መዝሙረ ዳዊት Psalm

አብኣ መራኽብ ይኸዳ፣ እቲ ዝፈጠርካዮ ሌዋታን ኣብኣ ይጻወት። እዚኣቶም ኵሎም ምግቦም በብጊዜኡ ኽትህቦምሲ፣ ንኣኻ ይጽበዩ ኣለዉ።

ህየ የሐውራ አሕማር፤
ከይሲ ዘፈጠርከ ይሳለቅ ላዕሌሆሙ፤
ወኵሉ ይሴፎ በኀቤከ።

ወንጌል Gospel

22. ንጽባሒቱ እቶም ኣብ ስግር ባሕሪ ደው ኢሎም ዝነበሩ ሕዝቢ ብዘይካ ሓንቲ ጃልባ ኻልእ ኣብኡ ኸም ዘይነበረት፥ ደቀ መዛሙርቱ ጥራይ ንበይኖም ከም ዝኸዱ እምበር፥ ኢየሱስ ምስ ደቀ መዛሙርቱ ናብታ ጃልባ ኸም ዘይደየበ ረኣዩ። 23. እንተኾነ፥ ኻልኦት ጃለቡ ካብ ጥብርያዶስ ናብ ጥቓ እታ ጐይታ ዝባረኾ እንጌራ ዝበልዑላ ቦታ መጻ። 24. ሽዑ እቶም ሕዝቢ ኢየሱስ ኮነ ወይ ደቀ መዛሙርቱ ኣብኡ ኸም ዘየለዉ ምስ ፈለጡ ናብተን ጃለቡ ደይቦም ንኢየሱስ ኬናድይዎ ናብ ቅፍርናሆም መጹ። 25. ኣብ ስግር ባሕሪ ምስ ረኸብዎ ኸኣ “መምህር! መኣዝ ደኣ ናብዚ መጺእካ፧” በልዎ። 26. ኢየሱስ ድማ “እተናድዩኒ ዘሎኹም እንጌራ በሊዕኩም ስለ ዝጸገብኩም ኢኹም እምበር፥ በቲ ዝረኣኹምዎ ትእምርቲ ኸምዘይኮነ ብሓቂ ብሓቂ፥ እብለኩም ኣሎኹ። 27. እምበኣር ምእንቲ እቲ ኃላፊ ምግቢ ዘይኮነስ ምእንቲ እቲ ወዲ ሰብ ዚህበኩም ንዘለዓለማዊ ሕይወት ዚኸውን ምግቢ ጸዓሩ። ምኽንያቱ እዚ ሓቂ ኸም ዝኾነ እግዚኣብሔር ኣቦ ብማኅተሙ መስኪሩሉ እዩ” ኢሉ መለሰሎም። ብወልድ ዝአምን ናይ ዘልኣለም ሕይወት ኣለዎ።

መልእክተ ጳውሎስ Pauline Epistle

1. ናይ ክርስቶስ ኢየሱስ ኣገልገልቲ ኻብ ዝኾኑ ጳውሎስን ጢሞቴዎስን፥ ናብቶም ኣብ ፊልጵስዩስ ብክርስቶስ ኢየሱስ ዘለው ዅሎም ኣመንቲ፥ ምስ ኤጲስቆጶሳትን ዲያቆናትን። 2. ካብ እግዚኣብሔር ኣቦናን ካብ ጐይታና ኢየሱስ ክርስቶስን ጸጋን ሰላምን ምሳኻትኩም ይኹን። 3. ኵሉ ሳዕ ንኣኻትኩም ክዝክር ከሎኹ፥ ንኣምላኸይ አመስግኖ። 4. ኣብ ኵሉ ጸሎተይ ምእንቲ ዅሉኻትኩም ብሓጐስ እጽሊ ኣሎኹ። 5. ካብ መጀመርታ ክሳዕ ሕጂ ኣብ ስብከት ወንጌል መዓይይተይ ስለ ዝኾንኩም ንኣምላኽ አመስግኖ ኣሎኹ። 6. እቲ ኣብ ሕይወትኩም ሠናይ ግብሪ ዝጀመረ ኣምላኽ፥ ክሳዕ እታ ክርስቶስ ኢየሱስ ዚመጸላ መዓልቲ ከም ዚፍጽሞ ተረዲአዮ ኣሎኹ። 7. ኵልኻትኩም ኣብ ልበይ ስለ ዘሎኹም፥ ብዛዕባ ዅልኻትኩም ከምዚ ኢለ ኽሓስብ ቅኑዕ እዩ። ከመይ ተኣሲረ ኸሎኹ ኾነ፥ ንወንጌል ክምሥርታን ክማጐተላን ከሎኹ ኾነ፥ ንስኻትኩም ኩልኹም ኣብዚ ጸጋ እዚ መኻፍልተይ ኢኹም። 8. ብፍቕሪ ክርስቶስ ኢየሱስ ንዂላትኩም ከመይ ገይረ ከም ዝናፍቐኩም ኣምላኽ ምስክረይ እዩ። 9. ፍቕርኹም ብዅሉ ፍልጠትን ምስትውዓልን ኣዝዩ እናበዝኀ ምእንቲ ኺኸይድ፦ 10. ነቲ ዝበለጸ ተቐቢልኩም ነታ ክርስቶስ ዝመጻላ መዓልቲ ንጹሓትን ኢንታ ዘይብሎምን ምእንቲ ኽትኮኑ፥ 11. ንኽብሪ ኣምላኽን ንዉዳሴኡን ኸኣ በቲ ኻብ ኢየሱስ ክርስቶስ ዚመጽእ ፍረ ጽድቂ ምእንቲ ኽትምልኡ እጽሊ ኣሎኹ።

ዘካልእ መልእክት Universal Epistle

1. ሕጂ ኸኣ፥ ኣቱም ሃብታማት ስምዑ፥ በቲ ዚመጸኩም ዘሎ መከራ ዋይ! ዋይ! እናበልኩም ብኸዩ። 2. ሃብትኹም መሽሚሹ፥ ክዳውንትኹምውን ብልዒ በሊዕዎ። 3. ወርቅኹምን ብሩርኩምን መሪቱ፥ እቲ ምምራቱ ኸኣ ኪኸሰኩም እዩ፥ ኣብዛ ኃላፊት ዓለም እዚኣ ሃብቲ ሰለ ዝኣከብኩም ድማ ንሥጋኹም ከም ሓዊ ኺበልዖ እዩ። 4. እንሆ እቲ ንሰኻትኩም ዝገደብኩምዎም፥ ውዕለት እቶም ግርሁኹም ዝዓጸዱ ዓየይቲ የእዊ ኣሎ። ኣውያት እቶም ዓጻዶውን ኣብ እዝኒ እግዚኣብሔር ጐይታ ሠራዊት በጺሑ ኣሎ። 5. ኣብ ምድሪ ሓንቂቕኩምን ጥዒሙኩምን፥ ከም ንመዓልቲ ማኅረዲውን ገዛእ ርእስኹም ኣስቢሕኩም ኣሎኹም። 6. ነቲ ኺከላኸል ዘይክእል ጻድቕ ሰብውን ፈረድኩምዎን ቀተልኩምዎን።

ግብረ ሃዋርያት Acts

1. ኣግሪጳ ንጳውሎስ “ብዛዕባ ርእስኻ ኽትዛረብ ተፈቒዱልካ ኣሎ” በሎ። ሽዑ ጳውሎስ ኢዱ ዘርጊሑ ከምዚ ዚስዕብ እናበለ ተመጻረየ፡ - 2. “ኦ ንጉሥ ኣግሪጳ! ሎሚ ኣብ ቅድሜኻ ብኣይሁድ እኽሰሰሉ ብዘሎኹ ዘበለ ነገር፥ ክምልስ ስለ ዝተፈቕደለይ ኣዝየ እሕጐስ ኣሎኹ። 3. ምኽንያቱ ኵሉ ሥርዓት ኣይሁድን ክርክሮምን ኣጸቢቕካ ትፈልጥ ኢኻ፤ ስለዚ ድማ ብትዕግሥቲ ክትሰምዓኒ እልምነካ ኣሎኹ። 4. “እምበኣርከስ፥ ካብ ንእስነተይ ጀሚረ፥ ኣብ ማእከል ሕዝበይ፥ ኣብ ኢየሩሳሌም ዘኅለፍክዎ ሕይወት ኵላቶም ኣይሁድ ይፈልጥዎ እዮም። 5. ኪምስክሩ እንተ ደኣ ደልዮምሲ፥ ካብቶም ብዛዕባ ሃይማኖት ኣዝዮም ዚጥንቀቑ ወገን ፈሪሳውያን ከም ዝነበርኩ፥ ንሳቶም ካብ ቀደም ጀሚሮም ይፈልጡኒ እዮም። 6. ሕጂ ድማ ነታ ኣምላኽ ነቦታትና ዝሃቦም ናይ ተስፋ ቓል ስለ ዝትስፎ፥ ኣብ ትሕቲ ፍርዲ ደው ኢለ እኔኹ። 7. እቶም ዓሠርተው ክልተ ነገድና ኸኣ፥ ለይትን መዓልትን ተጊሆም ንኣምላኽ እናኣገልገሉ፥ ፍጻሜ ናይዛ ቃል ተስፋ እዚኣ ይጽበዩ ነበሩ። ኣነውን፥ ኦ ንጉሥ ኣግሪጳ! ስለ እዛ ተስፋ እዚኣ እየ ብኣይሁድ ዝኽሰስ ዘሎኹ። 8. ኣምላኽ ንምዉታት ከም ዜተንሥኦም ደኣ፥ ስለምንታይ ከም ሓደ ዘይእመን ነገር ጌርኩም ትርእይዎ ኣሎኹም፧

