God is great! God is great!

Daily readings / መዓልታዊ ንባባት

ዘመነ ዮሃንስ Readings for Monday

መጋቢት 16, 2016 ብግእዝ Mar 25, 2024 ብፈረንጅ

Show/Hide ናይ ንግሆ ( Matin )

መዝሙረ ዳዊት Psalm

መዝ 17 : 43 - 44 [English][ትግርኛ]

ወትሠይመኒ ውስተ ርእሰ ሕዝብ፤
ሕዝብ ዘኢየአምር ተቀንየ ሊተ፤
ውስተ ምስማዐ ዕዝን ተሰጥዉኒ።

 

ወንጌል Gospel

ሉቃ 19 : 11 - 19 [English][ትግርኛ]

ወእንዘ ይሰምዑ ዘንተ መሰለ ሎሙ ወይቤሎሙ እስመ ቅሩብ ውእቱ ለኢየሩሳሌም ወይመስሎሙ ከመ ሶቤሃ ታስተርኢ መንግሥተ እግዚአብሔር። ወይቤ አሐዱ ብእሲ ክቡር ሖረ ብሔረ ርሑቀ ይንሣእ ሎቱ መንግሥተ ወይሠወጥ። ወጸውዐ አግብርቲሁ ዐሠርተ ወወሀቦሙ ዐሠርተ ምናናተ ወይቤሎሙ ተገበሩ እንከ እስከ አአቱ። ወሰብአ ሀገሩሰ ይጸልእዎ ወፈነዉ ተናብልተ ድኅሬሁ እንዘ ይብሉ ኢንፈቅዶ ለዝንቱ ይንግሥ ላዕሌነ። ወእምዝ አቲዎ ወነሢኦ መንግሥተ አዘዘ ያምጽእዎሙ ለአግብርቲሁ ለእለ ወሀቦሙ ወርቆ ከመ ያእምር ዘከመ ተገበሩ። ወመጽአ ቀዳማዊ ወይቤሎ እግዚኦ ምናንከ ዐሠርቱ ወዐሠርተ ምናናተ ረባሕኩ። ወይቤሎ እግዚኡ ኦገብር ኄር ወማእመን ዘበውኁድ ማእመነ ኮንከ ላዕለ ብዙኅ እሠይመከ። ተሠየም ላዕለ ዐሠርቱ አህጉር። ወመጽአ ካልኡሂ ወይቤሎ አግዚኦ ምናንከ ኀምስቱ ወኀምስተ ምናናተ ረባሕኩ። ወይቤሎ ሎቱኒ አንተኒ ተሠየም ላዕለ ኀምስቱ አህጉር።

 

Show/Hide ናይ ቅዳሴ ( Liturgy )

መልእክተ ጳውሎስ Pauline Epistle

1ይ ጢሞ 4 : 1 - ፍም [English][ትግርኛ]

ወመንፈስ ገሃደ ይነግር ከመ በደኃሪ መዋዕል የዐልዉ ሃይማኖቶሙ ብዙኃን ወይተልውዎሙ ለአጋንንት እኩያን ወመስሕታን ወትምህርተ ሰይጣን ዘያናፍቅ። ነባብያነ ሐሰት እለ ንዱዳን በሕሊናሆሙ። እለ የሐርሙ አውስቦ ወይከልኡ መባልዕተ ዘእግዚአብሔር ፈጠረ ለምእመናን ከመ ይሴሰዩ ወያእኵቱ እለ የአምር ዋ ለጽድቅ። እስመ ኵሉ ተግባረ እግዚአብሔር ሠናይ ወአልቦ ግዱፍ ወኢምንትኒ ለእመ ተወክፍዎ እንዘ ያአኵቱ። እስመ ይትቄደስ በቃለ እግዚአብሔር ወበጸሎት። ወዘንተ መሀሮሙ ለአኃዊከ ወትከውን ኅሩየ ላእከ ኢየሱስ ክርስቶስ እንዘ ትሴስዮሙ ቃለ ሃይማኖት ወሠናየ ትምህርተ ዘተምህርከ። ወለመኃደምተ እቤራትሰ ርኩስ እበዮ ወአግርር ርእሰከ ለጽድቅ። እስመ ግረትሰ በሥጋ ለኅዳጥ ትበቍዕ ወጽድቅሰ ታሰልጥ በኵሉ ወባቲ ተስፋ ሕይወት በዝ ዓለም ወበዘይመጽእ። እሙን ነገሩ ወርቱዕ ይትወከፍዎ በከሉ። እስመ በእንትዝ ንሰርሕ ወንጼአል እስመ ተወከልነ በእግዚአብሔር ሕያው ማሕየዊ ለኵሉ ሰብእ ወፈድፋደሰ ለመሃይምናን። ከመዝ መሀር ወገሥጽ። ወአልቦ ዘያስተአብዳ ለውርዙትከ ወኩኖሙ አርአያ ለመሃይምናን በቃልከ ወበምግባርከ በፍቅር ወበሃይማኖት ወበንጽሕ። ወተዐቀብ እስከ እመጽእ በአንብቦ ወበምሂር ወበገሥጾ ወበጸልዮ። ወኢታስትት ጸጋሁ ዘላዕሌከ ዘተውህበከ ምስለ ተነብዮ ወምስለ ሢመተ እዴሆሙ ለጳጳሳት። ዘንተ አንብብ ወበዝ ሀሉ ከመ ይትዐወቅ ስላጤከ በኵለሄ። ዑቅ እንከ ርእሰከ በእንተ አንብቦ ወዘልፈ ሀሉ ባቲ። ወእመሰ ዘንተ ገበርከ ርእስከሂ ታድኅን ወዘሂ ይሰምዐከ።

