መዝሙረ ዳዊት Psalm

ይጸንሑኒ ወይትኀብኡኒ፤
እሙንቱሰ ሰኰናየ ያስተሐይፁኒ፤
ወዘልፈ ይጸንሕዋ ለነፍስየ።

ወንጌል Gospel

፩. ወቀርበ በዓለ መጸለት ዘስሙ ፋሲካ። ፪. ወየኀሥሡ ሎቱ ሊቃን ካህናት ወጸሐፍት በዘይቀትልዎ ወይፈርህዎሙ ለሕዝብ። ፫. ወቦአ ሰይጣን ውስተ ልበ ይሁዳ አስቆሮታዊ ዘእምዐሠርቱ ወክልኤቱ ኍልቍ። ፬. ወሖረ ወተናገሮሙ ለሊቃነ ካህናት ወለጸሐፍት ዘከመ ያገብኦ ሎሙ። ፭. ወተፈሥሑ ወተናገርዎ የሀብዎ ብሩረ። ፮. ወአስተኃለቁ ወየኀሥሥ ሣኅተ ያግብኦ ሎሙ እንዘ አልቦ ሰብእ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. እስመ ይሰማዕ በላዕሌክሙ ዝሙት ወዝሙትኒ ዘከመዝ ዘኢይገብርዎ አረሚ ጥቀ። ሀሎአ ዘአውሰበ ብእሲተ አቡሁ። ፪. ወአንትሙሰ ምስለ ዝኒ ዕቡያን ወበእንተዝ ለምንት ፈድፋደ ኢላሐውክሙ ከመ ይእትት እምኔክሙ ዘገብረ ዘንተ። ፫. ወአንሰ እመ ኢሀለውኩ በሥጋየ ምስሌክሙ ወበመንፈስየ ሀሎኩ ምስሌክሙ። ወናሁ እኴንኖ ከመ ዘሀሎኩ ለዘገብሮ ለዝንቱ ግብር። ፬. አንገሊገክሙ በስመ እግዚእነ አየሱስ ክርስቶስ ወምስለ መንፈስየ ምስለ ኀይለ እግዚእነ ኢየሱስ ክርስቶስ። ፭. መጥውዎ ለሰይጣን ከመ ይሥርዎ ሥጋሁ ወትድኀን መንፈሱ በዕለተ እግዚእነ ኢየሱስ። ፮. ኢኮነቤ ተዝህርትክሙ ሠናየ። ኢታአምሩኑ ከመ ኅዳጥ ብሑእ ብዙኀ ኀሪጸ ያብሕእ? ፯. አንጽሑ እንከ ብሑአ ብሉየ እምኔክሙ። ከመ ትኩኑ ለሐዲስ ኀሪጽ እስመ ዓዲክሙ ናእት አንትሙ። አኮኑ በፋሲካነ ተሰቅለ ክርስቶስ። ፰. ወይእዜኒ ግበሩ በዓለክሙ ወአኮ በብሑእ ብሉይ ወአኮ በብሑእ እኩይ ዘኃጢአት፥ አላ በብሑእ ዘቅድሳት ወዘጽድቅ።

ዘካልእ መልእክት Universal Epistle

፯. ደቂቅየ ኢያስሕቱክሙ። ኵሉ ዘይገብራ ለጽድቅ ጻድቅ ውእቱ በከመ ዝክቱ ጻድቅ ውእቱ። ፰. ወዘሰ ይገብራ ለኃጢአት እምነ ጋኔን ውእቱ እስመ ቀዳሚሁ ሰይጣን አበሰ። ወበእንተ ዝንቱ አስተርአየ ወልደ እግዚአብሔር ከመ ይሰዐር ግብሮ ለጋኔን። ፱. ወኵሉ ዘይትወለድ እምእግዚአብሔር ኢይገብራ ለኃጢአት፥ እስመ ዘርዐ ዚአሁ ቦቱ ይነብር ወኢይክል አብሶ እስመ እምእግዚአብሔር ተወልደ። ፲. ወበዝንቱ እሙራን ውእቶሙ ደቂቀ እግዚአብሔር ወደቂቀ ጋኔን። ኵሉ ዘኢይገብራ ለጽድቅ ኢኮኒ እምእግዚአብሔር፥ ወከማሁ ዘኢያፈቅር ቢጾ። ፲፩. እስመ ዛቲ ይእቲ ትእዛዝ እንተ ሰማዕክሙ ትካት ከመ ንትፋቀር በበይናቲነ። ፲፪. ወአኮ በከመ ቃየን ዘእምእኩይ ውእቱ ወቀተሎ ለእኁሁ። ወበእንተ ምንት ቀተሎ? እስመ ምግባረ ዚአሁ እኩይ ውእቱ ወዘእኁሁሰ ጻድቅ ውእቱ።

ግብረ ሃዋርያት Acts

፲፮. ወእንዘ ይጸንሖሙ ጳውሎስ በአቴና ተምዕዐ መንፈሱ ሶበ ርእየ ያጣዕዉ ኵሉ ሀገር። ፲፯. ወይትዋቀሦሙ ለአይሁድ በምኵራብ ወበምሥያጥ ኵሎ አሚረ ለዘተራከቦሙ። ፲፰. ወቦ እምውስተ ጠቢባን እለ እምትምህርተ ኤፊቆሮስ ወካልኣን ይሰመዩ ረዋቅያውያነ እለ ተአኀዝዎ ወመንፈቆሙ ይብሉ፦ ምንተ ይፈቅድ ዝዘራዔ ነቢብ? ወካልኣን ይቤሉ፦ ትምህርተ አምላክ ሐዲስ ይሜህር፥ እስመ ሰበከ ሎሙ በእንተ ኢየሱስ ወትንሣኤሁ እሙታን። ፲፱. ወወሰድዎ ቤት ምኵናን ዘይሰመይ አርዮስፋጎስ ወይቤልዎ፦ እስኩ ንግረነ ምንትኑ ዝነገር ዘትሜህር ትምህርተ ሐዲሰ ዘትነግር። ፳. ንፈቅድ ንጠይቅ ምንት ውእቱ። ፳፩. ወሰብአ አቴናሰ ወእለ ይነግዱ ኵሎሙ ህየ ባዕድ ትካዘ አልቦሙ ዘእንበለ ዳእሙ ለአፅምኦ ዘሐዲስ ወየኃሥሡ ዘይብሉ ወዘይነብቡ። ፳፪. ወቆመ ጳውሎስ ውስተ አርዮስፋጎስ ወይቤሎሙ፦ አንትሙ ሰብአ አቴና እሬእየከሙ ተአብዱ በኵሉ። ፳፫. ወበጺሕየ ዝየ ርኢኩ ጣዖተክሙ ወምሥዋዒክሙ ኀበ ታመልኩ ወጽሑፍ ውስቴቱ መጽሐፍ ዘይብል፦ ለዘኢይትአመር አምላክ። ናሁኬ ርእዩ ከመ ኢታአምሩ ዘታመልኩ።

ስንክሳር Synaxarium

ቅዱስ ዮሐንስ ወልደ ፀራቢ
ወቅዱሳን ሰቢብጥራስ ወአባ ሰርቦ ወድራይስ ወስይላ

መዝሙር Psalm

አኀዝከኒ እዴየ ዘየማን፤
ወበምክረ ዚአከ መራሕከኒ፤
ወምስለ ስብሐት ተወከፍከኒ።

ወንጌል Gospel

፭. ወአውሥአ እግዚእ ኢየሱስ ወአኀዘ ይበሎሙ፦ ዑቁ ኢያስሕቱክሙ። ፮. እስመ ብዙኃን ይመጽኡ በስምየ እንዘ ይብሉ፦ አነ ውእቱ፥ ወያስሕትዎሙ ለብዙኃን። ፯. ወእመ ሰማዕክሙ አፅባእተ ወድምፀ ፀባኢት፥ ኢትደንግፁ እስመ ሀላዎ ይኩን ዝንቱ ወባሕቱ አኮ ሶቤሃ ዘየኀልቅ። ፰. ወይትነሣእ ሕዝብ ዲበ ሕዝብ ወነገሥት ዲበ ነገሥት፥ ወይመጽእ ድልቅልቅ በበ ብሔሩ፥ ወይመጽእ ረኃብ ወዝንቱ ቀዳሚሁ ለጻዕር። ፱. ወአንትሙሰ ዑቁ ርእሰክሙ፥ ወይወስዱክሙ አዕዋዳት ወይቀሥፉክሙ በመኳርብት ወይትባጽሑክሙ ኀበ መላእክት ወነገሥት በእንቲአየ ከመ ይኩን ስምዐ ላዕሌሆሙ። ፲. ወለኵሎሙ አሕዛብ ይቀድሙ ይስብክዋ ለወንጌል። ፲፩. ወሶበሂ ያበጽሑክሙ ኢትቅድሙ ተሐልዩ ዘትብሉ ወዘትነብቡ ዘአንበበክሙ ሶቤሃ ንቡ፤ እስመ ኢኮንክሙ አንትሙ ዘትነብቡ ዘእንበለ መንፈስ ቅዱስ። ፲፪. ወያገብእ እኅው እኅዋሁ ለሞት ወአብ ውሉደ፤ ወውሉድ ይትነሥኡ ዲበ አዝማዲሆሙ ወይቀትልዎሙ። ፲፫. ወትከውኑ ጽሉኣነ በኀበ ኵሉ በእንተ ስምየ፥ ወዘሰ አዝለፈ ትዕግሥቶ፥ ውእቱ ዘይድኅን። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