ስንክሳር Synaxarium

እለእስክንድሮስ
ወእንድራኒቆስ ዲያቆን

መዝሙር Psalm

ኵራኡ ቐልጢፉ ይነድድ እዩ እሞ፣ ከይዅሪ፣ ኣብ መገዲ ኸሎኹም ድማ ከይትጠፍኡስ፣ ንወዱ ስዐምዎ።

አጽንዕዋ ለጥበብ ከመ ኢይትመዓዕ እግዚአብሔር፤
ወኢትትሐጐሉ እምፍኖተ ጽድቅ፤
ሶበ ነደት ፍጡነ መዐቱ።

ወንጌል Gospel

6. ‘ነቦኡ ወይ ነዲኡ ኬኽብር ኣይግደድን እዩ’ ትብሉ። ስለዚ ምእንቲ ሥርዓትኩም ቃል ኣምላኽ ትስዕሩ ኣሎኹም። 7. - 8. ኣቱም ግቡዛት፥ ኢሳይያስ ‘እዚ ሕዝቢ እዚ ብኸናፍሩ የኽብረኒ፥ ብልቡ ግና ኻባይ ኣዝዩ ርሑቕ እዩ። ትምህርቲ ትእዛዛት ሰብ እናመሃሩ ብኸንቱ የምልኹኒ’ ኢሉ ብዛዕባኻትኩም ሓቂ ተነበየ” በሎም። 9. ኢየሱስ ነቶም ሕዝቢ ናብኡ ጸዊዑ “ስምዑ! ኣስተውዕሉ። 10. ንሰብ ዜርክሶ ካብ ኣፍ ዝወፅእ ደኣ እምበር ናብ ኣፍ ዚአቱ ኣየርክሶን እዩ” በሎም። 11. ሽዑ ደቀ መዛሙርቱ ቐሪቦም “ፈሪሳውያን ዘረባኻ ሰሚዖም ከም ዝተዓንቀፉስ ፈሊጥካዶ፧” በልዎ። 12. ንሱ ኸኣ መሊሱ “ናይ ሰማይ ኣቦይ ዘይተኸሎ ዘበለ ኵሉ ተኽሊ ኪምንቈስ እዩ፥ 13. ኅደግዎም፥ ዕዉራት መራሕቲ ዕዉራት እዮም። ዕዉር ንዕዉር እንተ መርሖ ክልቲኦም ኣብ ጕድጓድ ይወድቁ” በሎም። 14. ጴጥሮስ ድማ “ነዚ ምስላ እዚ ግዳ ተርጕመልና” በሎ። 15. ኢየሱስ ከኣ “ንስኻትኩምውንዶ ገና ኣየስተውዓልኩምን፧ 16. እቲ ብኣፍ ዚኣቱ ዘበለ ናብ ከብዲ ኸም ዚኃልፍ እሞ ንግዳም ከም ዚወፅእዶ ኣይትፈልጡን ኢኹም፧ 17. እቲ ካብ ኣፍ ዚወፅእ ግና ኻብ ልቢ እዩ ዚመጽእ እሞ፥ ንሱ እዩ ንሰብ ዜርክሶ። 18. ካብ ልቢ ኽፉእ ሓሳብ፥ ቅትለት፥ ዝሙት፥ ምንዝርና፥ ስርቂ፥ ብሓሶት ምምስካር፥ ጸርፊ፥ ይወፅእ እዩ እሞ፥ 19. እዚ እዩ ንሰብ ዜርክሶ እምበር ብዘይተሓጽበ ኣእዳው ምብላዕሲ ንሰብ ኣየርክሶን እዩ” በሎም። 20. ኢየሱስ ካብኡ ወፂኡ ናብ ወሰን ምድሪ ጢሮስን ሲዶናን ኣልገሰ። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ኣምላኽሲ ጻድቕ ፈራዲ፣ ዕለተ ዕለት ዚዅሪ ኣምላኽ እዩ። ሰብ እንተ ዘይተመልሰ፣ ሴፉ ስሒሉ፣ ቀስቱ ገቲሩ የዝግበሉ።

እግዚአብሔር መኰንነ ጽድቅ፤
ኃያል ወመስተዓግሥ፤
ወኢያመጽእ መንሱተ ኵሎ አሚረ።

ወንጌል Gospel

14. - 15. ድኅሪ ማእሰርቲ ዮሓንስ፥ ኢየሱስ “እቲ እዋን በጺሑ እዩ፥ መንግሥቲ ኣምላኽ ከኣ ቐሪባ እያ እሞ ተነስሑ፥ ብወንጌልውን እመኑ” ኢሉ ብሥራት ኣምላኽ እናሰበኸ ናብ ገሊላ መጸ። 16. ብጥቓ ባሕሪ ገሊላ ኺኃልፍ ከሎ ስምዖንን እንድርያስ ኃዉን ገፈፍቲ ዓሣ ስለ ዝነበሩ መርበቦም ኣብ ባሕሪ ኼዉርዱ ኸለዉ ረኣየ። 17. ኢየሱስ ድማ “ገፈፍቲ ሰብ ክገብረኩምሲ ንዑ ስዓቡኒ” በሎም። 18. ንሳቶም ድማ መርበቦም ኃዲጎም ሽዑንሽዑ ሰዓብዎ። 19. ካብኡ ቚሩብ ኅልፍ ምስ በለ ድማ ያዕቆብ ወዲ ዘብዴዎስን ዮሓንስ ኃዉን ኣብ ጃልባኦም ኮይኖም መርበቦም ኬተዓራርዩ ኸለዉ ረኣዮም እሞ 20. ብኡብኡ ጸውዖም። ንሳቶሞ ከኣ ንዘብዴዎስ ኣቦኦም ምስ ዕሱባቱ ኣብ ጃልባ ኃዲጎም ሰዓብዎ። 21. ኢየሱስን ደቀ መዛሙርቱን ኣብ ቅፍርናሆም በጽሑ፥ ኢየሱስ ድማ ብሰንበት ናብ ቤት ጸሎት ኣይሁድ ኣትዩ ኺምህር ጀመረ። 22. ንሱ ኸምቶም መምህራን ሕጊ ዘይኮነስ ከም ብዓል ሥልጣን ይምህሮም ስለ ዝነበረ፥ ብትምህርቱ ተገረሙ። እትሰምዕ እዝኒ ዘላቶ ይስማዕ!

መዝሙረ ዳዊት Psalm

ጸልማት ይኸውለኒ፣ ኣብ ዙርያይ ዘሎ ብርሃን ከኣ ለይቲ ይኹን፣ እንተ በልኩ፣ ንኣኻስ ጸልማት እኳ ኣይጽልምተካን፣ ለይቲ ኸኣ ከም መዓልቲ ትበርህ፣ ጸልማትን ብርሃንን ንኣኻ ሓደ እዮም።

እስመ ጽልመትኒ ኢይጸልም በኀቤከ፤
ወሌሊትኒ ብሩህ ከመ መዓልት፤
በአምጣነ ጽልመታ ከማሁ ብርሃና።

ወንጌል Gospel

35. ሽዑ ኢየሱስ “ገና ንቚሩብ መዓልቲ ብርሃን ምሳኹም ኣሎ። ስለዚ ጸልማት ከየርክበኩም ብብርሃን ተመላለሱ፤ ምኽንያቱ እቲ ብጸልማት ዚማላለስ ናብ ዚኸዶ ኣይፈልጥን እዩ። 36. ደቂ ብርሃን ምእንቲ ኽትኮኑ ኸኣ ብርሃን ከሎኩም ብብርሃን እመኑ” በሎም። ኢየሱስ ከምዚ ኢሉ ምስ ተዛረበ ካብኣቶም ከይዱ ተኃብአ። 37. - 38. እዚ ኽንድዚ ዚኣክል ትምህርቲ እኳ ኣብ ቅድሚኦም እንተ ገበረ፥ እቲ ነቢይ ኢሳይያስ “ጐይታይ፥ ንምስክርና መን ኣመኖ፧ ኃይሊ እግዚኣብሔርከ ንመን ተጋህደሉ፧” ዝበሎ ቓል ምእንቲ ኺፍጸም ብእኡ ኣይኣመኑን። 39. - 40. ከምኡ ድማ ኢሳይያስ ከም ብሓዱሽ “በዕይንቶም ከይርእዩ፥ ብልቦምውን ከየስተውዕሉ እሞ ከይምለሱ ኣነ ኸኣ ኸይምሕሮምሲ፥ ኣዕይንቶም ኣዖረ፥ ልቦምውን ኣትረረ” ከም ዝበሎ ምእማን ሰኣኑ። 41. ኢሳይያስ ብዛዕባኡ ኸምዚ ኢሉ ዝተዛረበ ኽብሩ ስለ ዝረኣየ እዩ። ብወልድ ዝአምን ናይ ዘልኣለም ሕይወት ኣለዎ።

መልእክተ ጳውሎስ Pauline Epistle

8. ስለ እንናፍቐኩም፥ ኣዚና እነፍቅረኩምውን ስለ ዝኾንና ገዛእ ሕይወትና ድማ እምበር ወንጌል ኣምላኽ ጥራይ ኣይኮንናን ከነካፍለኩም እንምነ ዝነበርና። 9. ኣኅዋተይ ነቲ ዕዮናን ጻዕርናን፥ ማለት ንሓደ እኳ ከይነኽብደሉ ኢልና፥ ለይትን መዓልትን እናዓየና ወንጌል ከም ዝሰበኽናልኩም፥ ትዝክርዎ ኢኹም። 10. ኣብ ማእከል እዞም እትኣምኑ ብቕድስናን ብጽድቅን ብዘይ መንቅብን ከም ዝነበርና፥ ንስኻትኩምን ኣምላኽን ምስክር ኢኹም። 11. - 12. ነቲ ንመንግሥቱን ክብሩን ዝጸውዓኩም ኣምላኽ ብቑዓት ኴንኩም ምእንቲ ኽትነብሩ፥ ንነፍስ ወከፍኩም ከም ኣቦ ንውሉዱ ከመይ ጌርና ንምዕደኩምን ነጸናንዓኩምን ነተባብዓኩምን ከም ዝነበርና ትፈልጡ ኢኹም። 13. ነቲ ኻባና ዝሰማዕኩሞዎ ቓል ኣምላኽ ምስ ተቐበልኩምዎ ከምቲ ኣባኻትኩም ኣብቶም ኣመንቲ፥ ዚዓዮ ዘሎ፥ ከምቲ ሓቁ ኸም ቃል ኣምላኽ እምበር፥ ከም ቃል ሰብ ስለ ዘይተቐበልኩሞዎ፥ ንሕና ኸየቋረጽና ንኣምላኽ ነመስግኖ ኣሎና። 14. ኣኅዋተይ፥ ንስኻትኩም ነተን ኣብ ክርስቶስ ኢየሱስ ዚነበራ፥ ኣብ ይሁዳ ዘለዋ ኣብያተ ክርስቲያን ኣምላኽ መሲልኩምወን ኢኹም። ከመይ ከምቲ ንሳተን ብኣይሁድ ሓሰራ መከራ ዝጸገባ፥ ንስኻትኩምውን ከምኡ ብደቂ ዓድኹም መከራ ጸጊብኩም ኢኹም። 15. - 16. ኣይሁድ ንጐይታና ኢየሱስን ንነብያትን ቀተልዎም፥ ንኣና ኸኣ ኣሳደዱና። ኣሕዛብ ምእንቲ ኺድኅኑ ንሕና ወንጌል ከይንሰብከሎም ብምኽልካሎም ንእግዚኣብሔር ኣየሓጐስዎን። ምስ ኵሉ ሰብ ኸኣ ይጻልኡ ኣለው። በዚ ኸኣ ከም ቀደሞም መስፈር ኃጢኣቶም ይመልኡ ኣለው። ግናኸ ቚጥዓ ኣምላኽ ኣብ ልዕሊኦም ድሮ ወሪዱ ኣሎ። 17. እንተኾነ፥ ኣኅዋተይ፥ ብልቢ ምሳኹም ከሎናስ ንሓጺር ጊዜ ካባኻትኩም ተፈሊና ስለ ዝነበርና፥ ገጽኩም ክንርእየኩም ብዙኅ ናፍቆትን ሃረርታን ነይሩና። 18. ስለዚ ናባኻትኩም ክንመጽእ ደሊና ኔርና። ኣነ ጳውሎስ እኳ ደጋጊመ ኽመጽእ ፈቲነ ነይረ። ግናኸ ሰይጣን ዓገተና። 19. ከመይ ተስፋና ወይ ሓጐስና ወይ ኸኣ ኣብ ካልኣይ ምጽኣቱ ኣብ ቅድሚ ጐይታና ኢየሱስ እንምክሓሉ ኣኽሊልና መን ድዩ፧ ንስኻትኩምዶ ኣይኮንኩምን፧ 20. ብርግጽ ክብርናን ሓጐስናን ንስኻትኩም ኢኹም።

