አላ እትአመን ባሕቱ ከመ ፍጡነ እሬእየከ ወእትናገረከ አፈ በአፍ። ፲፭. ሰላም ለከ ወይኤምኁከ አኀዊነ ወአምኅ ቢጸነ በበአስማቲሆሙ። መልአት መልእክተ ዮሐንስ ሣልሲት። ወስብሐት ለእግዚአብሔር፥ አሜን።

ግብረ ሃዋርያት Acts

፩. ወይቤሎ ሊቀ ካህናት፦ አማንኑ ከመዝ ትቤ? ፪. ወይቤ፦ ስምዑ አኃዊነ ወአበዊነ። አምላከ ስብሐት አስተርአዮ ለአቡነ አብርሃም እንዘ ሀሎ በማእከለ አፍላግ ዘሶርያ ዘእንበለ ይፍልስ ካራን። ፫. ወይቤሎ፦ ፃእ እምብሔርከ ወእምአዝማዲከ ወነዓ ውስተ ብሔር ዘአነ አርእየከ። ፬. ወእምዝ ወፂኦ እምከልዴዎን ነበረ ውስተ ካራን ወእምዝ መዊቶ አቡሁ አፍለሶ ውስተ ዛሀገር ኀበ ሀለውክሙ አንትሙ ይእዜ ትነብሩ። ፭. ወኢወሀቦ በውስቴታ ርስቶ ወኢመጠነ ምክያደ እግር ወባሕቱ አስፈዎ የሀቦ ኪያሃ ይኰንና ውእቱ ወዘርዑ እምድኅሬሁ እንዘ አልቦ ውሉደ ይእተ አሚረ። ፮. ወከመዝ ይቤሎ እግዚአብሔር፦ ሀለዉ ዘርእከ ይነብሩ ፈላስያን ብሔረ ነኪር ወይትቀነዩ ሎሙ ወያሐምምዎሙ አርብዐተ ምእተ ዓመተ። ፯. ወለሕዝብሰ እለ ይቀንይዎሙ አነ እኴንኖሙ ይቤ እግዚአብሔር ወእምዝ ይወፅኡ ወያመልኩኒ በዝ ብሔር።

ስንክሳር Synaxarium

አባ ስምዖን ሊቀ ጳጳሳት
ወማርያም እህተ አልዓዛር
ወጊዮርጊስ ሐዲስ
ወጎርጎርዮስ ዘአርማንያ
ወታኦድራ ቅድስት
ወካልአን ሰማዕት

መዝሙር Psalm

ወይሰግዳ ሎቱ አዋልደ ጠሮስ በአምኃ፤
ወለገጽኪ ይትመሀለሉ ኵሎሙ አሕዛብ ብዑላነ ምድር፤
ኵሉ ክብራ ለወለተ ንጉሥ ሐሴቦን።

ወንጌል Gospel

፴፰. ወእምዝ ሐዊሮሙ ቦኡ አሐተ ሀገረ ወተቀበለቶ አሐቲ ብእሲት በቤታ እንተ ስማ ማርታ። ፴፱. ወስመ እኅታ ማርያም እንተ ነበረት ኀበ እገሪሁ ለእግዚእ ኢየሱስ ወሰምዐቶ ነገሮ። ፵. ወማርታሰ ትሰርሕ በአስተደልዎ ብዙኀ፤ ወቆመት ወትቤሎ፦ እግዚእየ ኢያጽህቀከኑ ዘተኀድገኒ እኅትየ ባሕቲትየ አስተዳሉ? በላኬ ታርድአኒ። ፵፩. ወአውሥአ እግዚእ ኢየሱስ ወይቤላ፦ ማርታ፥ ማርታ፥ ትሰርሒ ብዙኀ ታስተዳልዊ። ፵፪. ወኅዳጥ የአክል፥ ወእመአኮ አሐቲ መክፈልት፥ ወማርያምሰ መክፈልተ ሠናየ ኀርየት፥ ላቲ ዘአልቦ ዘየሀይዳ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ዓፀደ ወይን አፍለስከ እምግብጽ፤
ሰደድከ አሕዛበ ወተከልከ ኪያሃ፤
ወፄሕከ ፍኖተ ቅድሜሃ።

ወንጌል Gospel

፭. አነ ውእቱ ጕንደ ወይን ወአንትሙሂ አዕጹቂሁ። ዘነበረ ብየ ወአነሂ ቦቱ ውእቱኬ ዘይፈሪ ብዙኀ። እስመ ዘእንበሌየሰ አልቦ ዘትክሉ ገቢረ ወኢምንተኒ። ፮. ወእመቦ ዘኢነበረ ብየ ይገድፍዎ አፍአ ከመ ዐጽቅ ይቡስ ወያስተጋብእዎ ወያውዕይዎ በእሳት። ፯. ወእመሰ ነበርክሙ ብየ ወነበረ ቃልየ ኀቤክሙ ወዘፈቀድክሙ ስእሉ ወይከውን ለክሙ። ፰. ወበዝንቱ ይሴባሕ አቡየ እምከመ ብዙኀ ፍሬ ትፈርዩ ወትከውኑኒ አርዳእየ። ፱. ወበከመ አፍቀረኒ አብ ከማሁ አነሂ አፍቀርኩክሙ። ንበሩ በፍቅረ ዚአየ። ፲. ወእመሰ ታፈቅሩኒ ዕቀቡ ትእዛዝየ ወትነብሩ በፍቅረ ዚአየ በከመ ዐቀብኩ አነ ትእዛዞ ለአቡየ ወእነብር በፍቅሩ። ፲፩. ወነገርኩክሙ ዘንተ ከመ የሀሉ ፍሥሓየ ኀቤክሙ ከመ ፍጹመ ይኩን ፍሥሓክሙ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