አፅምአኒ እግዚኦ ጸሎትየ፤
ወኢትትኀየየኒ ስእለትየ፤
ነጽረኒ ወስምዓኒ።

ወንጌል Gospel

፳፮. ወእንዘ ይበልዑ ነሥአ ኅብስተ እግዚእ ኢየሱስ፥ ወባረከ ወፈተተ ወወሀበ ለአርዳኢሁ ወይቤ፦ እንክሙ፥ ብልዑ ዝ ውእቱ ሥጋየ። ፳፯. ወነሥአ ጽዋዐኒ ወአእኰተ ወወሀቦሙ እንዘ ይብል፦ ስተዩ እምኔሁ ኵልክሙ። ፳፰. ዝ ውእቱ ደምየ ዘሐዲስ ሥርዐት ዘይትከዐው ለቤዛ ብዙኃን ወለኅድገተ ኀጢአት። ፳፱. ወናሁ እብለክሙ ኢይሰቲ እንከ እምዝንቱ አፂረ ፍሬ ወይን እስከ እንታክቲ ዕለት አመ አሰትዮ ሐዲሰ ምሰሌክሙ በመንግሥተ አቡየ። ፴. ወአንቢቦሙ ወሰቢሖሙ ወጽኡ ውስተ ደብረ ዘይት። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ወአውፅኦሙ እምጽልመት ወጽላሎተ ሞት፤
ወሰበረ መዋቅሕቲሆሙ፤
ንግሩ ለእግዚአብሔር ምሕረቶ።

ወንጌል Gospel

፴፫. ወተንሥኡ ሶቤሃ ይእተ ሰዓተ ወተሠውጡ ኢየሩሳሌም ወረከብዎሙ ለዐሠርቱ ወአሐዱ ጉቡኣኒሆሙ ወእለሂ ምስሌሆሙ። ፴፬. እንዘ ይብሉ፦ አማን ተንሥአ እግዚእነ ወአስተርአዮ ለስምዖን። ፴፭. ወነገርዎሙ እሙንቱሂ ዘበፍኖት ወዘከመሂ አእመርዎ ለእግዚእነ እንዘ ይፈትት ኅብስተ። ፴፮. ወእንዘ ዘንተ ይትናገሩ ቆመ ማእከሎሙ እግዚእ ኢየሱስ ወይቤሎሙ፦ ሰላም ለክሙ አትፍርሁ አነ ውእቱ። ፴፯. ወደንገፁ ወፈርሁ ወመሰሎሙ ዘመንፈሰ ይሬእዩ። ፴፰. ወይቤሎሙ፦ ምንትኑ ያደነግፀክሙ? ወለምንት ሕሊና የዐርግ ውስተ ልብክሙ? ፴፱. ርእዩ እደውየ ወእገርየ ከመ አነ ውእቱ ወግስሱኒ ወአእምሩ። እስመ መንፈስ ሥጋ ወዐጽመ አልቦ በከመ ትሬእዩኒ አነ ብየ። ፵. ወዘንተ ብሂሎ አርአዮሙ እደዊሁ ወእገሪሁ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፪. አእኵትዎ ለእግዚአብሔር አብ ዘረሰየነ ድልዋነ ለመክፈልተ ርስቶሙ ለቅድሳን በብርሃን። ፲፫. ወአድኀነነ እምኵነኔ ጽልመት ወአግብአነ ውስተ መንግሥተ ወልዱ ፍቁሩ። ፲፬. ዘቦቱ ረከብነ መድኀኒተነ ወተኀድገ ለነ ኃጢአትነ። ፲፭. ዘውእቱ አምሳሊሁ ለእግዚአብሔር ዘኢያስተርኢ በኵሩ ዘላዕለ ኵሉ ተግባሩ። ፲፮. እስመ ቦቱ ኵሎ ፈጠረ ዘበሰማይኒ ወዘበምድርኒ ዘያስተርኢ ወዘኢያስተርኢ እመኒ መናብርት ወእመኒ አጋእዝት ወእመኒ መኳንንት ወእመኒ ቀደምት ኵሉ ኮነ በእዴሁ ወኵሉ ሎቱ ተፈጥረ። ፲፯. ወውእቱ ህልው እምቅድመ ኵሉ፥ ወኵሉ ቦቱ ቆመ። ፲፰. ወውእቱ ርእሳ ለቤተ ክርስቲያን፥ እስመ ውእቱ በኵር ቀደመ እምኵሎሙ ምዉታን ተንሥአ፥ ከመ ይኩን ውእቱ ርእሰ ለኵሉ። ፲፱. እስመ ሠምረ ቦቱ ፍጹመ ኵሉ ይኅድር ላዕሌሁ ወቦቱ ይሣሀሎ ለኵሉ። ፳. ወገብረ ሰላመ በደመ መስቀሉ ለዘበምድር ወለዘበሰማያት። ፳፩. ወአንትሙሂ ትካት ፀሩ ወነኪሩ በልብክሙ ወበእከየ ምግባሪክሙ። ፳፪. ወይእዜሰ ተሣሀለክሙ በነፍስተ ሥጋሁ ወበሞቱ ከመ ይረሲክሙ ቅዱሳነ ወንጹሓነ ወኅሩያነ ለቅድሜሁ። ፳፫. ለእመ ጸናዕክሙ እንከ በሃይማኖት እንዘ ታጠብዑ ወኢያንቀለቅል ድደ መሰረትክሙ እምተስፋ ትምህርተ ወንጌል ዘሰማዕክሙ ዘተሰብከ በኵሉ ዓለም ዘመትሕተ ሰማይ። ዘሎቱ ተሠየምኩ አነ ጳውሎስ ዐዋዲ ወላእክሂ።

ዘካልእ መልእክት Universal Epistle

፲፭. አላ ለእግዚአብሔር ቀድስዎ በኵሉ ልብክሙ ወድልዋኒክሙ ሀልዉ በኵሉ ጊዜ ከመ ታውሥእዎሙ ቃለ ለእለ ይሴአሉክሙ በእንተ ዛቲ ተስፋክሙ። ፲፮. ወበየውሀትክሙ ወበፍርሀተ እግዚአብሔር አሠንዩ ግዕዘክሙ ከመ እመቦ እለ ይሔምዩክሙ ከመ ዘእኩይ ምግባሪክሙ ይትኀፈሩ እለ ይሔምዩክሙ እምሥነ ምግባሪክሙ ዘበእንተ ክርስቶስ። ፲፯. እስመ ይኄይስ እንዘ ሠናየ ትገብሩ ወትፈቅዱ ፈቃዶ ለእግዚአብሔር ትሕምሙ እምነ እንዘ እኪተ ትገብሩ። ፲፰. እስመ ክርስቶስኒ ምዕረ ሞተ በእንተ ኃጣውአ ሰብእ፥ ወበእንቲአነ ሞተ ጻድቅ በእንተ ኃጣውኢነ ከመ ኪያነ ያብጽሐነ ኀበ እግዘአብሔር። ፲፱. ሞተ በሥጋ ወሐይወ በመንፈስ፥ ወሖረ ኀበ እለ ሙቁሕታ ትነብር ነፍሶሙ ወሰበከ ሎሙ ግዕዛነ። ፳. ለእለ ክሕድዎ ቀዲሙ ወጸንሐቶሙ ትዕግሥቱ ለእግዚአብሔር በመዋዕሊሁ ለኖኅ አመ ይገብር ታቦተ ወድኅኑ ባቲ ሰማኒቱ ነፍስ ኅዳጣን እምነ ማይ። ፳፩. ወኪያነኒ ይእዜ ያድኅነነ በአርአያሁ በጥምቀት፥ አኮ በኅፅበተ ሥጋ እምርስሐት አላ ከመ ግዕዘ ሠናየ ይምሀረነ በዘነአምን በእግዚአብሔር በተንሥኦቱ ለኢየሱስ ክርስቶስ። ፳፪. ዘሀለዎ ይነብር በየማነ እግዚአብሔር ዘዐርገ ውስተ ሰማይ ወተኰነኑ ሎቱ መላእክት ወሥልጣናት ወኵሎ ኃይል።

ግብረ ሃዋርያት Acts

፳፮. ወእምዝ ሖረ መጋቤ ምኵራብ ምስለ ወዓሊሁ ያምጽእዎሙ እንዘ ይዬውህዎሙ እስመ ይፈርህዎሙ ለሕዝብ ኢይውግርዎሙ። ፳፯. ወአምጽእዎሙ ወአቀምዎሙ ማእከለ ዓውድ ወሐተትዎሙ ሊቃነ ካህናት። ፳፰. ወይቤልዎሙ፦ አኮኑ ከላእናክሙ ከመ ኢትምሀሩ በስሙ ለኢየሱስ ወኢለመኑሂ? ወናሁ መላእክምዋ ትምህርተክሙ ለኢየሩሳሌም ወትፈቅዱ ታግብኡ ላዕሌነ ደሞ ለዝ ብእሲ። ፳፱. ወተሠጥዎሙ ጴጥሮስ ምስለ ሐዋርያት ወይቤሎሙ፦ ይኄይሰነ ናድሉ ለእግዚአብሔር እምነ አድልዎ ለሰብእ። ፴. አምላከ አበዊነ አንሥኦ ለኢየሱስ ዘአንትሙ ዓለውክምዎ ወሰቀልክምዎ ዲበ ዕፅ። ፴፩. ኪያሁ ረሰዮ እግዚአብሔር መልአከ ሕይወት ወአልዐሎ በየማኑ። ወወሀቦሙ ለእስራኤል ንስሐ ከመ ይትኀደግ ሎሙ ኃጢአቶሙ። ፴፪. ወንሕነሰ ሰማዕቱ ለዝንቱ ነገር ወመንፈስ ቅዱስ ዘወሀቦሙ እግዚአብሔር ለእለ የአምኑ ቦቱ።