ዘካልእ መልእክት Universal Epistle

5. ንሳቶም ካብ ዓለም እዮም፥ ከም ኣዘራርባ ዓለም ከኣ ይዛረቡ ኣለዉ። ዓለምውን ትሰምዖም ኣላ። 6. ንሕና ኻብ ኣምላኽ ኢና፥ ንኣምላኽ ዚፈልጥ ይሰምዓና፥ እቲ ኻብ ኣምላኽ ዘይኮነ ኣይሰምዓናን እዩ። ንመንፈስ ሓቅን ንመንፈስ ሓሶትን ከኣ በዚ ኢና እንፈልጦ። 7. ኣቱም ፍቁራተይ፥ ፍቕሪ ካብ ኣምላኽ እያ እሞ ንሓድሕድና ንፋቐር። ዜፍቅር ዘበለ ዅሉ ካብ ኣምላኽ ዝተወልደ እዩ፥ ንኣምላኽውን ይፈልጦ እዩ። 8. ኣምላኽ ፍቕሪ እዩ እሞ፥ እቲ ዘየፍቅር ንኣምላኽ ኣይፈልጦን እዩ። 9. ኣምላኽ ንፍቕሩ፥ ብወዱ ብሕይወት ምእንቲ ክንነብር፥ ነቲ ሓደ ወዱ ናብ ዓለም ብምልኣኹ ገለጸልና።

ግብረ ሃዋርያት Acts

35. ምድሪ ምስ ወግሐ እቶም ሮማውያን ሰበ ሥልጣን “ነቶም ሰባት ፈቲሕካ ስደዶም” እናበሉ ገላዉ ለኣኹሉ። 36. እቲ ሓላው ቤት ማእሰርቲ ድማ፥ “እቶም ሰበ ሥልጣን ‘ፍትሕዎም’ ኢሎም ልኢኾም ኣለዉ እሞ፥ ሕጂ እምበኣር ወፂእኩም ብሰላም ኪዱ” ኢሉ ንጳውሎስ ነገሮ። 37. ጳውሎስ ግና፥ “ንሕና ሮማውያን ከሎና፥ ብዘይ ፍርዲ ብግህዶ ገሪፎም፥ ኣብ ቤት ማእሰርቲ ኣእትዮምናስ፥ ሕጂ ብኅቡእዶ ኪሰዱና፧ ባዕላቶም ደኣ መጺኦም የውፅኡና እምበር፥ እዝስ ከቶ ኣይከውንን እዩ” በሎም። 38. እቶም ገላዉ ኸኣ ነቶም ሰበ ሥልጣን ነዚ ነገር እዚ ነገርዎም። ንሳቶም ድማ ሮማውያን ምዃኖም ምስ ሰምዑ ፈርሁ። 39. መጺኦም ከኣ “ይቕረ በሉልና” ኢሎም ኣውፅእዎም። ካብታ ኸተማ ኬልግሱውን ለመንዎም። 40. ሽዑ ካብ ቤት ማእሰርቲ ወፂኦም ናብ ቤት ልድያ ኣተዉ፤ ነቶም ኣኅዋት ምስ ረኸብዎም ከኣ መዓድዎም፥ ካብኡውን ኃለፉ።

ስንክሳር Synaxarium

ፍልሰተ ሥጋሁ ለአባ መቃርስ
ወፊንሐስ

መዝሙር Psalm

ብኣምላኽ ንቓሉ ኤመስግኖ፣ ብእግዚኣብሄር ንቓሉ ኤመስግኖ ኣሎኹ። ኣብ ኣምላኽ ተወኪለ ኣይፈርህን፣ ሰባትከ እንታይ ከይገብሩኒ፧

በእግዚአብሔር እሴብሕ ቃልየ፤
በእግዚአብሔር ይከብር ዘነበብኩ፤
ወበእግዚአብሔር ተወከልኩ ኢይፈርህ ምንተ ይሬስየኒ ሰብእ።

ወንጌል Gospel

12. ንሱ ኸኣ መሊሱ “ናይ ሰማይ ኣቦይ ዘይተኸሎ ዘበለ ኵሉ ተኽሊ ኪምንቈስ እዩ፥ 13. ኅደግዎም፥ ዕዉራት መራሕቲ ዕዉራት እዮም። ዕዉር ንዕዉር እንተ መርሖ ክልቲኦም ኣብ ጕድጓድ ይወድቁ” በሎም። 14. ጴጥሮስ ድማ “ነዚ ምስላ እዚ ግዳ ተርጕመልና” በሎ። 15. ኢየሱስ ከኣ “ንስኻትኩምውንዶ ገና ኣየስተውዓልኩምን፧ 16. እቲ ብኣፍ ዚኣቱ ዘበለ ናብ ከብዲ ኸም ዚኃልፍ እሞ ንግዳም ከም ዚወፅእዶ ኣይትፈልጡን ኢኹም፧ 17. እቲ ካብ ኣፍ ዚወፅእ ግና ኻብ ልቢ እዩ ዚመጽእ እሞ፥ ንሱ እዩ ንሰብ ዜርክሶ። 18. ካብ ልቢ ኽፉእ ሓሳብ፥ ቅትለት፥ ዝሙት፥ ምንዝርና፥ ስርቂ፥ ብሓሶት ምምስካር፥ ጸርፊ፥ ይወፅእ እዩ እሞ፥ 19. እዚ እዩ ንሰብ ዜርክሶ እምበር ብዘይተሓጽበ ኣእዳው ምብላዕሲ ንሰብ ኣየርክሶን እዩ” በሎም። 20. ኢየሱስ ካብኡ ወፂኡ ናብ ወሰን ምድሪ ጢሮስን ሲዶናን ኣልገሰ። 21. እንሆ ድማ ሓንቲ ከነኣናዊት ሰበይቲ ካብ ወሰናስን እቲ ምድሪ መጺኣ “ኦ ጐይታይ ወዲ ዳዊት! ንጓለይ ጋኔን ብኽፉእ ኂዝዋ ኣሎ እሞ ራኅርኃለይ” እናበለት ጨርሐት። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

አብ ማሕበር ኣህዛብ ልዕል የብልዎ፣ አብ ባይቶ ሽማግሌታት ድማ የመስግንዎ። ንወሓዝቲ ናብ በረኻ፣ ንዓይኒ ማያት ናብ ንቚጽ ምድሪ፣ ንፍርያም ምድሪ፣ ብሰሪ ኽፍኣት እቶም ዝነበርዋ፣ ናብ ጐልጐል ጨው ለወጦ።

ወያዓብይዎ በማኅበረ አሕዛብ፤
ወይሴብሕዎ በመንበረ ሊቃውንት፤
ወረሰዮሙ ለአፍላግ በድወ።

ወንጌል Gospel

39. ኣብ ማእከል እቲ ሕዝቢ ዝነበሩ ገሊኣቶም ፈሪሳውያን ከኣ “መምህር! ንደቀ መዛሙርትኻ ገሥጾም” በልዎ። 40. ኢየሱስ ከኣ “እዚኣቶም እኳ ስቕ እንተ በሉ፥ እዞም ኣእማን ኪጭድሩ እዮም፥ እብለኩም ኣሎኹ፥” ኢሉ መለሰሎም። ኢየሱስ ንኢየሩሳሌም ከም ዘልቀሰላ 41. ኢየሱስ ናብታ ኸተማ ቐረበ፥ ምስ ረኣያ ኸኣ ኸምዚ ኢሉ ኣልቀሰላ፦ 42. “ኣየ፥ ንስኺ በዚ መዓልቲ እዚ ንሰላምኪ ዚኸውን ነገር ፈሊጥክዮ እንተ ትኾኒ! ሕጂ ግና ኻብ ዓይንኺ ተኸዊሉ ኣሎ። 43. ጸላእትኺ ቐጽሪ ቐጺሮም ዚኸቡኺ መዓልቲ ኽትመጽእ እያ እሞ፥ በዝን በትን ከኣ ኬጽብቡልኪ እዮም። 44. ዘመን ምሕረትኪ ሰኣን ምፍላጥክስ ንኣኽን ኣባኺ ንዚነብሩ ደቅኽን ምስ ሓመድ ኪጽምብሩኺ፥ እምኒ ኣብ ልዕሊ እምኒውን ኣይኪኃድጉልክን እዮም።” 45. ኢየሱስ ናብ ቤት መቕደስ ኣትዩ ኸኣ ነቶም ዚሸጡን ዚሻየጡን ዝነበሩ፥ 46. “‘ቤተይ ቤት ጸሎት ክትከውን እያ’ ዚብል ተጻሒፉ ኣሎ፤ ንስኻትኩም ግና በዓቲ ጐሓሉ ገበርኩምዋ” እናበለ ኼውፅኦም ጀመረ። 47. ዕለት ዕለት ከኣ ኣብ ቤተ መቕደስ ይምህር ነበረ። ሊቃነ ኻህናትን መምህራን ሕግን ዓበይቲ ሕዝብን ድማ ኺቀትልዎ ይደልዩ ነበሩ። 48. ብዘሎ እቲ ሕዝቢ ግና ብተመስጦ ይሰምዖ ስለ ዝነበረ ዚገብርዎ ሰአኑ። ‘ሓንቲ ቃል ካብ ኦሪት ወይ ነብያት ካብ ትሓልፍ ሰማይን ምድርን ክሓልፍ ይቐልል።’ በለ ጐይታ ንደቀ መዛሙርቱ።

መዝሙረ ዳዊት Psalm

ንብዙሓት መስተንከሪ ዀንክዎም፣ ንስኻ ግና ብርቱዕ መዕቈብየይ ኢኻ። አፈይ ብምስጋናኻ፣ ኵሉ መዓልቲ ብኽብርኻ ምልአዮ።

አንተ ረዳእየ ወኃይልየ፤
ምላእ አፉየ ስብሐቲከ፤
ከመ እሰብሕ አኰቴተከ።

ወንጌል Gospel

34. ንሳቶም ግና ኻብዚ ነገር እዚ ሓንቲ እኳ ኣየስተውዓሉን፤ እዚ ዘረባዚ ተሠዊርዎም ስለ ዝነበረ ነቲ ዝተዛረቦ ኣየስተብሃልዎን ነበሩ። 35. ናብ ኢያሪኮ ምስ ቀረቡ፥ እንሆ ሓደ ዕዉር ሰብኣይ ኣብ ጥቓ መገዲ ተቐሚጡ ይልምን ነበረ። 36. ሕዝቢ ብኡኡ ኺኃልፍ ከሎ ሰሚዑ ኸኣ፥ “እዚ እንታይ እዩ፧” ኢሉ ሓተተ። 37. ንሳቶም ከኣ “ኢየሱስ፥ እቲ ናዝራዊ፥ ይኃልፍ ኣሎ” ኢሎም ነገርዎ። 38. ንሱ ሽዑ፥ “ወዲ ዳዊት ምሓረኒ፥” እናበለ ጨርሐ። 39. እቶም ቅድሚት ዚኸዱ ዝነበሩ ስቕ ኪብል ገሠጽዎ፤ ንሱ ግና “ወዲ ዳዊት ምሓረኒ” እናበለ ኣበርቲዑ ጨርሐ። 40. ኢየሱስ ከኣ ደው ኢሉ ናብኡ ኼምጽእዎ ኣዘዘ። ናብኡ ምስ ቀረበ ድማ ኢየሱስ 41. “እንታይ ክገብረልካ ትደሊ ኣሎኻ፧” እናበለ ሓተቶ። ንሱ ኸኣ፥ “ጐይታይ! ኣዕይንተይ ኪርእያ” በለ። 42. ኢየሱስ ድማ “ርአ፥ እምነትካ እዩ ዘሕወየካ” በሎ። 43. ብኡብኡ ረኣየ ንኣምላኽ እናወደሰ ኸኣ ሰዓቦ፤ እቶም ሕዝቢ ዅሎምውን እዚ ምስ ረኣዩ ንኣምላኽ ኣመስገንዎ። ‘ሓንቲ ቃል ካብ ኦሪት ወይ ነብያት ካብ ትሓልፍ ሰማይን ምድርን ክሓልፍ ይቐልል።’ በለ ጐይታ ንደቀ መዛሙርቱ።