እግዚኦ ስብሐተ ሐዲሰ እሴብሐከ፤
ወበመዝሙር ዘዓሠርቱ አውታሪሁ እዜምር ለከ፤
ዘይሁቦሙ ለነገሥት መድኃኒተ።

ወንጌል Gospel

፳፬. ወበጺሖሙ ቅፍርናሖም መጽኡ እለ ጸባሕተ ዲናር ይነሥኡ ኀበ ጴጥሮስ ወይቤልዎ፦ ሊቅክሙሰ ኢይሁብኑ ጸባሕተ? ፳፭. ወይቤ፦ እወ። ወበዊኦ ውስተ ቤት አቅደመ እግዚእ ኢየሱስ ብሂሎቶ፦ ምንተ ትብል ስምዖን? ነገሥተ ምድር እምኀበ መኑ ይነሥኡ ጸባሕተ ወጋዳ? እምኀበ ውሉዶሙኑ ወሚመ እምኀበ ነኪር? ፳፮. ወይቤ፦ እምኀበ ነኪር። ወይቤሎ እግዚእ ኢየሱስ፦ እንጋ አግዓዝያንኑ እሙንቱ ውሉዶሙ። ፳፯. ወባሕቱ ከመ ኢያንጐርጕሩ፥ ሑር ውስተ ባሕር ወደይ መቃጥነ ወዘቀዳሜ አሥገርከ ዓሣ፥ ንሣእ ወክሥት አፋሁ ወትረክብ ዲናረ ስጥጢራ። ኪያሁ ንሣእ ወሀቦሙ ሊተሂ ወለከ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ለኵሉ ነፍስ መኰንን ተኰነኑ እስመ ኢይሠየም መኰንን ዘእንበለ እምኀበ እግዚአብሔር ወእምከመሰ እምኀበ እግዚአብሔር ውእቱ ኵሉ ብዉሕ ሎቱ። ፪. ወዘሰ አበየ ተኰንኖ ለመኰንን ትእዛዘ እግዚአብሔር አበየ። ወእለሰ አበዩ ተኰንኖ ኵነኔ ያመጽኡ ለርእሶሙ። ፫. ወመኳንንትሰ ኢኮኑ ግሩማነ ለዘይገብር ሠናየ ዘእንበለ ለዘእኩይ ምግባሩ። ወእመሰ ትፈቅድ ኢትፍርሆሙ ለመኳንንት? ግበር ሠናየ ወዓዲ እሙንቱ ያአኵቱከ። ፬. እስመ ላእካነ እግዚአብሔር እሙንቱ ከመ አንተ ታሠኒ ምግባሪከ ወእመሰ ፈቀድከ ኢትፍራህ ግበር ሠናየ። ወዘአኮ ለከንቱ አኰነንዎሙ መጥባሕተ እስመ ላእካኑ እሙንቱ ከመ ይትበቀልዎ ለገባሬ እኪት። ፭. ወይእዜኒ በግብር ተኰነኑ። ወአኮ ዳእሙ ዘእኩይ ዓዲ ዘሠናይኒ ምግባሩ። ፮. ወበእንተዝ ታገብኡ ሎሙ ጸባሕተ። እስመ ላእካነ እግዚአብሔር እሙንቱ ወለዝ ግብር ተሠይሙ። ፯. ወለኵሉ በዘይረትዕ ግበሩ። ወለዘሂ ጸባሕተ ጸብሑ ወለዘሂ ብነተ በንቱ። ወለዘሂ ፍርሃተ ፍርሁ። ወለዘሂ ክብረ አክብሩ። ፰. ወአልቦ ዘይበቍዐክሙ ዘእንበለ አፍቅሮ ቢጽክሙ። ወዘሰ አፍቀረ ቢጾ ኵሎ ሕገ ፈጸመ ገቢረ።

ዘካልእ መልእክት Universal Epistle

፲፮. ወኩኑ ከመ አግዓዝያን ወአኮ ከመ እለ ቦሙ ጌጋይ ዘእኩይ፥ ወአንትሙሰ ከመ አግብርተ እግዚአብሔር። ፲፯. ኵሎ አክብሩ፥ ወቢጸክሙኒ አፍቅሩ፥ ወለእግዚአብሔርኒ ፍርህዎ፥ ወለንጉሥኒ አክብርዎ። ፲፰. ወአንትሙኒ ነባሪ ተኰነኑ ለአጋእዝቲክሙ እንዘ ትፈርሁ ወአኮ ዳእሙ ለኄራን ወለመሓርያን አላ ለእኩያንኒ። ፲፱. እስመ ጸጋ እግዚአብሔር ትትወሀብ ለዘበእንተ ሠናይ ምግባሩ ይትዔገሣ ለሐዘን እንዘ የሐምም በግፍዕ። ፳. ወምንትኑመ ይእቲ አኰቴትክሙ እመ እንዘ ትኤብሱ ትትዔገሡ መቅሠፍተክሙ? አላ እንዘ ሠናየ ትገብሩ እመ ተዐገሥክሙ ግፍዐክሙ ዛቲ አኰቴት ይእቲ በኀበ እግዚአብሔር። ፳፩. እስመ ወበአንተ ዝንቱ ተጸዋዕክሙ እስመ ክርስቶስኒ በእንቲአክሙ ሐመ ይኅድግ ለክሙ ማዕተቦ ከመ ትትልዉ አሰረ ዚአሁ። ፳፪. በከመ ውእቱ ኢገብረ ኃጢአተ፦ ወኢተረክበ ሐሰት ውስተ አፉሁ። ፳፫. እንዘ ይጼእልዎ ኢጸአለ ወእንዘ ያሐምምዎ ኢተቀየመ። አላ አግብአ ለዘይኴንን ጽድቀ። ፳፬. ወበእንተ ኃጣውኢነ ውእቱ ተሰቅለ ዲበ ዕፅ በሥጋሁ ከመ ያውፅአነ እምኃጣውኢኒ ወበጽድቁ ያሕይወነ፥ እስመ በቍስለ ዚአሁ ሐየውክሙ ቍስለክሙ እንዘ ከመ አባግዕ ትሳኰዩ። ፳፭. ወይእዜኒ ግብኡ ኀበ ኖላዊክሙ ወዐቃቢሃ ለነፍስክሙ።

ግብረ ሃዋርያት Acts

፲. ወሀሎ አሐዱ ብእሲ በሀገረ ደማስቆ ዘእምውስተ አርድእት ዘስሙ ሐናንያ ወአስተርአዮ እግዚእነ በራእይ ወይቤሎ፦ ሐናንያ። ወይቤ፦ ነየ እግዚኦ። ፲፩. ወይቤሎ እግዚእነ፦ ተንሥእ ወሑር ስኰተ እንተ ይብልዋ ርትዕት ወኅሥሥ በቤተ ይሁዳ ዘስሙ ሳውል ዘሀገረ ጠርሴስ እስመ ውእቱ ናሁ ይጼሊ። ፲፪. ወእንዘ ይጸሊ አስተርአዮ ብእሲ ዘስሙ ሐናንያ ቦአ ኀቤሁ ወወደየ እዴሁ ዲቤሁ ከመ ይርአይ። ፲፫. ወአውሥአ ሐናንያ ወይቤ፦ እግዚኦ፥ ሰማዕኩ በእንተ ውእቱ ብእሲ በኀበ ብዙኃን ኵሎ ዘይገብር እኩየ ዲበ ቅዱሳኒከ በኢየሩሳሌም። ፲፬. ወዝየኒ አስተበዊሖ በኀበ ሊቀ ካህናት መጽአ ከመ ይሞቅሖሙ ለኵሎሙ እለ ይጼውዑ ስመከ። ፲፭. ወይበሎ እግዚእነ፦ ሑር፥ እስመ ንዋየ ኅሩየ ረሰይክዎ ሊተ ከመ ይጹር ስምየ በቅድመ አሕዛብ ወነገሥት ወደቂቀ እስራኤል። ፲፮. ወአነ አርእዮ መጠነ ሀለዎ ይሕምም በእንተ ስምየ። ፲፯. ወሶቤሃ ሖረ ሐናንያ ወቦአ ቤቶ ወወደየ እዴሁ ዲቤሁ፥ ወይቤሎ፦ ሳውል እኁየ፥ እግዚእነ ኢየሱስ ክርስቶስ ፈነወኒ ኀቤከ ዘአስተርአየከ በፍኖት እንዘ ትመጽእ ከመ ትርአይ ወይምላእ መንፈስ ቅዱስ ላዕሌከ። ፲፰. ወሶቤሃ ተሥዕዓ እምአዕይንቲሁ ከመ ዘሳሬት ወተከሥታ አዕይንቲሁ ወርእየ ሶቤሃ። ወተንሥአ ወተጠምቀ። ፲፱. ወበልዐ እክለ ወጸንዐ። ወነበረ ደማስቆ ኅዳጠ መዋዕለ ምስለ አርድእት። ፳. ወሰበከ በጊዜሃ በምኵራባት ወመሀረ በእንተ ኢየሱስ ክርስቶስ እንዘ ይብል ውእቱ ወልደ እግዚአብሔር።