ስንክሳር Synaxarium

ፊቅጦር ወልደ ህርማኖስ
ወእሙ ማርታ
ሲኖዳ ወእስጢፋኖስ
ወተዝካረ ስቅለቱ ለእግዚእነ

መዝሙር Psalm

ይእዜ እትነሣእ ይቤ እግዚአብሔር፤
እሬሲ መድኃኒተ ወእግህድ ቦቱ፤
ቃለ እግዚአብሔር ቃል ንጹሕ።

ወንጌል Gospel

፩. ወእምዝ አስተርአዮሙ ካዕበ እግዚእ ኢየሱስ ለአርዳኢሁ በብሔረ ጥብርያዶስ ወከመዝ አስተርአዮሙ። ፪. እንዘ ሀላዉ ኅቡረ ስምዖን ጴጥሮስ ወቶማስ ዘይብልዎ ዲዲሞስ ወናትናኤል ዘቃና ዘገሊላ ወደቂቀ ዘብዴዎስ ወዓዲ ካልኣን ክልኤቱ እምውስተ አርዳኢሁ። ፫. ወይቤሎሙ ስምዖን ጴጥሮስ፦ አሐውር አሥግር ዓሣ። ወይቤልዎ፦ ንሕነኒ ንመጽእ ምስሌከ። ወሖሩ ወዐርጉ ሐመረ ወአልቦ ዘአሥገሩ በይእቲ ሌሊት ወኢምንተኒ። ፬. ወጸቢሖ ይቀውም እግዚእ ኢየሱስ ውስተ ሐይቅ ወኢያእመሩ አርዳኢሁ ከመ እግዚእ ኢየሱስ ውእቱ። ፭. ወይቤሎሙ እግዚእ ኢየሱስ፦ ደቂቅየ፥ ቦኑ ዘብክሙ ዘንበልዕ። ወይቤልዎ፦ አልቦ። ፮. ወይቤሎሙ እግዚእ ኢየሱስ፦ አውርዱ መሣግሪክሙ ኀበ ይምነ ሐመር ወትረክቡ ብዙኅ። (ወይቤልዎ፦ ሰራሕነ ኵላ ሌሊተ ወአልቦ ዘረከብነ ወኢምንተኒ ወበቃልከሰ ናወርድ።) ወአውሪዶሙ እንከ ስእኑ ስሒበ እምብዝኀ ዓሣት ዘተሠግረ። ፯. ወይቤሎ ለጴጥሮስ ዝኩ ካልእ ረድእ ዘያፈቅሮ እግዚእ ኢየሱስ፦ እግዚእነ ውእቱ። ወሰሚዖ ስምዖን ጴጥሮስ ከመ እግዚእነ ውእቱ ቀነተ ውስተ ሐቌሁ ዘይትዐጸፍ እስመ ዕራቁ ውእቱ ወተወረወ ውስተ ባሕር። ፰. ወካልኣንሰ አርዳእ በሐመር በጽሑ እስመ ኢኮኑ ርሑቃነ እምድር ዘእንበለ መጠነ ክልኤ ምእት በእመት። ወሖሩ እንዘ ይስሕቡ መሣግሪሆሙ ዘውስቴቶን ዓሣት። ፱. ወወሪዶሙ ምድረ ረከቡ ፍሕመ ብቍጸ ወዓሣ ዲቤሁ ወኅብስተ ሥሩዐ። ፲. ወይቤሎሙ እግዚእ ኢየሱስ፦ አምጽኡ እምዓሣት ዘአኀዝክሙ ይእዜ። ፲፩. ወዐርገ ስምዖን ጴጥሮስ ወሰሐበ መሥገርተ ውስተ ምድር ወምሉእ ውእቱ ዓሣት ዓበይት ምእት ወኀምሳ ወሠለስቱ ወእንዘ መጠነዝ ብዝኁ ኢተሰጠ መሥገርቱ። ፲፪. ወይቤሎሙ እግዚእ ኢየሱስ፦ ንዑ ንምሳሕ። ወአልቦ ዘተኀበለ እምአርዳኢሁ ይስአሎ ወይበሎ፦ መኑ አንተ? እስመ አእመሩ ከመ እግዚእነ ውእቱ። ፲፫. ወመጽአ እግዚእ ኢየሱስ ወነሥአ ኅብስተ ወወሀቦሙ ወዓሣሁኒ ከማሁ። ፲፬. ወሣልሱ ዝንቱ እንዘ ያስተርአዮሙ እግዚእ ኢየሱስ ለአርዳኢሁ ተንሢኦ እምነ ምዉታን። ዘየአምን በወልድ ቦ ሕይወት ዘለዓለም።

ቅዳሴ Liturgy :

መዝሙረ ዳዊት Psalm

ይስምዑ የዋሃን ወይትፈሥሑ፤
አዕብይዎ ለእግዚአብሔር ምስሌየ፤
ወናልዕል ስሞ ኅቡረ።

ወንጌል Gospel

፳፫. ወአውሥአ እግዚእ ኢየሱስ ወይቤሎሙ፦ በጽሐ ጊዜሁ ከመ ይሰባሕ ወልደ እጓለ እመሕያው። ፳፬. አማን አማን እብለክሙ እመ ኢወድቀተ ኅጠተ ስርናይ ውስተ ምድር ወኢሞተት ባሕቲታ ትነብር፥ ወእመሰ ሞተት ብዙኀ ፍሬ ትፈሪ። ፳፭. ወዘሰ ያፈቅራ ለነፍሱ ይገድፋ፥ ወዘሰ ጸልኣ ለነፍሱ በዝንቱ ዓለም የዐቅባ ለሕይወት ዘለዓለም። ፳፮. ወእመቦ ዘይትለአከኒ ሊተ ለይትልወኒ እስመ ኀበ ሀሎኩ አነ ህየ ይሄሉ ዘይትለአከኒ። ወዘሊተ ተልእከኒ ያከብሮ አቡየ። ፳፯. ወይእዜሰ ተሀውከት ነፍስየ ወምንተ እብል፦ አባ አድኅና ለነፍስየ እምዛቲ ሰዓት? ወባሕቱ በእንተ ዝንቱ በጻሕኩ ለዛቲ ሰዓት። ፳፰. አባ ሰብሖ ለወልድከ። ወመጽአ ቃል እምሰማይ ዘይብል፦ ሰባሕኩሂ ወዓዲ ካዕበ እሴብሕ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

ዘፃመወ በዓለም የሐዩ ለዝሉፉ፤
እስመ ኢይሬኢ ሙስና፤
ሶበ ትሬእዮሙ ለጠቢባን ይመውቱ።

ወንጌል Gospel

፯. ወበጽሐት ዕለተ መጸለት አመ ይጠብሑ ፍሥሐ። ፰. ወይቤሎሙ እግዚእ ኢየሱስ ለጴጥሮስ ወለዮሐንስ፦ ሑሩ አስተዳልዉ ለነ ፍሥሐ ዘንበልዕ። ፱. ወይቤልዎ፦ በአይቴ ትፈቅድ ናስተዳሉ ለከ? ፲. ወይቤሎሙ፦ በዊአክሙ ሀገረ ትረክቡ ብእሴ ዘይጸውር ጻኅበ ማይ ትልውዎ ኪያሁ ኀበ ቦአ ቤተ። ፲፩. ወበልዎ፦ ለባዕለ ውእቱ ቤት ይቤለከ ሊቅ፦ አይቴኑ ቤት ኀበ እበልዕ ፍሥሐ ምስለ አርዳእየ? ፲፪. ወውእቱ ያርእየክሙ ጽርሐ ዐቢየ ወንፁፈ ወበህየ አስተዳልዉ ለነ። ፲፫. ወሐዊሮሙ ረከቡ በከመ ይቤሎሙ ወአስተዳለዉ ፍሥሐ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፫. ወከመ ይኩን አባሆሙ ለግዙራን ወአኮ ለግዙራን ለባሕቲቶሙ። ወለእለሂ ዓዲ ይተልዉ አሰረ ሃይማኖት ለአቡነ አብርሃም እንዘ ኢኮኑ ግዙራነ በከመ ውእቱ አቡነ አብርሃም አምነ እንዘ ቈላፍ ውእቱ። ፲፬. ወአኮ በእንተ ሕገገ ኦሪት ዘረከበ ተስፋ አብርሃም ወዘርዑ ከመ ይረስ ዓለመ። አላ ዳእሙ ዘረከበ ዘንተ በጽድቀ ሃይማኖቱ በቃለ እግዚአብሔር ወአሚን ቦቱ። ፲፭. ሶበሰኬ ዘገብረ ዳእሙ ሕገገ ኦሪት ይነሥእ ተስፋ ወይወርስ ዓለመ እምኢበቍዖ ለአብርሃም አሚኖቱ ወእመሂ ኢረከበ ተስፋሁ። ፲፮. እስመ ሕገገ ኦሪት መቅሠፍተ ያመጽእ ዲበ ዘዐለወ ወኀበ አልቦ ኦሪት አልቦ አበሳ። ፲፯. ወበእንተዝ በአሚን ረሰየ እግዚአብሔር ጸዲቀ ከመ ይኩን እሙነ ዘአሰፈዎ እግዚአብሔር ለአብርሃም ወለዘርዑ ከመ ያእምሩ ከመ አኮ በገቢረ ሕገገ ኦሪት ዘይጸድቁ ዘእንበለ ዳእሙ በአሚን። በከመ አምነ አብርሃም አበ ኵልነ። ፲፰. ዘይቤሎ እግዚአብሔር፦ እሬስየከ አባሆሙ ለብዙኃን አሕዛብ። እለ የአምኑ በእግዚአብሔር ዘያነሥኦሙ ለምዉታን ወይሬስዮሙ ለእለ ኢሀለዉ ከመ ዘሀለዉ። ፲፱. ወተአመነ አብርሃም ከመ ይከውን አባሆሙ ለብዙኃን አሕዛብ ከመ አሰፈዎ እግዚአብሔር ወይቤሎ፦ ከማሁ ይከውን ዘርዕከ። ፳. ወተአመነ አብርሃም ወኢናፈቀ እንዘ ይሬኢ ርእሶ ከመ ልሂቅ ወከመ ነፍስተ በድን ሥጋሁ እስመ ምእት ክረምቱ። ወሳራሂ ከመ ምውት ይእቲ ማሕፀና። ፳፩. ወኢናፈቀ ወኢቀብጸ በዘአሰፈዎ እግዚአብሔር። ፳፪. ወተአመነ በኵሉ ልቡ ከመ ይክል ገቢረ ሎቱ እግዚአብሔር ወአእኰቶ። ፳፫. ወእንበይነዝ ጽድቀ ኮኖ። ፳፬. ወአኮ እንበይነ ባሕቲቱ ዘተጽሕፈ ዝንቱ። ፳፭. አኮኑ በእንቲአነሂ እለ አመነ በዘአንሥኦ ለእግዚእነ እምዉታን። ፳፮. ዘተሰቅለ በእንተ ኃጢአትነ ወተንሥአ ከመ ያጽድቀነ ወከመ ያንሥአነ።

