መዝሙረ ዳዊት Psalm

ግርሁ ዘርኡ፣ ወይንታት ተኸሉ፣ ብዝሒ ፍረ ኸኣ ሀቦም። ባረኾም እሞ ኣዝዮም በዝሑ።

ወንጌል Gospel

1. ኢየሱስ ብምስላታት ገይሩ ኸምዚ ኺብሎም ጀመረ፡ - “ሓደ ሰብኣይ ወይኒ ተኸለ፥ ሓጹር ገበረሉ፥ መሓምተሊ ኸኣ ኾዓተሉ፥ መሓለዊ ዋላውን ሠርሓሉ፥ ንሓረስቶት ድማ ብመገስ ሂብዎም ገሸ። 2. ጊዜ ፍርያት ምስ በጽሐ፥ ካብቲ ኣታኽልቲ ወይኒ ፍረ ኼምጽእሉ ናብቶም ሓረስቶት ኣገልጋሊኡ ለኣኸ። 3. ንስቶም ግና ኂዞም ገረፍዎ፥ ጥራይ ኢዱውን ሰደድዎ። 4. ደጊሙ ኻልእ ኣገልጋሊኡ ናብኣቶም ለኣኸ። ብዳርባ እምኒ ፈግእዎ፥ ኣዋሪዶምውን ሰደድዎ። 5. ካልእ ድማ ለኣኸ፥ ንእኡ ውን ቀተልዎ። ብዙኃት ካልኦት ከኣ ለኣኸ፥ ንገሊኦም ገረፍዎም፥ ንገሊኦም ድማ ቐተልዎም። 6. ገና ሓደ ዜፍቅሮ ወዲ ነበሮ፥ ኣብ መውዳእታ ኸኣ 'ንወደይሲ ይኃፍርዎ ግዲ ይኾኑ' ኢሉ ናብኣቶም ለኣኾ። 7. እቶም ሓረስቶት ግና፥ 'እዚ እቲ ወራሲ እዩ፥ ንዑ ንቕተሎ እሞ እቲ ርስቱ ኸኣ ንኣና ኪኸውን እዩ' ተበሃሃሉ። 8. ኂዞም ቀተልዎ፥ ካብቲ ኣታኽልቲ ወይኒ ኸኣ ናብ ወፃኢ ደርበይዎ። 9. እቲ ዋና ኣታኽልቲ ወይኒ እንታይ ኮን ኪገብር እዩ፧ መጺኡ ነቶም ሓረስቶት ይቐትሎም፥ ነቲ ኣታኽልቲ ወይኑ ኸኣ ንኻልኦት ይህቦ። 10. - 11. 'እቲ ነደቕቲ ዝነዓቕዎ እምኒ፥ ንሱ ርእሲ መኣዝን ኮነ፥ እዚ ኻብ እግዚኣብሔር እዩ፥ ንምርኣዩውን ዜደንቕ እዩ' ዚብል ጽሑፍዶ ከቶ ኣየንበብኩምዎን ኢኹም፧” 12. መራሕቲ ኣይሁድ እዚ ምስላ እዚ ብዛዕብኦም ከም ዝተዛረቦ ፈሊጦም ነበሩ እሞ ኪኅዝዎ ደለዩ፥ ነቶም ሕዝቢ ፈሪሆም ግና ኃዲጎምዎ ኸዱ። እትሰምዕ እዝኒ ዘላቶ ይስማዕ!

መልእክተ ጳውሎስ Pauline Epistle

1. ኣነ ግና ኣኅዋተይ፥ ከም ሥጋውያን፥ ብክርስቶስ ከኣ ገና ከም ዘይዓበዩ ሕፃናት እምበር፥ ከም መንፈሳውያን ክዛረበኩም ኣይከኣልኩን። 2. ዕጹም ብልዒ ዘይኮነ ጸባ መገብኩኹም፤ ከመይ ድልዋት ኣይነበርኩምን፥ ሕጂውን ገና ዝተዳሎኹም ኣይኮንኩምን። 3. እዚ ኸኣ ገና ሥጋውያን ስለ ዝኾንኩም እዩ። ኣብ ማእከልኩም ቅንእን ባእስን ካብ ዚህሉስ ሥጋውያን ምዃንኩምዶ ኣይኰነን፧ ከም ባህሊ ማንም ሰብዶኸ ትኸዱ ኣየለኹምን፧ 4. ምኽንያቱ እቲ ሓደ “ኣነ ናይ ጳውሎስ እየ”፥ ሓደ ኻልእ ከኣ “ኣነስባ ናይ ኣጵሎስ እየ” ካብ ዚብል ሥጋውያን ምዃንኩምዶ ኣይኮነን። 5. እምበርከ ኣጵሎስ መን እዩ፧ ጳውሎስከ መን እዩ፧ ንነፍሲ ወከፎም እግዚኣብሔር ከም ዝሃቦም ብኣኣቶም ጌርኩም ናብ እምነት ዝበጻሕኩም ኣገልገልቲ እዮም። 6. ኣነ ተኸልኩ፥ ኣጵሎስ ኣስተየ፥ ኣምላኽ ግና ኣብቈለ። 7. እቲ ዜብቊል ኣምላኽ ደኣ እምበር እቲ ዚተክል ወይስ እቲ ዜስቲ ዚዓብሶ የብሉን። 8. እቲ ዚተክልን እቲ ዜስትን ማዕረ እዮም፥ ነፍስ ወከፍ ከኣ ከከም ጻዕሩ ዓስቡ ኪቕበል እዩ። 9. ከመይ ንሕና መዓይይቲ ኣምላኽ ኢና፥ ንስኻትኩም ከኣ ግራት ኣምላኽ ኢኹም፥ ሕንጻ ኣምላኽ ኢኹም።

ዘካልእ መልእክት Universal Epistle

5. ከምኡ ኸኣ፥ ኣቱም መንእሰይ፥ ነቶም ዚዓብዩኹም ተገዝእዎም። “ኣምላኽ ንዕቡያት ይመዓቶም፥ ንትሑታት ግና ጸጋ ይህቦም” ከም ዚብል ድማ ትሕትና ለቢስኩም ንሓድሕድኩም ኣገልግሉ። 6. ደጊም ብጊዜኡ ንሱ ልዕል ምእንቲ ኼብለኩም ኣብ ትሕቲ እታ ጽንዕቲ ኢድ ኣምላኽ ትሕት በሉ። 7. ንሱ ይሓልየልኩም እዩ እሞ ንዅሉ ኃልዮትኩም ኣብኡ ኣውድቕዎ። 8. ዲያብሎስ፥ እቲ መጻርርትኹም፥ ዚውሕጦ ደልዩ ከም ዚጓዝም ኣንበሳ ይዘውር ኣሎ እሞ ተጠንቀቑ፥ ንቕሑ። 9. ኣብ እምነት ጸኒዕኩም ተቓወምዎ፥ ምኽንያቱ ነቶም ኣብ ምሉእ ዓለም ዘለዉ ኣኅዋትኩምውን እዚ መከራ እዚ ይበጽሖም ከም ዘሎ ትፈልጡ ኢኹም። 10. እቲ ብክርስቶስ ኢየሱስ ናብ ናይ ዘለዓለም ክብሩ ዝጸወዓኩም፥ ኣምላኽ ዅሉ ጸጋ፥ ቊሩብ ጊዜ ሓሰረ መከራ ምስ ጸገብኩም፥ ንሱ ፍጹማት ኪገብረኩም፥ ኬጽንዓኩም፥ ኬበርትዓኩም፥ ኪሥርተኩምውን እዩ። 11. ንዘለዓለም ዓለም ንእኡ ኽብርን ሥልጣንን ይኹን። ኣሜን። 12. በቲ እሙን ምዃን ኣነ ዝፈልጦ ስልዋኖስ ኃውና ገይረ ነዛ ሓጻር መልእኽቲ እጽሕፈልኩም ኣሎኹ። እዚ ኸኣ ከተባብዓኩምን እዚ ናይ ሓቂ ጸጋ ኣምላኽ ምዃኑ ኽምስክርን ኢለ እየ። ኣብዚ ጸጋ እዚ ጸኒዕኩም ደው በሉ። 13. እታ መተኃርይትኹም ዝኾነት ኣብ ባቢሎን እትርከብ ቤተ ክርስቲያን ሰላም ትብለኩም ኣላ። ማርቆስ ወደይውን ሰላም ይብለኩም ኣሎ። 14. ብክርስቲያናዊ ፍቕሪ እናተሰዓዓምኩም ንሓድሕድኩም ሰላም ተበሃሃሉ። ብክርስቶስ ዘሎኹም ኵላትኩም ሰላም ይሃልኹም። ኣሜን።

ግብረ ሃዋርያት Acts

1. እቲ ታዕታዕ ዝግ ምስ በለ ኸኣ፥ ጳውሎስ ነቶም ደቀ መዛሙርቲ ጸዊዑ ብምኽሪ ኣበራትዖም፥ ተሰናቢትዎም ከኣ ናብ መቄዶንያ ኪኸይድ ተበገሰ። 2. በቲ ዝኃለፎ ዓድታት ከኣ ብብዙኅ ቃል እናኣጸናንዖም ናብ ግሪኽ ከደ። 3. ኣብኡ ሠለስተ ወርኂ ተቐመጠ፤ ናብ ሶርያ ብመርከብ ኪኸይድ ሓሲቡ ኸሎ ድማ፥ ኣይሁድ ውዲት ከም ዝገበሩሉ ምስ ፈለጠ፥ ብመቄዶንያ ገይሩ ኺምለስ መኸረ። 4. ክሳብ እስያ ኸኣ እኒ ሶጴጥሮስ ወዲ ጲሮስ ብዓል ቤርያ፥ ኣርስጦርኮስን ሲኮንዱስን ሰብ ተሰሎንቄ፥ ጋይዮስ ብዓል ደርቤን፥ ከምኡ ኸኣ ጢሞቴዎስ፥ ካብ እስያ ኸኣ ቲኪቆስን ጥሮፊሞስን ኣሰነይዎ። 5. እዚኣቶም ቅድሜና ኃሊፎም ኣብ ጢሮኣዳ ተጸበዩና። 6. ንሕና ግና ድኅሪ በዓል ቅጫ፥ ካብ ፊልጵስዩስ ብመርከብ ነቒልና፥ ብኃሙሽተ መዓልቲ ኣብ ጢሮኣዳ ናብኣቶም በጻሕና፥ ኣብኣውን ሾብዓተ መዓልቲ ቐኔና።

ስንክሳር Synaxarium

ተዝካረ ተአምሪሁ ወስደቱ ለሳዊሮስ ሊቀ ጳጳሳት
ወቴክላ ሰማዕት
ወሕርያቆስ

መዝሙር Psalm

ኣብ እግዚኣብሄር ኣዕቊበ ኣሎኹ፣ ከመይ ደአ ንነፍሰይ፣ ከም ዑፍ ናብ ከረንኪ ህደሚ፣ እትብልዋ፧ ንቕኑዓት ልቢ ብጸልማት ምእንቲ ኺውርውሩሎም፣ እንሆ፣ ረሲኣን ቀስቶም ይግትሩ፣ ንፍላጻኦም ኣብ መንትግ የዝግብዎ።