ስንክሳር Synaxarium

አብርሃ ወአጽብሃ ነገሥተ ኢትዮጵያ
ወባኮስ ቢጹ ለሰርጊስ
ወገብረ ክርስቶስ
ወሐናንያ ፩እም ፸ወ፪ አርድእት

መዝሙር Psalm

ኢትዮጵያ ታበጽሕ እደዊሃ ኀበ እግዚአብሔር፤
ነገሥተ ምድር ሰብሕዎ ለእግዚአብሔር፤
ወዘምሩ ለአምላክነ።

ወንጌል Gospel

፴፮. ወእምዝ ኀዲጎ አሐዛበ ቦአ ውስተ ቤት፥ ወቀርቡ ኀቤሁ አርዳኢሁ እንዘ ይብልዎ፦ ፈክር ለነ ምሳሌ ዘክርዳደ ገራህት። ፴፯. ወአውሥአ ወይቤሎሙ፦ ዘይዘርዕ ሠናየ ዘርዐ ወልደ እጓለ እመሕያው ውእቱ። ፴፰. ወገራህቱኒ ዓለም ውእቱ፤ ወሠናይኒ ዘርዕ ውሉደ መንግሥት እሙንቱ፤ ወክርዳድኒ ውሉዱ ለእኩይ። ፴፱. ወፀራዊኒ ዘዘርዖሙ ዲያብሎስ ውእቱ፤ ወማእረርኒ ኅልቀተ ዓለም ውእቱ፤ ወዓፀድኒ መላእክት እሙንቱ። ፵. ከመኬ የአርይዎ ለክርዳድ ወበእሳት ያውዕይዎ፥ ከማሁ ይከውን በኅልቀተ ዓለም። ፵፩. ይፌንዎሙ ወልደ እጓለ እመሕያው ለመላእክቲሁ ወየአርዩ እመንግሥቱ ኵሎ ዐላውያነ ወእለ ያገብሩ አበሳ። ፵፪. ወይወድይዎሙ ውስተ እቶነ እሳት፤ ወበህየ ይከውን ብካይ ወሐቂየ ስነን። ፵፫. አሜሃ ይበርሁ ጻድቃን ከመ ፀሓይ በመንግሥተ አቡሆሙ። ዘቦ እዘነ ሰሚዐ ይስማዕ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ብፁዓን እለ ተኀድገ ሎሙ ኃጢአቶሙ፤
ወእለ ኢሐሰበ ሎሙ ኵሎ ጌጋዮሙ፤
ብፁዕ ብእሲ ዘኢኇለቈ ሎቱ እግዚአብሔር ኃጢአቶ።

ወንጌል Gospel

፳፪. ወአውሥአ እግዚእ ኢየሱስ ወይቤሎሙ፦ ሃይማኖተ እግዚአብሔር ርከቡ። ፳፫. ወአማን እብለክሙ፥ ለእመ ትቤልዎ ለዝደብር፦ ተንሥእ ወተወረው ውስተ ባሕር፥ ወኢናፈቅሙ በልብክሙ ወተአመንክሙ፥ ከመ ዘነበብክሙ ይከውን ወትረክቡ። ፳፬. ወበእንተ ዝንቱ እብለክሙ፥ ኵሎ ዘጸለይክሙ ወዘሰአልክሙ እንዘ ትትአመኑ ከመ ትረክቡ ወይከውነክሙ። ፳፭. ወሶበሂ ትጼልዩ ኅድጉ ለቢጽክሙ ዘተሓየስክምዎ ከመ ይኅድግ ለክሙ አቡክሙ ዘበሰማያት አበሳክሙ። ፳፮. ወእመሰ አንትሙ ኢኀደግሙ፥ አቡክሙኒ ሰማያዊ ኢየኀድግ ለክሙ አበሳክሙ። ዘቦ እዝን ሰሚዐ ለይስማዕ።