ዘካልእ መልእክት Universal Epistle

፲፱. ወአንተሰ ተአምን ከመ አሐዱ ውእቱ እግዚአብሔር። ሠናየ ትገብር። አጋንንትኒ የአምኑ ወይደነግፁ። ፳. ትፈቅድኑ ታእምር ኦ ብእሲ አብድ ከመ ሃይማኖት ዘእንበለ ምግባር ምውት ይእቲ? ፳፩. አኮነ አብርሃም አቡነ በምግባሩ ጸድቀ ሶበ አዕረጎ ለይስሐቅ ወልዱ ውስተ ምሥዋዕ። ፳፪. ትሬኢኑ ከመ ሃይማኖት ትረድኦ ለገቢር፥ ወበምግባሩ መልአት ወፍጽምተ ኮነት ሃይማኖቱ። ፳፫. ወተፈጸመ ዘይብል መጽሐፍ፦ አምነ አብርሃም በእግዚአብሔር ወተኈለቈ ጽድቀ፥ ወፍቁረ እግዚአብሔር ተሰምየ። ፳፬. ትሬእዩኑ ከመ በምግባሩ ይጸድቅ ሰብእ ወአኮ በሃይማኖቱ ባሕቲታ። ፳፭. ወከማሁ ረአብኒ ዘማ በምግባሪሃ ጸድቀት ሶበ ተቀበለቶሙ ለሰብአ ዐይን ወእንተ ካልእት ፍኖት አውጽአቶሙ። ፳፮. በከመ ሥጋ ዘአልቦ መንፈስ ምዉት ውእቱ፥ ከማሁ ሃይማኖትኒ እንተ አልባቲ ምግባረ ሠናይ ምውት ይእቲ።

ግብረ ሃዋርያት Acts

፲፪. ወሶበ ርእዮሙ ጴጥሮስ ለሕዝብ ወይቤሎሙ፦ አንትሙ ሰብአ እስራኤል ምንትኑ ታነክሩ ዘንተ ወኪያነኒ? ምንትኑ ትኔጽሩነ ከመ ዘበኃይልነ ወከመ ዘበጽድቅነ ረሰይናሁ ለዝንቱ ከመ ይሑር በእገሪሁ? አልቦኬ። ፲፫. አላ አምላከ አብረሃም ወአምላከ ይስሐቅ ወአምላከ ያዕቆብ። አምላከ አበዊነ ሰብሖ ለወልዱ ኢየሱስ ክርስቶስ ዘአንትሙ ዓለውክምዎ ወክሕድክምዎ በቅድመ ገጸ ጲላጦስ ፈቂዶ ውእቱ ያሕይዎ ለክሙ። ፲፬. ወአንትሙሰ ክሕድክምዎ ለቅዱስ ወለጻድቅ። ወሰአልክሙ ብእሴ ቀታሌ ነፍስ ያሕዩ ለክሙ። ፲፭. ወለመልአከ ሕይወትሰ ቀተልክምዎ ወእግዚአብሔር አንሥኦ እሙታን ወንሕነ ሰማዕቱ። ፲፮. ከመ በሃይማኖተ ስሙ ለዝ ዘትሬእዩ ወታአምሩ አጽንዖ ወበሃይማኖተ ዚአሁ ወሀቦ ዘንተ ሕይወተ በቅድሜክሙ። ፲፯. ወይእዜኒ አኃውየ አአምር ከመ በኢያእምሮ ገበርክምዎ ለዝ ከመ ገብሩ መላእክቲክሙ። ፲፰. ወእግዚአብሔርሰ በከመ አቅደመ ነጊረ በኦፈ ኵሎሙ ነቢያት ከመ ይትቀተል ክርስቶስ አብጽሐ ከማሁ።

ስንክሳር Synaxarium

ቅዱስ ሜልዮስ ሰማዕት
ወብስጣውሮስ
ወሊጥሊስ
ወብዙሐን ሰማዕት
ወአብርሃም ወይስሐቅ ወያዕቆብ አበዊነ

መዝሙር Psalm

ዕቀበኒ አመሥገርት እንተ ኀብኡ ሊተ፤
ወእማዕቀፎሙ ለገበርተ ዐመፃ፤
ለይደቁ ውስተ መሥገርቶሙ ኃጥአን።

ወንጌል Gospel

፰. እብለክሙ ኵሉ ዘየአምን ብየ በቅድመ እጓለ እመሕያው አአምኖ አነሂ በቅድመ መላእክተ እግዚአብሔር። ፱. ወዘሰ ክሕደኒ በቅድመ እጓለ እመሕያው እክሕዶ አነሂ በቅድመ መላእክተ እግዚአብሔር። ፲. ወኵሉ ዘነበበ ቃለ ፅርፈት ላዕለ ወልደ እጓለ እመሕያው ይትኀደግ ሎቱ ወዘሰ ነበበ ፅርፈተ ላዕለ መንፈስ ቅዱስ ኢይትኀደግ ሎቱ ኢበዝዓለም ወኢበዘይመጽእ ዓለም። ፲፩. ወሶበሂ ይወስዱክሙ አዕዋዳተ ወኀበሂ መላእክት ወነገሥት ወመኳንንት ኢተሐልዩ ዘከመ ትብሉ ወዘከመሂ ትትናገሩ። ፲፪. እስመ መንፈስ ቅዱስ ውእቱ ዘይነብብ በላዕሌክሙ ሶቤሃ። ፲፫. ወይቤሎ አሐዱ እምሕዝብ፦ ሊቅ በሎ ለእኁየ ይክፍለኒ ርስትየ። ፲፬. ወይቤሎ እግዚእ ኢየሱስ፦ አንተ ብእሲ መኑ ሤመኒ ከፋሌ ወመኰንነ ላዕሌክሙ? ፲፭. ወይቤሎሙ፦ ዑቁ ወተዐቀቡ እምነ ኵሉ ትዕግልት እስመ አኮ በአብዝኆ ንዋይ ዘየሐዩ ሰብእ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወኖምኩ ድንጉፅየ፤
ደቂቀ ዕጓለ እመሕያው ስነኒሆሙ ሐፅ ወኵናት፤
ወልሳኖሙኒ በሊኅ መጥባሕት።

ወንጌል Gospel

፴፯. ወነሥኦ ለጴጥሮስ ወለክልኤሆሙ ደቂቀ ዘብዴዎስ ወአኀዘ ይተክዝ ወይሕዝን። ፴፰. ወእምዝ ይቤሎሙ፦ ተከዘት ነፍስየ እስከ ለመዊት፤ ንበሩ ዝየ ወትግሁ ምስሌየ። ፴፱. ወተአተተ ሕቀ እምህየ ወሰገደ በገጹ ወጸለየ ወይቤ፦ አቡየ እመሰ ይትከሀል ይኅልፍ እምኔየ ዝጽዋዕ፤ ወባሕቱ ፈቃደከ ይኩን ወአኮ ፈቃድየ። ፵. ወሖረ ኀበ አርዳኢሁ ወረከቦሙ እንዘ ይነውሙ ወይቤሎ ለጴጥሮስ፦ ከመዝኑ ስእንክሙ ተጊሀ አሐተ ሰዓተ ምስሌየ? ፵፩. ትግሁ ወጸልዩ ከመ ኢትባኡ ውስተ መንሱት። መንፈስሰ ይፈቱ ወሥጋ ድኩም። ፵፪. ወካዕበ ሖረ ዳግመ ወጸለየ ወይቤ፦ አቡየ እመ ኢይትከሀል ዝኀሊፈ ዘእንበለ እስትዮ ይኩን ፈቃደከ። ፵፫. ወገብአ ካዕበ ኀበ አርዳኢሁ ወረከቦሙ እንዘ ይነውሙ እስመ አዕይንቲሆሙ ክቡዳት። ፵፬. ወሖረ ካዕበ በሣልስ ወጸለየ ኪያሁ ክመ ቃለ እንዘ ይብል። ፵፭. ወገብአ ካዕበ ኀበ አርዳኢሁ ወይቤሎሙ፦ ኑሙ እንከሰ ወኣዕርፉ ናሁ በጽሐ ጊዜሁ ወያገብእዎ ለወልደ እጓለ እመሕያው ውሰተ እደ ኃጥኣን። ፵፮. ተንሥኡ ንሑር፤ ናሁ ቀርበ ዘያገብአኒ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ምስሌከ ቀዳማዊ በዕለተ ኀይል፤
በብርሃኖሙ ለቅዱሳን፤
ወለድኩከ እምከርሥ እምቅድመ ኮከበ ጽባሕ።