ወይ

መዝ 4 ፡ 6 - 7

ዎ እግዚኣብሄር፣ ብርሃን ገጽካ ኣብርሃልና። ካብቲ እቶም እኽሎምን ወይኖምን ምስ በዝሔ ዚሕጐስዎ ኣብሊጽካ ኣብ ልበይ ሓጐስ ኣንበርካ።

ወንጌል Gospel

10. ምእንቲ ጽድቂ ዚስደዱ፥ መንግሥተ ሰማያት ናቶም እያ እሞ፥ ብፁዓን እዮም። 11. “ምእንታይ እንተ ጸረፉኹምን፥ እንተ ሰጐጉኹምን፥ ኵሉ ኽፋእ ዘበለ ድማ ብሓሶት እንተ ተዛረቡልኩምን፥ ብፁዓን ኢኹም። 12. ከምኡ ኸኣ ነቶም ቅድሜኹም ዝነበሩ ነቢያት ኣሳዲዶምዎም እዮም እሞ፥ ኣብ ሰማያት ዓስብኹም ብዙኅ ስለ ዝኾነ፥ ተሓጐሱ ባህውን ይበልኩም። 13. “ንስኻትኩም ንምድሪ ጨው ኢኹም፥ ጨው መቐረቱ እንተ ጠፍአኸ፥ ብምንታይ ይምቅር፧ ንደገ ተደርብዩ፥ ብሰብ ኪርገጽ እንተ ዘይኮይኑስ ዚጠቕሞ የብሉን። 14. ንስኻትኩም ንዓለም ብርሃኑ ኢኹም፥ ኣብ እንባ ዘላ ኸተማ ኽትክወል ኣይከኣላን እዩ። 15. መብራህቲ፥ ኣብ ቤት ንዘሎ ዅሉ ምእንቲ ኬብርህ ኣብ በሪኽ መቐመጢኡ ተንብሮ እምበር ኣብ ትሕቲ ኸፈር ከተንብሮ ኣይተብርሆን ኢኻ። 16. ከምኡ ኸኣ ነቲ ጽቡቕ ግብርኹም ርእዮም፥ ኣብ ሰማያት ንዘሎ ኣቦኹም ምእንቲ ኼመስግንዎ፥ ብርሃንኩም ኣብ ቅድሚ ሰብ ይብራህ። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ንዕቡያት ከም ግብሮም ፍደዮም። ክሳዕ መአዝ እቶም ረሲኣን፣ ጐይታየ፣ ክሳዕ መአዝ ረሲኣን ኪዕወቱ እዮም፧

ወንጌል Gospel

28. ቀጺሉ ኢየሱስ “እንታይ ይመስለኩም፧ ሓደ ሰብኣይ ክልተ ደቂ ነበርዎ፥ ናብቲ ቐዳማይ ቀሪቡ ‘ወደይ፥ ሎሚ ናብ ኣታኽልቲ ወይኒ ውፈር እሞ ዕየ’ በሎ። 29. ንሱ ኸኣ ‘እምቢ’ ኢሉ መለሰ፥ ደኃር ግና ተጣዒሱ ወፈረ። 30. ናብቲ ኻልኣይ ቀሪቡ ኸኣ ኸምኡ በሎ፥ ንሱ ኸኣ ‘ሕራይ፥ ጐይታይ’ በሎ፥ ግናኸ ኣይወፈረን። 31. ካብ ክልቲኦም ኣየናዮም እዩ ፍቓድ ኣቦኡ ዝመልአ፧” በሎም። ንሳቶም ከኣ “እቲ ቐዳማይ” በልዎ፥ ኢየሱስ ድማ “ተቐበልቲ ቐረጽን ኣመናዝርን ናብ መንግሥቲ ኣምላኽ ከም ዚቕድሙኹም ብሓቂ እብለኩም ኣሎኹ። 32. ዮሓንስ ብመገዲ ጽድቂ ናባኻትኩም መጺኡ ነበረ እሞ፥ ተቐበልቲ ቐረጽን ዘመዉትን ደኣ ኣመንዎ እምበር ንስኻትኩምሲ ኣይኣመንኩምዎን፥ ነዚ ምስ ርኤኹምዉን ተጣዒስኩም ብእኡ ኣይኣመንኩምን” በሎም። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

መዝሙረ ዳዊት Psalm

ጕንዲ ወይኒ ኻብ ግብጺ ኣውጻእካ፣ ኣህዛብ ሰጒጕካውን ተኸልካያ። አብ ቅድሚኣ ቦታ ኣዳሎኻላ፣ ሱር ሰደደት ምድሪውን መልኤት። ኣኽራን ብጽላላ ተኸድኑ፣ ጨናፍራ ድማ ከም ጽሕድታት ኣምላኽ ነበሩ።

ወንጌል Gospel

5. እቲ ጒንዲ ወይኒ ኣነ እየ፥ ጨናፍር ከኣ ንስኻትኩም ኢኹም፥ እቲ ኣባይ ዚነብር ኣነውን ኣብኡ፥ ንሱ እዩ ብዙኅ ፍረ ዚፈሪ፤ ምኽንያቱ ብጀካይ ሓንቲ እኳ ኽትገብሩ ኣይትኽእሉን ኢኹም። 6. ኣባይ ዘይነብር ዘበለ ኸም ጨንፈር ወይኒ ንወፃኢ ተደርብዩ ይነቅጽ፥ ኣኪቦም ድማ ናብ ሓዊ ይድርብይዎ እሞ ይነድድ። 7. ኣባይ እንተ ነበርኩም፥ ቃለይውን ኣባኻትኩም እንተ ኃደረ፥ እትደልይዎ ዘበለ ትልምኑ እሞ ይኾነልኩም። 8. ብዙኅ ፍረ እንተ ፈሬኹም ኣቦይ በዚ ኪኸብር እዩ፥ ንስኻትኩም ከኣ ደቀ መዛሙርተይ ክትኮኑ ኢኹም። 9. “ከምቲ ኣቦ ዘፍቀረኒ ኣነውን ኣፍቂረኩም እየ፤ ኣብ ፍቕረይ ንበሩ። 10. ከምቲ ኣነ ትእዛዛት ኣቦይ ሓልየ ኣብ ፍቕሩውን ጸኒዐ ዝነብር ዘሎኹ፥ ከምኡ ኸኣ ንስኻትኩም ትእዛዛተይ እንተ ሓሎኹም ኣብ ፍቕረይ ጸኒዕኩም ክትነብሩ ኢኹም። 11. ሓጐሰይ ኣባኻትኩም ምእንቲ ኺነብር፥ ሓጐስኩምውን ምሉእ ምእንቲ ኪኸውንሲ እዚ ነገርኩኹም። ብወልድ ዝአምን ናይ ዘልኣለም ሕይወት ኣለዎ።

መልእክተ ጳውሎስ Pauline Epistle

1. ንስኻ ግና ምስቲ ጥዑይ ትምህርቲ ዚሰማማዕ ምሃር። 2. ነቶም ኣረገውቲ ሰብኡት እሩማት፥ ሓፋራት፥ ለባማት፥ ብእምነትን ብፍቕርን ብትዕግስትን ጥዑያት ኪኾኑ ምሃሮም። 3. ነተን ኣረገውቲ ኣንስቲውን ከምኡ ብቕድስና ዚነብራ፥ ዘይሓምያ፥ ወልፊ መስተ ዘይብለን፥ ሠናይ ዘበለ ዚምህራ ኪኾና ምሃረን። 4. ሽዑ ነተን ናኣሽቱ ኣንስቲ ንሰብኡተንን ንውሉደንን ኬፍቅራ፥ 5. ገዛእ ርእሰን ገቲአን ዚኽእላ ንጹሓት፥ ቤተን ዚኣልያ፥ ሕያዎት፥ ንሰብኡተን ዚእዘዛ ኪኾና ኬለብማአን እየን። እዚ ኸኣ ቃል ኣምላኽ ምእንቲ ኸይጽረፍ እዩ። 6. ንመንእሰይውን ከምኡ ለባማት ኪኾኑ ምዓዶም። 7. - 8. እቶም ዚቃወሙኻ ብዛዕባና ዚብልዎ ኽፉእ ነገር ስኢኖም ምእንቲ ኪኃፍሩስ፥ ክትምህር ከሎኻ እሙን ብምዃን፥ ብርዝነት፥ መንቅብ ብዘይብሉ ጥዑይ ዘረባ፥ ብዅሉ ሠናይ ግብሪ እናኣዘውተርካ ኣርኣያ ኹኖም።

ዘካልእ መልእክት Universal Epistle

8. እምብኣርከስ ከምኣቶም ምእንቲ እታ ሓቂ ዚዓዩ ክንከውን፥ ነዞም ከምዚኣቶም ዝበሉ ክንቅበሎም ይግብኣና እዩ። 9. ኣነ ናብታ ቤተ ክርስቲያን ሓደ ነገር ጽሒፈ ነይረ፥ እቲ ሓለቓኦም ኪኸውን ዚደሊ ድዮጥራፊስ ግና ኣይቅበለናን እዩ። 10. ስለዚ ኣነ ምስ መጻእኩ ነቲ ንሱ ኽፉእ እናተዛረበ ዚጸርፈና ዘሎ ከዘኻኽረኩም እየ። እዚ ምእካል ኣብይዎ ኸኣ ንሱ ንባዕሉ ነቶም ኣኅዋት ኣይቅበሎምን፥ ነቶም ኪቕበልዎም ዚደልዩ ኸኣ ይኽልክሎም፥ ካብ ቤተ ክርስቲያንውን የውፅኦም ኣሎ። 11. ኣታ ፍቁረይ፥ ነቲ ሠናይ ደኣ እምበር፥ ነቲ እኩይሲ ኣይትስዓቦ። እቲ ሠናይ ዚገብር ካብ ኣምላኽ እዩ፥ እቲ ኽፉእ ዚገብር ንኣምላኽ ኣይረኣዮን። 12. ንድሜጥሮስ ኵላቶም ይምስክሩሉ ኣለዉ፥ እታ ሓቂ ባዕላ ድማ ትምስክረሉ ኣላ። ንሕናውን ንምስክረሉ ኣሎና፥ ምስክርና ሓቂ ከም ዝኾነት ድማ ንስኻ ትፈልጥ ኢኻ። 13. ብዙኅ ዝጽሕፈልካ ነይሩኒ፥ ግናኸ ብቐለምን ብብርዕን ክጽሕፈልካ ኣይደሌኹን። 14. ቀልጢፈ ኽርእየካ ተስፋ ኣሎኒ፥ ሽዑ ኣፍ ንኣፍ ክንዘራረብ ኢና። 15. ሰላም ምሳኻ ይኹን። እቶም ፈተውትኻ ሰላም ይብሉኻ ኣለዉ። ነቶም ፈተውትና በብስሞም ሰላም በሎም።