መዝሙረ ዳዊት Psalm

ንሕነሰ ሕዝቡ ወአባግዐ መርዔቱ፤
ባኡ ውስተ አናቅጺሁ በተጋንዮ፤
ወውስተ አዕፃዲሁ በስብሐት እመንዎ።

ወንጌል Gospel

፩. አማን አማን እብለክሙ ዘኢቦአ እንተ አንቀጽ ውስተ ዐጸደ አባግዕ ወዐርገ እንተ ካልእ ገጽ ሰራቀ ውእቱ ወጕሕልያ። ፪. ወዘሰ እንተ አንቀጽ ይበውእ ኖላዌ አባግዕ ውእቱ። ፫. ወሎቱሰ ዐጻዊኒ ያርኅዎ ወአባግዕኒ ይሰምዓሁ ቃሎ። ወይጼውዖን ለአባግዒሁ በበ አስማቲሆን ወያወፍሮን። ፬. ወሶበ አውፈሮን ለኵሎን የሐውር ቅድሜሆን ወይተልዋሁ አባግዒሁ እስመ ያአምራ ቃሎ። ፭. ወለነኪርሰ ኢይተልዋሁ አላ ይጐይያ እምኔሁ እስመ ኢያአምራ ቃሎ ለነኪር። ፮. ዘንተ ምሳሌ ይቤሎሙ እግዚእ ኢየሱስ ወእሙንቱሰ ኢያእመሩ ዘይቤሎሙ። ፯. ወካዕበ ይቤሎሙ እግዚእ ኢየሱስ፦ አማን አማን እብለክሙ፥ አነ ውእቱ አንቀጸ አባግዕ። ፰. ኵሎሙ እለ መጽኡ እምቅድሜየ ሰረቅት ወጕሕልያ እሙንቱ ወባሕቱ ኢይሰምዓሆሙ አባግዕ። ፱. አነ ውእቱ አንቀጸ አባግዕ ዘበአማን፤ ዘቦአ እንተ ኀቤየ ይድኅን ወይበውእ ወይወፅእ ወይረክብ ምርዓየ። ፲. ወሰራቂሰ ኢይመጽእ ዘእንበለ ከመ ይስርቅ ወይጥባሕ ወያሕጕል፥ ወአንሰኬ መጻእኩ ከመ ይርከቡ ሕይወተ ዘለዓለም ወፈድፋደ ይርከቡ። ፲፩. አነ ውእቱ ኖላዊ ኄር፥ ወኖላዊሰ ኄር ይሜጡ ነፍሶ ቤዛ አባግዒሁ። ፲፪. ወዐሳብሰ ዘኢኮነ ኖላዌ ወዘኢኮና ዘዚአሁ አባግዒሁ ሶበ ይሬኢ ተኵላ ይመጽእ ይጐይይ ወየኀድግ አባግዒሁ ወይመስጦን ተኵላ ወይዘርዎን ለአባግዕ። ፲፫. ወዐሳብሰ ይጐይይ እስመ ዐሳብ ውእቱ ወኢያሐዝኖ በእንተ አባግዕ። ፲፬. አነ ውእቱ ኖላዊ ኄር ወአአምር ዘዚአየ መርዔትየ ወያአምራኒ እሊአየ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፲፫. ወንሕነሰ አኀዊነ ርቱዕ ናእኵቶ ለእግዚአብሔር ዘልፈ በእንቲአክሙ እለ አፍቀረክሙ እግዚአብሔር፥ እስመ ኀረየክሙ ወተሣሀለክሙ እግዚአብሔር ርእሰ ሕይወት በተቀድሶ መንፈስ ወበሃይማኖተ ጽድቅ። ፲፬. ዘበእንቲአሁ ጸውዐክሙ በትምህርተ ወንጌል፥ ከመ ትሕየዉ በስብሐቲሁ ለእግዚእነ ኢየሱስ ክርስቶስ። ፲፭. ወይእዜኒ አኀዊነ ቁሙ ወዕቀቡ ትእዛዘ ዘመሀሩክሙ ወሠርዑክሙ ዘበቃልነ ወዘበመጽሐፍነ። ፲፮. ወውእቱ እግዚእነ ኢየሱስ ክርስቶስ ወእግዚአብሔር አቡነ ዘአፍቀረነ ወወሀበነ ፍሥሓ ዘለዓለም ወተስፋ ሠናየ ጸጋሁ። ፲፯. ጸጋሁ ውእቱ ያስተፍሥሕክሙ ልበክሙ ወያጽንዕክሙ በኵሉ ምግባር ወበኵሉ ቃል ሠናይ።

ዘካልእ መልእክት Universal Epistle

፲፪. አኀዊነ ኢታንክርዋ ለእንተ ትመጽአክሙ መከራ ከመ ዘነኪር ግብር ዘይከውን ብክሙ። ፲፫. ዳእሙ ከመ ትሳተፍዎ በሕማሙ ለክርስቶስ ወተፈሥሑ ከመ አመ ያስተርኢ በስብሐቲሁ ትትሐሠዩ ፍሡሓኒክሙ። ፲፬. ወእመሰቦ ዘተዐየሩክሙ በእንተ ስሙ ለክርስቶስ ብፁዓን አንትሙ እስመ ስብሐቲሁ ወኀይሉ ለእግዚአብሔር ወመንፈሱ ያዕርፍ ላዕሌክሙ። ፲፭. አልቦ ዘየሐምም እምውስቴትክሙ አው ከመ ቀታሊ አው ከመ ሰራቂ አው ከመ ዘእኩይ ምግባሩ አው ከመ ዘባዕደ ያፈቅር ወይፈቱ። ፲፮. ወእመሰ ከመ ክርስቲይናዊ ኢትኅፈሩ አላ ሰብሕዎ ለእግዚአብሔር በዝንቱ ስም። ፲፯. እስመ በጽሐ ጊዜሁ ለፍዳ ዘያቀድም እምነ ቤቱ ለእግዚአብሔር። ወእመሰ ኮነ እምኀቤነ አቅድሞቱ ምንተ እንከ ይከውን ደኃሪቶሙ ለእለ ይክሕድዎ ለወንጌሉ ለእግዚአብሔር? ፲፰. ወሶበ ጻድቅ እምዕፁብ ይድኅን፥ ኃጥእ ወዐማፂ በአይቴ ያስትርኢ ሀለዎ? ፲፱. ወእለኒ የሐምሙ በእንተ ፈቃዱ ለእግዚአብሔር ያማኅፅኑ ነፍሶሙ ኀበ ምእመን ፈጣሪ በገቢረ ሠናይ። ኦ አኃውየ ብቍዑኒ።

ግብረ ሃዋርያት Acts

፳፪. ወተጋብኡ ሕዝበ ወመኳንንት ወአኀዙ ይዝብጥዎሙ በበትር ወሰጠጡ አልባሲሆሙ። ፳፫. ወዘበጥዎሙ ብዙኀ ወሞቅሕዎሙ። ወአዘዝዎ ለዐቃቤ ቤተ ሞቅሕ ያጽንዕ ዐቂቦቶሙ። ፳፬. ወተአዚዞ ሞቅሖሙ ውስተ ውሳጤ ቤተ ሞቅሕ። ወአጽንዐ እገሪሆሙ ውስተ ጕንድ። ፳፭. ወጊዜ መንፈቀ ሌሊት ጸለዩ ጳውሎስ ወሲላስ ወሰብሕዎ ለእግዚአብሔር ወሙቁሓን ይሰምዕዎሙ። ፳፮. ወሶቤሃ አድለቅለቀ ዓቢይ ድልቅልቅ ወአንቀልቀለ መሠረታተ ቤተ ሞቅሕ ወተርኅወ በጊዜሃ ኵሉ አንቀጽ ወተፈትሑ መዋቅሕቲሆሙ ለኵሎሙ። ፳፯. ወሶበ ነቅሀ ዐቃቤ ቤተ ሞቅሕ ወርእየ ርኅወ ኵሎ አናቅጸ ወመልሐ መጥባሕቶ ወፈቀደ ይትረገዝ ለሊሁ እስመ መሰሎ ዘአምሰጡ ሙቁሓን። ፳፰. ወከልሐ ሎቱ ጳውሎስ ወይቤሎ፦ ኢትግበር እኩየ ዲበ ነፍስከ፥ ሀሎነ ኵልነ ዝየ።