ወንጌል Gospel

፷፮. ወጸቢሖ ተጋብኡ ሊቃነ ካህናት ወጸሐፍት ወሊቃናተ ሕዝብ ወወሰድዎ ውስተ ዓውዶሙ። ፷፯. ወይቤልዎ፦ እመ አንተኑ ክርስቶስ፥ ንግረነ ገሃደ። ወይቤሎሙ፦ እመኒ አይዳዕኩክሙ ኢተአምኑኒ። ፷፰. ወእመኒ ተስእልኩክሙ ኢትነግሩኒ ወኢሂ ተኀድጉኒ። ፷፱. ወባሕቱ እምይእዜሰ ይነብር ወልደ እጓለ እመሕያው በየማነ ኀይለ እግዚአብሔር። ፸. ወይቤልዎ ኵሎሙ፦ አንተኑ እንከ ውእቱ ወልደ እግዚአበሔር? ወይቤሎሙ፦ አንትሙ ትብሉ ከመ አነ ውእቱ ወልደ እግዚአብሔር። ፸፩. ወይቤሉ፦ ምንተ እንከ ንፈቅድ ሰማዕተ? በእንቲአሁ ለሊነ ሰማዕነ እምአፉሁ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፯. ወአመ ሀሎ በመዋዕለ ሥጋሁ ጸሎተ ወስኢለ አብአ በዓቢይ ገዓር ወአንብዕ ኀበ ዘይክል አድኅኖቶ እሞት ወሰምዖ ጽድቆ። ፰. ወከዊኖ ወልደ አእመረ በእንተ ዘሐመ ተአዚዞ። ፱. ወፈጺሞ ውእቱ ኮነ ዐሳዬ ሕይወተ ለኵሎመ እለ ይተኤዘዙ ሎቱ ወመድኅነ ዘለዓለም። ፲. ወሰመዮ እግዚአብሔር ሊቀ ካህናት ዘለዓለም በከመ ሢመቱ ለመልከ ጼዴቅ። ፲፩. ዘበእንቲአሁ ዕፁብ ነገሩ ወኢይተከሀል ይፈክርዎ እስመ ድንዙዘነ ኮንክሙ እዘኒክሙ ለሰሚዕ። ፲፪. እንዘ ርቱዕ ለክሙ ትኩኑ መምህራነ በእንተ ዘጐንደይክሙ እምአመ አመንክሙ ውስተ ትምህርት ወዓዲክሙ እስከ ይእዜ ትፈቅድ ይምሀሩክሙ ቀዳሜ መጽሐፈ መቅድመ ቃሉ ለእግዚአብሔር ወትፈቅዱ ሐሊበ ይውግዑክሙ ወአኮ መብልዐ ጽኑዐ። ፲፫. እስመ ኵሉ ዘይትወጋዕ ሐሊበ ሕፃን ውእቱ ወኢየኀሥሥ ያእምር ቃለ ጽድቅ። ፲፬. ወመብልዕሰ ጽኑዕ ለልሂቅ ውእቱ ዘይለምድ ተኃሥሦ በዘይፈልጥ ሠናየ ወእኩየ።

ዘካልእ መልእክት Universal Epistle

፰. ወዘሰ ኢያፈቅር ቢጾ ኢያአምሮ ለእግዚአብሔር፥ እስመ እግዚአብሔር ፍቅር ውእቱ። ፱. ወበዝንቱ ተዐውቀ ፍቅሩ ለእግዚአብሔር ላዕሌነ እስመ ለወልዱ ዋሕድ ፈነዎ ውስተ ዓለም ከመ ንሕዮ በእንቲአሁ። ፲. ወዝንቱ ውእቱ ፍቅሩ ለእግዚአብሔር አኮ ንሕነ ዘአፍቀርናሁ አላ ውእቱ አፍቀረነ ወፈነዎ ላወልዱ ይኅድግ ለነ ኃጣውኢነ። ፲፩. አኀዊነ እመሰ ከመዝ አፍቀረነ እግዚአብሔር ወንሕነኒ ይደልወነ ንትፋቀር በበይናቲነ። ፲፪. ለእግዚአብሔርሰ አልቦ ዘርእዮ ግሙራ ወእመሰ ተፋቀርነ በበይናቲነ እግዚአብሔር ይነብር ምስሌነ ወፍቅሩሂ ፍጹም ሀሎ ምስሌነ። ፲፫. ወበዝንቱ ናአምር ከመ ምስሌሁ ንነብር ወውእቱ ምስሌነ እምነ መንፈሱ ቅዱስ ዘወሀበነ። ፲፬. ወንሕነኒ ርኢነ ወሰማዕነ ከመ አብ ፈነወ ወልደ መድኅነ ዓለም። ፲፭. ወኵሉ ዘየአምን ከመ ኢየሱስ ውእቱ ወልደ እግዚአብሔር፥ እግዚአብሔር ይነብር ምስሌሁ ወውእቱ ምስለ እግዚአብሔር። ፲፮. ወንሕነሰ አእመርነ ወአመነ እንተቦ ፍቅረ እግዚአብሔር ምስሌነ። እግዚአብሔርሰ ፍቅር ውእቱ ወዘኒ ነበረ በተፋቅሮ ምስለ እግዚአብር ይነብር ወእግዚአብሔር ምስሌሁ። ፲፯. ወበዝንቱ ትትፌጸም ተፋቅሮ ምስሌነ ከመ ንርከብ ገጸ በዕለተ ደይን በኀቤሁ፥ እስመ በከመ ኮነ ውእቱ ኮነ ንሕነኒ ውስተ ዝንቱ ዓለም።

ግብረ ሃዋርያት Acts

፴፪. ወንሕነኒ ንዜንወክሙ ዘአሰፈዎሙ እግዚአብሔር ለእበዊነ። ፴፫. ወወሀቦሙ ለውሉዶሙ ወአንሥኦ ለኢየሱስ በከመ ይቤ ውስተ መዝሙር ዘክልኤቱ፦ ወልድየ አንተ ወአነ ዮም ወለድኩከ። ፴፬. እስመ አንሥኦ እሙታን ከመ ኢይገብእኒ ውስተ ሙስና ከመዝ ይቤ፦ እሁበክሙ ጽድቆ ለዳዊት ዘእሙን። ፴፭. ወውስተ ካልእኒ ይብል፦ ኢትሁቦ ለጻድቅከ ይርአይ ሙስና። ፴፮. ወዳዊትኒ ተልእከ በመዋዕሊሁ ለትእዛዘ እግዚአብሔር ወኖመሂ ወተቀብረ ኀበ አበዊሁ ወርእየ ሙስና። ፴፯. ወዘሰ አንሥኦ እግዚአብሔር ኢርእያ ለሙስና። ፴፰. አእምሩ እንከ አኃዊነ ከመ በእንቲአሁ ይትኀደግ ለክሙ ኃጢአትክሙ ዘአሰፈወክሙ። ፴፱. እምኵሉ ዘተስእነክሙ ጸዲቀ በሕገ ኦሪተ ሙሴ ወቦቱሰ ኵሉ ዘአምነ ይጸድቅ።

ስንክሳር Synaxarium

ተዝካረ ልደቱ ለእግዚእነ
ወአርስጠቦሉ ሐዋርያ ፩ ዘእም ፸ወ፪ አርድእት
ወአባ አካክስዩስ
ወአባ ገሞስ
ወብዙሐን ሰማዕታት

መዝሙር Psalm

ይእዜ እትነሣእ ይቤ እግዚአብሔር፤
እሬሲ መድኀኒተ ወአግህድ ቦቱ፤
ቃለ እግዚአብሔር ቃል ንጹሕ።

ወንጌል Gospel

፷. ወመጽኡ ብዙኃን ሰማዕት ሐሰት ወስእኑ። ወድኅረ መጽኡ ክልኤቱ። ፷፩. ወይቤሉ፦ ይቤ ዝንቱ፦ እክል ነሢቶቶ ለቤተ እግዚአብሔር ወበሣልስት ዕለት አንሥኦቶ። ፷፪. ወተንሥአ ሊቀ ካህናት ወይቤሎ፦ ኢትሰምዕኑ፥ ዘመጠነዝ ያስተዋድዩከ? ፷፫. ወኢያውሥኦ እግዚእ ኢየሱስ፤ ወይቤሎ ሊቀ ካህናት፦ አምሐልኩከ በእግዚአብሔር ሕያው ከመ ትንግረኒ እመ አንተሁ ክርስቶስ ወልዱ ለእግዚአብሔር። ፷፬. ወይቤሎ እግዚእ ኢየሱስ፦ አንተ ትቤ ወባሕቱ እብለክሙ እምይእዜሰ ትሬእይዎ ለወልደ እጓለ እመሕያው እንዘ ይነብር በየማነ ኀይል ወእንዘ ይመጽእ በደመናተ ሰማይ። ፷፭. ወሰጠጠ አልባሲሁ ሊቀ ካህናት እንዘ ይብል፦ ምንተ እንከ ትፈቅዱ ሎቱ ሰማዕተ? ናሁ ፀርፈ ወሰማዕክሙ ፅርፈቶ። ፷፮. ምንተ እንከ ትብሉ? ወአውሥኡ ወይቤሉ፦ ይቅትልዎ። ፷፯. ወእምዝ ተፍኡ ውስተ ገጹ ወኰርዕዎ ወጸፍዕዎ፤ ፷፰. እንዘ ይብሉ፦ ተነበይ ለነ ክርስቶስ፥ መኑ ውእቱ ዘጸፍዐከ? ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ይብሉ በከናፍሪሆሙ ወየሐውሱ ርእሶሙ፤
ተወከለ በእግዚአብሔር ለያድኅኖ፤
ወያድኅኖ እመ ይፈቅዶ።

ወንጌል Gospel

፴፮. ወነበሩ የዐቅብዎ ህየ። ፴፯. ወአንበሩ መልዕልተ ርእሱ ጽሒፎሙ ዘኮነ እንዘ ይብሉ፦ ዝውእቱ ንጉሦሙ ለአይሁድ ኢየሱሰ። ፴፰. ወእምዝ ተሰቅሉ ምስሌሁ ክልኤቱ ፈያት አሐዱ በየማን ወአሐዱ በፀጋም። ፴፱. ወእለ የኀልፉ ይፀርፉ ላዕሌሁ እንዘ ያሐውሱ ርእሶሙ። ፵. ወይብሉ፦ ዘይነሥቶ ለምኵራብ ወየሐንጾ በሣልስት ዕለት አድኅን ርእሰከ እመሰ ወልደ እግዚአብሔር አንተ ረድ እመስቀልከ። ፵፩. ወከማሁ ሊቃነ ካህናትሂ ይሳለቁ ምስለ ጸሐፍት ወሊቃናት እንዘ ይብሉ፦ ፵፪. ባዕደ አድኀነ ወርእሶ ኢይክል አድኅኖ እመ ንጉሠ እስራኤል ውእቱ ይረድ እመስቀል ወንእመን ቦቱ። ፵፫. ዘተአመነ በእግዚአብሔር ናሁ ይእዜ ይድኅኖ እመ ይፈቅደ እስመ ይብለ ወልደ እግዚአብሔር አነ። ፵፬. ወከማሁ ፈያትኒ እለ ተሰቅሉ ምስሌሁ ይዘነጕጕዎ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