መልእክተ ጳውሎስ Pauline Epistle

8. በቲ ጐይታ ንምፍራስኩም ዘይኮነስ ንምሕናጽኩም ዝሃበና ሥልጣን፥ ቍሩብ ኣዛይደ እንተ ደኣ ተመኪሐ ኾይነ ድማ ኣይኃፍርን እየ። 9. ብመልእኽትታተይ ገይረ ከፈራርሃኩም ዝደሌኹ ኣይምሰልኩም። 10. ከመይ ገለ ሰብ “እተን መልእኽትታቱ ከበድትን ብርቱዓትን እየን፥ ብቖመናኡ ምሳና ኸሎ ግና ድኹም እዩ፥ ዘረባኡውን ንዑቕ እዩ” ዚብል ኣሎ። 11. እቲ ከምዚ ዚብል ሰብ፥ ከምቲ ኣብ ርሑቕ ከሎና ብመልእኽትታትና እንብሎ፥ ብቖመናና ኣብኡ ምሳኻትኩም ከሎናውን ከምኡ ከም እንብል ይፍለጥ። 12. ምስቶም ባዕላቶም ንገዛእ ርእሶም ዚንእዱ ንገዛእ ርእስና ኽንቈጽር ወይስ ከነመዓራሪ ኣይንደፍርን ኢና። ንሳቶም ንገዛእ ርእሶም ምስ ገዛእ ርእሶም ካብ ዜመዛዝኑ፥ ንገዛእ ርእሶም ከኣ ምስ ገዛእ ርእሶም ካብ ዜመዓራርዩ ዓያሱ እዮም። 13. ንሕና ግና በቲ ኣምላኽ ዝሃበና ደረት እምበር ካብ ልክዕ ኃሊፍና ኣይንምካሕን ኢና። እዚ ደረትዚ ኸኣ ክሳብ ናባኻትኩም ዚበጽሕ እዩ። 14. ቅድሚ ዅሉ ወንጌል ዝሰበኽናልኩም ንሕና ኢና። ስለዚ ሕጂ ብኣኻትኩም እንተ ተመካሕና ካብቲ ብኣምላኽ ዝተደረተልና ዝኃለፍና ኣይመስለናን። 15. ካብቲ ዝተደረተልና ኃሊፍና በቲ ኻልኦት ዝገበርዎ ኣይንምካሕን ኢና። እኳ ደኣ እምነትኩም ኪዓቢ እሞ እቲ ኣብ ማእከልኩም ዘሎና ሰበኻ ኪገፍሓልና ተስፋ ኣሎና። 16. ሽዑ ካባኹም ኃሊፍና ናብ ኻልእ ሃገር ወንጌል ክንሰብኽ ኢና። በቲ ኻልኦት ድሮ ዘዳለውዎ ሰበኻውን ኣይንምካሕን ኢና። 17. “እቲ ዚምካሕ ብእግዚኣብሔር ደኣ ይመካሕ” ከም ዚብሎ፥ 18. እቲ እግዚኣብሔር ዚንእዶ እምበር እቲ ንገዛእ ርእሱ ዚንእድ ሰብ ኣይኮነን ተመስኪሩሉ ዚወፅእ።

ዘካልእ መልእክት Universal Epistle

11. ኣቱም ኣኅዋተይ፥ ንሓድሕድኩም ኣይትነቓቐፋ። እቲ ንኃዉ ዚነቅፍ ወይ ኣብ ልዕሊ ኃው ዚፈርድ ንሕጊ እዩ ዚነቅፍ፥ ኣብ ልዕሊ ሕጊውን ይፈርድ፥ ንሕጊ ክትፈርዶ ኸሎኻ ግና፥ ትፈርዶ እምበር ትሕልዎ ኣይኮንካን ዘሎኻ። 12. እቲ ኼድኅንን ኬጥፍእን ዚኽእል፥ ሓጋግ ሕግን ፈራድን ሓደ ንሱ እዩ። ንሰኻ ደኣ ኣብ ብጻይካ እትፈርድ እንታዋይ ኢኻ፧ 13. ንስኻትኩም፥ ኣቱም “ሎሚ ወይ ጽባሕ ናብታ ኸተማ እቲኣ ኽንከይድ ኢና፥ እናነገድና ምእንቲ ኽንረብሕ ከኣ ኣብኣ ዓመት ክትቅመጥ ኢና” እትብሉ ስምዑ። 14. ንስኻትኩም ነቲ ጽባሕ ዚኸውን እኳ ኣይትፈልጡን ኢኹም። ሕይወትኩምከ እንታይ እያ፧ ንቝሩብ ጊዜ ተራእዩ ደኃር ዚበንን ሃፋ ኢኹም። 15. “ጐይታ እንተ ፈቒድዎ፥ ብሕይወት ክንነብር ኢና፥ ከምዚ ወይ ከምቲ ኽንገብር ኢና” እዩ ኽትብሉ ዚግብኣኩም ነይሩ። 16. ሕጂ ግና ትጀሃሩን ትምክሑን ኣሎኹም። ከምዚ ዝበለ ትምክሕቲ ኵሉ ኸኣ ክፉእ እዩ። 17. እምበኣርከስ እቲ ኺገብሮ ዚግብኦ ሠናይ ነገር ዚፈልጥ፥ ግና ዘይገብሮ፥ ንሱ ኃጢኣተኛ እዩ።

ግብረ ሃዋርያት Acts

9. እዚ ምስ ኮነ ድማ እቶም ካልኦት ሕሙማት ደቂ እታ ደሴት ናብኡ መመጺኦም ተፈወሱ። 10. ንሳቶም ከኣ ብብዙኅ መገዲ ኣኽበሩና፥ ብመርከብ ክንብገስ ከሎናውን ዜድልየና ዘበለ ሂቦም ኣፋነውና። 11. ድኅሪ ሠለስተ ወርኂ ኸኣ በታ ኣብታ ደሴት ከሪማ ዝነበረት ናይ ዲዮስቆሮስ ዕላማ ዝነበራ መርከብ እስክንድርያ ጌርና ተበገስና። 12. ኣብ ሲራኩዛ ምስ በጻሕና ኸኣ ኣብኣ ሠለስተ መዓልቲ ጸናሕና። 13. ካብኣ ኃሊፍና ኸኣ ናብ ሬግዩም ኣቶና፤ ንጽባሒቱ ንፋስ ደቡብ ነፈሰ እሞ፥ ብኻልኣይቲ መዓልቲ ናብ ፑቲዮሉስ በጻሕና። 14. ኣብኣ ድማ ኣኅዋት ረኸብና እሞ፥ ሾብዓተ መዓልቲ ምስኣቶም ክንቅኒ ለመኑና፥ ከምዚ ኢልና ድማ ናብ ሮማ በጻሕና። 15. እቶም ኣኅዋት ወሬና ምስ ሰምዑ ኸኣ፥ ክሳዕ እቲ ኣጵያስ ዚብሃል ዕዳጋን ክሳዕ “ሠለስተ መኃድር” እትብሃል ቦታን መጺኦም ተቐበሉና፤ ጳውሎስ ከኣ ምስ ረኣዮም ንኣምላኽ ኣመስገነ፥ ኣዝዩውን ተጸናንዐ። 16. ኣብ ሮማ ምስ ኣቶና ኸኣ እቲ ሓለቓ ሚእቲ [ነቶም እሱራት ንሓለቓ ሠራዊት ኣኅሊፉ ሃቦም]፥ ንጳውሎስ ግና ምስ ሓደ ዚሕልዎ ዓቀይታይ ንበይኑ ኪቕመጥ ተፈቐደሉ።

ስንክሳር Synaxarium

አባ ስላማ ካልእ መተርጉመ መጻሕፍት
ወ፯ ደቂቁ እለ ኖሙ ፫፻፸ወ፪ኤተ ዓመተ

መዝሙር Psalm

ዎ እግዚኣብሄር ኣምላኸይ፣ ጠምት እሞ ምለሰለይ። ኣነ ድቃስ ሞት ከይድቅስ፣ ጸላእየይ፣ ስዒረዮ፣ ከይብል፣ እንተ ተናወጽኩ፣ ተጻረርተይ ከይፍስሁስ፣ ነዒንተይ ኣብርሃየን።

ነጽረኒ ወስምዐኒ እግዚኦ አምላኪየ፤
አብርሆን ለአዕይንትየ ከመ ኢይኑማ ለመዊት፤
ወከመ ኢይበሉኒ ጸላእትየ ሞእናሁ።

ወንጌል Gospel

23. በታ መዓልቲ እቲኣ “ትንሣኤ ሙታን የልቦን” ዚብሉ ሰዱቃውያን ናብኡ መጹ። 24. ከምዚ ኢሎም ድማ ሓተትዎ፡ - “መምህር! ሙሴ ‘ሓደ ሰብ ውሉድ ዘይብሉ እንተ ሞተ፥ እቲ ኃው ነታ ሰበይቲ ኃዉ ይውረሳ፥ ንኃዉ ድማ ውሉድ የቑመሉ’ ኢሉ ኣሎ። 25. እምበኣር ኣባና ሾብዓተ ኣኅዋት ነበሩ። እቲ ዓብይ ሰበይቲ ኣእትዩ፥ ከይወለደ ሞተ፥ እታ ሰበይቱ ድማ ንኃው ኃደጋ፥ 26. ከምኡ ድማ እቲ ኻልኣይን ሣልሳይውን፥ ክሳዕ ሾብዓቲኦም። 27. ድኅሪ ዅሎም ድማ እታ ሰበይቲ ሞተት። 28. ኵሎም ኣእትዮምዋ ነይሮም እዮም እሞ፥ ብጊዜ ትንሣኤ ሙታን ካብ ሾብዓቲኦም ሰበይቲ መኖም ክትከውን እያ፧” 29. ኢየሱስ ድማ “መጻሕፍቲ ኾነ ኃይሊ ኣምላኽ ብዘይምፍላጥ ትጋገዩ ኣሎኹም። 30. ኣብ ጊዜ ትንሣኤስ፥ ኣብ ሰማያት ከም መላእኽቲ ኣምላኽ እዮም እምበር፥ ኣይምርዓዉ ኣየመርዓዕዉ። 31. - 32. ብዛዕባ ትንሣኤ ሙታን ግና እቲ ካብ ኣምላኽ ‘ኣነ ኣምላኽ ኣብርሃም፥ ኣምላኽ ይስሓቅ፥ ኣምላኽ ያዕቆብ እየ’ ዝተባህለልኩምዶ ኣየንበብኩምን ኢኹም፧ እምበኣርከስ ንሱ ኣምላኽ ሕያዋን እዩ እምበር፥ ኣምላኽ ምዉታት ኣይኮነን” ኢሉ መለሰሎም። 33. እቶም ሕዝቢ ኸኣ ብትምህርቱ ተገረሙ። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ንእግዚኣብሄር ሓድሽ መዝሙር ዘምሩ፣ ኵልኺ ምድሪ፣ ንእግዚኣብሄር ዘምሪ። ንእግዚኣብሄር ዘምሩ፣ ንስሙ ባርኹ።