 

ዘካልእ መልእክት Universal Epistle

2ይ ጴጥ 1 : 12 - 18 [English][ትግርኛ]

ወበእንተዝ እጽህቅ ለክሙ ዘልፈ ወአዜረክሙ ዘንተ ትእዛዘ እንዘ ጽኑዓን አንትሙ በዘሀለወ ጽድቅ። ወይመስለኒሰ ከመ ርቱዕ ሊተ አምጣነ ሀሎኩ በዝንቱ ሥጋየ አንቅሀክሙ በዘክሮ። እስመ አአምር ከመ ፍጡነ ይእቲ ስሳሌ ዚአየ እምኔክሙ በከመ አይድዐኒ እግዚእነ ኢየሱስ ክርስቶስ። ወዓዲ ጐጕኡ ከመ ተሀሉ ኀቤክሙ ዛቲ ትእዛዝ ዘልፈ፤ ወከመ ትዘከርዋ እምድኅረ ኅልፈትየ ወከማሁ ትግበሩ። እስመ ኢኮነ መኃድምተ ጥበብ ዘተሎነ ወአእመርናክሙ ቦቱ ኀይሎ ለእግዚእነ ኢየሱስ ክርስቶስ ወምጽአቶ። አላ ለሊነ ርኢነ ዕበዮ። ዘነሥአ እምኀበ እግዚአብሔር አብ ክብረ ወስብሐት ወቃል ዘወረደ ላዕሌሁ ዘምሉእ ስብሐተ ወልዕልና ይቤ ዝንቱ ውእቱ ወልድየ ዘአፈቅር ዘአነ ኀረይኩ። ዘንተ ቃለ ንሕነ ሰማዕናሁ ከመ እምሰማይ ወረደ ሎቱ እንዘ ሀሎነ ምስሌሁ በደብረ መቅደሱ።

 

ግብረ ሃዋርያት Acts

ግብ ሐዋ 11 : 19 - 26 [English][ትግርኛ]

ወእለሰ ተዘርዉ በእንተ ቅትለተ እስጢፋኖስ ወሖሩ ወበጽሑ ቆጵሮስ ወፍንቂስ ወአንጾኪያ እንዘ ኢይነግሩ ቃሎሙ ዘእንበለ ለአይሁድ ለባሕቲቶሙ። ወቦ እምውስቴቶሙ ሰብአ ቆጵሮስ ወቀሬናውያን እለ ሖሩ አንጾኪያ ወነገርዎሙ ለአረማውያን ወመሀርዎሙ በእንተ እግዚእነ ኢየሱስ ክርስቶስ። ወእደ እግዚአብሔር ምስሌሆሙ ወበዝኀ ኍልቆሙ ለእለ አምኑ ወተመይጡ ኀበ እግዚአብሔር። ወተሰምዐ ዝነገር በአብያተ ክርስቲያናት ዘኢየሩሳሌም በእንቲአሆሙ። ወፈነውዎ ለበርናባስ አንጾኪያ። ወበጺሖ ርእየ ጸጋ እግዚአብሔር ወተፈሥሐ ወመሀሮሙ ለኵሎሙ ይትመየጡ በኵሉ ልቦሙ ኀበ እግዚአብሔር። እስመ ብእሲ ጻድቅ ውእቱ ወምሉእ መንፈስ ቅዱስ ወሃይማኖት። ወተወሰኩ ብዙኃን አሕዛብ ኀበ እግዚእነ። ወእምዝ ሖረ በርናባስ ጠርሶን ይኅሥሦ ለሳውል ወረከቦ ወወሰዶ አንጾኪያ። ወነበሩ አሐተ ዓመተ ኅቡረ በቤተ ክርስቲያን። ወመሀሩ ለብዙኃን አሕዛብ። ወተሰምዩ አርድእት ክርስቲያነ በአንጾኪያ ቀዲሙ።