እስመ መምህረ ሕግ ይሁብ በረከተ፤
ወይሐውር እምኃይል ውስተ ኃይል፤
ወያስተርኢ አምላከ አማልክት በጽዮን።

ወንጌል Gospel

፩. አማን አማን እብለክሙ ዘኢቦአ እንተ አንቀጽ ውስተ ዐጸደ አባግዕ ወዐርገ እንተ ካልእ ገጽ ሰራቀ ውእቱ ወጕሕልያ። ፪. ወዘሰ እንተ አንቀጽ ይበውእ ኖላዌ አባግዕ ውእቱ። ፫. ወሎቱሰ ዐጻዊኒ ያርኅዎ ወአባግዕኒ ይሰምዓሁ ቃሎ። ወይጼውዖን ለአባግዒሁ በበ አስማቲሆን ወያወፍሮን። ፬. ወሶበ አውፈሮን ለኵሎን የሐውር ቅድሜሆን ወይተልዋሁ አባግዒሁ እስመ ያአምራ ቃሎ። ፭. ወለነኪርሰ ኢይተልዋሁ አላ ይጐይያ እምኔሁ እስመ ኢያአምራ ቃሎ ለነኪር። ፮. ዘንተ ምሳሌ ይቤሎሙ እግዚእ ኢየሱስ ወእሙንቱሰ ኢያእመሩ ዘይቤሎሙ። ፯. ወካዕበ ይቤሎሙ እግዚእ ኢየሱስ፦ አማን አማን እብለክሙ፥ አነ ውእቱ አንቀጸ አባግዕ። ፰. ኵሎሙ እለ መጽኡ እምቅድሜየ ሰረቅት ወጕሕልያ እሙንቱ ወባሕቱ ኢይሰምዓሆሙ አባግዕ። ፱. አነ ውእቱ አንቀጸ አባግዕ ዘበአማን፤ ዘቦአ እንተ ኀቤየ ይድኅን ወይበውእ ወይወፅእ ወይረክብ ምርዓየ። ፲. ወሰራቂሰ ኢይመጽእ ዘእንበለ ከመ ይስርቅ ወይጥባሕ ወያሕጕል፥ ወአንሰኬ መጻእኩ ከመ ይርከቡ ሕይወተ ዘለዓለም ወፈድፋደ ይርከቡ። ፲፩. አነ ውእቱ ኖላዊ ኄር፥ ወኖላዊሰ ኄር ይሜጡ ነፍሶ ቤዛ አባግዒሁ። ፲፪. ወዐሳብሰ ዘኢኮነ ኖላዌ ወዘኢኮና ዘዚአሁ አባግዒሁ ሶበ ይሬኢ ተኵላ ይመጽእ ይጐይይ ወየኀድግ አባግዒሁ ወይመስጦን ተኵላ ወይዘርዎን ለአባግዕ። ፲፫. ወዐሳብሰ ይጐይይ እስመ ዐሳብ ውእቱ ወኢያሐዝኖ በእንተ አባግዕ። ፲፬. አነ ውእቱ ኖላዊ ኄር ወአአምር ዘዚአየ መርዔትየ ወያአምራኒ እሊአየ። ፲፭. ወበከመ ያአምረኒ አብ አነኒ አአምሮ ለአብ ወእሜጡ ነፍስየ ቤዛ አባግዕየ። ፲፮. ወብየ ካልኣተኒ አባግዐ እለ ኢኮና እምዝንቱ ዐጸድ፥ ወኪያሆንሂ ሀለወኒ አምጽኦን ወይሰምዓኒ ቃልየ፥ ወይከውና አሐደ መርዔተ ለአሐዱ ኖላዊ። ፲፯. ወበእንተ ዝንቱ ያፈቅረኒ አብ እስመ አነ እሜጡ ነፍስየ ከመ ካዕበ አንሥኣ። ፲፰. ወአልቦ ዘየሀይደንያ፥ አላ ለልየ እሜጥዋ በፈቃድየ፥ እስመ ብዉሕ ሊተ አንብራሂ ወብዉሕ ሊተ ካዕበ አንሥኣ፥ ዘንተ ትእዛዘ ነሣእኩ እምኀበ አቡየ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፭. ወአንተሰ ንቃህ ወጥበብ በኵሉ ወጻሙ ወግበር ምግባረ ወንጌላዊ ወፈጽም መልእክተከ። ፮. ወአንሰ ወዳእኩ ሰለጥኩ ወበጽሐኒ ዕድሜየ ለአዕርፎ። ፯. ሠናየ ገድለ ተጋደልኩ፥ በድርየኒ ፈጸምኩ፥ ወሃይማኖተኒ ዐቀብኩ። ፰. እንከሰ ጽኑሕ ሊተ አክሊለ ጽድቅ ዘየዐስየኒ እግዚአብሔር ይእተ ዕለተ መኰንነ ጽድቅ። ወአኮ ለባሕቲተየ፥ አላ ለኵሎሙ እለ ያፈቅሩ ምጽአተ ዚአሁ። ፱. አሰተፋጥን ትምጻእ ኀቤየ ፍጡነ። ፲. ዴማስ ኀደገኒ ወአፍቀሮ ለዝንቱ ዓለም ዘይእዜ ወሖረ ተሰሎንቄ ወቄርቂስኒ ገላትያ ወቲቶ ድልማጥያ። ፲፩. ሉቃስ ባሕቲቱ ምስሌየ። ወአምጽኦ ምስሌከ ለማርቆስ እስመ ይበቍዐኒ ለመልእክት። ፲፪. ወፈነውክዎ ለቲኪቆስ ኤፌሶን። ፲፫. ወፌሎነኒ ዘመጽሐፍ ዘኀደጉ በጢሮአስ ኀበ ቀርጳ ተመላእ ምስሌከ አመ ትመጽእ ወዓዲ መጻሕፍተ ወረቀ። ፲፬. እለ እስክንድሮስ ነሃቢ ብዙኀ ሣቀየኒ። ይፍድዮ እግዚአብሔር በከመ ምግባሩ። ፲፭. ወአንተኒ ተዓቀቦ እስመ ፈድፋደ ተቃወሞ ለነገርነ። ፲፮. ወበቀዳሚ ነገርየ አልቦ ዘኀብረ ምስሌየ ዳእሙ ኵሎሙ ኀደጉኒ። ወይስረይ ሎሙ ዘንተ። ፲፯. ወዳእሙ እግዚአብሔር ቆመ ሊተ ወአጽንዐኒ ከመ ይእመኑ በስብከተ ዚአየ ወይስምዑ ኵሎሙ አሕዛብ ወድኅንኩ እምአፈ አንበሳ። ፲፰. ወያድኅነኒ እግዘአብሔር እምኵሉ ግብር እኩይ ወያሐይወኒ ውስተ መንግሥቱ ዘበሰማያት ውእቱ ዘሎቱ ስብሐት ለዓለመ ዓለም አሜን።

ዘካልእ መልእክት Universal Epistle

፮. አትሕቱ እንከ ርእስክሙ ታሕተ እዴሁ ለእግዚአብሔር ጽንዕት ከመ ያልዕልክሙ አመ ይሔውጸክሙ። ፯. ወኵሎ ሕሊናክሙ ግድፉ ላዕሌሁ እስመ ውእቱ ይሔሊ በእንቲአክሙ። ፰. ጥበቡ እንከ ወአጥብቡ ልበክሙ እስመ ጸላኢክሙ ጋኔን ይጥሕር ከመ አንበሳ ወየኀሥሥ ዘይውኅጥ። ፱. አጽንዑ ቀዊመ በሃይማኖትክሙ እንዘ ታአምሩ ከመ ሕማሙ ለዝ ዓለም ትረክቦሙ ለኵሎሙ አኀዊክሙ ወአጽንዕዋ ለተፋቅሮ። ፲. ወእግዚአብሔርሰ ዘበኵሉ ክብር ጸውዐክሙ ውስተ ዘለዓለም ስብሐቲሁ በኢየሱስ ክርስቶስ ወሕዳጠ ሐሚመክሙ ውእቱ ይፌጽም ለክሙ ወያጸንዐክሙ ወያሌብወክሙ። ፲፩. ውእቱ ዘሎቱ ስብሐት ወኀይለ ለዓለመ ዓለም አሜን። ፲፪. ምስለ ሰልዋኖስ እኁነ ምእመን በከመ ሐለይኩ ሕዳጠ ጸሐፍኩ ለክሙ እንዘ አስተበቍዐክሙ ወእከውን ስምዐ ከመ በአማን ስብሐቲሁ ለእግዚአብሔር ዛቲ እንተ ባቲ ትቀውሙ። ፲፫. ትኤምኀክሙ ቤተ ክርስቲያን ኅሪት እንተ ውስተ ባቢሎን ወማርቆስ ወልድየ። ፲፬. ተአምኁ በበይናቲክሙ በአምኃ ተፋቅሮ ወተሰናአዉ ኵልክሙ እለ በክርስቶስ ሀሎክሙ። ጸጋ ምስለ ኵልክሙ። መልአት መልእክተ ጴጥሮስ ቀዳሚት። ወስብሐት ለእግዚአብሔር፥ አሜን።

ግብረ ሃዋርያት Acts

፴፮. ወእምድኅረ ኅዳጥ መዋዕል ይቤሎ ጳውሎስ ለበርናባስ፦ ንሠወጥ እንከሰ ወነሐውጾሙ ለቢጽነ በኵሉ አህጉር ኀበ መሀርኖሙ ቃለ እግዚአብሔር ወናአምር ዘከመ ሀለዉ። ፴፯. ወፈቀደ በርናባስ ይንሥኦ ለዮሔንስ ዘተሰምየ ማርቆስ። ፴፰. ወኢፈቀደ ጳውሎስ ይንሥኦ ምስሌሆሙ እስመ ኀደጎሙ እንዘ እሙንቱ በጵንፍልያ። ወሖረ ወኢመጽአ ምስሌሆሙ ውስተ ግብር። ፴፱. ወበእንተዝ ተማዕዑ ወተፋለጡ ዘዘዚአሆሙ። በርናባስ ነሥኦ ለማርቆስ ወነገደ ቆጵሮስ። ፵. ጳውሎስ ኀረዮ ለሲላስ ወሖረ ወአማኅፀንዎ ቢጹ በጸጋ እግዜአብሔር። ፵፩. ወዖደ ሶርያ ወቂልቅያ ወአጽንዐ አብያተ ክርስቲያናት።