ሰብሕዎ ለእግዚአብሔር ስብሐተ ሐዲሰ፤
ሰብሕዎ ለእግዚአብሔር ኵላ ምድር፤
ሰብሕዎ ለእግዚአብሔር ወባርኩ ለስሙ።

ወንጌል Gospel

11. ኢየሱስ ናብ ኢየሩሳሌም ኪኸይድ ከሎ ድማ ብመንጎ ሰማርያን ገሊላን ኃለፈ። 12. ንሱ ናብ ሓንቲ ዓዲ ኺኣቱ ኸሎ ኸኣ ብርሑቕ ደው ዝበሉ፥ ዓሠርተ ለምጻማት ተጓነፍዎ። 13. ድምፆም ዓው ኣቢሎም ከኣ “ኦ ኢየሱስ! ኦ መምህር! ምሓረና” በልዎ። 14. ንሱ ኸኣ ምስ ረኣዮም፥ “ኪዱ ርእስኹም ንኻህናት ኣርእዩ” በሎም። ኪኸዱ ኸለዉ ኸኣ ነጽሑ። 15. ካብኣቶም ሓደ ኸኣ ከም ዝሓወየ ምስ ረኣየ፥ ድምፁ ዓው ኣቢሉ ንኣምላኽ እናኣመስገነ ተመልሰ። 16. እናኣመስገኖ ኸኣ ኣብ እግሪ ኢየሱስ ብገጹ ተደፍአ። ንሱ ሳምራዊ ነበረ። 17. ኢየሱስ ከኣ ኸምዚ እናበለ ሓተተ፦ “ዝነጽሑስ ዓሠርተ ደይኮኑን፧ እቶም ትሽዓተ ደኣ ኣበይ ኣለዉ፧ 18. ብጀካ እዚ ኻልእ ዝዓሌቱስ ንኣምላኽ ክብሪ ኺህብ ዝተመልሰዶ የልቦን፧” 19. ብድኅርዚ “ተንሥእ እሞ ኪድ፤ እምነትካ ኣሕወየትካ” በሎ። ‘ሓንቲ ቃል ካብ ኦሪት ወይ ነብያት ካብ ትሓልፍ ሰማይን ምድርን ክሓልፍ ይቐልል።’ በለ ጐይታ ንደቀ መዛሙርቱ።

መዝሙረ ዳዊት Psalm

ንእግዚኣብሄር ዘምሩ፣ ንስሙ ባርኹ፣ ካብ መዓልቲ ንመዓልቲ ምድሓኑ አበስሩ። ክብሩ አብ ማእከል አህዛብ፣ ተአምራቱ አብ ማእከል ኵሎም ህዝብታት አዘንትዉ።

ወንግርዎሙ ለአሕዛብ ስብሐቲሁ፤
ወለኵሎሙ አሕዛብ ተአምሪሁ፤
እስመ ዓቢይ እግዚአብሔር ወብዙኅ አኰቴቱ።

ወንጌል Gospel

24. ኢየሱሰ ከኣ “መጽሓፍቲ ኾነ ኃይሊ ኣምላኽ ሰኣን ምፍላጥኩምዶ ኣይኮነን ትጋገዩ ዘሎኹም፧ 25. ካብ ምዉታት ምስ ተንሥኡስ ከምቶም ኣብ ሰማያት ዘለዉ መላእኽቲ ኣምላኽ እዮም እምበር፥ ኣይምርዓውን ኣየመረዓዕውን እዮም። 26. ምውታት ከም ዚትንሥኡኸ ኣብቲ ብዝዕባ ቘጥቋጥ ዚዛረብ መጽሓፍ ሙሴ፥ “ኣነ ኣምላኽ ኣብርሃምን ኣምላኽ ይስሃቕን ኣምላኽ ያዕቆብን እየ” ኢሉ ኸም ዝተዛረቦዶ ኣየንበብኩምን ኢኹም፧ 27. እምበኣር ንሱ ኣምላኽ ሕያዋን እዩ እምበር ኣምላኽ ምዉታት ኣይኮነን፥ ንስኻትኩም ግና ኣዚኹም ትጋገዩ ኣሎኹም” ኢሉ መለሰሎም። እትሰምዕ እዝኒ ዘላቶ ይስማዕ!

መልእክተ ጳውሎስ Pauline Epistle

18. ሓደ እኳ፥ ሓቂ ብዘይብሉ ትሕትናን ንመላእኽቲ ብዚግበር ኣምልኾን ነቲ ዓስቢ ዓወት ኣየግድፍኩም። እዚ ሰብዚ በቲ ዝረኸቦ ራእይ እናተመጻደቐ፥ ከንቱ ብዝኾነ ሥጋዊ ኣተሓሳስብኡ ዚዕበ እዩ። 19. እዚ ሰብዚ ምስቲ ርእሲ ዝኾነ ክርስቶስ ርክብ የብሉን፥ ንሰብነት ብጅማትን መገጣጠምን ኣሲሩ ዚምግብ ርእሲ እዩ። ኣምላኽ ከም ዝሃቦ ኸኣ ይዓቢ። 20. - 21. እምበኣር ካብ ኣተሓሳስባ እዛ ዓለም እዚኣ ምስ ክርስቶስ ሞይትኩም እንተ ዄንኩም፥ ስለምንታይ ደኣ ገና ከም ኣነባብራ ዓለም ትነብሩ፧ ስለምንታይከ ነቲ “ኣይትኃዝ፥ ኣይትልከፍ፥ ኣይትተንኪ” ዚብል ሕጊ ትግዝኡ፧ 22. እዚ ሕጊ እዚ ብምሉኡ ሰብ ዝሓገጎን ዝመሃሮን ስለ ዝኾነ፥ ምስ ፈጸምካዮ ኃላፊ እዩ። 23. እዚ ሰብ ባዕሉ ብዘጥረዮ ኣምልኾን ሓቂ ብዘይብሉ ትሕትናን ንሰብነት ኣበርቲዑ ዚቐጽዕ መልክዕ ጥበብ ዘለዎ ሕጊ እዩ። ባህታ ሥጋ ንምቊጽጻር ግና ኣይጠቅምን እዩ።

ዘካልእ መልእክት Universal Epistle

1. ካብ መራሕ ቤተ ክርስትያን፥ ናብታ ኅርይቲ እመቤትን፥ ናብቶም ኣነ ብሓቂ ዘፍቅሮም ደቃን፥ ኣነ በይነይ ዘይኮንኩስ፥ እቶም ነታ ሓቂ ዚፈልጥዋ ዘበሉ ዅላቶም ድማ ዜፍቅርዎም። 2. እነፍቅሮም ድማ ስለ እታ ኣባና ዘላ፥ ንዘለዓለም ከኣ ምሳና እትነብር ሓቂ፥ ኢልና ኢና። 3. ካብ እግዚኣብሔር ኣቦናን ካብ ኢየሱስ ክርስቶስ ወዱ ንእግዚኣብሔር ኣቦን፥ ጸጋን ምሕረትን ሰላምን ብሓቅን ብፍቕርን ምሳና ኪኸውን እዩ። 4. ገለ ካብ ደቅኺ ከምቲ ኻብ ኣቦ ዝተቐበልናዮ ትእዛዝ ኮይኖም ብሓቂ ዚነብሩ ስለ ዝረኸብኩ፥ ብዙኅ እሕጐስ ኣሎኹ። 5. ሕጂ ድማ እመቤተይ፥ ሓድሽ ዘይኮነስ፥ እቲ ኻብ መጀመርታ ዝነበረና ትእዛዝ እየ ዝጽሕፈልኪ ዘሎኹ፥ ማለት ንሓድሕድና ክንፋቐር እልምነኪ ኣሎኹ። 6. ፍቕሪ ማለት ትእዛዛት ኣምላኽ እናፈጸምካ ምንባር ማለት እዩ። ከምቲ ካብ መጀመርታ ዝሰማዕኩምዎ፥ እቲ ትእዛዝ “ብፍቕሪ ንበሩ” ዚብል እዩ። 7. ኢየሱስ ክርስቶስ ሰብ ኮይኑ ብሥጋ ኸም ዝመጸ ዘይእመኑ ብዙኃት መስሓትቲ ኣብ ዓለም ተላዒሎም ኣለዉ። መስሓትን ፀረ ክርስቶስን ዚበሃል ከኣ ኸምዚ ዝበለ እዩ።

ግብረ ሃዋርያት Acts

17. ነታ ጃልባ ስሒቦም ምስ ኣውፅእዋ፥ ነታ መርከብ ብታሕቲ ብገመድ ኣሰርዋ። ኣብ ድበት ሑጻ ናብ ሰርቱስ ከይወድቁ ፈሪሆም ድማ ነቲ ጋንጽላ ጠቕሊሎም ትኺድ ኃደግዋ። 18. ንጽባሒቱ ማዕበል እናበርትዓና ምስ ከደ ድማ ኻብቲ ጽዕነት ናብ ባሕሪ ኺድርብዩ ጀመሩ። 19. ብሣልሰይቲ መዓልቲ ድማ ነቲ ናውቲ መርከብ ብገዛእ ኣእዳዎም ደርበይዎ። 20. ብዙኅ መዓልቲ ፀሓይ ኮነ ከዋኽብቲ ከይረአና ማዕበል እናበርትዓና ምስ ከደ፥ ኵሉ ተስፋ ድኅነት ሕይወትና ፈጺምና ቐበጽናዮ። 21. እኽሊ ኸይጠዓሙ ብዙኅ መዓልቲ ምስ ገበሩ ድማ ጳውሎስ ኣብ ማእከሎም ደው ኢሉ “ኣቱም ሰባት፥ ምኽረይ ሰሚዕኩምኒ እንተ ትኾኑ ኔርኩም፥ ካብ ቀርጤስ ኣይምተበገስኩምን ኔርኩም። እዚ ጸበባን ጉድኣትን እዚ ኣይምረኸበኩምን ነይሩ። 22. ሕጂ ድማ እዛ መርከብ ክትጉዳእ እያ፤ ካባኻትኩም ግና ሓደ እኳ ኣይኪጠፍእን እዩ፤ ስለዚ ክትሃድኡ እልምነኩም ኣሎኹ።

ስንክሳር Synaxarium

በዓለ እግዝእትነ ማርያም
ወኄራኒ ሰማዕት

መዝሙር Psalm

ኣዋልድ ነገስታት ኣብ ማእከል እተን ክቡራት ኣንስትኻ እየን፣ እታ ንግስቲ ብወርቂ ኦፈር ተሰሊማ፣ ኣብ የማንካ ትቐውም ኣላ።

አዋልደ ነገሥት ለክብርከ፤
ወትቀውም ንግሥት በየማንከ፤
በአልባሰ ወርቅ ዑጽፍት ወሑብርት።

ወንጌል Gospel

1. “ሽዑ መንግሥተ ሰማያት መመብራህተን ኂዘን መርዓዊ ኺቕበላ ዝወፃ ዓሠርተ ደናግል ትመስል። 2. ካብኣተን እተን ኃሙሽተ ዓያሱ፥ እተን ኃሙሽተ ኸኣ ለባማት ነበራ። 3. እተን ዓያሱ ቐቀንዴለን ወሲደን፥ ዘይቲ ኣይተማልኣን። 4. እተን ለባማት ግና መምስ ቀንዴለን ዘይቲ ኣብ ጢናአን ተማሊአን ነበራ። 5. መርዓዊ ምስ ደንጐየ ድማ፥ ዂለን ተታኺሰን ደቀሳ። 6. ፍርቂ ለይቲ ምስ ኮነ ‘እንሆ መርዓዊ ኽትቅበሉ ውፁ’ ዚብል ዋዕዋዕታን ዕልልታን ኮነ። 7. ሽዑ ዅለን እተን ደናግል ተንሢአን፥ ቀቀንዴለን ኣሰናደዋ። 8. እተን ዓያሱ ነተን ለባማት ‘መባርህትና ኺጠፍኣና ኢለን እሞ፥ ካብ ዘይትኽን ግዳ ሃባና’ በላአን። 9. እተን ለባማት ግና ናብቶም ዚሸጡ ደኣ ኼድክን ንርእስኽን ተሻየጣ እምበር ንኣናን ንኣኻትክንን ዚኣክል የብልናን ኢለን መለሳለን። 10. ኪዕድጋ ምስ ከዳ እቲ መርዓዊ መጸ፥ እተን ተዳልየን ዝጸንሓ ምስኡ ናብ መርዓ ኣተዋ፥ ማዕጾ ድማ ተዓጽወ። 11. ደኃር እተን ዝተረፋ ደናግል መጺአን “ኦ ጐይታ! ኦ ጐይታ! ኣርኅወልና ኾታ፧” በላ። 12. ንሱ ግና “ብሓቂ ኣይፈልጠክንን እየ እብለክን ኣሎኹ” ኢሉ መለሰለን። 13. እምብኣርሲ እታ ወዲ ሰብ ዚመጸላ መዓልትን ሰዓትን ኣይትፈልጥዋን ኢኹም እሞ ንቕሑ። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ኣፈይ ምስጋና እግዚኣብሄር ይዛረብ፣ ኵሉ ስጋ ኸኣ ንቕዱስ ስሙ ንዘለአለም ኣለም ይባርኾ።