 

ስንክሳር Synaxarium

አባ ሚካኤል ሊቀ ጳጳሳት ዘሃገረ እስክንድርያ

 

መዝሙር Psalm

መዝ 67 : 30 - 31 [English][ትግርኛ]

ዝርዎሙ ለአሕዛብ እለ ይፈቅዱ ቀትለ ፤
ይምጽኡ ተናብልት እምግብጽ ፤
ኢትዮጵያ ታበጽሕ እደዊሃ ኀበ እግዚአብሔር።

 

ወንጌል Gospel

ሉቃ 14 : 28 - ፍም [English][ትግርኛ]

ወእመቦ አሐዱ እምኔክሙ ዘይፈቅድ ይሕንጽ ማኅፈደ፤ አኮኑ ያቀድም ወይነብር ወየሐስብ ፃእፃአ እመቦ ዘየአክሎ ከመ ይሳርር መሰረቶ። ከመ ሳሪሮ መሰረተ እመ ስእነ ፈጽሞ ኵሎሙ እለ ይርእይዎ ይእኅዙ ወይሳለቁ ላዕሌሁ። እንዘ ይበሉ ዝንቱ ብእሲ አኀዘ ይሕንጽ ወስእነ ፈጽሞ። ወእመኒ ፈቀደ ንጉሥ ይሑር ይፅብኦ ለካልእ ንጉሥ አኮኑ ይቀድም ይንበር ወይመክር ለእመ ይክል በእልፍ ፀቢኦቶ ለዘይመጽእ ኀቤሁ ምስለ ክልኤ እልፍ። ወእመአኮሰ እንዘ ርሑቅ ውእቱ ይፌኑ ሐዋርያተ ትንብልና ኀቤሁ ወይዜንውዎ ሰላመ። ከመዝ እንከ ኵሉ ዘእምኔክሙሂ ዘኢወፅአ እምኵሉ ወዘኢይትናከር ኵሎ ዘዚአሁ ንዋየ ኢይክል ከዊነ ረድእየ። ሠናይ ውእቱ ጼው ወእመሰ ጼው ለስኀ በምንት እንከ ይቄስምዎ። አኮኑ ይገድፍዎ አፍአ ውስተ መሬት። ዘቦ እዝን ሰሚዐ ለይስማዕ።

ቅዳሴ Liturgy :

ዘ፫፻ ምእት(ግሩም) ዓዲ ዘእግዝእትነ ማርያም(ጐሥዓ)

Show/Hide ናይ ምሸት/ሰርክ ( Vesper )

መዝሙረ ዳዊት Psalm

መዝ 118 : 37 - 38 [English][ትግርኛ]

ሚጦን ለአዕይንትየ ከመ ኢይርአያ ከንቶ ፤
ወአሕይወኒ በፍኖትከ ፤
አቅም ለገብርከ ዘነበብከ ውስተ ነቢብከ።

 

ወንጌል Gospel

ማቴ 5 : 29 - 37 [English][ትግርኛ]

እመኒ ዐይንከ እንተ የማን ታስሕተከ ምልሐ ወግድፋ እምላዕሌከ። እስመ ይኄይሰከ ነቋረከ ትባእ ውስተ መንግሥተ ሰማያት፤ እምትባእ ምስለ ክልኤሆን አዕይንቲከ ውስተ እሳተ ገሃነም። ወእመኒ እዴከ እንተ የማን ታስሕተከ ምትራ ወግድፋ እምላዕሌከ። እሰመ ይኄይሰከ ይትሐጐል አሐዱ እምነ አባልከ፤ እምኵሉ ሥጋከ ይትወደይ ውስተ እሳተ ገሃነም። ወእመኒ እግርከ ዘየማን ታስሕተከ ምትራ ወግድፋ፤ እስመ ይኄይሰከ ሐንካሰከ ትባእ ውስተ መንግሥተ ሰማያት፤ እምትባእ ምስለ ክልኤሆን እገሪከ ውስተ እሳተ ገሃነም። ሰማዕክሙ ዘተብህለ ለቀደምትክሙ፤ ኩሉ ዘይድኅር ብእሲቶ ይጽሐፍ ላቲ መጽሐፈ ኅድጋቲሃ ወየሀባ ወይድኃራ። ወአንሰ እብለክሙ ከመ ኵሉ ዘይድኅር ብእሲቶ ዘእንበለ ትዘሙ በላዕሌሁ ለሊሁ ረሰያ ዘማ ወዘሰ ኅድግተ አውሰበ ዘመወ። ወካዕበ ሰማዕክሙ ከመ ተብህለ ለቀደምትክሙ ኢትምሐሉ በሐሰት፤ አግብኡ ባሕቱ መሐላክሙ ለእግዚአብሔር። ወአንሰ እብለክሙ ኢትምሐሉ ግሙራ። ኢ በሰማይ እስመ መንበሩ ለእግዚአብሔር ውእቱ። ወኢ በምድር እስመ መከየደ እገሪሁ ይእቲ። ወኢ በኢየሩሳሌም እስመ ሀገሩ ይእቲ ለንጉሥ ዓቢይ። ወኢ በርእስክሙ ኢትምሐሉ፤ ወኢ በሥዕርተ ርእሰክሙ፤ እስመ ኢትክሉ አሐተ እምሥዕርተ ርእስክሙ ኢ አጻዕድዎ ወኢ አጽልሞ። ባሕቱ ይኩን ነገርክሙ እመሂ እወ እወ፤ ወእመሂ አልቦ አልቦ። ወፈድፋደሰ እምእሉ እምእኩይ ውእቱ።