ስንክሳር Synaxarium

ማርቆስ ወንጌላዊ በኲረ ፸ወ፪ አርድእት፤ ወሊቀ ጳጳሳት ዘሀገረ እስክንድርያ

መዝሙር Psalm

ክቡር ሞቱ ለጻድቅ በቅድመ እግዚአብሔር፤
እግዚኦ አነ ገብርከ፤
ገብርከ ወልደ አመትከ።

ወንጌል Gospel

፩. ወእምዝ ኃረየ እግዚእነ ካልኣነ ሰብዓ ወፈነዎሙ በበ ክልኤቱ ቅድመ ገጹ ውስተ ኵሉ አህጉር ወበሐውርት ኀበ ሀለዎ ይባእ። ፪. ወይቤሎሙ እግዚእ ኢየሱስ፦ ማእረሩሰ ብዙኅ ወገባሩ ኅዳጥ ሰአልዎ እንከ ለባዕለ ማእረር ከመ ይወስክ ወይፈኑ ገባረ ለማእረሩ። ፫. ሑሩ ናሁ አነ እፌንወክሙ ከመ አባግዕ ማእከለ ተኵላት። ፬. ወኢትጹሩ ቈናማተ ወኢጽፍነተ ወኢአሣእነ ወኢምንተኒ ወኢተአምኁ ወኢመነሂ በፍኖት። ፭. ወቤት ኀበ ቦእክሙ ቅድሙ በሉ፦ ሰላም ለዝንቱ ቤት። ፮. ወእመሂ ቦህየ ወልደ ሰላም ያዕርፍ ሰላምክሙ ላዕሌሁ ወእመአኮሰ ይግባእ ሰላምክሙ ላዕሌክሙ። ፯. ወውእተ ቤተ ንበሩ ወብልዑ ወስትዩ ዘእምኀቤሆሙ እስመ ይደልዎ ዐስቡ ለዘይትቀነይ ወኢትፍልሱ እምቤት ውስተ ቤት። ፰. ወሀገርኒ ኀበ ቦእክሙ ወተወክፉክሙ ብልዑ ዘአቅረቡ ለክሙ። ፱. ወፈውሱ ድዉያነ እለ ውስቴታ ወበልዎሙ፦ ቀርበት መንግሥተ እግዚአብሔር ኀቤክሙ። ፲. ወሀገርሰ ኀበ ቦእክሙ ወኢተወክፉክሙ ወፂአክሙ ውስተ መርሕባ ንግፉ ጸበለ እገሪክሙ እንዘ ትብሉ፦ ፲፩. ወጸበለክሙኒ ዘተለወነ እምሀገርክሙ ንነግፍ ለክሙ ወባሕቱ ዘንተ አእምሩ ከመ ቀርበት መንግሥተ እግዚአብሔር ላዕሌክሙ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

የዓቅቦሙ እግዚአብሔር ለኵሎሙ እለ ይፈርህዎ፤
ወይሤርዎሙ ለኵሎሙ ኃጥአን፤
ስብሐተ እግዚአብሔር ይነግር አፉየ።

ወንጌል Gospel

፲፪. አመሰ ሀሎኩ አነ ምስሌሆሙ ውስተ ዓለም ዐቀብክዎሙ በስምከ ለእለ ወሀብከኒ። ናሁ ዐቀብክዎሙ ወተማኅፀንክዎሙ ወኢተሐጕለ አሐዱሂ እምኔሆሙ ዘእንበለ ወልደ ሐጕል ከመ ይብጻሕ ቃለ መጽሐፍ። ፲፫. ወይእዜሰ ባሕቱ እመጽእ ኀቤከ ወዘንተ እነግር ውስተ ዓለም ከመ ይኩን ፍሥሓየ ፍጹመ በላዕሌሆሙ። ፲፬. ወአንሰ ፈጺምየ ወሀብክዎሙ ቃለከ ወዓለምሰ ጸልኦሙ እስመ ኢኮኑ እሙንቱ እምዓለም በከመ ኢኮንኩ አነ እምዓለም። ፲፭. አኮ ዘእስእለከ ከመ ትንሥኦሙ እምዓለም ዘእንበለ ዳእሙ ከመ ትዕቀቦሙ እምእኩይ። ፲፮. እስመ እሙንቱ ኢኮኑ እምዓለም በከመ አነ ኢኮንኩ እምዓለም። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

መሠረታቲሃ ውስተ አድባር ቅዱሳን፤
ያበድሮን እግዚአብሔር ለአናቅጸ ጽዮን፤
እምኵሉ ተዓይኒሁ ለያዕቆብ።
 

ወንጌል Gospel

፩. ወንጌል ቅዱስ ዘእግዚእነ ወአምላክነ ወመድኃኒነ ኢየሱስ ክርስቶስ። ብሥራተ ማቴዎስ ሐዋርያ አሐዱ እምዓሠርቱ ወክልኤቱ ሐዋርያት። ጸሎቱ ወበረከቱ የሀሉ ምስለ ኵልነ ሕዝበ ክርስትያን ለዓለም ዓለም አሜን። መጽሐፈ ልደቱ ለእግዚእነ ኢየሱስ ክርስቶስ ወልደ ዳዊት ወልደ አብርሃም። ፪. አብርሃመ ወለዶ ለያስሐቅ፤ ወይስሐቅኒ ወለዶ ለያዕቆብ፤ ወያዕቆብኒ ወለደ ይሁዳሃ ወአኀዊሁ። ፫. ወይሁዳኒ ወለደ ፋሬስሃ ወዛራሃ እምትእማር፤ ወፋሬስኒ ወለደ ኤስሮምሃ፤ ወኤስሮምኒ ወለደ አራምሃ። ፬. ወአራምኒ ወለደ አሚናዳብሃ፤ ወአሚናዳብኒ ወለደ ነአሶንሃ፤ ወነአሶንኒ ወለደ ሰልሞንሃ። ፭. ወሰልሞንኒ ወለደ ቦዔዝሃ እምራኬብ፤ ወቦዔዝኒ ወለደ ኢዮቤድሃ እምነ ሩት፤ ወኢዮቤድኒ ወለደ እሴይሃ። ፮. ወእሴይኒ ወለደ ዳዊትሃ ንጉሠ፤ ወዳዊትኒ ንጉሥ ወለደ ሰሎሞንሃ እምነ ብእሲተ ኦርዮ። ፯. ወሰሎሞንኒ ወለደ ሮብዓምሃ፤ ወሮብዓምኒ ወለደ አብያሃ፤ ወአብያኒ ወለደ አሳፍሃ። ፰. ወአሳፍኒ ወለደ ኢዮሳፍጥሃ፤ ወኢዮሳፍጥኒ ወለደ ኢዮራምሃ፤ ወኢዮራምኒ ወልደ (አካዝያስሃ፤ ወአካዝያስኒ ወልደ አሜስያስሃ፤ ወአሜስያስኒ) ዖዝያንሃ፤ ዘተሰምየ አዛርያስ። ፱. ወዖዝያንኒ ወለደ ኢዮአታምሃ፤ ወኢዮአታምኒ ወለደ አካዝሃ፤ ወአካዝኒ ወለደ ሕዝቅያስሃ። ፲. ወሕዝቅያስኒ ወለደ ምናሴሃ፤ ወምናሴኒ ወለደ አሞጽሃ፤ ወአሞጽኒ ወለደ ኢዮስያስሃ። ፲፩. ወኢዮስያስኒ ወለደ ኢኮንያንሃ ወአኀዊሁ አመ ፍልሰተ ባቢሎን። ፲፪. ወእምድኅረ ፍልስተ ባቢሎን ኢኮንያንኒ ወለደ ሰላትያልሃ፤ ወሰላትያልኒ ወለደ ዘሩባቤልሃ። ፲፫. ወዘሩባቤልኒ ወለደ አብዩድሃ፤ ወአብዩድኒ ወለደ ኤልያቄምሃ፤ ወኤልያቄምኒ ወለደ አዛርሃ። ፲፬. ወአዛርኒ ወለደ ሰዶቅሃ፤ ወሰደቅኒ ወለደ አኪምሃ፤ ወአኪምኒ ወለደ ኤልዩድሃ። ፲፭. ወኤልዩድኒ ወለደ አልዓዛርሃ፤ ወአልዓዛርኒ ወለደ ማትያንሃ፤ ወማትያንኒ ወለደ ያዕቆብሃ። ፲፮. ወያዕቆብኒ ወለደ ዮሴፍሃ ፈኃሪሃ ለማርያም ዘእምኔሃ ተወልደ ኢየሱስ ዘተሰምየ ክርስቶስ። ፲፯. ወኵሎንኬ እንከ ትውለድ እምአብርሃም እስከ ዳዊት ትውልድ ዐሠርቱ ወአርባዕቱ፤ ወእምዳዊት እስከ ፍልሰተ ባቢሎን ትውልድ ዐሠርቱ ወአርባዕቱ፤ ወእምፍልሰተ ባቢሎን እስከ ክርስቶስ ትውልድ ዐሠርቱ ወአርባዕቱ፤ ወኵሎንኬ ትውልድ እምአብርሃም እስከ ክርስቶስ ትውልድ አርብዓ ወክልኤቱ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ወለቀዳሚትኒ ደብተራ ሥርዓተ ምሥዋዕ ባቲ ወመቅደስ። ፪. ወለቀዳሚትኒ ደብተራ እንተ ተሠርዐት ትርሲታ ባቲ ተቅዋመ መራናት ወማእድ ወኅብስት ዘይሠርዑ፥ ወይብልዋ ቅድስተ። ፫. ወውሣጢትሰ ደብተራ እንተ እምድኅረ ካልእ መንጦላዕት ይብልዋ ቅድስተ ቅዱሳን። ፬. ወውስቴታ ማዕጠንት ዘወርቅ ወታቦትኒ እንተ ውስቴታ ኦሪት እነተ ይከድንዋ በወርቅ ውቱረ። ወውስቴታ መሶበ ወርቅ ዘመና፥ ወበትረ አሮን እንተ ሠረጸት፣ ወጽላትኒ ዘኦሪት፥ ፭. ወመልዕልታ ኪሩቤል ዘስብሐት ይጼልሉ ዲበ ምሥሀል፥ ወኢኮነ ይእዜ ጊዜሁ ከመ ንንግር በበገጹ። ፮. ወዘከመዝ ሥርዓቱ ወትርሲቱ ወውስተ ጸናፊትሰ ደብተራ ዘልፈ ይበውኡ ካህናት ይግበሩ ምሥዋዒሆሙ ኵሎ ጊዜ። ፯. ወውስተ ውሣጢትሰ ምዕረ በበዐመት ይበውእ ሊቀ ካህናት ባሕቲቱ ምስለ ደም ዘያበውእ በእንተ ርእሱ ወበእንተ ሕዝቡ በበይነ ኃጢአቶሙ። ፰. ወከመዝ አዘዘ መንፈስ ቅዱስ እስመ ዓዲሃ ኢተዐውቀት ፍኖቶሙ ለቅዱሳን በቀዳሚት ደብተራ። ፱. ወባሕቱ አምሳለ ኮነት ለዝ መዋዕል። ዘቦቱ ያበውኡ ቍርባነ ወመሥዋዕተ ዘኢይክል ፈጽሞ ለዘያቄርብ። ፲. ዘእንበለ በመባልዕት ወበዘይሰትዩ ወጥምቀታት ዘዘዚአሁ እንት ይእቲ ሕግ ዝሥጋ እስከ አመ ይትራታዕ ተሠርዓ።