ግብረ ሃዋርያት Acts

1. እቲ ሊቀ ካህናት ከኣ “እዚ ነገር እዚ ኸምኡ ድዩ፧” ኢሉ ሓተቶ። 2. ንሱ ድማ ኸምዚ ኢሉ መለሰ፡ - “ኣቱም ኣኅዋትናን ኣቦታትናን ስምዑ። ነቦና ኣብርሃም ኣብ ካራን ከይተቐመጠ ገና ኣብ መሰጶታምያ ኸሎ፥ ኣምላኽ ክብሪ ተራእዮ እሞ፥ 3. ‘ካብ ምድርኻን ካብ ኣዝማድካን ውፃእ፥ ናብቲ ኣነ ዘርእየካ ምድሪውን ኪድ’ በሎ። 4. ሽዑ ኻብ ምድሪ ከለዳውያን ወፂኡ ኣብ ካራን ተቐመጠ። ኣቦኡ ምስ ሞተ ኸኣ ኣምላኽ ካብኡ ናብዛ ሕጂ እትነብሩላ ዘሎኹም ምድሪ ኣግዓዞ። 5. ኣብኣ ኽንዲ መርገጽ እግሪ እትኣክል እኳ ርስቲ ኣይሃቦን፤ እንተኾነ ውሉድ ዘይብሉ ኸሎ፥ እታ ምድሪ ንእኡን ብድኅሪኡውን ንዘርኡን ከም ዘረስትዮ ኣተስፈዎ። 6. ኣምላኽ ድማ ኸምዚ ኢሉ ተዛረቦ፥ ‘ዘርእኻ ኣብ ምድሪ ባዕዲ ስደተኛ ኪኸውን እዩ፥ ነርባዕተ ሚእቲ ዓመት ከኣ ከም ባርያ ኪገፍዕዎን ኪጭቊንዎን እዮም። 7. ኣነ ግና ነቶም ዝገዝእዎም ሕዝቢ ኽፈርዶም እየ’ ይብል ኣምላኽ፥ ‘ብድኅርዚ ኻብኡ ወፂኦም ኣብዛ ሥፍራ እዚኣ ኬምልኹኒ እዮም።’

ስንክሳር Synaxarium

አባ ስምዖን ሊቀ ጳጳሳት
ወማርያም እህተ አልዓዛር
ወጊዮርጊስ ሐዲስ
ወጎርጎርዮስ ዘአርማንያ
ወታኦድራ ቅድስት
ወካልአን ሰማዕት

መዝሙር Psalm

ጓል ጢሮስን ናይ ህዝቢ ሃብታማትን፣ ገጸ በረኸት ሒዞም፣ ሞገስካ ኺደልዩ እዮም። ጓል ንጉስ ኣብ ውሽጢ ዅለንትናኣ ኽብርቲ እያ፣ ክዳውንታ ወርቀዘቦ እዩ።

ወንጌል Gospel

38. ኪኸዱ ኸለዉ ድማ ኢየሱስ ናብ ሓንቲ ዓዲ ኣተወ፤ ማርታ ዝስማ ሓንቲ ሰበይቲ ኸኣ ኣብ ቤታ ተቐበለቶ። 39. ማርያም እትብሃል ኃብቲ ድማ ነበረታ፤ ንሳ ኸኣ ቓሉ ኽትሰምዕ ኣብ ጥቓ እግሪ ኢየሱስ ተቐሚጣ ነበረት። 40. ማርታ ግና ብብዙኅ ምግልጋል ትጽዕር ነበረት። ደው ኢላ ኸኣ፣ “ጐይታይ፥ ኃብተይ ኃዲጋትኒ በይነይ ከገልግልዶ ግዲ የብልካን ኢኻ፧ ክትድግፈኒ እንዶ ንገራ፧” በለቶ። 41. ኢየሱስ ድማ “ማርታ! ማርታ! ብብዙኅ ነገር ትጭነቕን ትስህርን አሎኺ። 42. እቲ ዜድሊ ግና ሓደ ነገር ጥራይ እዩ። ማርያምሲ ካብኣ ዘይውሰድ ሠናይ ግደ ኃርያ ኣላ” ኢሉ መለሰላ። ‘ሓንቲ ቃል ካብ ኦሪት ወይ ነብያት ካብ ትሓልፍ ሰማይን ምድርን ክሓልፍ ይቐልል።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ጕንዲ ወይኒ ኻብ ግብጺ ኣውጻእካ፣ ኣህዛብ ሰጒጕካውን ተኸልካያ። አብ ቅድሚኣ ቦታ ኣዳሎኻላ።

ወንጌል Gospel

5. እቲ ጒንዲ ወይኒ ኣነ እየ፥ ጨናፍር ከኣ ንስኻትኩም ኢኹም፥ እቲ ኣባይ ዚነብር ኣነውን ኣብኡ፥ ንሱ እዩ ብዙኅ ፍረ ዚፈሪ፤ ምኽንያቱ ብጀካይ ሓንቲ እኳ ኽትገብሩ ኣይትኽእሉን ኢኹም። 6. ኣባይ ዘይነብር ዘበለ ኸም ጨንፈር ወይኒ ንወፃኢ ተደርብዩ ይነቅጽ፥ ኣኪቦም ድማ ናብ ሓዊ ይድርብይዎ እሞ ይነድድ። 7. ኣባይ እንተ ነበርኩም፥ ቃለይውን ኣባኻትኩም እንተ ኃደረ፥ እትደልይዎ ዘበለ ትልምኑ እሞ ይኾነልኩም። 8. ብዙኅ ፍረ እንተ ፈሬኹም ኣቦይ በዚ ኪኸብር እዩ፥ ንስኻትኩም ከኣ ደቀ መዛሙርተይ ክትኮኑ ኢኹም። 9. “ከምቲ ኣቦ ዘፍቀረኒ ኣነውን ኣፍቂረኩም እየ፤ ኣብ ፍቕረይ ንበሩ። 10. ከምቲ ኣነ ትእዛዛት ኣቦይ ሓልየ ኣብ ፍቕሩውን ጸኒዐ ዝነብር ዘሎኹ፥ ከምኡ ኸኣ ንስኻትኩም ትእዛዛተይ እንተ ሓሎኹም ኣብ ፍቕረይ ጸኒዕኩም ክትነብሩ ኢኹም። 11. ሓጐሰይ ኣባኻትኩም ምእንቲ ኺነብር፥ ሓጐስኩምውን ምሉእ ምእንቲ ኪኸውንሲ እዚ ነገርኩኹም። ብወልድ ዝአምን ናይ ዘልኣለም ሕይወት ኣለዎ።

መዝሙረ ዳዊት Psalm

ዎ ኣምላኽ፣ ሓድሽ መዝሙር እዝምረልካ፣ ዓሰርተ ብዘውታሩ በገና እውድሰካ ኣሎኹ። ንነገስታት ዲል ዝሀብካ፣ ንዳዊት ባርያኻ ኻብ ክፉእ ሰይፊ ዘድሐንካ ንስኻ ኢኻ።

ወንጌል Gospel

24. ናብ ቅፍርናሆም ምስ መጹ እቶም ግብሪ ቤት መቕደስ ዚቕበሉ ናብ ጴጥሮስ መጺኦም፥ “መምህርኩምሲ ግብሪዶ ኣይከፍልን እዩ፧” በልዎ። 25. ንሱ ድማ “ይኸፍል እባ” ኢሉ መለሰ። ናብ ቤት ምስ ኣተወ ኢየሱስ ኣቐዲሙ “ስምዖን፥ እንታይ ይመስለካ፧ ነገሥታት ምድርስ ግብርን ቀረጽን ካብ መን ይቕበሉ፧ ካብ ደቆምዶ ወይ ካብ ካልኦት” በሎ። 26. ጴጥሮስ ከኣ “ካብ ካልኦት እባ” በለ። ኢየሱስ ከኣ “ደቆምስ እምበኣር ናጻ እዮም፧ 27. ከይንዕንቕፎም ግና ናብ ባሕሪ ኼድካ መቚለብ ዓሣ ደርቢ፥ ነቲ ቕድም እትኅዞ ዓሣ ውሰድ። ኣፉ ምስ ከፈትካ ኣብኡ ሓደ ኣስታቴር ክትረክብ ኢኻ። ንእኡ ወሲድካ ኣብ ክንዳይን ኣብ ክንዳኻን ሃቦም” በሎ። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

መልእክተ ጳውሎስ Pauline Epistle

1. ነፍስ ወከፍ ነቲ ኣብ ልዕሊኡ ዘሎ ብዓል ሥልጣን ይገዝኣዮ፥ ከመይ ካብ ኣምላኽ እንተ ዘይኮይኑ ኻልእ ሥልጣን የልቦን። እቶም ዘለዉ ሰብ ሥልጣንውን ብኣምላኽ ዝተሠርዑ እዮም። 2. ስለዚ ኸኣ ንብዓል ሥልጣን ዚቃወም፥ ኣምላኽ ንዝሠርዖ እዩ ዚቃወም፥ እቶም ዚቃወምዎ ድማ ኣብ ገዛእ ርእሶም ፍርዲ ኼምጽኡ እዮም። 3. እቶም ገዛእቲ ንእኩይ ዚገብሩ እምበር ንሠናይ ዚገብሩ ኣየፍርሁን እዮም። ንበዓል ሥልጣን ከይትፈርሆዶ ትደሊ ኢኻ፧ ሠናይ ግበር፥ ንሱውን ኪንእደካ እዩ። 4. ከመይ ንሱ ኣምላኽ ንሠናይካ ኢሉ ዝሸሞ ኣገልጋሊ እዩ። እኩይ እንተ ገበርካ ግና ፍራህ፥ ምኽንያቱ ሰይፊ ንኸንቱ ኣይዕጠቕን እዩ። ንሱ ኣገልጋሊ ኣምላኽ ስለ ዝኾነ ነቲ እኩይ ዝግብሩ ኺቐጽዕ ልኡኽ ቊጥዓ ኣምላኽ እዩ። 5. ስለዚ መቕጻዕቲ ፈሪህኩም ጥራይ ዘይኮነ ሕልናኹም ስለ ዚወቕሰኩምውን ክትግዝኡ ይግብኣኩም እዩ። 6. ንሳቶም ኣገልገልቲ ኣምላኽ እዮም፥ ኣብዚ ተግባር እዚ ድማ ኸየብኰሩ ተጸሚዶም ኣለዉ። ስለዚ ግቡእኩም እዩ እሞ ግብሪ ኽፈሉ። 7. እምበኣርከስ ግብሪ ንዚግብኦ ግብሪ፥ ቀረጽ ንዝግብኦ ቐረጽ፥ ፍርሃት ንዝግብኦ ፍርሃት፥ ክብሪ ንዝግብኦ ኽብሪ፥ ንዅሉ እቲ ዘዚግብኦ ሃብዎ። 8. ንሓድሕድኩም ምፍቓር እንተ ዘይኮይኑ፥ ምስ ሓደ እኳ ዕዳ ኣይሃልኹም። ምኽንያቱ እቲ ንብጻዩ ዜፍቅር ንሕጊ ፈጺምዎ እዩ።