 

ዘመነ ዮሃንስ Readings for Tuesday

መጋቢት 17, 2016 ብግእዝ Mar 26, 2024 ብፈረንጅ

Show/Hide ናይ ንግሆ ( Matin )

መዝሙረ ዳዊት Psalm

መዝ 30 : 9 - 10 [English][ትግርኛ]

ተሣሃለኒ እግዚኦ እስመ ሐመምኩ፤
ወተሀውከት እመዓት ዐይንየ፤
ነፍስየኒ ወከርሥየኒ።

 

ወንጌል Gospel

ዮሐ 11 : 1 - 6 [English][ትግርኛ]

ወሀሎ አሐዱ ብእሲ ዘይደዊ ዘስሙ አልዓዛር በቢታንያ ዘሀገረ ማርያም ወማርታ እኅታ። ወማርያሰ ይእቲ እንተ ቀብአቶ ለእግዚእነ ዕፍረተ ወመዝመዘት እገሪሁ በሥዕርታ ወእኁሃ ላቲ አልዓዛር ዘይደዊ። ወለአካ አኃቲሁ ኀበ እግዚእ ኢየሱስ እንዘ ይብላ እግዚእነአ ናሁ ዘታፈቅር ይደዊ። ወሰሚዖ እግዚእ ኢየሱስ ይቤ ዝንቱ ደዌ ኢኮነ ለሞት አላ በእንተ ስብሓተ እግዚአብሔር ወከመ ይሰባሕ ወልደ እግዚአብሔር በእንቲአሁ። ወያፈቅሮሙ እግዚእ ኢየሱስ ለማርታ ወለማርያም እኅታ ወለአልዓዛር። ወሶበ ሰምዐ ከመ ይደዊ ነበረ ኀበ ሀለወ ብሔረ ሰኑየ መዋዕለ።

 

Show/Hide ናይ ቅዳሴ ( Liturgy )

መልእክተ ጳውሎስ Pauline Epistle

ሮሜ 15 : 14 - 21 [English][ትግርኛ]

ወእትአመነክሙ አነሂ አኀዊነ ከመ ትፈጽሙ በኵሉ ምግባረ ሠናይ ወጽጉባን አንትሙ በኵሉ ጥበብ ወትክሉ ምህሮቶሙ ለቢጽክሙ። ወተኀቢልየ ጸሐፍኩ ለክሙ እምአሐዱ ገጽ በእንተ ጸጋሁ ለእግዚአብሔር ዘረከብኩ። ከመ እትለአክ ለእግዚእ ኢየሱስ ክርስቶስ ውስተ አሕዛብ ወከመ እትቀነይ ለትምህርተ እግዚአብሔር። ከመ ይኩን መሥዋዕቶሙ ለአሕዛብ ሥሙረ ወኅሩየ በመንፈስ ቅዱስ። ወሊተሰ እግዚእ ኢየሱስ ክርስቶስ ምክሕየ ለኀበ እግዚአብሔር። ወእትኀበል እንግር ዘገብረ ሊተ ክርስቶስ በዘየአምኑ አሕዛብ በቃል ወበምግባር። በኃይል ወበትእምርት ወበመንክር በኃይለ መንፈስ ቅዱስ። ወዘከመ መሀርኩ በኢየሩሳሌም እስከ አድያሚሃ ለኢያሪኮ ወፈጸምኩ ትምህርተ ክርስቶስ። ወፈድፋደ ተፈቅረት ትምህርቱ። ወኢሖርኩ ኀበ ተሰምየ ክርስቶስ ከመ ኢይሕንጽ ዲበ መሰረተ ባዕድ። በከመ ይብል መጽሐፍ እለኒ ኢዜነውዎሙ በእንቲአሁ ያእምርዎ ሀለዎሙ ወእለኒ ኢሰምዕዎ ይሌብውዎ።