ስንክሳር Synaxarium

ጳውሎስ ሊቀ ጳጳሳት ዘቁስጥንጥያ
ወኪራኮስ ሰማዕት ዘአርአየ መካነ መስቀል
ወያዕቆብ ወልደ እልፍዮስ

መዝሙር Psalm

ብፁአን እለ ንጹሓን በፍኖቶሙ፤
እለ ይሐውሩ በሕገ እግዚአብሔር፤
ብፁዓን እለ ይኀሡ ስምዖ።

ወንጌል Gospel

፳፫. በእንተዝ ትመስል መንግሥተ ሰማያት ብእሴ ንጉሠ ዘፈቀደ ይግበር ሐሳበ ምስለ አግብርቲሁ። ፳፬. ወእንዘ ይትሓሰብ አምጽኡ ሎቱ አሐደ ዘይፈዲ እልፈ መካልየ። ፳፭. ወኀጢኦ ዘይፈዲ አዘዘ እግዚኡ ይሢጥዎ ምስለ ብእሲቱ ወምስለ ውሉዱ ወኵሎ ዘቦ እስከ ይፈዲ። ፳፮. ወወድቀ እንከ ውእቱ ገብር ወሰገደ እንዘ ይብል፦ እግዚኦ፥ ተዐገሠኒ ወኵሎ እፈድየከ። ፳፯. ወመሐሮ እግዚኡ ለውእቱ ገብር ወፈትሖ ወዕዳሁኒ ኀደገ ሎቱ። ፳፰. ወወፂኦ ውእቱ ገብር ረከበ አሐደ ገብረ እምነ አብያጺሁ ዘይፈድዮ ምእተ ዲናረ፥ ወአኀዞ ይኅንቆ እንዘ ይብል፦ ሀብ ስልጥ ዘትፈዲ። ፳፱. ወወድቀ ውእቱ ገብረ እግዚኡ ወአስተብቍዖ እንዘ ይብል፦ ተዐገሠኒ፥ ወኵሎ እፈድየከ። ፴. ወአበዮ ወሖረ ወአሞቅሖ እስከ ይፈድዮ። ፴፩. ወርእዮሙ አብያጺሁ ዘከመ ረሰዮ ተከዙ ጥቀ ወሐዊሮሙ ነገርዎ ለእግዚኦሙ ኵሎ ዘከመ ኮነ። ፴፪. ወእምዝ ጸውዖ እግዚኡ ወይቤሎ፦ ገብር እኩይ፥ ኵሎ ዕዳ ኀደጉ ለከ እስመ አስተብቋዕከኒ። ፴፫. አኮሁ መፍትው አንተሂ ትምሐር ቢጸከ በከመ አነ መሐርኩከ? ፴፬. ወተምዕዐ እግዚኡ ወመጠዎ ለእለ ይኴንኑ እስከ አመ ይስልጥ ኵሎ ዘይፈድዮ። ፴፭. ከማሁኬ አቡየኒ ሰማያዊ ይገብር ለክሙ እመ ኢኀደግሙ ለቢጽክሙ እምልብክሙ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

አርኅዉ ሊተ አናቅጸ ጽድቅ፤
እባእ ውስቴቶን ወእግነይ ለእግዚአብሔር፤
ዛ አንቀጽ እንተ እግዚአብሔር።

ወንጌል Gospel

፯. ወካዕበ ይቤሎሙ እግዚእ ኢየሱስ፦ አማን አማን እብለክሙ፥ አነ ውእቱ አንቀጸ አባግዕ። ፰. ኵሎሙ እለ መጽኡ እምቅድሜየ ሰረቅት ወጕሕልያ እሙንቱ ወባሕቱ ኢይሰምዓሆሙ አባግዕ። ፱. አነ ውእቱ አንቀጸ አባግዕ ዘበአማን፤ ዘቦአ እንተ ኀቤየ ይድኅን ወይበውእ ወይወፅእ ወይረክብ ምርዓየ። ፲. ወሰራቂሰ ኢይመጽእ ዘእንበለ ከመ ይስርቅ ወይጥባሕ ወያሕጕል፥ ወአንሰኬ መጻእኩ ከመ ይርከቡ ሕይወተ ዘለዓለም ወፈድፋደ ይርከቡ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

እገኒ ለከ እግዚኦ እገኒ ለከ፤
እገኒ ለከ ወእጼውዕ ስመከ፤
ወእነግር ኵሎ ስብሐቲከ።

ወንጌል Gospel

፴፪. ኵሉ እንከ ዘየአምን ብየ በቅድመ ሰብእ አአምኖ አነሂ በቅድመ አቡየ ዘበሰማያት። ፴፫. ወለዘሰ ክሕደኒ በቅድመ ሰብእ እክሕዶ አነሂ በቅድመ አቡየ ዘበሰማያት። ፴፬. ኢይምሰልክሙ ዘመጻእኩ ሰላመ እደይ ውስተ ምድር፥ ኢመጻእኩ እደይ ሰላመ አላ መጥባሕተ። ፴፭. ወመጻእኩ እፍልጥ ብእሴ እምአቡሁ ወወለትኒ እምእማ ወመርዓተኒ እምሐማታ። ፴፮. ወፀሩ ለሰብእ ሰብአ ቤቱ። ፴፯. ዘያፈቅር አባሁ ወእሞ እምኔየ ኢይደሉ ሊተ። ወዘያፈቅር ወልደ ወወለቶ እምኔየ ኢይደሉ ሊተ። ፴፰. ወዘኢነሥአ መስቀሎ ወዘኢተለወ ድኅሬየ ኢይደሉ ሊተ። ፴፱. ዘረከባ ለነፍሱ ይገድፋ፤ ወዘሰ ገደፋ ለነፍሱ በእንቲአየ ይረክባ። ፵. ዘኪያክሙ ተወክፈ ኪያየ ተወክፈ፤ ወዘኪያየ ተወክፈ ተወክፎ ለዘፈነወኒ። ፵፩. ዘተወክፈ ነቢየ በስመ ነቢይ ዐስበ ነቢይ ይነሥእ። ወዘተወክፈ ጻድቀ በስመ ጻድቅ ዐስበ ጻድቅ ይነሥእ። ፵፪. ወዘአስተየ አሐደ እምእሉ ንኡሳን ጽዋዐ ማይ ቈሪር ባሕቲቶ በስመ ረድእ አማን እብለክሙ ኢያሐጕል ዐስቦ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፭. ወእንተሰ እቤር በአማን ንጽሕት እንተ ባሕቲታ ትነብር እስመ ቱክልታ እግዚአብሔር ወትፀመድ ጸሎተ ወትስእል መዐልተ ወሌሊተ። ፮. ወእንተሰ ትፈግዕ ምስለ ተውኔት ምውት ይእቲ እንዘ ሕያዋ። ፯. ወከመዝ ገሥጽ ከመ ኢያድልዉ ወኢያመክንዩ። ፰. ወዘሰ ኢይሔሊ ለቤቱ ወይገድፍ አዝማዲሁ ውእቱ ክሕደ ሃይማኖቶ ወየአኪ እምዘ ኢየአምን። ፱. ወለእመ ኀረይከ እቤረ ኅረይ እንተ ስሳ ክረምታ እንተ አሐደ ብእሴ አውስበት። ፲. ብእሲት እንተ ይንእድዋ በኵሉ ምግባረ ሠናይ፥ ለእመ አልሀቀት ውሉዳ ወለእመ ነግደ ተወክፈት ወለእመ እግረ ጻድቃን ኀፀበት ወእመ ርኁበ አጽገበት ወኵሎ ምግባረ ሠናይ ለእመ ተለወት።