ዘካልእ መልእክት Universal Epistle

16. ከም ኣገልገልቲ ኣምላኽ ብሓርነት ንበሩ እምበር፥ ከምቶም ነቲ ሓርነትሲ መጐልበቢ ኽፍኣት ዚገብርዎ ኣይትኹኑ። 17. ንዅሉ ሰብ ኣኽብሩ፥ ፍቕሪ ኣኅዋት ይሃሉኹም፥ ንኣምላኽ ፍርህዎ፥ ንንጉሥ ኣኽብርዎ። 18. ኣቱም ግዙኣት፥ ነቶም ሕያዎትን ልኡማትን ጐይቶትኩም ጥራይ ዘይኮነስ፥ ነቶም ዓመጽቲውን ከይተረፈ ብዅሉ ኽብሪ ተኣዘዝዎም። 19. ሓደ እኳ ተዓሚጹ ኸሎ ምእንቲ ኣምላኽ ኢሉ እንተ ተዓገሠ፥ ብኣምላኽ ቅቡል እዩ። 20. በደል እናገበርኩም መውቃዕቲ እንተ ተዓገሥኩምከ እንታይ ሓበን ኣለዎ፧ ሠናይ እናገበርኩም መከራ እንተ ተዓገሥኩም ግና እዚ ኣብ ቅድሚ ኣምላኽ ቅቡል እዩ። 21. ንስኻትኩምውን ነዚ ኢኹም ዝተጸዋዕኩም፥ ክርስቶስ ድማ ኣሰር ኣሰሩ ምእንቲ ኽትስዕቡ ኢሉ ምእንታኹም መከራ ተቐበለ፥ ኣርኣያውን ኃደገልኩም። 22. “ንሱ ኃጢኣት ኣይገበረን፥ ሓሶትውን ኣብ ኣፉ ኣይተረኽበን።” 23. ምስ ጸረፍዎ መሊሱ ኣይጸረፈን፥ መከራ ምስ ኣጽገብዎ ኸኣ ነቲ ብቕንዕና ዚፈርድ ኣምላኽ ደኣ ነገሩ ኣኅሊፋ ሃበ እምበር ኣየፈራርሀን። 24. ካብ ኃጢኣት ርሒቕና ብጽድቂ ምእንቲ ኽንነብር ንሱ ባዕሉ ንኃጢኣትና በቲ ኣብ መስቀል ዝተሸንከረ ስብነቱ ፆሮ። ብቚስሉ ኢኹም ዝሓዌኹም። 25. ከመይ ከም ኣባጊዕ ተባሪርኩም ጠፊእኩም ነበርኩም፥ ሕጂ ግና ናብቲ ጓሳኹምን ሓላዊ ነፍሳትኩምን ተመሊስኩም ኣሎኹም።

ግብረ ሃዋርያት Acts

10. ኣብ ደማስቆ ኸኣ ሓደ ሃናንያ ዝስሙ ወደ መዝሙር ነበረ። ንእኡ ጐይታ ብራእይ “ሃናንያ” ኢሉ ጸውዖ፤ ንሱ ከኣ “እኔኹ ጐይታይ” ኢሉ መለሰ። 11. ጐይታ ኸኣ “ተንሥእ እሞ ናብታ ቕንዕቲ ተባሂላ እትጽዋዕ መገዲ ኺድ፤ ሳውል ዚብሃል ሰብኣይ ብዓል ጠርሴስ ይጽሊ ኣሎ እሞ ኣብ ቤት ይሁዳ ድለዮ፤ 12. ንእኡውን ንስኻ ኼድካ፥ ኢድካ ኣንቢርካ ከም ዚርኢ ኽትገብሮ ምዃንካ ብራእይ ገሊጸሉ ኣሎኹ” በሎ። 13. ሃናንያ ኸኣ “ጐይታይ! ብዛዕባ እዚ ሰብኣይዚ፥ ኣብ ኢየሩሳሌም ንቕዱሳንካ ክንደይ ክፉእ ከም ዝገበሮም ካብ ብዙኃት ሰሚዐ ኣሎኹ። 14. ኣብዚ ድማ ነቶም ስምካ ዚጽውዑ ዅሎም ኪኣስር ካብ ሊቃነ ካህናት ሥልጣን ኂዙ መጺኡ ኣሎ” ኢሉ መለሰ። 15. ጐይታ ግና “ኪድ ድኣ እዚ ሰብኣይ እዚ ኣብ ቅድሚ ኣሕዛብን ነገሥታትን ደቂ እስራኤልን ስመይ ኪፀውር ዘለዎ ናተይ ኅሩይ ኣቕሓ እዩ። 16. ምእንቲ ስመይውን ክንደይ ብዙኅ ሓሳረ መከራ ኪቕበል ከም ዚግብኦ ኸርእዮ እየ” በሎ። 17. ሃናንያ ኸኣ ከደ፥ ናብ ቤትውን ኣተወ፥ ኢዱ ኣብ ልዕሊኡ ኣንቢሩ ኸኣ “ሳውል ኃወይ! እቲ ኽትመጽእ ከሎኻ ኣብ መገዲ ዝተራእየካ ጐይታና ኢየሱስ ክትርእን መንፈስ ቅዱስ ኪመልኣካን ናባኻ ልኢኹኒ” በሎ። 18. ብኡብኡ ኸኣ ካብ ኣዕይንቱ ከም ቅራፍ ዝበለ ረጊፉ ወደቐ እሞ ረኣየ፤ ተንሢኡውን ተጠምቀ። 19. ምግቢ ምስ በልዐ ድማ በርትዐ። 20. ብኡብኡ ድማ ኣብ ቤት ጸሎት ኣይሁድ “ኢየሱስ ወዲ ኣምላኽ እዩ” እናበለ ሰበኸ።

ስንክሳር Synaxarium

አብርሃ ወአጽብሃ ነገሥተ ኢትዮጵያ
ወባኮስ ቢጹ ለሰርጊስ
ወገብረ ክርስቶስ
ወሐናንያ ፩እም ፸ወ፪ አርድእት

መዝሙር Psalm

ኢትዮጵያ ቐልጢፋ ኣእዳዋ ናብ ኣምላኽ ክትዝርግሕ እያ። አቱም መንግስትታት ምድሪ፣ ነቲ ኣብ ልዕሊ ናይ ጥንቲ ሰማየ ሰማያት ዚኸይድ ኣምላኽ ዘምሩ፣ ንእግዚኣብሄር ዘምሩሉ።

ወንጌል Gospel

36. ድኅርዚ ነቶም ሕዝቢ ኣፋንዩ ናብ ቤት ኣተወ፥ ደቀ መዛሙርቱ ድማ ቐሪቦም “ምስላ ናይቲ ኣብ ግራት ዝበቘለ ኽርዳድ ተርጕመልና” በልዎ። 37. ንሱ ድማ ኸምዚ ኢሉ መለሰሎም፡ - “እቲ ጽሩይ ዘርኢ ዚዘርእ ወዲ ሰብ እዩ፥ 38. እታ ግራት ዓለም እያ፥ ጽሩይ ዘርኢ ድማ ደቂ መንግሥቲ እዮም፥ እቲ ኽርዳድ ግና ደቂ እቲ እኩይ እዮም። 39. እቲ ዝዘርኦም ጸላኢ ኸኣ ድያብሎስ እዩ፥ ቀውዒ ድማ መወዳእታ ዓለም እዩ፥ እቶም ዓጻዶውን መላእኽቲ እዮም። 40. እምበኣር ነቲ ኽርዳድ ኣኪቦም ብሓዊ ኸም ዜንድድዎ ኣብ መወዳእታ ዓለም ከኣ ኸምኡ ኺኸውን እዩ። 41. ወዲ ሰብ ንመላእኽቱ ኪልእኮም እዩ፥ ንሳቶም ከኣ ንዅሎም ምኽንያት ኃጢኣት ዝኾኑን ገበርቲ ኽፉእን ካብ መንግሥቱ ኺእክብዎም እዮም። 42. ኣብ እቶን ሓዊ ኺድርብይዎም እዮም፥ ኣብኡ ድማ ብኽያትን ምሕርቃም ኣስናንን ኪኸውን እዩ። 43. ሽዑ ጻድቃን ኣብ መንግሥቲ ኣቦኦም ከም ፀጸሓይ ኪበርሁ እዮም፥ እትሰምዕ እዝኒ ዘላቶ ይስማዕ። ተቐቢሩ ዝተረኽበ ወርቅን ዕንቊን ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ኣበሳኡ እተሐድገሉ፣ ሓጢኣቱ እተሰወረሉ ሰብ ብጹእ እዩ። እግዚኣብሄር በደሉ ዘይጽብጽበሉ፣ ኣብ መንፈሱውን ልግሚ ዜብሉ ሰብ ብጹእ እዩ።

ወንጌል Gospel

22. ኢየሱስ ከኣ ኸምዚ ኢሉ መለሰሎም፡ - “ብኣምላኽ እመኑ። 23. እቲ ብልቡ ኸይተጠራጠረ እቲ ዚልምኖ ከም ዚፍጸም ዚኣምን ኵሉ፥ ነዚ እምባ እዚ ‘ካብዚ ተላዒልካ ናብቲ ባሕሪ ተወርወር’ እንተ በሎ ንእኡ ከም ዚኾነሉ ብሓቂ እብለኩም ኣሎኹ። 24. ስለዚ እትጽልይዎን እትልምንዎን ዘበለ ኸም ዝተቐበልኩምዎ እመኑ እሞ ኪኾነልኩም እዩ፥ እብለኩም ኣሎኹ። 25. ደው ኢልኩም ክትጽልዩ ኸሎኹም ከኣ ሰማያዊ ኣቦኹም በደልኩም ምእንቲ ኺኃድገልኩም፥ ንብጻይኩም ዝኃዝኩምሉ በደል እንተሎ፥ ኅደጉሉ። 26. ንስኻትኩም እንተ ዘይኃደግኩም ግና እቲ ኣብ ሰማይ ዘሎ ኣቦኹም ድማ በደልኩም ኣይኃድገልኩምን እዩ።” እትሰምዕ እዝኒ ዘላቶ ይስማዕ!