 

ዘካልእ መልእክት Universal Epistle

ያዕ 5 : 14 - ፍም [English][ትግርኛ]

ወእመቦ ዘይደዊ እምኔክሙ ለይጸውዕ ቀሳውስተ እለ ውስተ ቤተ ክርስቲያን፤ ወይጸልዩ ላዕሌሁ ወይቅብእዎ ቅብአ ጸሎት በስሙ ለእግዚእነ ኢየሱስ ክርስቶስ። ወጸሎተ ሃይማኖት ያሐይዎ ለድውይ ወያነሥኦ እግዚአብሔር ወእመኒ ቦቱ ኃጢአት ይትኀደግ ሎቱ። ተአመኑ በበይናቲክሙ ኃጢአተክሙ ወጸልዩ ላዕለ ቢጽክሙ ከመ ትሕየዉ። ብዙኀ ትረድእ ጸሎቱ ለጻድቅ ትክል ወታሰልጥ። ኤልያስ ዘከማነ ሰብእ ውእቱ ወዘከመ ነሐምም የሐምም ወጸሎተ ጸለየ ከመ ኢይዝንም ዝናም ወኢዘንመ ውስተ ምድር ሰለስተ ዓመተ ወስድስተ አውራኀ። ወካዕበ ጸለየ ከመ ይዝንም ወወሀበ ሰማይ ዝናሞ ወምድርኒ አብቈለት ፍሬሃ። አኀዊነ እመቦ ዘስሕተ እምኔክሙ እምጽድቅ። ወእመቦ ዘሜጦ እምነ ጌጋዩ። ለያእምር ከመ አድኀነ ርእሶ እምነ ሞት ወከደኖን ለብዙኃት ኃጣውኢሁ። ተፈጸመት መልእክተ ያዕቆብ ሐዋርያ፤ እኅሁ ለእግዚእነ ኢየሱስ ክርስቶስ፤ ወስብሐት ለእግዚአብሔር አሜን።

 

ግብረ ሃዋርያት Acts

ግብ ሐዋ 2 : 22 - 24 [English][ትግርኛ]

ስምዑ ሰብአ እስራኤል ዘንተ ነገረ፤ ኢየሱስ ናዝራዊ ብእሲ ዘአርአየክሙ እግዚአብሔር በኃይል ወበተአምር ወበመንክር ዘገብረ እግዚአብሔር በእደዊሁ፤ በማእከሌክሙ ዘከመ ርኢክምዎ። በሥርዓተ ምክሩ ወበአእምሮቱ ለእግዚአብሔር መጠውክምዎ ውስተ እደ ኃጥአን ወሰቀልክምዎ ወቀተልክምዎ። ወእግዚአብሔር አንሥኦ እምዉታን ፈቲሖ ማእሠሪሁ ለሞት፤ እስመ ኢይክል እኂዞቶ ሞት።

 

ስንክሳር Synaxarium

አልአዛር ዘአንሥኦ እግዚእነ እመቃብር
ወቴዎቅሪጦስ
ወጊዮርጊስ
ወቶስላስ
ወዮሴፍ
ወአባ ገሪማ ዘመደራ

 

መዝሙር Psalm

መዝ 22 : 3 - 4 [English][ትግርኛ]

በእንተ ስመ ዚአሁ ፤
እመኒ ሖርኩ ማእከለ ጽላሎተ ሞት ፤
ኢይፈርሆ ለእኩይ እስመ አንተ ምስሌየ።

 

ወንጌል Gospel

ዮሐ 11 : 7 - 13 [English][ትግርኛ]

ወእምዝ ይቤሎሙ ለአርዳኢሁ ንሑር ብሔረ ይሁዳ ካዕበ። ወይበልዎ አርዳኢሁ ረቢ አኮኑ ይእዜ የኀሥሡ አይሁድ ይውግሩከ ወካዕበ ተሐውር ህየ። ወአውሥአ እግዚእ ኢየሱስ ወይቤሎሙ አኮኑ ዐሠርቱ ወክልኤቱ ሰዓቱ ለዕለት። ብእሲ ዘየሐውር መዐልተ ኢይትዐቀፍ እስመ ይሬኢ ብርሃኖ ለዝንቱ ዓለም። ወዘሰ የሐውር ሌሊተ ይትዐቀፍ እስመ አልቦ ውስቴቱ ብርሃን ዘይሬኢ። ዘንተ ነገረ ይቤሎሙ ለአርዳኢሁ ወእምዝ ይቤሎሙ አልዓዛር ዐርክነ ኖመ ወባሕቱ አሐውር አንቅሖ። ወይቤልዎ አርዳኢሁ እግዚኦ እመሰ ኖመ ይጥዒ ወይነቅህ። ወኢየሱስ ይቤ በእንተ ንዋመ ሞቱ ወሎሙሰ መሰሎሙ በእንተ ንዋመ ድቃስ ዘይቤሎሙ።