ዘካልእ መልእክት Universal Epistle

፰. ጥበቡ እንከ ወአጥብቡ ልበክሙ እስመ ጸላኢክሙ ጋኔን ይጥሕር ከመ አንበሳ ወየኀሥሥ ዘይውኅጥ። ፱. አጽንዑ ቀዊመ በሃይማኖትክሙ እንዘ ታአምሩ ከመ ሕማሙ ለዝ ዓለም ትረክቦሙ ለኵሎሙ አኀዊክሙ ወአጽንዕዋ ለተፋቅሮ። ፲. ወእግዚአብሔርሰ ዘበኵሉ ክብር ጸውዐክሙ ውስተ ዘለዓለም ስብሐቲሁ በኢየሱስ ክርስቶስ ወሕዳጠ ሐሚመክሙ ውእቱ ይፌጽም ለክሙ ወያጸንዐክሙ ወያሌብወክሙ። ፲፩. ውእቱ ዘሎቱ ስብሐት ወኀይለ ለዓለመ ዓለም አሜን። ፲፪. ምስለ ሰልዋኖስ እኁነ ምእመን በከመ ሐለይኩ ሕዳጠ ጸሐፍኩ ለክሙ እንዘ አስተበቍዐክሙ ወእከውን ስምዐ ከመ በአማን ስብሐቲሁ ለእግዚአብሔር ዛቲ እንተ ባቲ ትቀውሙ። ፲፫. ትኤምኀክሙ ቤተ ክርስቲያን ኅሪት እንተ ውስተ ባቢሎን ወማርቆስ ወልድየ። ፲፬. ተአምኁ በበይናቲክሙ በአምኃ ተፋቅሮ ወተሰናአዉ ኵልክሙ እለ በክርስቶስ ሀሎክሙ። ጸጋ ምስለ ኵልክሙ። መልአት መልእክተ ጴጥሮስ ቀዳሚት። ወስብሐት ለእግዚአብሔር፥ አሜን።

ግብረ ሃዋርያት Acts

፴፩. እስመ አቀመ ዕለተ እንተ ባቲ ይኴንን ዓለመ በጽድቅ ላዕለ እደዊሁ ለብእሲ ዘሠርዖ ወሚጦሙ ኀበ ሃይማኖት ለኵሉ ሰብእ ኪያሁ በአንሥኦ እሙታን። ፴፪. ወሰሚዖሙ ሕይወተ እሙታን መንፈቆሙሰ ሰሐቅዎ ወካልኣን ይቤልዎ፦ ናፀምአከ በእንተዝ ካልአ ጊዜ። ፴፫. ወወጽአ ጳውሎስ እማእከሎሙ። ፴፬. ወቦ ዕደው እለ አምኑ ወተለውዎ ወአሐዱ እምኔሆሙ ዲዮኒስዮስ እመኳንንት ዘአርዮስፋጎስ ወብእሲት እንተ ስማ ደማሪስ ወቦ ባዕዳንሂ እለ ምስሌሆሙ።

ስንክሳር Synaxarium

ሐና ነብይት
ወአባ ጰንጠሌዎን
ወዕንባቆም
ወዲዮናስዮስ ዘሃገረ አቴና
ወተዝካረ ሄኖክ ወልደ ሴት
ወ፺፻ ወ፰ቱ ማኅበረ ጰንጠሌዎን

መዝሙር Psalm

ዘያነብራ ለመካን ውስተ ቤቱ፤
ወያስትፌሥሓ ለእመ ውሉድ፤
ዘያነብራ ለመካን ውስተ ቤቱ።

ወንጌል Gospel

፴፮. ወሀለወት ሐና ነቢት ወለተ ፈኑኤል እንተ ነገደ አሴር ወኀለፋ መዋዕሊሃ ወምስለ ምታሰ ሰብዐተ ክረምተ ነበረት እምድንግልናሃ። ፴፯. ወኮነት ማዕስበ ሰማንያ ወአርባዕተ ክረምተ ወኢትወፅእ እምኵራብ መዐልተ ወሌሊተ እንዘ ትትቀነይ በጾም ወበጸሎት። ፴፰. ወተንሥአት ሶቤሃ ወገነየት ወአእኰተቶ ለእግዚአብሔር ወነገረት በእንቲአሁ ለኵሎሙ እለ ይሴፈዉ መድኃኒታ ለኢየሩሳሌም። ፴፱. ወፈጺሞሙ ኵሎ ዘበሕገ እግዚአብሔር አተዉ ገሊላ ሀገሮሙ ናዝሬት። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ዘያነብራ ለመካን ውስተ ቤቱ፤
ወያስተፌሥሓ ለእመ ውሉድ፤
ዘያነብራ ለመካን ውስተ ቤቱ።

ወንጌል Gospel

፳፪. ወናሁ ብእሲት ከነናዊት እምውእቱ ኢድዋል ወጽአት እንዘ ትጸርኅ ወትብል፦ መሐረኒ እግዚኦ ወልደ ዳዊት፤ ወለትየ እኩይ ጋኔን አኀዛ። ፳፫. ወኢይውሥአ እግዚእ ኢየሱስ ቃለ። ወቀሪቦሙ አርዳኢሁ አስተብቍዕዎ እንዘ ይብሉ፦ ፈንዋ እስመ ትጸርኅ በድኅሬነ። ፳፬. ወአውሥአ ወይቤ፦ ኢተፈነውኩ ዘእንበለ ኀበ አባግዕ ዘተሐጕለ ዘቤተ እስራኤል። ፳፭. ወቀሪባ ሰገደት ሎቱ እንዘ ትብል፦ እግዚኦ ርድአኒ። ፳፮. ወአውሥአ ወይቤላ፦ ኢኮነ ሠናየ ነሢአ ኅብስተ ውሉድ ወውሂበ ለከለባት። ፳፯. ወትቤ፦ እወ እግዚኦ፥ እስመ ከለባትኒ ይበልዑ እምፍርፋራት ዘይወድቅ እማእደ አጋእዝቲሆሙ። ፳፰. ወእምዝ አውሥአ እግዚእ ኢየሱስ ወይቤላ፦ ኦብእሲቶ፥ ዓቢይ ሃይማኖትኪ፤ ይኩንኪ በከመ ትፈቅዲ። ወሐይወት ወለታ እምይእቲ ሰዓት። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ተቀነዩ ለእግዚአብሔር በፍርሀት፤
ወተሐሠዩ ሎቱ በረዐድ፤
አጽንዕዋ ለጥበብ ከመ ኢይትመዓዕ እግዚአብሔር።
 