መዝሙረ ዳዊት Psalm

እግዚኣብሄርሲ ኣምላኽ ምዃኑ ፍለጡ፣ ንሱ ገበረና፣ ባዕላትና ኣይኰንናን፣ ንሕናስ ህዝቡን ኣባጊዕ መጓሴኡን ኢና። አብ ደጌታቱ ብምስጋና፣ አብ አጸዱውን ብውዳሴ እተዉ፣ አመስግንዎ ንስሙ ኸኣ ባርኹ።

ወንጌል Gospel

1. ኣስዒቡ ኸኣ ኢየሱስ ከምዚ በለ፦ “እቲ ናብ ደምበ ኣባጊዕ ብኣፍ ደገ ዘይኣቱ፥ ብኻልእ ወገን ዚሓኵር፥ ንሱ ሰራቕን ጒሒላን ከም ዝኾነ ብሓቂ፥ ብሓቂ እብለኩም ኣሎኹ። 2. እቲ ብኣፍ ደገ ዚኣቱ ግና ንሱ ጓሳ ኣባጊዕ እዩ። 3. ንእኡ እቲ ሓላው ኣፍ ደገ ይኸፍተሉ፥ እተን ኣባጊዕውን ድምፁ ይሰምዓ፥ ነተን ኣባጊዑ ኸኣ በብስመን ጸዊዑ የውፍረን። 4. ንዅለን ነተን ኣባጊዑ ምስ ኣውፈረን ድማ ቀቅድሚአን ይኸይድ፥ እተን ኣባጊዑውን ድምፁ ስለ ዘለልያ ይስዕባኦ። 5. ንጓና ግና ድምፁ ስለ ዘየለልያ፥ ኻብኡ ይገልባ እምበር ኣይስዕባኦን እየን።” 6. ኢየሱስ ነዚ ምስላ እዚ መሰለሎም፥ ንሳቶም ግና ነቲ ዝተዛረቦም ኣየስተውዓልዎን። 7. ስለዚውን ኢየሱስ ከም ብሓድሽ ከምዚ በሎም፦ “ብሓቂ፥ ብሓቂ እብለኩም ኣሎኹ፥ እቲ ኣፍ ደገ ኣባጊዕ ኣነ እየ። 8. እቶም ቅድመይ ዝመጹ ዅላቶም ሰረቕትን ጐሓሉትን እዮም፥ እተን ኣባጊዕ ግና ኣይሰምዓኦምን እየን። 9. እቲ ኣፍ ደገ ኣነ እየ፤ ብኣይ ዚኣቱ ኪድኅን እዩ፤ ኪኣቱን ኪወፍርን እዩ፤ መጓሰዪውን ኪረክብ እዩ። 10. ሰራቒ ኪሰርቕን ኪሓርድን ኬጥፍእን እንተ ዘይኮይኑ ኣይመጽእን እዩ፤ ኣነ ግና ሕይወት ምእንቲ ኺረኽባ፥ ብምልኣትውን ምእንቲ ኺረኽባ እየ ዝመጻእኩ። 11. “ሕያዋይ ጓሳ ኣነ እየ፥ እቲ ሕያዋይ ጓሳ ሕይወቱ በጃ ኣባጊዑ ኣኅሊፉ ይህብ። 12. እቲ ጓሳ ዘይኮነ ብዓል ዓስቢ ግና፥ እተን ኣባጊዕ ዘይጥሪቱ ስለ ዝኾና ተዅላ ኪመጽእ እንተ ረኣየ፥ ነተን ኣባጊዕ ኃዲግወን ይሃድም፥ እቲ ተዅላ ድማ ነተን ኣባጊዕ ይዝርፈን ፋሕውን የብለን። 13. ብዓል ዓስቢ ስለ ዝኾነ ይሃድም፥ ግዲ እተን ኣባጊዕውን የብሉን። 14. - ብወልድ ዝአምን ናይ ዘልኣለም ሕይወት ኣለዎ።

መልእክተ ጳውሎስ Pauline Epistle

13. ነቲ ኻባና ዝሰማዕኩሞዎ ቓል ኣምላኽ ምስ ተቐበልኩምዎ ከምቲ ኣባኻትኩም ኣብቶም ኣመንቲ፥ ዚዓዮ ዘሎ፥ ከምቲ ሓቁ ኸም ቃል ኣምላኽ እምበር፥ ከም ቃል ሰብ ስለ ዘይተቐበልኩሞዎ፥ ንሕና ኸየቋረጽና ንኣምላኽ ነመስግኖ ኣሎና። 14. ኣኅዋተይ፥ ንስኻትኩም ነተን ኣብ ክርስቶስ ኢየሱስ ዚነበራ፥ ኣብ ይሁዳ ዘለዋ ኣብያተ ክርስቲያን ኣምላኽ መሲልኩምወን ኢኹም። ከመይ ከምቲ ንሳተን ብኣይሁድ ሓሰራ መከራ ዝጸገባ፥ ንስኻትኩምውን ከምኡ ብደቂ ዓድኹም መከራ ጸጊብኩም ኢኹም። 15. - 16. ኣይሁድ ንጐይታና ኢየሱስን ንነብያትን ቀተልዎም፥ ንኣና ኸኣ ኣሳደዱና። ኣሕዛብ ምእንቲ ኺድኅኑ ንሕና ወንጌል ከይንሰብከሎም ብምኽልካሎም ንእግዚኣብሔር ኣየሓጐስዎን። ምስ ኵሉ ሰብ ኸኣ ይጻልኡ ኣለው። በዚ ኸኣ ከም ቀደሞም መስፈር ኃጢኣቶም ይመልኡ ኣለው። ግናኸ ቚጥዓ ኣምላኽ ኣብ ልዕሊኦም ድሮ ወሪዱ ኣሎ። 17. እንተኾነ፥ ኣኅዋተይ፥ ብልቢ ምሳኹም ከሎናስ ንሓጺር ጊዜ ካባኻትኩም ተፈሊና ስለ ዝነበርና፥ ገጽኩም ክንርእየኩም ብዙኅ ናፍቆትን ሃረርታን ነይሩና። 18. ስለዚ ናባኻትኩም ክንመጽእ ደሊና ኔርና። ኣነ ጳውሎስ እኳ ደጋጊመ ኽመጽእ ፈቲነ ነይረ። ግናኸ ሰይጣን ዓገተና። 19. ከመይ ተስፋና ወይ ሓጐስና ወይ ኸኣ ኣብ ካልኣይ ምጽኣቱ ኣብ ቅድሚ ጐይታና ኢየሱስ እንምክሓሉ ኣኽሊልና መን ድዩ፧ ንስኻትኩምዶ ኣይኮንኩምን፧ 20. ብርግጽ ክብርናን ሓጐስናን ንስኻትኩም ኢኹም።

ዘካልእ መልእክት Universal Epistle

12. ኣቱም ፍቁራተይ፥ ከም ሓዊ ዚባላዕ ፈተና ኺረኽበኩም ከሎ፥ ሓደ ሓዱሽ ነገር ከም ዝበጽሓኩም ኴንኩም ኣይትገረሙ። 13. ንሱ ብግርማ ኺግለጽ ከሎ ኣዝዩ ባህ ኪብለኩም እዩ እሞ ኣብ ሥቓይ ክርስቶስ ክትካፈሉ ኸሎኹም ተሓጐሱ። 14. ምእንቲ ስም ክርስቶስ እንተ ተጸረፍኩም፥ እቲ ኽቡር መንፈስ ኣምላኽ ኣባኻትኩም ስለ ዚኃድር ተሓጐሱ። 15. ሓደ እኳ ኻባኻትኩም ቀታሊ፥ ወይ ሰራቒ፥ ወይ ገባር ክፋእ፥ ወይ ኣብ ነገር ካልኦት ኢዱ ዜእቱ ብምዃኑ ስቓይ ዚቕበል ኣይሃሉኹም። 16. ክርስቲያን ብምዃን እንተ ተሳቐየ ግና፥ ስለ እዚ ስም እዚ ንኣምላኽ የመስግን እምበር ኣይኅፈር። 17. ጊዜ ፍርዲ ቐሪቡ እዩ፥ ዚጅምሮ ኸኣ በቶም ኣብ ቤት ኣምላኽ ዘለዉ እዩ። ብኣና ዚጅምር ካብ ኮነኸ፥ መወዳእታ እቶም ንወንጌል ኣምላኽ ዘይእዘዙ ደኣ እንታይ ኪኽውን እዩ፧ 18. “እቲ ጻድቕ ብኃይሊ ገደል ዚድኅን ካብ ኮነኸ፥ እቲ ዓማጽን ኃጥእን ደኣ እንታይ ኪኸውን እዩ፧” 19. እምበኣር እቶም ከም ፍቓድ ኣምላኽ ዚሳቐዩ፥ ሠናይ እናገበሩ ንገዛእ ርእሶም ኣብቲ እሙን ፈጣሪ የማኅጽኑ።

ግብረ ሃዋርያት Acts

22. እቲ ሕዝቢ ኸኣ ኣብ ልዕሊኦም ተንሢኡ ተጻብኦም፥ እቶም ሮማውያን ሰበ ሥልጣን ድማ ክዳውንቶም ገፊፎም ብበትሪ ኪዘብጥዎም ኣዘዙ። 23. ብዙኅ ምስ ገረፍዎም ከኣ ናብ ቤት ማእሰርቲ ኣእተውዎም፤ ነቲ ሓላው ቤት ማእሰርቲ ድማ ኣጽኒዑ ኪሕልዎም ኣዘዝዎ። 24. ንሱ ነዚ ትእዛዝ እዚ ምስ ተቐበለ ኸኣ፥ ናብቲ ዝወሸጠ ቤት ማእሰርቲ ኣእተዎም፤ ኣእጋሮም ድማ ብመቚሕ ጒንዲ ኣጽኒዑ ኣሰሮም። 25. ፍርቂ ለይቲ ምስ ኮነ ድማ፥ ጳውሎስን ሲላስን እናጸለዩ፥ ንኣምላኽ ብመዝሙር የመስግኑ ነበሩ፤ እቶም ካልኦት እሱራት ከኣ ይሰምዕዎም ነበሩ። 26. ብሃንደበት ድማ፥ መሠረት እታ ቤት ማእሰርቲ ኽሳብ ዚናወጽ፥ ብርቱዕ ምንድቕዳቕ ምድሪ ኾነ፤ ብኡብኡ ኸኣ ኵሉ እቲ መዓጹ ተኸፍተ፥ ናይ ኵላቶም መቓውሕውን ተፈትሐ። 27. እቲ ሓላው ቤት ማእሰርቲ ምስ ተበራበረ ኸኣ መዓጹ እታ ቤት ማእሰርቲ ተኸፊቱ ረኣየ፤ እቶም እሱራት ዝመለቑ መሲልዎ ድማ ሰይፉ መሊሑ ባዕሉ ንባዕሉ ኪቐትል ደለየ። 28. ጳውሎስ ግና ዓው ኢሉ “ርእስኻ ኣይትጒዳእ፥ ኵላትና ኣብዚ ኣሎና” በሎ።