ቅዳሴ Liturgy :

ዘእግዚእነ(ነአኩተከ)

Show/Hide ናይ ምሸት/ሰርክ ( Vesper )

መዝሙረ ዳዊት Psalm

መዝ 24 : 8 - 9 [English][ትግርኛ]

ኄርኒ ወጻድቅኒ እግዚአብሔር ፤
በእንተዝ ይመርሖሙ ፍኖተ ለእለ ይስሕቱ ፤
ወይሜህሮሙ ፍትሐ ለየዋሃን።

 

ወንጌል Gospel

ዮሐ 7 : 40 - ፍም [English][ትግርኛ]

ወብዙኃን እምሕዝብ ሰሚዖሙ ዘንተ ነገረ ይቤሉ አማን ኒቢይ ውእቱ ዝንቱ። ወቦ እለ ይቤሉ ክርስቶስ ውእቱ። ወመንፈቆሙ ይቤሉ ቦኑ እምገሊላ ይመጽእ ክርስቶስ። አኮኑ ይብል መጽሐፍ ከመ እምነ ዘርዐ ዳዊት ወእምነ ቤተ ልሔም ሀገሩ ለዳዊት ይመጽእ ክርስቶስ። ወተናፈቁ አሕዛብ በበይናቲሆሙ በእንቲአሁ። ወቦ እለ ፈቀዱ የአኀዝዎ ወባሕቱ አልቦ ዘአንሥአ እዴሁ ላዕሌሁ። ወተሠውጡ ወዓሊሆሙ ኀበ ሊቃነ ካህናት ወፈሪሳውያን ወይቤልዎሙ እሙንቱ እፎመ ዘኢያምጻእክምዎ። ወአውሥአ ወዓሊሆሙ ወይቤልዎሙ ግሙራ ኢተናገረ ሰብእ ከማሁ ለውእቱ ብእሲ። ወአውሥኡ ፈሪሳውያን ወይቤልዎሙ ትጌገዩኑ አንትሙኒ። ቦኑ እመላእክት ወእምፈሪሳውያን እለ አምኑ ቦቱ። ዘእንበለ እሉ ጊጉያን ሕዝብ እለ ኢያአምሩ ኦሪተ ወእሙንቱሰ ርጉማን። ወይቤሎሙ ኒቆዲሞስ ዘሖረ ኀቤሁ ለእግዚእ ኢየሱስ ቀዲሙ ሌሊተ አሐዱ እምኔሆሙ። ኦሪትነኑ ትኴንኖ ለሰብእ ዘኢሐተትዎ ቅድመ ወያእመሩ ዘገብረ። ወአውሥእዎ ወይቤልዎ አንተሂ እምገሊላኑ ትብል አንተ፤ ኅሥሥ መጽሐፈ ትርአይ ከመ እምገሊላ ኢይትነሣእ ነቢይ። ወገብኡ ኵሉ ለለ አሐዱ ውስተ ቤቶሙ።

 

ዘመነ ዮሃንስ Readings for Wednesday

መጋቢት 18, 2016 ብግእዝ Mar 27, 2024 ብፈረንጅ

Show/Hide ናይ ንግሆ ( Matin )

መዝሙረ ዳዊት Psalm

መዝ 140 : 3 - 4 [English][ትግርኛ]

ሢም እግዚኦ ዐቃቤ ለአፉየ፤
ወማዕፆ ዘዓቅም ለከናፍርየ፤
ኢትሚጦ ለልብየ ውስተ ነገር እኩይ።

 

ወንጌል Gospel

ሉቃ 19 : 18 - 27 [English][ትግርኛ]