ወንጌል Gospel

፩. ወይቤሎሙ እግዚእ ኢየሱስ፦ እስመ ትመስል መንግሥተ ሰማያት ብእሴ ባዕለ ቤት ዘወጽአ በነግህ ይትዓሰብ ገባእተ ለዐጸደ ወይኑ። ፪. ወተካሀለ ምስለ ገባእት በበ ዲናር ለዕለት ወፈነዎሙ ውስተ ዐጸደ ወይኑ። ፫. ወወፂኦ ጊዜ ሠላስ ሰዓት ርእየ ካልኣነ እንዘ ይቀውሙ ውስተ ምሥያጥ ፅሩዓነ። ፬. ወሎሙኒ ይቤ፦ ሑሩ አንትሙኒ ውስተ ዐጸደ ወይንየ ወዘበርቱዕ እሁበክሙ። ወእሙንቱሂ ሖሩ። ፭. ወካዕበ ወፂኦ ጊዜ ስሱ ወተስዑ ሰዓት ገብረ ከማሁ ክመ። ፮. ወጊዜ ዐሥሩ ወአሐቲ ወፂኦ ረከበ ካልኣነ እንዘ ይቀውሙ ወይቤሎሙ፦ ምንት አቀመክሙ ዝየ ኵሎ ዕለተ ፅሩዓኒክሙ? ፯. ወይቤልዎ፦ እስመ አልቦ ዘተዓሰበነ። ወይቤሎሙ፦ ሑሩ እንትሙኒ ውስተ ዐጸደ ወይንየ ወዘረትዐኒ እሁበክሙ። ፰. ወእምዘ መስየ ይቤ ባዕለ ዐጸደ ወይን ለመጋቢሁ፦ ጸውዖሙ ለገባእት ወሀቦሙ ዐስቦሙ ወአኀዝ ቅድም እምደኀርት እስከ ቀደምት። ፱. ወመጽኡ እለ ዐሥሩ ወአሐቲ ሰዓት ወነሥኡ በበ ዲናር። ፲. ወመጽኡ ቀደምት ወመሰሎሙ ዘያፈደፍዱ ነሢአ፤ ወነሥኡ በበ ዲናር እሙንቱሂ። ፲፩. ወነሢኦሙ አንጐርጐሩ ላዕሊሁ ለባዕለ ቤት። ፲፪. እንዘ ይብሉ፦ እሉ ደኀርት አሐተ ሰዓተ ተቀንዩ ወአስተዐረይኮሙ ምስሌነ፥ ለእለ ጾርነ ክበዳ ወላህባ ለዕለት። ፲፫. ወአውሢኦ ይቤሎ ለአሐዱ እምኔሆሙ፦ ካልእየ ኢገፋዕኩከ፤ አኮኑ በዲናር ተከሀልኩከ? ፲፬. ንሣእ ዘይረክበከ ወሑር፤ ፈቀድኩ አነ ለዝ ደኃሪ አሀቦ ከመ ለከ። ፲፭. ኢይከውነኒሁ እግበር ዘፈቀድኩ በንዋይየ? ዐይንከኑ ሐማሚ ውእቱ እስመ ኣነ ኄር አነ? ፲፮. ከማሁኬ ይከውኑ ደኀርት ቅድመ ወቀደምት ድኅረ። እስመ ብዙኃን እሙንቱ ጽዉዓን፥ ወኅዳጣን ኅሩያን። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፳፫. እመኒ ላእኩ ለክርስቶስ እሙንቱ? አኮሁ እዘነግዕ ለርእስየ በጻማሂ አፈድፈድኩ ወበተቅሥፎሂ አፈድፈድኩ ወበተሞቅሖሂ አብዛኅኩ። ወለሞትኒ ብዙኀ ተደለውኩ። ፳፬. ኀምሰ ቀሠፉኒ አይሁድ በአርብዓ ዘእንበለ አሐቲ። ፳፭. ሥልሰ ዘበጡኒ በአብትር። ምዕረ ወገሩኒ በአእባን። ሥልሰ ሰኰየ ሐመርየ። ቤትኩ ወወዐልኩ እንዘ እጸብት ውስተ ዕመቀ ባሕር። ፳፮. ወበመንገድሂ ዘልፈ እትመነደብ ወተመንደብኩ በተከዜኒ። አመንደቡኒ ፈያት አመንደቡኒ አዝማድየ አመንደቡኒ አሕዛብ። ተመንደብኩ በሀገር ወተመንደብኩ በሐቅል ተመንደብኩ በባሕር። አመንደቡኒ ቢጽ ሐሳውያን። ፳፯. በጻማ ወበስራሕ ወበትጋህ ብገዙኀ። በረኃብ ወበጽምእ በጾም ብዙኀ በቍር ወበዕርቃን። ፳፰. ዘእንበለ ብዙኅ ባዕድ ዘረከበኒ ኵሎ አሚረ እንዘ እሔሊ ቤተ ክርስቲያናት። ፳፱. መኑ ዘይደዊ ወኢየሐምም አነ? ወመኑ ዘይስሕት ወኢይደነግፅ? ፴. ወእመሰ ይደሉ ተመክሖ አነኒ እትሜካሕ በሕማምየ። ፴፩. የአምር እግዚአብሔር አቡሁ ለእግዚእነ ኢየሱስ ክርስቶስ ዘውእቱ ቡሩክ ለዓለም ከመ ኢይሔሱ። ፴፪. በሀገረ ደማስቆ መልአከ አሕዛብ ዘውእቱ አርስጣስዮስ ንጉሥ ዐቃቤ ሀገር ደማስቆናዊ ፈቀደ የአኀዘኒ። ፴፫. ወአውረዱኒ በሠብሣብ እንተ መስኮት እምአረፍት ወአምሰጥኩ እምእዴሁ።