ስንክሳር Synaxarium

ጳውሎስ ሊቀ ጳጳሳት ዘቁስጥንጥያ
ወኪራኮስ ሰማዕት ዘአርአየ መካነ መስቀል
ወያዕቆብ ወልደ እልፍዮስ

መዝሙር Psalm

ብመገዶም ፍጹማት ዝዀኑ፣ ብሕጊ እግዚኣብሄር ዚመላለሱ ብጹኣን እዮም። ምስክራቱ ዚሕልዉ፣ ብምሉእ ልቢ ዚደልይዎ ብጹኣን እዮም።

ወንጌል Gospel

23. “ስለዚ መንግሥተ ሰማያት ምስ ኣግልገልቱ ኪጸባጸብ ዝደለየ ንጉሥ ትመስል። 24. ኪጸባጸብ ምስ ጀመረ ዓሠርተ ሽሕ መክሊት፥ ዕዳ ዘለዎ ሰብ ኣምጽእሉ። 25. ዚፈድዮ ምስ ሰኣነ ግና እቲ ጐይታኡ ንሱን ሰበይቱን ደቁን ዘለዎ ሃብቲ ዅሉን ኪሸይጥ እሞ እቲ ዕዳ ኪኸፍል ኣዘዘ። 26. እቲ ኣገልጋሊ ድማ ናብ እግሩ ተደፊኡ ‘ጐይታይ፥ ተዓገሠኒ ድኣ እምበር ኵሉ ኽፈድየካ እየ’ እናበለ ሰገደሉ። 27. እቲ ጐይታኡ ድማ ነቲ ኣገልጋሊ ደንገጸሉ እሞ ፈትሖ፥ ዕዳኡውን ኃደገሉ። 28. እቲ ኣገልጋሊ ምስ ወፀ ግና፥ ካብቶም ብጾቱ ሚእቲ ዲናር ዕዳ ዘለዎ ሓደ ኣገልጋሊ ረኸበ እሞ፥ ‘ኣባኻ ዘሎ ዕዳ ፍደየኒ’ ኢሉ ሓኒቑ ኃዞ። 29. ሽዑ እቲ ብጻዩ ኣገልጋሊ ‘ተዓገሠኒ፥ ኵሉ ኽፈድየካ እየ’ እናበለ ተደፊኡ ለመኖ። 30. ንሱ ግና ኣበዮ፥ ከይዱ ድማ ክሳዕ ዕዳኡ ዚፈድዮ ኣእሰሮ። 31. እቶም ብጾቱ ኣገልገልቲ ድማ እቲ ዝገበሮ ነገር ርእዮም ኣዝዮም ጐሃዩ፥ ከይዶምውን እቲ ዝዀነ ዅሉ ነገር ንጐይታኦም ነገርዎ። 32. ሽዑ ጐይታኡ ጸዊዑ ‘ኣታ ሕሱም ኣገልጋሊ፥ ኣነ ስለ ዝለመንካኒ ብዘሎ ዕዳኻ ኃደግኩልካ። 33. ንስኻኸ ከምቲ ኣነ ዝመሓርኩኻዶ ነቲ ብጻይካ ኽትምሕሮ ኣይምተገብኣካን፧’ በሎ። 34. ጐይታኡ ኸኣ ተቔጢዑ ዅሉ ዕዳኡ ፈጺሙ ክሳዕ ዚፈዲ ንዜሳቕይዎ ኣኅሊፉ ሃቦ። 35. እምበኣር ንስኻትኩም ድማ ነፍስ ወከፍኩም ንኃዉ ካብ ልቡ በደሉ እንተ ዘይኃዲጉሉ፥ ሰማያዊ ኣቦይውን ከምኡ ኺገብረኩም እዩ።” ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ብእኤን አትየ ንእግዚኣብሄር ከመስግኖስ፣ ደጌታት ጽድቂ ኽፈቱለይ። ደገ እግዚኣብሄር እዚኣ እያ፣ ጻድቃን ብእኣ ኺአትዉ እዮም።

ወንጌል Gospel

7. ስለዚውን ኢየሱስ ከም ብሓድሽ ከምዚ በሎም፦ “ብሓቂ፥ ብሓቂ እብለኩም ኣሎኹ፥ እቲ ኣፍ ደገ ኣባጊዕ ኣነ እየ። 8. እቶም ቅድመይ ዝመጹ ዅላቶም ሰረቕትን ጐሓሉትን እዮም፥ እተን ኣባጊዕ ግና ኣይሰምዓኦምን እየን። 9. እቲ ኣፍ ደገ ኣነ እየ፤ ብኣይ ዚኣቱ ኪድኅን እዩ፤ ኪኣቱን ኪወፍርን እዩ፤ መጓሰዪውን ኪረክብ እዩ። 10. ሰራቒ ኪሰርቕን ኪሓርድን ኬጥፍእን እንተ ዘይኮይኑ ኣይመጽእን እዩ፤ ኣነ ግና ሕይወት ምእንቲ ኺረኽባ፥ ብምልኣትውን ምእንቲ ኺረኽባ እየ ዝመጻእኩ። ብወልድ ዝአምን ናይ ዘልኣለም ሕይወት ኣለዎ።

መዝሙረ ዳዊት Psalm

ነመስግነካ፣ ዎ ኣምላኽ፣ ነመስግነካ ኣሎና፣ ስምካ ቐረባ እዩ፣ ሰብ ንተአምራትካ የዘንትውዎ።

ወንጌል Gospel

32. “ኣብ ቅድሚ ሰብ ንዝተኣመነኒ ዅሉ ኣነ ኸኣ ኣብ ቅድሚ እቲ ኣብ ሰማያት ዘሎ ኣቦይ ክእመኖ እየ። 33. ኣብ ቅድሚ ሰብ ንዝኸሓደኒ ግና፥ ኣነ ድማ ኣብ ቅድሚ እቲ ኣብ ሰማያት ዘሎ ኣቦይ ክኽሕዶ እየ። 34. “ኣነ ናብ ምድሪ ሰላም ከውርድ ዝመጻእኩ ኣይምሰልኩም፥ ኲናት ደኣ እምበር ሰላም ከውርድ ኣይመጻእኩን። 35. ወዲ ኻብ ኣቦኡ፥ ጓል ካብ ኣዲኣ፥ መርዓት ካብ ሓማታ ኽፈላሊ እየ ዝመጻእኩ። 36. ንሰብ ከኣ ጸላእቱ ቤተ ሰቡ ኪኾኑ እዮም። 37. እቲ ነቦኡ ወይ ነዲኡ ካባይ ኣብሊጹ ዜፍቅር ንኣይ ኣይበቅዕን እዩ። ካባይ ንወዱ ወይ ንጓሉ ኣብሊጹ ዜፍቅርውን ንኣይ ኣይበቅዕን እዩ። 38. እቲ መስቀሉ ፀይሩ ደድኀረይ ዘይስዕብ ንኣይ ኣይበቅዕን እዩ። 39. ንሕይወቱ ዚረኽባ ኼጥፍኣ እዩ፥ ንሕይወቱ ምእንታይ ዜጥፍኣ ኸኣ ኪረኽባ እዩ። 40. “ንኣኻትኩም ዚቕበል ንኣይ ይቕበል፥ እቲ ንኣይ ዚቕበል ድማ ነቲ ዝለኣኸኒ ይቕበሎ። 41. ንነቢይ ብስም ነቢይ ዚቕበል ዓስቢ ነቢይ ይረክብ፥ እቲ ንጻድቕ ብስም ጻድቕ ዚቕበል ዓስቢ ጻድቕ ይረክብ። 42. ካብዞም ናእሽቱ ንሓደ እኳ ብስም ወደ መዝሙር ዝሑል ብርጭቆ ማይ ጥራይ ዜስቲ፥ ዓስቡ ከቶ ከም ዘይስእን ብሓቂ እብለኩም ኣሎኹ።” ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

መልእክተ ጳውሎስ Pauline Epistle

5. እታ ሓጋዚ ዘይብላ መበለት ግና፥ ተስፋኣ ኣብ እግዚኣብሔር ገይራ፥ ምእንቲ ኪረድኣ ለይትን መዓልትን ብምህለላን ጸሎትን እያ እትጸንዕ። 6. እታ ብደስታ እዚ ዓለም እዚ ጥራይ እትነብር ግና፥ ብሕይወታ ኸላ ዝሞተት እያ። 7. ብዘይ መንቅብ ምእንቲ ኪኾኑስ፥ እዚ ድማ አዝዝ። 8. ሓደ እኳ ነቶም ኣዝማዱ፥ ምናዳ ግና ንስድራኡ፥ ዘይሐሊ እንተሎ፥ ንሱ እምነቱ ዝኸሐደ ኻብቲ ዘይኣምንውን ዝገደደ እዩ። 9. - 10. ካብ ስሳ ዓመት ንላዕሊ ዝዕድሜኣ፥ ሰበይቲ ሓደ ሰብኣይ ዝነበረት፥ ንሠናይ ግብሪ ብምስዓባ ዝተመስከረላ፥ ደቃ ብዝግባእ ዘዕበየት፥ ጋሻ ብምቕባል፥ እግሪ ኣመንቲ ብምሕጻብ፥ ንዝጸበቦ ብምርሃው፥ ንሠናይ ግብሪ ዘበለ ድማ ገዛእ ርእሳ ዝወፈየት መበለት፥ ምስተን መበላሉ ትቈጸር።

ዘካልእ መልእክት Universal Epistle

8. ዲያብሎስ፥ እቲ መጻርርትኹም፥ ዚውሕጦ ደልዩ ከም ዚጓዝም ኣንበሳ ይዘውር ኣሎ እሞ ተጠንቀቑ፥ ንቕሑ። 9. ኣብ እምነት ጸኒዕኩም ተቓወምዎ፥ ምኽንያቱ ነቶም ኣብ ምሉእ ዓለም ዘለዉ ኣኅዋትኩምውን እዚ መከራ እዚ ይበጽሖም ከም ዘሎ ትፈልጡ ኢኹም። 10. እቲ ብክርስቶስ ኢየሱስ ናብ ናይ ዘለዓለም ክብሩ ዝጸወዓኩም፥ ኣምላኽ ዅሉ ጸጋ፥ ቊሩብ ጊዜ ሓሰረ መከራ ምስ ጸገብኩም፥ ንሱ ፍጹማት ኪገብረኩም፥ ኬጽንዓኩም፥ ኬበርትዓኩም፥ ኪሥርተኩምውን እዩ። 11. ንዘለዓለም ዓለም ንእኡ ኽብርን ሥልጣንን ይኹን። ኣሜን። 12. በቲ እሙን ምዃን ኣነ ዝፈልጦ ስልዋኖስ ኃውና ገይረ ነዛ ሓጻር መልእኽቲ እጽሕፈልኩም ኣሎኹ። እዚ ኸኣ ከተባብዓኩምን እዚ ናይ ሓቂ ጸጋ ኣምላኽ ምዃኑ ኽምስክርን ኢለ እየ። ኣብዚ ጸጋ እዚ ጸኒዕኩም ደው በሉ። 13. እታ መተኃርይትኹም ዝኾነት ኣብ ባቢሎን እትርከብ ቤተ ክርስቲያን ሰላም ትብለኩም ኣላ። ማርቆስ ወደይውን ሰላም ይብለኩም ኣሎ። 14. ብክርስቲያናዊ ፍቕሪ እናተሰዓዓምኩም ንሓድሕድኩም ሰላም ተበሃሃሉ። ብክርስቶስ ዘሎኹም ኵላትኩም ሰላም ይሃልኹም። ኣሜን።