ወመጽአ ካልኡሂ ወይቤሎ አግዚኦ ምናንከ ኀምስቱ ወኀምስተ ምናናተ ረባሕኩ። ወይቤሎ ሎቱኒ አንተኒ ተሠየም ላዕለ ኀምስቱ አህጉር። ወመጽአ ሣልሱኒ ወይቤሎ እግዚኦ ነያ ምናንከ እንተ ኀቤየ አንበርክዋ ውስተ ሰበንየ። እስመ ፈራህኩከ እስመ አአምረከ ከመ ዕፁብ ብእሲ አንተ ወትነሥእ ዘኢያንበርከ ወተአርር ዘኢዘራዕከ ወታስተጋብእ ዘኢዘረውከ። ወይቤሎ እግዚኡ በከመ ቃልከ እኴንነከ ገብር እኩይ ወሀካይ። ተአምረኒ ከመ ብእሲ ዕፁብ አነ እነሥእ ዘኢያንበርኩ ወአአርር ዘኢዘራዕኩ ወአስተጋብእ ዘኢዘረውኩ። ወለምንት ኢያግባእከ ወርቅየ ውስተ ማእድ ወለሊየ አነ አቲውየ እምአስተገበርክዎ በሲሳይ። ወይቤሎሙ ለእለ ይቀውሙ ህየ ንሥኡ እምላዕሌሁ ዘንተ ምናነ ወሀብዎ ለዘቦ ዐሠርተ ምናናተ። ወይቤልዎ እግዚኦ አኮኑ ቦቱ ዐሠርተ ምናናተ። ወይቤሎሙ እብለክሙ ለኵሉ ዘቦ ይሁብዎ ወይዌስክዎ ወለዘሰ አልቦ እለሂቦ የሀይድዎ። ወባሕቱ ለእልክቱሰ ጸላእትየ እለ ኢይፈቅዱኒ ያንግሡኒ አምጽእዎሙ ዝየ ወርግዝዎሙ በቅድሜየ።

 

Show/Hide ናይ ቅዳሴ ( Liturgy )

መልእክተ ጳውሎስ Pauline Epistle

1ይ ቆሮ 14 : 1 - 9 [English][ትግርኛ]

ዴግንዋ ለተፋቅሮ ወተቃኅዎ ዘመንፈስ ከመ ትትነበዩ። እስመ ዘይነብብ በነገረ በሐውርት አኮ ለሰበእ ዘይነብብ ዘእንበለ ለእግዚአብሔር እስመ አልቦ ዘይሰምዖ ዘይነብብ ዳእሙ በመንፈስ ዘኅቡእ ይትናገር። ወዘሰ ይትኔበይ ለሰብእ ይነብብ በዘይጸንዕ ወበዘይትፌሣሕ ወይትናዘዝ። ወዘሰ ይነብብ በነገረ በሐውርት ርእሶ የሐንጽ ወዘሰ ይትኔበይ ቤተ ክርስቲያን የሐንጽ። ወእፈቅድ ትንብቡ በነገረ በሐውርት ዓዲ ፈድፋደ ከመ ትትነበዩ ወየዐቢ ዘይትኔበይ እምዘ ይነብብ በነገረ በሐውርት ዘእንበለ ፍካሬ ወለእመሰ ዘይተረጕም የሐንጽ ሕዝበ። ወይእዜኒ አኀዊነ አመ መጻእኩ ኀቤክሙ ወነበብኩ በነገረ በሐውርት ዘኢተአምርዎ፤ አየ በቍዔተ ዘኢበቋዕክሙ ለእመ ኢተናገርኩክሙ ክሡተ ወገሃደ አው ዘጥበብ፡ አው ዘተነብዮ፡ አው ዘትምህርት። ወውስተ ዓለምኒ ግብር ዘአልቦ ነፍስ ወይሁብ ቃሎ ከመ ንዋየ ተውኔት ወመሰንቆ ወእመሰ በትእምርት ኢነቀዉ ወኢነበቡ መኑ የአምር ዘይብል መሰንቆሁኒ ወዕንዚራሁኒ። ወዘሂ ይነፍኅ ቀርነ ለእመ በትእምርት ዘይትዐወቅ ኢነፍኀ። መኑ ይትረሰይ ለቀትል። ከማሁ አንትሙሂ ለእመ ተናገርክሙ በነገረ በሐውርት ወኢተርጐምክሙ ዘንተ ገሃደ መኑ የአምር ዘትብሉ ወዘትትናገሩ። ትከውኑ ከመ ዘምስለ ነፋስ ትትናገሩ።

 

ዘካልእ መልእክት Universal Epistle

1ይ ዮሐ 3 : 11 - 18 [English][ትግርኛ]