ስብሐተ እግዚአብሔር ይነግር አፉየ፤
ወኵሉ ዘሥጋ ይባርክ ለስሙ ቅዱስ፤
ለዓለም ወለዓለመ ዓለም።

ወንጌል Gospel

31. ንሱ ምስ ወፀ፥ ሽዑ ኢየሱስ ከምዚ በለ፦ “ሕጂ ወዲ ሰብ ከበረ፥ ኣምላኽውን ብእኡ ኸበረ። 32. ኣምላኽ ብእኡ ኻብ ከበረ፥ ኣምላኽ ከኣ ንእኡ ባዕሉ ኬኽብሮ እዩ፥ ቀልጢፉውን ኬኽብሮ እዩ። 33. ደቀየ፥ ገና ቚሩብ ጊዜ ምሳኻትኩም እየ፥ ክትደልዩኒ ኢኹም፥ ከምቲ ንኣይሁድ 'ናብቲ ኣነ ዝኸዶ ንስኻትኩም ክትመጹ ኣይክኣለኩምን እዩ' ዝበልክዎም፥ ንኣኻትኩምውን ሕጂ እብለኩም ኣሎኹ። 34. ንሓድሕድኩም ኽትፋቐሩ፥ እወ፥ ከምቲ ኣነ ዘፍቀርኩኹም ጌርኩም ንሓድሕድኩም ምእንቲ ክትፋቐሩ፥ ሓድሽ ትእዛዝ እህበኩም ኣሎኹ። 35. ነንሓድሕድኩም ፍቕሪ እንተ ኣላትኩም በዚ ደቀ መዛሙርተይ ምዃንኩም ኵሉ ኪፈልጥ እዩ።” 36. ስምዖን ጴጥሮስ ከኣ፥ “ጐይታይ! ናበይ ክትከይድ ኢኻ፧” በሎ። ኢየሱስ ድማ “ናብቲ ኣነ ዝኸዶ ንስኻ ሕጂ ኽትስዕበኒ ኣይትኽእልን ኢኻ፥ ደኃር ግና ኽትስዕበኒ ኢኻ” ኢሉ መለሰሉ። 37. ጴጥሮስ ከኣ “ጐይታይ! ስለምንታይ እየ ሕጂ ኽስዕበካ ዘይክእል፧ ሕይወተይ እንተ ኾነ እኳ በጃኻ ኣኅሊፈ ኽህብ እየ” በሎ። 38. ኢየሱስ ከኣ “ብሓቂዶ ንሕይወትካ በጃይ ከተኅልፋ ኢኻ፧ ሠለስተ ጊዜ ክሳዕ እትኽሕደኒ ደርሆ ኸም ዘይንቁ፥ ብሓቂ ብሓቂ እብለካ ኣሎኹ” ኢሉ መለሰሉ። ብወልድ ዝአምን ናይ ዘልኣለም ሕይወት ኣለዎ።

መዝሙረ ዳዊት Psalm

ኵሉ ጊዜ ኣይገንሕን፣ ንዘለአለም ከኣ ኣይቅየምን እዩ። ከም መጠን ሓጢኣትና ኣይገብረናን፣ ከም መጠን ኣበሳና ድማ ኣይፈድየናን እዩ።

ኢይቀሥፍ ወትረ ወኢይትመዓዕ ዘልፈ፤
አኮ በከመ ኃጢአትነ ዘገብረ ለነ፤
ወኢፈደየነ በከመ አበሳነ።

ወንጌል Gospel

1. “ብሰብ ምእንቲ ኽትርኣዩ ኢልኩም ጽድቅኹም ከይትገብሩ ተጠንቀቑ። እንተ ዘይኮነ ካብቲ ኣብ ሰማያት ዘሎ ኣቦኹም ዓስቢ የብልኩምን። 2. እምብኣርከ ንስኻ ክትምጽውት ከሎኻ፥ እቶም ግቡዛት፥ ብሰብ ምእንቲ ኺንኣዱ ኣብ ናይ ኣይሁድ ኣባይቲ ጸሎትን ዓበይቲ መገድታትን ከም ዚገብርዎ ኣብ ቅድሜኻ መለኸት ኣይትንፋሕ። ዓስቦም ከም ዝተቐበሉ፥ ብሓቂ እበለኩም ኣሎኹ። 3. - 4. ንስኻ ግና ምጽዋትካ ብኅቡእ ምእንቲ ኪኸውን፥ ክትምጽውት ከሎኻ የማነይትኻ እትገብሮ ጸጋመይትኻ ኣይትፍለጦ፥ እቲ ብሥዉር ዚርኢ ኣቦኻ ድማ ብግልጺ ኪፈድየካ እዩ። 5. “እቶም ግቡዛት ብሰብ ምእንቲ ኺርኣዩ፥ ኣብ ናይ ኣይሁድ ኣባይቲ ጸሎትን፥ ኣብ ቀራናታት መገድን ደው ኢሎም ኪጽልዩ ይፈትዉ እዮም እሞ፥ ክትጽልዩ ኸሎኹም ከምኣቶም ኣይትኹኑ፥ ዓስቦም ከም ዝተቐበሉ ብሓቂ እብለኩም ኣሎኹ። 6. ንስኻ ግና ክትጽሊ ከሎኻ፥ ናብ ቤትካ እቶ፥ ማዕጾኻ ዓጺኻ ናብቲ ብሥዉር ዘሎ ኣቦኻ ጸሊ። እቲ ብሥዉር ዚርኢ ኣቦኻ ድማ ብግልጺ ኪፈድየካ እዩ። 7. “ኣሕዛብ ብምብዛኅ ዘረባኦም ዚስምዑ እዩ ዚመስሎም እሞ፥ ኽትጽልዩ ኸሎኹም ከምኣቶም ከንቱ ዘረባ ኣይተብዝኁ። 8. እምብኣርከ ኣቦኹም ከይለመንኩምዎ፥ ዜድልየኩም ይፈልጥ እዩ እሞ፥ ኣይትምሰልዎም። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

መልእክተ ጳውሎስ Pauline Epistle

25. ኣኅዋተይ! ምእንቲ “ብልህታት ኢና” ኢልኩም ከይትምክሑስ፥ ነዛ ምሥጢር እዚኣ ኽትፈልጡ ምፈቶኹ። ንገለ እስራኤላውያን ትሪ ልቢ ዝበጽሖም፥ ኣሕዛብ ናብ ድኅነት ብምልኣት ክሳዕ ዚምለሱ እዩ። 26. ስለዚ እስራኤላውያን ብምሉኦም ኪድኅኑ እዮም። ከመይ “መድኅኒ ካብ ጽዮን ኪመጽእ እዩ፥ ካብ ያዕቆብ ኃጢኣት ኬርሕቕ እዩ። 27. ኃጢኣቶም ምስ ኣርሓቕኩ ኸኣ፥ እቲ ምስኣቶም ዝኣትዎ ኺዳን እዚ እዩ” ዚብል ጽሑፍ ኣሎ። 28. እስራኤላውያን ንወንጌል ብዘይ ምቕባሎም፥ ምእንቲ ጥቕምኹም ጸላእቲ እግዚኣብሔር ኮኑ፥ ብኅርየት ግን ሳላ ኣቦታት ፍቁራት እግዚኣብሔር እዮም። 29. ከመይ እግዚኣብሔር ውህበት ምስ ሃበን ምስ ጸውዐን ኣይጠዓስን እዩ። 30. ንስኻትኩም ቀደም ንኣምላኽ ኣይተኣዘዝኩምዎን፥ ሕጂ ግና ብናይ እስራኤል ዘይምእዛዝ ተመሓርኩም። 31. ከምኡውን ንሳቶም፥ በቲ ንስኻትኩም ዝተመሓርኩምሉ ምሕረት ምእንቲ ኪምሓሩ ሕጂ ኣይተኣዘዙን። 32. ምኽንያቱ፥ ኣምላኽ ምሕረቱ ምእንቲ ኼርእዮም ንዅሎም ኣብቲ ዘይምእዛዝ ዓጸዎም። 33. ኣየ! ሃብቲ ኣምላኽን ጥበቡን ፍልጠቱን ክንደይ ዓሚቚ እዩ፥ ንፍርዱ ኪምርምሮ ዚኽእል የልቦን፥ ንመገዱ ኪእስሮ ዚኽእልውን የልቦን። 34. ሓሳብ እግዚኣብሔር ዚፈልጥ መን እዩ፧ ወይስ መን እዩ ዘማኸሮ፧ 35. ንኣምላኽከ ቀደም ገለ ዝሃቦ እሞ ዚፍደዮ መን እዩ፧ 36. ምኽንያቱ ዅሉ ኻብኡን ብእኡን ንእኡን እዩ። ንእኡ ንዘለዓለም ክብሪ ይኹኖ። ኣሜን።

ዘካልእ መልእክት Universal Epistle

19. ነዚ ብዝበለጸ ዜረጋግጽልና ቃል ነብያትውን ኣሎና። ምድሪ ኽሳዕ ዚውግሕ፥ ኮኸብ ጽባሕ ኸኣ ኣብ ልብኹም ክሳዕ ዚወፅእ፥ ከምቲ ኣብ ጸልማት ዜብርህ መብራህቲ ጌርኩም እንተ ኣስተብሃልኩምሉ ሠናይ ትገብሩ።20. ቅድሚ ዅሉ፥ ነቲ ኣብ ቅዱስ መጽሓፍ ዘሎ ትንቢት፥ ሓደ ብናይ ርእሱ ኣተሓሳስባ ኪትርጒሞ ከም ዘይክእል ፍለጡ።21. ከመይ ትንቢት፥ ሰባት ብመንፈስ ቅዱስ ተመሪሖም ካብ ኣምላኽ ዝተዛረብዎ እምበር፥ ከቶ ብፍቓድ ሰብ መጺኡ ኣይፈልጥን።