ግብረ ሃዋርያት Acts

31. በቲ ንሱ ዝሸሞ ሰብኣይ ገይሩ ንዓለም ብጽድቂ ዚፈርደላ መዓልቲ ወሲኑ ኣሎ፤ ነዚ ንዅሉ ሰብ ዘረጋገጾ ነቲ ዝኃረዮ ሰብኣይ ካብ ምውታት ብምትንሣኡ እዩ።” 32. ብዛዕባ ትንሣኤ ምውታት ምስ ሰምዑ ገሊኦም ኣላገጹሉ፥ ገሊኦም ከኣ፥ “እዝስ ከም ብሓድሽ ክንሰምዓካ ንደሊ ኢና” በልዎ። 33. ሽዑ ጳውሎስ ካብ ማእከሎም ወፂኡ ኸደ። 34. ገሊኣቶም ሰባት ከኣ ኣሚኖም ሰዓብዎ፥ ንሳቶም ድማ ሓደ ኻብቶም ናይ ኣርዮስፋጎስ ባይቶ፥ ዲዮናስዮስ ዚብሃልን፥ ደማሪስ እትብሃል ሰበይትን፥ ከምኡውን ካልኦት ሰባት ምስኣቶም ነበሩ።

ስንክሳር Synaxarium

ሐና ነብይት
ወአባ ጰንጠሌዎን
ወዕንባቆም
ወዲዮናስዮስ ዘሃገረ አቴና
ወተዝካረ ሄኖክ ወልደ ሴት
ወ፺፻ ወ፰ቱ ማኅበረ ጰንጠሌዎን

መዝሙር Psalm

ንመኻን፣ አደ ቘልዑ ገይሩ፣ አብ ቤት ብሓጐስ የንብራ። ንመኻን፣ አደ ቘልዑ ገይሩ፣ አብ ቤት ብሓጐስ የንብራ።

ወይ

መዝ 102 ፡ 3 - 5

ምብላዕ እንጌራይ ረሲዔዮ እየ እሞ፣ ልበይ ከም ሳዕሪ ጸምለወን ነቐጸን። ካብ ድምጺ ገዓረይ እተላዕለ አዕጽምተይ አብ ስጋይ ተጣበቐ።

ወይ

መዝ 102 ፡ 7 - 8

ተጋህኩ፣ ከምቲ አብ ናሕሲ በይኑ ዘሎ ዑፍ ከኣ እየ። ምሉእ መዓልቲ ጸላእተይ የላግጹለይ፣ ተጻረርተይ ብስመይ ይረግሙ ኣለዉ።

ወንጌል Gospel

36. ካብ ነገደ ኣሴር ሃና እትብሃል ጓል ፋኑኤል፥ ኣዝያ ዝኣረገት ነብዪት ነበረ፤ ካብ ድንግልናኣ ኂዛ ድማ ምስ ሰብኣያ ሾብዓተ ዓመት ገበረት። 37. ንሳ ሰማንያን ኣርባዕተን ዓመት ዝዕድሚኣ መበለት እያ። ካብ ቤተ መቕደስ ከይወፀት ከኣ ብጾምን ብጸሎትን ለይትን መዓልትን ንኣምላኽ ተገልግል ነበረት። 38. ንሳውን ሽዑ ናብኡ መጺኣ ንኣምላኽ ኣመስገነቶ፤ ነቶም ምድኃን ኢየሩሳሌም ዚጽበዩ ዅሎም ከኣ ብዛዕባኡ ተዛረበቶም። 39. ከምቲ ሕጊ እግዚኣብሔር ዚእዝዞ ዅሉ ምስ ፈጸሙ፥ ንገሊላ ናብ ናዝሬት ዓዶም ተመልሱ። ‘ሓንቲ ቃል ካብ ኦሪት ወይ ነብያት ካብ ትሓልፍ ሰማይን ምድርን ክሓልፍ ይቐልል።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ንመኻን፣ አደ ቘልዑ ገይሩ፣ አብ ቤት ብሓጐስ የንብራ። ንመኻን፣ አደ ቘልዑ ገይሩ፣ አብ ቤት ብሓጐስ የንብራ።

ወንጌል Gospel

22. ንሱ ግና ሓንቲ ቓል እኳ ኣይመለሰላን። ደቀ መዛሙርቱ ኸኣ ቐሪቦም “ደድኅሬና ትጠርዕ ኣላ እሞ ኣፋንዋ” ኢሎም ለመንዎ። 23. ንሱ ግና “ብዘይካ ናብተን ዝጠፉኣ ኣባጊዕ ቤት እስራኤል ኣይተለኣኽኩን” ኢሉ መለሰ። 24. ንሳ ድማ “ጐይታይ ርድኣኒ” እናበለት ቀሪባ ሰገደትሉ። 25. ንሱ ኸኣ መሊሱ “እንጌራ ውሉድ ኣልዒልካ ነኽላባት ምሃብ ጽቡቕ ኣይኮነን” በላ። 26. ንሳ ኸኣ “እወ ጐይታይ፥ ኣኽላባት ውን እምበር ካብ መኣዲ ጐይተቶም ዝወደቐ ርፍራፍ ይበልዑ እዮም” በለቶ። 27. ሽዑ ኢየሱስ “ኣቲ ሰበይቲ፥ እምነትኪ ዓቢይ እዩ፥ ከምቲ ዝደሌኽዮ ይኹነልኪ” ኢሉ መለሰላ። በታ ሰዓት እቲኣ ኸኣ ጓላ ሓወየት። ኢየሱስ ብዙኃት ሕሙማት ከም ዘሕወየ 28. ኢየሱስ ካብኡ ኃሊፉ ብወሰን ባሕሪ ገሊላ ኸደ፥ ናብ እምባ ደይቡ ድማ ኣብኡ ተቐመጠ። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

መዝሙረ ዳዊት Psalm

ንእግዚኣብሄር ብፍርሃት ኣገልግልዎ፣ ብረዓድ ከኣ ተሐጐሱ። ኵራኡ ቐልጢፉ ይነድድ እዩ እሞ፣ ከይዅሪ፣ ኣብ መገዲ ኸሎኹም ድማ ከይትጠፍኡስ፣ ንወዱ ስዐምዎ።
 

ወንጌል Gospel

1. “መንግሥተ ሰማያት ነታኽልቲ ወይኑ፥ ሰብ ውዕለት ኪደሊ ኣንጊሁ ዝወፀ ብዓል ቤት ትመስል። 2. ምስቶም ሰብ ውዕለት፥ ንነፍስ ወከፎም ንመዓልቲ ሓደ ዲናር ኪህቦም ምስ ተሳማምዐ ናብ ኣታኽልቲ ወይኑ ሰደዶም። 3. ብሣልሰይቲ ሰዓት ናይ መዓልቲ ኣቢሉ ምስ ወፀ ድማ ሥራሕ ዘይብሎም ካልኦት ኣብ ዕዳጋ ቐንፈዘው ኪብሉ ረኣየ። 4. ንኣታቶም ከኣ ‘ንስኻትኩምውን ናብቲ ኣታኽልቲ ወይነይ ኺዱ እሞ እቲ ዝግባእ ክህበኩም እየ’ በሎም። ንሳቶም ከኣ ኸዱ። 5. ከም ብሓድሽ ድማ ብሳድሰይትን ብታስዐይትን ሰዓት ናይ መዓልቲ ወፂኡ ከምኡ ገበረ። 6. ኣብ መበል ዓሠርተው ሓደ ሰዓት ናይ መዓልቲ ኣቢሉ ወፂኡ ድማ፥ ካልኦት ቀንፈዘው ዚብሉ ረኸበ፥ ‘ንምንታይ ምሉእ መዓልቲ ብዘይ ሥራሕ ኣብዚ ዘዘው እትብሉ፧’ በሎም። 7. ንሳቶም ከኣ ‘ውዕለት ዜውዕለና ስለ ዝስኣንና’ በልዎ። ‘ሕራይ እንበኣር ንስኻትኩም ውን ናብቲ ኣታኽልቲ ወይኒ ኺዱ’ በሎም። 8. “ምስ መሰየ እቲ ብዓል ኣታኽልቲ ወይኒ ንኣዛዝ ቤቱ ‘ነቶም ሰብ ውዕለት ጸውዓዮም፥ ካብቶም ዳኅሮት ጀሚርካ ኸኣ ክሳዕ እቶም ቀዳሞት ውዕለቶም ሃቦም’ በሎ። 9. እቶም ሰብ መበል ዓሥርተው ሓደ ሰዓት ናይ መዓልቲ ቐሪቦም ደዲናሮም ተቐበሉ። 10. እቶም ቀዳሞት ምስ ቀረቡ ኸኣ ካብቶም ዳኅሮት ዚበዝኅ ዚቕበሉ መሰሎም፥ ግናኸ ንሳቶምውን ደዲናሮም ተቐበሉ። 11. - 12. ምስ ተቐበሉ ኸኣ ‘ነዞም ሓንቲ ሰዓት ዝሥረሑ ዳኅሮት ምስ እዞም ድኻም መዓልቲን ሃሩርን ዝፆርና ኣዳላደልካዮም’ እናበሉ ኣብ ልዕሊ እቲ በዓል ቤት ኣዕዘምዘሙ። 13. ንሱ ኸኣ ንሓደ ኻብኣቶም ‘ዓርከይ ኣይዓመጽኩኻን፥ ብሓደ ዲናርዶ ኣይተሰማማዕካንን፧ 14. ዚብጽሓካ ደኣ ኂዝካ ኺድ፥ ነዚ ዳኅራይ ድማ ክንዲ ናትካ ኽህቦ ፍቓደይ እዩ። 15. ወይ ድማ ብገንዘበይ ዝደሌኽዎ ኽገብርዶ ኣይግበኣንን እዩ፧ ወይስ ኣነ ሕያዋይ ስለ ዝኾንኩ ዓይንኻዶ ቐናእ እዩ፧’ ኢሉ መለሰሉ። 16. “ከምኡኸስ ጽዉዓት ብዙኃት ኅሩያት ግና ውሑዳት እዮም እሞ ዳኅሮት ቀዳሞት፥ ቀዳሞትውን ዳኅሮት ኪዀኑ እዮም።” ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