ዘካልእ መልእክት Universal Epistle

፰. ውእቱኬ ዘታፈቅርዎ እንዘ ኢትሬእይዎ፥ ወእስከ ይእዜ ኢርኢክምዎ፥ ወባሕቱ ተአምኑ ቦቱ፥ ወይእዜኒ ትትፌሥሑ በፍሥሐ እንተ አልባቲ ማኅለቅት ወስብሕት። ፱. እንዘ ትነሥኡ በፍጻሜሃ ለሃይማኖትክሙ መድኀኒተ ነፍስክሙ። ፲. ይእቲኬ መደኀኒት እንተ ኀሠሥዋ ወዖድዋ ነቢያት እለ ተነበዩ በእንተ ክብርክመ። ፲፩. እንዘ የኀሥሡ ለአይ ወለማእዜ መዋዕል ዘነገረ በላዕሌሆሙ መንፈሱ ለኢየሱስ ክርስቶስ ወአቅደመ ስምዐ ከዊነ በእንተ ዘሀለዎ ይሕምም ክርስቶስ ወበእንተ ስብሐቲሁ ዘእምድኅሬሁ። ፲፪. ለእለ አስተርአዮሙ ወአኮ ለርእሶሙ አላ በእንቲአክሙ ተልእኩ ዘንተ ዘይእዜ ንዜንወክሙ እለ አይድዑክሙ በመንፈስ ቅዱስ ዘተፈነወ እምሰማይ እምኀበ ያፈትዎሙ ለመላእክት ከመ የሐውጽዎ።

ግብረ ሃዋርያት Acts

፴፪. ወንሕነኒ ንዜንወክሙ ዘአሰፈዎሙ እግዚአብሔር ለእበዊነ። ፴፫. ወወሀቦሙ ለውሉዶሙ ወአንሥኦ ለኢየሱስ በከመ ይቤ ውስተ መዝሙር ዘክልኤቱ፦ ወልድየ አንተ ወአነ ዮም ወለድኩከ። ፴፬. እስመ አንሥኦ እሙታን ከመ ኢይገብእኒ ውስተ ሙስና ከመዝ ይቤ፦ እሁበክሙ ጽድቆ ለዳዊት ዘእሙን። ፴፭. ወውስተ ካልእኒ ይብል፦ ኢትሁቦ ለጻድቅከ ይርአይ ሙስና። ፴፮. ወዳዊትኒ ተልእከ በመዋዕሊሁ ለትእዛዘ እግዚአብሔር ወኖመሂ ወተቀብረ ኀበ አበዊሁ ወርእየ ሙስና። ፴፯. ወዘሰ አንሥኦ እግዚአብሔር ኢርእያ ለሙስና። ፴፰. አእምሩ እንከ አኃዊነ ከመ በእንቲአሁ ይትኀደግ ለክሙ ኃጢአትክሙ ዘአሰፈወክሙ። ፴፱. እምኵሉ ዘተስእነክሙ ጸዲቀ በሕገ ኦሪተ ሙሴ ወቦቱሰ ኵሉ ዘአምነ ይጸድቅ።

ስንክሳር Synaxarium

ልደታ ለእግዝእትነ ማርያም

መዝሙር Psalm

ወለገጽኪ ይትመሀለሉ ኵሎሙ አሕዛብ ብዑላነ ምድር፤
ኵሉ ክብራ ለወለተ ንጉሠ ሐሴቦን፤
በዘአዝፋረ ወርቅ ዑጽፍት ወኁብርት።

ወንጌል Gospel

፳፭. ወይቀውማ ኀበ መስቀሉ ለእግዚእ ኢየሱስ እሙ ወእኅታ ለእሙ፥ ወማርያም እንተ ቀለዮጳ፥ ወማርያም መግደላዊት። ፳፮. ወሶበ ርእዮሙ እግዚእ ኢየሱስ ለእሙ ወለረድኡ ዘያፈቅር ይቀውሙ ወይቤላ ለእሙ፦ ብእሲቶ ነዋ ወልድኪ። ፳፯. ወይቤሎ ለውእቱኒ ረድኡ፦ ነያ እምከ። ወእምይእቲ ሰዓት ነሥኣ ውእቱ ረድእ ወአእተዋ ቤቶ። ፳፰. ወእምዝ ሶበ አእመረ እግዚእ ኢየሱስ ከመ ተፈጸመ ኵሉ ከመ ይብጻሕ ቃለ መጽሐፍ ይቤ፦ ጸማእኩ። ፳፱. ወቦቱ ህየ ግምዔ ብሒእ ዘምሉእ ወመልኡ ስፍንገ እምብሒእ በቈጽለ ሁሶጱ ወአንበሩ ዲበ ሕለት ወአስተርከቡ ውስተ አፉሁ ወዐጸሩ። ፴. ወነሢኦ ብሒአ እግዚእ ኢየሱስ ይቤ፦ ተፈጸመ። ወአጽነነ ርእሶ ወመጠወ ነፍሶ። ፴፩. ወአይሁድሰ እስመ ዐርብ ውእቱ ይቤሉ እላንቱ ሥጋት ኢይቢታ ዲበ መሳቅሊሆን በእንተ ሰንበት። እስመ ዓባይ ዕለታ ለይእቲ ሰንበት። ወሰአልዎ ለጲላጦስ ከመ ያውርድዎሙ ስቢሮሙ ቍያጺሆሙ። ፴፪. ወሖሩ ሐራ ወሰበሩ ቍይጾ ለቀዳማዊ ወለካልኡኒ እለ ተሰቅሉ ምስሌሁ። ፴፫. ወሶበ ሖሩ ኀበ እግዚእ ኢየሱስ ወርእይዎ ከመ ሰለጠ መዊተ ኢሰበሩ ቍይጾ። ፴፬. አላ አሐዱ እምሐራ ረገዞ ገቦሁ ዘየማን በኵናት። ወሶቤሃ ወጽአ እምኔሁ ደም ወማይ። ፴፭. ወዘርእየ ስምዐ ኮነ ወጽድቅ ውእቱ ስምዑ ወአእመረ ውእቱ ከመ ጽድቀ ይነብር ከመ አንትሙሂ ትእመኑ። ፴፮. ወዝንቱ ኵሉ ዘኮነ ከመ ይብጻሕ ቃለ መጽሐፍ ዘይቤ፦ ዐጽሞ ኢትስብሩ እምኔሁ። ፴፯. ወካዕበ ይብል ካልእኒ መጽሐፍ፦ ሀለዎሙ ይርአይዎ ለዘወግእዎ። ዘየአምን በወልድ ቦ ሕይወት ዘለዓለም።

ቅዳሴ Liturgy :

መዝሙረ ዳዊት Psalm

ሶበ ይትቃወሙኒ ኃጥአን ቅድሜየ፤
ተጸመምኩ ወአትሐትኩ ርእስየ፤
ወአርመምኩ ለሠናይ።
 

ወንጌል Gospel

፯. ወይቤ፦ ሀለዎ ለወልደ እጓለ እመሕያው ይግባእ ውስተ እደ ሰብእ ኃጥኣን ወይሰቅልዎ ወይቀትልዎ ወይትነሣእ በሣልስት ዕለት? ፰. ወተዘከራ ቃሎ። ፱. ወአቲዎን እምኀበ መቃብር ነገራሆሙ ለዐሠርቱ ወአሐዱ ወለቢጾሙኒ ኵሎሙ ዘንተ። ፲. ወእማንቱሰ ማርያም መግደላዊት ወዮሐና ወማርያም እንተ ያዕቆብ ወቢጾንሂ እለ ምስሌሆን ነገራሆሙ ለሐዋርያት ዘንተ። ፲፩. ወኮነ ዝንቱ ነገር በቅድሜሆሙ ከመ ዝንጋዔ ወኢአምንዎን ወአክሐድዎን። ፲፪. ወተንሥአ ጴጥሮስ ወሮጸ ኀበ መቃብር ወሐወጸ ወርእየ መዋጥሐ ባሕቲቶ ንቡረ ወአተወ እንዘ ያነክር ዘኮነ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።