ግብረ ሃዋርያት Acts

48. - 49. ከምቲ ነቢይ ‘ሰማይ ዝፋነይ እዩ፥ ምድሪ ኸኣ መርገጽ እግረይ እዩ፥ ከመይ ዝበለ ቤት ደኣ ኢኹም እትሓንጹለይ፧ ይብል እግዚኣብሔር፥ ከመይ ዝበለ ሥፍራኸ እዩ እቲ ኣነ ዝዓርፈሉ፧ ነዚ ዅሉ ነገራትስ ኢደይዶ ኣይኮነን ዝገበሮ፧’ ዝበሎ፥ እቲ ልዑል ኣምላኽ ብኢድ ሰብ ኣብ ዝተሓንጸ ቤት ኣይነብርን እዩ። 50. ኣቱም ተረርቲ ኽሳድ፥ ልብኹምን ኣእዛንኩምን ዘይተገዝረ፥ ንስኻትኩምውን ከምቲ ናይ ኣቦታትኩም ንመንፈስ ቅዱስ ኵሉ ጊዜ ትጻረርዎ ኣሎኹም። 51. ካብ ነቢያትከ ኣቦታትኩም ዘይሰጐጒዎ መን እዩ፧ ንሳቶም ነቶም ብዛዕባ ምምጻእ እቲ ጻድቅ ኣቐዲሞም ዘበሠሩ ቐተልዎም፤ ሕጂውን ንስኻትኩም ኣኅሊፍኩም ወሃብቱን ቀተልቱን ኢኹም። 52. ንስኻትኩም ነቲ ሕጊ ብኢድ መላእኽቲ ተቐቢልኩምዎ ኔርኩም፥ እንተኾነ ኣይሓሎኹምዎን።” 53. እቶም ሰብ ከኣ ነዚ ምስ ሰምዑ፥ ልቦም ነደደ፥ ኣስናኖም ከኣ ሓርቀሙሉ። 54. ንእስጢፋኖስ ግና መንፈስ ቅዱስ መልኦ፥ ናብ ሰማይ ኣንቃዕሪሩ ኸኣ ኽብሪ ኣምላኽን ኢየሱስ ድማ ኣብ የማን ኣምላኽ ደው ኢሉን ረኣየ።

ስንክሳር Synaxarium

ሚክያስ ነቢይ ፩ እምደቂቀ ነቢያት

መዝሙር Psalm

ንሱ ሰብ ኪጠቕዖም ኣይሐደገን፣ ንቕቡኣተይ ኣይትተንክይዎም፣ ነብያተይ ድማ ክፉእ ኣይትግበርዎም፣ ኢሉ ምእንትኦም ንነገስታት ገሰጾም።

ወገሠጸ ነገሥተ በእንቲአሆሙ፤
ኢትግስሱ መሲሓንየ፤
ወኢታሕሥሙ ዲበ ነቢያትየ።

ወንጌል Gospel

1. - 2. ኢየሱስ ብዘመን ንጉሥ ሄሮድስ ኣብ ቤተ ልሔም ምድሪ ይሁዳ ምስ ተወለደ፥ እንሆ ካብ ሃገር ምብራቕ ዝተላዕሉ ሰብ ጥበብ፥ “እቲ ዝተወለደ ንጉሥ ኣይሁድ ኣበይ ኣሎ፧ ኮኸቡ ብምብራቕ ርኢና እሞ፥ ክንሰግደሉ መጺእና” እናበሉ ናብ ኢየሩሳሌም በጹሑ። 3. ንጉሥ ሄሮድስ ነዚ ሰሚዑ ተሸበረ፥ ኵሎም ሕዝቢ ኢየሩሳሌምውን ምስኡ ተሸበሩ። 4. ንሱ ድማ ንዅሎም ሊቃነ ኻህናትን ናይ ሕዝቢ መማህራን ሕግን ኣኪቡ፥ “ክርስቶስ ኣበይ እዩ ዚውለድ፧” ኢሉ ሓተቶም። 5. - 6. ንሳቶም ከኣ “‘ኣቲ ቤተ ልሔም ምድሪ ይሁዳ፥ ንሕዝበይ እስራኤል ዚጓስዮም ሹም ካባኺ ኪወፅእ እዩ እሞ፥ ካብ ሹማምንቲ ይሁዳ ከቶ ኣይትንእስን ኢኺ’ ዝብል ብነቢይ ጽሑፍ ስለ ዘሎ፥ ኣብ ቤተ ልሔም ናይ ይሁዳ እዩ” በልዎ። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ዎ እግዚኣብሄር፣ ናባኻ ኤእዊ ኣሎኹ፣ ከይመለስካለይ ስቕ እንተ በልካ፣ ኣነ ነቶም ናብ ጕድጓድ ዚወርዱ ኸይመስልሲ፣ ዎ ኸውሔይ፣ ኣይትጽመመኒ። ነእዳወይ ናብ ቅድስተ ቕዱሳን ኣልዒለ፣ ናባኻ ኽምህለል ከሎኹ፣ ንድምጺ ጸሎተይ ስምዓዮ።

ኀቤከ እግዚኦ ጸራሕኩ አምላኪየ ወኢትጸመመኒ፤
እመሰ ተጸመምከኒ እከውን ከመ እለ ይወርዱ ውስተ ግብ፤
ስምዐኒ እግዚኦ ቃለ ስእለትየ ዘጸራሕኩ ኀቤከ።

ወንጌል Gospel

39. ብምስላ ኸኣ ከምዚ በሎም፦ “ዕዉርዶ ንዕዉር ኪመርሖ ይኽእል እዩ፧ ክልቲኦምዶኸ ኣብ ጕድጓድ ኣይወድቁን፧ 40. ተመሃሪ ካብ መምህሩ ኣይበልጽን፥ ተማሂሩ ዝወድአ ዅሉ ግና ከም መምህሩ እዩ ዚኸውን። 41. “ኣብ ዓይንኻ ዘሎ ሠርወ ዘየስተብሃልካስ ፥ ስለምንታይ ግዳ ኣብ ዓይኒ ኃውካ ዘሎ በሰር ትርኢ፧ 42. ወይሲ ንስኻ ኣብ ዓይንኻ ዘሎ ሠርወ ዘይረኣኻስ ከመይ ኢልካ ኢኻ ንኃውካ፥ ‘ኣታ ኃወይ፥ ነቲ ኣብ ዓይንኻ ዘሎ በሰር ከውፅኣልካ ኅደገኒ’ ክትብሎ ትኽእል፧ ኣታ ግብዝ፥ ቅድም ነቲ ኣብ ዓይንኻ ዘሎ ሠርወ ኣውፅእ እሞ ብድኅሪኡ ነቲ ኣብ ዓይኒ ኃውካ ዘሎ በሰር ምውፃእ ኣጸቢቕካ ኽትርኢ ኢኻ። 43. “ሕማቕ ፍረ ዚፈሪ ጽቡቕ ኦም፥ ወይ ከኣ ጽቡቕ ፍረ ዚፈሪ ሕማቕ ኦም፥ የልቦን። 44. ምኽንያቱ በለስ ካብ እሾዂ፥ ወይኒ ኸኣ ካብ ተኾርባ ኣይቕንጠብን እዩ፥ ኵሉ ኦም ብፍሪኡ እዩ ዚፍለጥ። 45. ኣፍ ድማ ካብ ምልኣት ልቢ እዩ ዚዛረብ እሞ እቲ ሕያዋይ ሰብ ካብቲ ሠናይ መዝገብ ልቡ ሠናይ የውፅእ፥ እቲ ኽፉእ ድማ ካብቲ ኽፉእ መዝገብ ልቡ ኽፉእ የውፅእ። 46. “ነቲ ኣነ ዝብሎ ዘይትገብሩስ፥ ስለምንታይ ኢኹም ጐይታይ! ጐይታይ! እትብሉኒ፧ 47. እቲ ናባይ ዚመጽእን ንቓለይ ሰሚዑ ዚገብሮን ዘበለ ዅሉ ንመን ከም ዚመስል ከርእየኩም እየ። 48. ንሱ ቤት ኪሠርሕ ከሎ ኣዕሚቑ ዝዀዓተን መሠረቱውን ኣብ ከውሒ ዝመሥረተን ሰብኣይ እዩ ዚመስል። ብርቱዕ ውሒዝ ምስ መጸ፥ ነቲ ቤት ደፍኦ፥ ብጽኑዕ ስለ ዝተነድቀ ኸኣ ምንቕናቑ ሰኣነ። 49. እቲ ንቓለይ ሰሚዑ ዘይገብሮ ግና ቤቱ ብዘይ መሠረት ኣብ ምድሪ ዝሠርሐ ሰብኣይ እዩ ዚመስል፤ እቲ ውሒዝ ደፍኦ፤ ብኡብኡ ወደቐ፥ ኣወዳድቓ እቲ ቤት እቲ ኸኣ ዓቢይ ኾነ።” ‘ሓንቲ ቃል ካብ ኦሪት ወይ ነብያት ካብ ትሓልፍ ሰማይን ምድርን ክሓልፍ ይቐልል።’ በለ ጐይታ ንደቀ መዛሙርቱ።

መዝሙረ ዳዊት Psalm

ካብ ተጻራሪ ኣምለስካና፣ ጸላእትናውን ዘመቱና። ከም ኣባጊዕ ክንብላዕ ኣሕሊፍካ ሀብካና፣ ኣብ ኣህዛብውን ፋሕ ኣበልካና፣

ወአግባእከነ ድኅሬነ ኀበ ፀርነ፤
ወተማሰጡነ ጸላእትነ፤
ወወሀብከነ ይብልዑነ ከመ አባግዕ።

ወንጌል Gospel

1. “እዚ ዝነገርኩኹም ብእምነትኩም ምእንቲ ኸይትዕንቀፉ ኢለ እየ። 2. ካብ ቤት ጸሎቶም ኬውፅኡኹም እዮም፥ አረ እቲ ዚቐትለኩም ዘበለስ ንኣምላኽ ኣገልግሎት ዜቕርበሉ ኸም ዘሎ ዚመስሎ ጊዜ ኽትመጽእ እያ። 3. ነቦን ንኣይን ስለ ዘይፈለጡ፥ እዚ ዅሉ ኺገብሩኹም እዮም። 4. እዚ ነገራት እዚ ዝነገርኩኹም፥ ጊዜኦም ምስ በጽሐ ኣነ ኸም ዝበልኩኹም ምእንቲ ክትዝክርዎ ኢለ እየ። ካብ መጀመርታ እዚ ዘይነገርኩኹም ምሳኻትኩም ስለ ዝነበርኩ እየ። 5. “ሕጂ ግና ናብቲ ዝለኣኸኒ እኸይድ ኣሎኹ፥ ካባኻትኩም ከኣ ሓደ እኳ 'ናበይ ኢኻ እትኸይድ፧' ኢሉ ዚሓተኒ የልቦን። 6. እዚ ስለ ዝነገርኩኹም ግና ልብኹም ኃዘን መልአ። ብወልድ ዝአምን ናይ ዘልኣለም ሕይወት ኣለዎ።