መልእክተ ጳውሎስ Pauline Epistle

23. ኣገልገልቲ ክርስቶስ ድዮም፧ ከም ጽሉል ደኣ እየ ዝዛረብ ዘሎኹ እምበር፥ ኣነ እበልጾም። ኅልፊኦም ዝጸዓርኩ፥ ብዙኅ ጊዜ ዝተኣሰርኩ፥ ብዙኅ ጊዜ ዝተገረፍኩ፥ ብዙኅ ጊዜ ኣብ ኣፍ ሞት ዝበጻሕኩ እየ። 24. ኃሙሽተ ጊዜ፥ ነርብዓ ጭጕራፍ ሓደ ጐደል፥ ብኣይሁድ ተገረፍኩ። 25. ሠለስተ ሳዕ ብሽመል ተዘበጥኩ፥ ሓደ ሳዕ ብዳርባ እምኒ ተቐጥቀጥኩ። ሠለስተ ሳዕ እታ ዝነበርክዋ መርከብ ተሰብረትኒ። ሓደ ለይትን ሓደ መዓልትን ኣብ ባሕሪ ገበርኩ። 26. ብዙኅ ጊዜ መንገደኛ ኾይነ ነበርኩ። ብውሕጅን ብኸተርትን ኸኣ ተጨነቕኩ፥ ብኣይሁድን ብኣሕዛብን ተጨነቕኩ፥ ኣብ ከተማን ኣብ በረኻን ኣብ ባሕርን ተጨነቕኩ፥ በቶም ሓሰውቲ ኣኅዋት ተጨነቕኩ። 27. ብዕዮ፥ ብፃዕሪ፥ ድቃስ ለይቲ ብምስኣን፥ ብጥሜት፥ ብጽምኢ፥ ብስእነት መግቢ፥ ኣብ ጥራይ ዝባነይ ቍሪ ብምቕባል ነበርኩ። 28. ኣብ ርእሲ እዚ ዅሉ ኸኣ፥ እቲ ብዛዕባ ዅለን ኣብያተ ክርስቲያን ዘሎኒ ኃልዮት ኣብ ጸጽባሕ የጽብበለይ ኣሎ። 29. ሓደ ኺደክም ከሎ ኣነ ኸኣ እደክም፥ ሓደ ብኃጢኣት ኪወድቕ ከሎ ኣነ ኸኣ እኃዝን። 30. እንተ ደኣ ኽምካሕ ኮይነ ግና ብድኻመይውን ክምካሕ እየ። 31. እቲ ኣቦ ጐይታና ኢየሱስ ዝኾነ ኣምላኽ፥ ስሙ ንዘልዓለም ይመስገን ኣነ ከም ዘይሕሱ ይፈልጥ እዩ። 32. ኣብ ደማስቆ፥ እቲ ኣብ ትሕቲ ንጉሥ ኣርስጣስዮስ ኮይኑ ዜመኃድር ዝነበረ ምስለኔ፥ ኺኅዘኒ ደልዩ ነታ ኸተማ የሐልዋ ነበረ። 33. ስለዚ ኣብ ከፈር ገይሮም በቲ ኣብቲ ቐጽሪ ዝነበረ መስኮት ኣውረዱኒ እሞ ኻብ ኢዱ ደኅንኩ።

ዘካልእ መልእክት Universal Epistle

12. እቲ ብጊዜ ፈተና ዚዕገስ ሰብኣይ ብፁዕ እዩ፥ ከመይ ተፈቲኑ ምስ ወፀ፥ ነቲ እግዚኣብሔር ነቶም ዜፍቅርዎ ዘተስፈዎም ኣኽሊል ሕይወት ኪቕበል እዩ። 13. ሓደ እኳ ምስ ተፈተነ ኣምላኽ ፈቲኑኒ ኣይበል፥ ከመይ ኣምላኽሲ ብእኩይ ኣይፍተንን፥ ባዕሉውን ንሓደ እኳ ኣይፍትንን እዩ። 14. ነፍስ ወከፍ ግና ብገዛእ ትምኒቱ ተሳሒቡን ተሓቢሉን እዩ ዚፍተን። 15. ሽዑ ትምኒት ምስ ጠነሰት ንኃጢኣት ትወልዳ፥ ኃጢኣት ምስ ተፈጸመት ድማ ንሞት ትወልዳ። 16. ኣቱም ፍቁራት ኣኅዋተይ፥ ኣይትስሓቱ። 17. ጽቡቕን ምሉእን ውህበት ካብ ላዕሊ እዩ፥ ካብቲ ዘይልወጥን ኣብ ጸልማት ክንነብር ዘይኃድገናን፥ ኣቦ ብርሃናት ዝኾነ ዚወርድ እዩ።

ግብረ ሃዋርያት Acts

12. እዚ ምስ ሰማዕና ንሕናን እቶም ደቂ እታ ዓድን ኴንና፥ ናብ ኢየሩሳሌም ከይድይብ ንጳውሎስ ለመንናዮ። 13. ሽዑ ጳውሎስ “ንምንታይከ ከምዚ ትገብሩ፧ ስለምንታይከ ትበኽዩ፧ ንምንታይከ ልበይ ትሰብሩኒ ኣሎኹም፧ ኣነ ምእንቲ ስም ጐይታና ኢየሱስ ኣብ ኢየሩሳሌም ንማእሰርቲ ጥራይ ዘይኮነስ ንሙማትውን ድልዊ እየ” ኢሉ መለሰ። 14. ምስማዕ ምስ ኣበየና ኸኣ፥ “ፍቓድ ጐይታ ይኹን” ኢልና ሃዳእና። 15. ብድኅሪ እዘን መዓልትታት እዚኣተን ምስ ተዳሎና ናብ ኢየሩሳሌም ደየብና። 16. ገለ ቚሩባት ደቀ መዛሙርቲ ኸኣ ካብ ቂሳርያ ኣሰንዮምና መጹ፥ ናብ እንዳ ምናሶን ብዓል ቆጵሮስ ክንኣቱውን መርሑና፥ ንሱ ካብቶም ቀዳሞት ዝኣመኑ ደቀ መዛሙርቲ ነበረ። 17. ኣብ ኢየሩሳሌም ምስ በጻሕና፥ እቶም ኣኅዋት ብሓጐስ ተቐበሉና።

ስንክሳር Synaxarium

አባ ባውላ ዘሃገረ ጠውማ
ወቅዱስ ሚናስ
ወሐናሲ ሰማዕት

መዝሙር Psalm

ጻድቃን የእውዩ፣ እግዚኣብሄር ድማ ይሰምዖም፣ ካብ ኵሉ መከራኦምውን የናግፎም። እግዚኣብሄር ነቶም ስቡር ልቢ ዘለዎም ቀረባኦም እዩ፣ ነቶም ቅጥቁጥ መንፈስ ዘለዎም ድማ የድሕኖም።

ወንጌል Gospel

25. ደቀ መዛሙርቲ ድማ ነዚ ሰሚዖም “መን ደኣ ኾን ኪድኅን ይኽእል፧” እናበሉ ብዙኅ ተገረሙ። 26. ኢየሱስ ድማ ጠመቶም እሞ “እዚ ብዓቕሚ ሰብ ኣይከኣልን እዩ፥ ብኣምላኽ ግና ዅሉ ይከኣል እዩ” በሎም። 27. ሽዑ ጴጥሮስ መሊሱ “እንሆ ንሕና ዅሉ ኃዲግና ስዒብናካ ኣሎና፥ እንታይ ኮን ክንረክብ ኢና፧” በሎ። 28. ኢየሱስ ድማ “ኣቱም ዝሰዓብኩምኒ፥ ወዲ ሰብ በታ ሓዳስ ዘመን ኣብ ዝፋን ክብሩ ዚቕመጠላ እዋን፥ ንስኻትኩም ድማ ኣብ ዓሠርተው ክልተ ዝፋናት ተቐሚጥኩም ንዓሠርተው ክልተ ነገደ እስራኤል ከም እትፈርዱ ብሓቂ እብለኩም ኣሎኹ። 29. ስለ ስመይ ኢሉ ኣባይቲ፥ ኣኅዋት፥ ኣኃት፥ ኣቦ፥ ኣደ፥ ሰበይቲ፥ ውሉድ፥ ግርሁ ዝኃደገ ዅሉ ሚእቲ ዕጽፊ ኺረክብ እዩ፥ ናይ ዘለዓለም ሕይወትውን ኪወርስ እዩ። 30. ብዙኃት ቀዳሞት ዳኃሮት ኪኾኑ እዮም፥ ዳኃሮት ድማ ቐዳሞት ኪኮኑ እዮም” በሎም። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ስልጣን ናይ ኣምላኽ ምዃኑ፣ ኣምላኽ ሓንሳእ ተዛረበ፣ ክልተ ሳዕ ሰማዕክዎ። ንነፍሲ ወከፍ ከከም ግብሩ ትፈድዮ ኢኻ እሞ፣ ጐይታየ፣ ጸጋውን ናትካ እዩ።
 

ወንጌል Gospel

8. “ምስ መሰየ እቲ ብዓል ኣታኽልቲ ወይኒ ንኣዛዝ ቤቱ ‘ነቶም ሰብ ውዕለት ጸውዓዮም፥ ካብቶም ዳኅሮት ጀሚርካ ኸኣ ክሳዕ እቶም ቀዳሞት ውዕለቶም ሃቦም’ በሎ። 9. እቶም ሰብ መበል ዓሥርተው ሓደ ሰዓት ናይ መዓልቲ ቐሪቦም ደዲናሮም ተቐበሉ። 10. እቶም ቀዳሞት ምስ ቀረቡ ኸኣ ካብቶም ዳኅሮት ዚበዝኅ ዚቕበሉ መሰሎም፥ ግናኸ ንሳቶምውን ደዲናሮም ተቐበሉ። 11. - 12. ምስ ተቐበሉ ኸኣ ‘ነዞም ሓንቲ ሰዓት ዝሥረሑ ዳኅሮት ምስ እዞም ድኻም መዓልቲን ሃሩርን ዝፆርና ኣዳላደልካዮም’ እናበሉ ኣብ ልዕሊ እቲ በዓል ቤት ኣዕዘምዘሙ። 13. ንሱ ኸኣ ንሓደ ኻብኣቶም ‘ዓርከይ ኣይዓመጽኩኻን፥ ብሓደ ዲናርዶ ኣይተሰማማዕካንን፧ 14. ዚብጽሓካ ደኣ ኂዝካ ኺድ፥ ነዚ ዳኅራይ ድማ ክንዲ ናትካ ኽህቦ ፍቓደይ እዩ። 15. ወይ ድማ ብገንዘበይ ዝደሌኽዎ ኽገብርዶ ኣይግበኣንን እዩ፧ ወይስ ኣነ ሕያዋይ ስለ ዝኾንኩ ዓይንኻዶ ቐናእ እዩ፧’ ኢሉ መለሰሉ። 16. “ከምኡኸስ ጽዉዓት ብዙኃት ኅሩያት ግና ውሑዳት እዮም እሞ ዳኅሮት ቀዳሞት፥ ቀዳሞትውን ዳኅሮት ኪዀኑ እዮም።” ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።