ዘካልእ መልእክት Universal Epistle

፲፪. ወብፁዕ ብእሲ ዘይትዔገሣ ለእኪት እስመ ተመኪሮ ይነሥእ አክሊለ ሕይወት ዘአሰፈዎሙ እግዚአብሔር ለእለ ያፈቅርዎ። ፲፫. ወእመቦ ዘይትሜከር ኢይበል፦ እግዚአብሔር ያሜክረኒ፥ እስመ እግዚአብሔር ኢያሜክር ለእኪተ ወውእቱሰ ኢይሜክር ወኢመነሂ። ፲፬. አለ አሐዱ አሐዱ ይትሜከር በፍትወተ እንቲአሁ ወይወፅእ ኀቤሃ ወይደነግፅ። ፲፭. ወፍትወትሰ እምከመ ፀንሰት ትወልዳ ለኃጢአት፥ ወኃጢአትኒ እምከመ ተፈጸመት ትወልዳ ለሞት። ፲፮. ኢያስሕቱክሙ አኀዊነ ፍቁራን። ፲፯. ኵሉ ሀብት ሠናይ ወኵሉ ፍት ፍጹም እምላዕሉ ይእቲ ትወርድ እምኀበ አቡሃ ለብርሃን ውእቱ ዘአልቦ ተውላጥ ኀቤሁ ወአልቦ ምንትኒ ዘያመስጥ እምእዴሁ።

ግብረ ሃዋርያት Acts

፲፪. ወዘንተ ሰሚዐነ አስተብቋዕናሁ ለጳውሎስ ምስለ ሰብአ ውእቱ ብሔር ከመ ኢይዕርግ ኢየሩሳሌም። ፲፫. ወተሠጥወ ጳውሎስ ወይቤ፦ ለምንት ከሙዘ ትገብሩ ወትበክዩ ወትሰብሩኒ ልብየ። አንሰኬ አኮ ባሕቲቶ ማሕመሜ ወመዋቅሕተ ዘእሴፎ ዓዲ ለመዊትኒ ጥቡዕ አነ በኢየሩሳሌም በእንተ ስመ እግዚእነ ኢየሱስ። ፲፬. ወሶበ አበየ አርመምነ ወኀደግናሁ ወንቤ፦ ዘፈቀደ እግዚአብሔር ለይኩን። ፲፭. ወእምድኅረ እማንቱ መዋዕል አስተዳሎነ ወዐረግነ ኢየሩሳሌም። ፲፮. ወቦ እምነ አርዳእ እለ መጽኡ ምስሌነ እምቂሳርያ ወሖርነ ወኀደርነ ኀበ ምናሶን ዘሀገረ ቆጵሮስ ዘእምአርድእት ቀዳማውያን። ፲፯. ወበጺሐነ ኢየሩሳሌም ተቀበሉነ አኀዊነ በፍሥሓ።

ስንክሳር Synaxarium

አባ ባውላ ዘሃገረ ጠውማ
ወቅዱስ ሚናስ
ወሐናሲ ሰማዕት

መዝሙር Psalm

ጸርኁ ጻድቃን ወእግዚአብሔር ሰምዖሙ፤
ወእምኵሉ ምንዳቤሆሙ አድኀኖሙ፤
ቅሩብ እግዚአብሔር ለየዋሃነ ልብ።

ወንጌል Gospel

፳፭. ወሰሚዖሙ አርዳኢሁ አንከሩ ጥቀ እንዘ ይብሉ፦ መኑ እንጋ ይክል ድኂነ? ፳፮. ወነጸሮሙ እግዚእ ኢየሱስ ወይቤሎሙ፦ በኀበ ሰብእ ኢይትከሀልዝ፥ ወበኀበ እግዚአብሔርሰ ኵሉ ይትከሀል። ፳፯. ወእምዝ አውሥአ ጴጥሮስ ወይቤሎ፦ ናሁ ንሕነ ኀደግነ ኵሎ ወተሎናከ። ምንተ እንጋ ንረክብ? ፳፰. ወይቤሎሙ እግዚእ ኢየሱስ፦ አማን እብለክሙ፥ አንትሙ እለ ተሎክሙኒ አመ ደግም ልደት አመ ይነብር ወልደ እጓለ እመሕያው ዲበ መንበረ ስብሓቲሁ፤ አንትሙኒ ትነብሩ ዲበ ዐሠርቱ ወክልኤቱ መናብርት እንዘ ትኴንኑ ዐሠርተ ወክልኤተ ሕዝበ እስራኤል። ፳፱. ወኵሉ ዘኀደገ አብያተ ወአኀወ ወአኃተ ወአባ ወእመ ወብእሲተ ወውሉደ ወገራውሀ በእንተ ስምየ፥ ምእተ ምክዕቢተ ይነሥእ ወሕይወተ ዘለዓለም ይወርስ። ፴. ወብዙኃን ይከውኑ ቀደምት ድኅረ፥ ወደኀርት ቅድመ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

እስመ ዘእግዚአብሔር ሣህል፤
ወዚአከ እግዚኦ ኃይል፤
እስመ አንተ ትፈድዮ ለኵሉ በከመ ምግባሩ።
 

ወንጌል Gospel

፰. ወእምዘ መስየ ይቤ ባዕለ ዐጸደ ወይን ለመጋቢሁ፦ ጸውዖሙ ለገባእት ወሀቦሙ ዐስቦሙ ወአኀዝ ቅድም እምደኀርት እስከ ቀደምት። ፱. ወመጽኡ እለ ዐሥሩ ወአሐቲ ሰዓት ወነሥኡ በበ ዲናር። ፲. ወመጽኡ ቀደምት ወመሰሎሙ ዘያፈደፍዱ ነሢአ፤ ወነሥኡ በበ ዲናር እሙንቱሂ። ፲፩. ወነሢኦሙ አንጐርጐሩ ላዕሊሁ ለባዕለ ቤት። ፲፪. እንዘ ይብሉ፦ እሉ ደኀርት አሐተ ሰዓተ ተቀንዩ ወአስተዐረይኮሙ ምስሌነ፥ ለእለ ጾርነ ክበዳ ወላህባ ለዕለት። ፲፫. ወአውሢኦ ይቤሎ ለአሐዱ እምኔሆሙ፦ ካልእየ ኢገፋዕኩከ፤ አኮኑ በዲናር ተከሀልኩከ? ፲፬. ንሣእ ዘይረክበከ ወሑር፤ ፈቀድኩ አነ ለዝ ደኃሪ አሀቦ ከመ ለከ። ፲፭. ኢይከውነኒሁ እግበር ዘፈቀድኩ በንዋይየ? ዐይንከኑ ሐማሚ ውእቱ እስመ ኣነ ኄር አነ? ፲፮. ከማሁኬ ይከውኑ ደኀርት ቅድመ ወቀደምት ድኅረ። እስመ ብዙኃን እሙንቱ ጽዉዓን፥ ወኅዳጣን ኅሩያን። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።