መልእክተ ጳውሎስ Pauline Epistle

1. ብቛንቋታት ሰብን መላእኽትን እንተ ዝዛረብ፥ ግና ፍቕሪ እንተ ዘይህልወኒ፥ ከም ዜድሂ ኣስራዚ ወይ ጭልጭል ከም ዚብል ጸናጽል ምኾንኩ። 2. ውህበት ትንቢት እንተ ዚህልወኒ፥ ኵሉ ምሥጢራትን ኵሉ ፍልጠትን እንተ ዝፈልጥ፥ እምባታት ክሳብ ዘግዕዝ ከኣ ኵሉ እምነት እንተ ዚህልወኒ፥ ግና ፍቕሪ እንተ ዘይህልወኒ ከንቱ ምኾንኩ ነይረ። 3. ኵሉ ገንዘበይ ከኣ ንድኻታት እንተ ዝዕድል፥ ሰብነተይ ንምንዳድ ኣኅሊፈ እንተ ዝህብ፥ ግና ፍቕሪ እንተ ዘይህልወኒ ሓንቲ እኳ ኣይጠቕመንን እዩ። 4. ፍቕሪ ዓቃል እያ፥ ፍቕሪ ለዋህ እያ፥ ፍቕሪ ኣይትቐንእን እያ፥ ፍቕሪ ኣይትጀሃርን እያ፥ ኣይትዕበን እያ። 5. ፍቕሪ ስዲ ኣይኮነትን፥ ንኣይ ይጥዓመኒ ብዚብል ኣይትምራሕን እያ። ፍቕሪ ኣይትቚጣዕን፥ ኣይትቕየምን እያ። 6. ብሓቂ ትሕጐስ እምበር ብዓመጽ ባህ ኣይብላን። 7. ፍቕሪ ንዅሉ ትፀውር፥ ንዅሉ ትኣምን፥ ብዅሉ ድማ ተስፋ ትገብር፥ ንዅሉ ትዕገሥ። 8. ትንቢት እንተሎ ንሱ ኺሰዓር እዩ፥ ምዝራብ ቋንቋታት እንተሎ ንሱ ኪውዳእ እዩ፥ ፍልጠት እንተሎውን ንሱ ኺሰዓር እዩ፥ ፍቕሪ ግና ከቶ ኣይተቋርጽን እያ። 9. ከመይ እቲ እንፈልጦ ኾነ እንንበዮ ምሉእ ኣይኮነን። 10. ግናኸ እቲ ምልኣት ምስ መጸ እቲ ጐደሎ ኪሰዓር እዩ። 11. ቈልዓ ኣብ ዝነበርኩሉ ጊዜ ኸም ቈልዓ እዛረብ ነበርኩ፥ ኸም ቈልዓ እሓስብ ነበርኩ፥ ከም ቈልዓውን እመራመር ነበርኩ። ሰብኣይ ምስ ኮንኩ ግና ነቲ ነገር ቈልዓ ኃደግክዎ። 12. ሕጂስ ከም ብመስትያት ዋግዋጎ ንርኢ ኣሎና፥ ሽዑ ግና ገጽ ንገጽ ክንርኢ ኢና። ሕጂ ፍልጠተይ ጐደሎ እዩ፥ ሽዑ ግና ከምቲ ኣምላኽ ንኣይ ዚፈልጠኒ ፍልጠተይ ምሉእ ኪኸውን እዩ። 13. ሕጂ ኸኣ እምነት፥ ተስፋ፥ ፍቕሪ፥ እዚኣተን ሠለስቲአን ኣለዋ። ካብዚኣተን እትዓቢ ግና ፍቕሪ እያ።

ዘካልእ መልእክት Universal Epistle

14. ዝሙት ዝመልኣ ኻብ ኃጢኣት ኸኣ ዘየቋርጻ ኣዕይንቲ ኣለዋኦም፥ እተን ብእምነት ዘይጸንዓ ነፍሳት ይሓብልወን፥ ስስዐ ዝለመደ ልቢ ኣለዎም፥ ደቂ መርገም እዮም።15. ነታ ቕንዕቲ መገዲ ኃዲጎም ተጋገዩ፥ መገዲ እቲ ዓስቢ ዓመጻ ዝፈተወ በለኣም ወዲ ባሶር ሰዓቡ።16. እንተኾነ ሕጊ ብምፍራሱ መግናሕቲ ተቐበለ፥ በሃም ኣድጊ ብድምፂ ሰብ ተዛሪባ ንዕብዳን እቲ ነቢይ ዓገተቶ።17. እዞም ሰባት እዚኣቶም ዝነጸፈ ዓይኒ ማይን ህቦብላ ዚኽብክቦ ግመን እዮም፥ ንኣኣቶም ግብ ዝበለ ጸልማት ዘለዓለም ተኣኪቡሎም ኣሎ።18. ንሳቶም ነቶም ኣብ ስሕተት ካብ ምንባር ብቐረባ እዋን ዝመለቑ፥ በቲ ኸንቱን ትዕቢት ዝመልኦን ዘረባኦም ገይሮም ብኽፉእ ትምኒት ሥጋን ብርኽሰትን ይሓባብልዎም ኣለዉ።19. ዝተሰዓረ ሰብ ባርያ ናይቲ ዝሰዓሮ እዩ ዚኸውን፥ ንሳቶም ግና ገዛእ ርእሶም ናይ ክፋእ ኣመል ባሮት ኸለዉ “ሓራ ኽትወፁ ኢኹም” እናበሉ የተስፍውዎም።20. ከመይ ሰባት ንጐይታናን መድኃኒናን ኢየሱስ ክርስቶስ ብምፍላጥ ካብ ርኽሰት ዓለም መሊቖም፥ ከም ብሓዱሽ ብእኣ ተጠሊፎም እንተ ደኣ ተሳዕሩ፥ ካብ ቀዳማዮም ዳኅራዮም እዩ ዚገድድ።21. ንሳቶም እናፈለጥዋ ኻብቲ ዝተዋህቦም ቅዱስ ትእዛዝ ንድኅሪት ካብ ዚምለሱስ፥ ነታ መገዲ ጽድቂ እንተ ዘይፈልጥዋ ምኃሾም ነይሩ።22. እዚ ኸኣ እቲ “ከልቢ ናብ ትፍኡ ተመልሰ” ከምኡ ኸኣ “ሓሰማ ተሓጺባ ኣብ ጸምሪ ኣንገርገረት” ዚብል ምስላ ሓቂ ከም ዝኾነ የረድእ።

ግብረ ሃዋርያት Acts

39. ምስ ወግሐ ነቲ ምድሪ ምልላዩ ሰኣኑ፤ ኣማዕድዮም ግና ገምገም ዘለዎ ልሳን ባሕሪ ረኣዩ እሞ፥ እንተ ተኻእሎምሲ ነታ መርከብ ናብኡ ኬብጽሕዋ ደለዩ። 40. ነቲ መልህቅ ፈቲሖም ከኣ ናብ ባሕሪ ደርበይዎ፤ ሽዑ ነቲ ማእሰር ስካን ፈትሕዎ፥ ነቲ ንእሽቶ ጋንጽላ ንንፋስ ገቲሮምውን ናብቲ ገምገም ገጾም ከዱ። 41. ኣብ ሓደ ልሳን ምድሪ ምስ በጽሑ ኸኣ፥ እታ መርከብ ብወገን ቅድሚታ ኣብ ምድሪ ተሸኽለት እሞ ዘይትንቕነቕ ኮነት፥ ብወገን ድኅሪታ ኸኣ ማዕበል በርቲዕዋ ተሰብረት። 42. እቶም ዓቀይቲ ድማ ሓደ እኳ ሓምቢሱ መታን ከይመልቚ ኢሎም፥ ነቶም እሱራት ኪቐትልዎም ተማኸሩ። 43. እቲ ሓለቓ ሚእቲ ግና ንጳውሎስ ኬድኅኖ ደልዩ፥ ነቲ ምኽሮም ኣይሠመሮን። ነቶም ሓምቢሶም ዚኽእሉ ድማ ቕድም ወሪዶም ናብ ምድሪ ኺወፁ ኣዘዘ። 44. ነቶም ዝተረፉ ኸኣ ገሊኦም ብሉሕ፥ ገሊኦምውን ብስባር እታ መርከብ ኪወፁ ኣዘዘ። በዚ ኸምዚ ዅላቶም ድኂኖም ናብ ምድሪ በጽሑ።

ስንክሳር Synaxarium

፫፻ ሰማዕታት
ወድምያኖስ
ወአብርሃም ሶርያዊ
ወበዓለ እግዝእትነ በዘአፍለሰታ ለዕቆና

መዝሙር Psalm

ኣኽራን ኣብ መዓሙቚ ባሕሪ እንተ ተናወጹ፣ ማያቱ እንተ ሀመመን እንተ ዐፈረን፣ ኣኽራን ብነድሮም እንተ አንቀጥቀጡ፣ ንሕናስ ኣይንፈርህን ኢና።

ወለእመኒ ፈለሱ አድባር ውስተ ልበ ባሕር፤
ደምፁ ወተሐመጉ ማያቲሆሙ፤
ወአድለቅለቁ አድባር እምኀይሉ።

ወንጌል Gospel

18. ንግሆ ናብ ከተማ ኺምለስ ከሎ ጠመየ። 19. ኣብ ጥቓ መገዲ ሓንቲ ኦም በለስ ርእዩ ናብኣ ኸደ፥ እንተኾነ ቈጽሊ ጥራይ እምበር ሓንቲ ፍረ ስለ ዘይረኸበላ “ደጊም ካባኺ ንሓዋሩ ፍረ ኣይረኸብ” በላ፥ እታ ኦም በለስ ከኣ ሽዑንሽዑ ነቐጸት። 20. ደቀ መዛሙርቱ ድማ ርእዮም “እዛ ኦም በለስ ከመይ ኢላ ብኡብኡ ነቐጸት” እናበሉ ተገረሙ። 21. ኢየሱስ ከኣ “ብሓቂ እብለኩም ኣሎኹ፥ እምነት እንት ኣልያትኩም እሞ እንተ ዘይተጠራጠርኩም እዛ ኦም በለስ ከም ዝኾነቶ ጥራይ ኣይኮነን እትገብሩ፥ ነዚ እምባዚውን ‘ተለዓል፥ ናብ ባሕሪ ተወርወር’ እንተ በልኩምዎ ኪኾነልኩም እዩ። 22. ኣሚንኩም ብጸሎት ዝለመንኩምዎ ዘበለ ዅሉ ነገርዉን ክትቅበሉ ኢኹም” እናበለ መለሰሎም። ‘ሰማይን ምድርን ክሓልፍ ቃለይ ግና ኣይሓልፍን እዩ።’ በለ ጐይታ ንደቀ መዛሙርቱ።

ቅዳሴ Liturgy :

መዝሙረ ዳዊት Psalm

ዎ ህዝበይ፣ ክምስክረልካስ ስማዕ፣ ዎ እስራኤል፣ ኣየ እንተ ትሰምዓኒ። ካልእ ኣምላኽ አብ ማእከል ኣይኹን፣ ንኻልእ ኣምላኽውን ኣይትስገድ።

ስምዓኒ ሕዝብየ ወእንግርከ፤
እስራኤል አሰምዕ ለከ፤
እመሰ ሰማዕከኒ ኢይከውነከ አምላከ ግብት።

ወንጌል Gospel

1. ኢየሱስ ነቶም ዓሠርተው ክልተ ሓዋርያት ብኃባር ጸዊዑ፥ ኣጋንንቲ ኼውፅኡን ሕሙማት ኬሕውዩን ኃይልን ሥልጣንን ሃቦም። 2. መንግሥቲ ኣምላኽ ኪሰብኩን ሕሙማት ኬሕውዩን ከኣ ለኣኾም። 3. ከምዚውን በሎም፦ “ንመገሻ ኢልኩም በትሪ ኾነ ሳንጣ፥ እንጌራ ኾነ ገንዘብ ገለ እኳ ኣይትማልኡ፤ ክልተ ቐሚሽ ድማ ኣይሃሉኹም። 4. ኣብታ ዝኣቶኹምዋ ቤት ተቐመጡ፥ ካብታ ኸተማ ኽሳዕ እትወፁ ኸኣ ኣብኣ ጽንሑ። 5. እንተ ዘይተቐበሉኹም ግና፥ ካብታ ኸተማ እቲኣ ወፂእኩም ንኣኣቶም ምእንቲ ምስክር ኪኸውን፥ ደሮና ኣእጋርኩም ንገፉ።” 6. ንሳቶም ድማ ወፂኦም ዓዲ ንዓዲ እናዞሩ ወንጌል ይሰብኩ፥ ኣብ ኵሉውን ሕሙማት የሕውዩ ነበሩ። ‘ሓንቲ ቃል ካብ ኦሪት ወይ ነብያት ካብ ትሓልፍ ሰማይን ምድርን ክሓልፍ ይቐልል።’ በለ ጐይታ ንደቀ መዛሙርቱ።