እስመ ዛቲ ይእቲ ትእዛዝ እንተ ሰማዕክሙ ትካት ከመ ንትፋቀር በበይናቲነ። ወአኮ በከመ ቃየን ዘእምእኩይ ውእቱ ወቀተሎ ለእኁሁ። ወበእንተ ምንት ቀተሎ። እስመ ምግባረ ዚአሁ እኩይ ውእቱ ወዘእኁሁሰ ጻድቅ ውእቱ። ወኢታንክሩ አኀዊነ እመሂ ዓለም ጸልአክሙ። ንሕነሰ ነአምር ከመ ዐደውነ እሞት ውስተ ሕይወት እስመ ናፈቅር ቢጸነ። ወዘሰ ኢያፈቅር ቢጾ ውስተ ጽልመት ይነብር። ኵሉ ዘይጸልእ ቢጾ ቀታሌ ነፍስ ውእቱ። ወታአመሩ ከመ ለቀታሌ ነፍስ አልቦ ሕይወት ዘለዓለም እንተ ትሄሉ ላዕሌሁ። ወበዝንቱ አእመርናሁ ለተፋቅሮ እስመ ውእቱ መጠወ ነፍሶ በእንቲአነ ወንሕነኒ ይደልወኒ ንመጡ ነፍሰነ በእንተ ቢጽነ። ወዘቦቱ መንበርተ ዝንቱ ዓለም ወይሬኢ ቢጾ ጽኑሰ ወየዐጹ ምሕረቶ እምኔሁ እፎ ይነብር ፍቅረ እግዘእብሔር ላዕሌሁ።

 

ግብረ ሃዋርያት Acts

ግብ ሐዋ 23 : 1 - 6 [English][ትግርኛ]

ወነጺሮ ጳውሎስ ዐውደ ይቤሎሙ፤ አንሰኬ ኦ አኀውየ በኵሉ ትምህርት ሠናይ ተፀመድክዎ ለእግዚአብሔር እስከ ዛቲ ዕለት። ወአዘዘ ሊቀ ካህናት ሐናንያ ይጽፍዕዎ አፉሁ ለጳውሎስ። ወይቤሎ ጳውሎስ ሀሎ እግዚአብሔር ይጸፍዐከ አረፍተ ግብስስተ። አንተሰ ነበርከ ትኰንነኒ በሕጉሂ ወዘአንበለ ሕጉሂ ትኤዝዝ ይዝብጡኒ። ወይቤልዎ ለጳውሎስ እለ ይቀውሙ በእፎ ትጼእል ሊቀ ካህናቲሁ ለእግዚአብሔር። ወይቤሎሙ ጳውሎስ ኢያእመርኩ አኀውየ ለእመ ሊቀ ካህናት ውእቱ ወይብል መጽሐፍ ኢታሕሥም ዲበ መኰንነ ሕዝብከ። ወርኢዮ ጳውሎስ ከመ አሐዱ ገጽ ሰዱቃውያን ወመንፈቆሙ ፈሪሳውያን ከልሐ በውስተ ዐውድ ወይቤ አንሰ ፈሪሳዊ ወልደ ፈሪሳዊ አነ በእንተ ተስፋ ሕይወተ ሙታን እትኴነን።

 

ስንክሳር Synaxarium

ኤስድሮስ ሰማዕት

 

መዝሙር Psalm

መዝ 102 : 8 - 9 [English][ትግርኛ]

መሓሪ ወመስተሣህል እግዚአብሔር ፤
ርሑቀ መዐት ወብዙኀ ምሕረት ወጻድቅ ፤
ኢይቀሥፍ ወትረ ወኢይትመዓዕ ዘልፈ።

 

ወንጌል Gospel

ሉቃ 18 : 17 - 26 [English][ትግርኛ]

ወተስእሎ አሐዱ መልአክ ወይቤሎ ሊቅ ኄር ምንተ ሠናየ ገቢርየ እረክብ ሕይወተ ዘለዓለም። ወይቤሎ እግዚእ ኢየሱስ ለምንተ ትብለኒ ኄር፤ አልቦ ኄር ዘእንበለ አሐዱ እግዚአብሔር። ተአምር ትእዛዛቲሁ፤ ኢትቅትል ነፍሰ፡ ወኢትሑር ብእሲተ ብእሲ፡ ወኢትዘሙ፡ ወኢትስርቅ፡ ወኢትኩን ስምዐ በሐሰት፡ ወአክብር አባከ ወእመከ።ወይቤሎ ዘንተ ኵሎ ዐቀብኩ እምንእስየ እስከ ይእዜ። ወሰሚዖ ዘንተ እግዚእ ኢየሱስ ይቤሎ አሐቲ ተረፈተከ ሑር ሢጥ ኵሎ ዘብከ ንዋየ ወሀብ ለነዳያን ወትረክብ መዝገበ በሰማይ ወነዓ ትልወኒ። ወሰሚዖ ዘንተ ተከዘ ፈድፋደ እስመ ባዕል ውእቱ ጥቀ። ወርእዮ ትኩዞ እግዚእ ኢየሱስ ይቤ እፎ ዕፁብ ለእለ ቦሙ ንዋየ በዊአ መንግሥተ እግዚአብሔር። ይቀልል ገመል ይኅልፍ እንተ ስቍረተ መርፍእ እምባዕል ይባእ መንግሥተ እግዚአብሔር። ወይቤሉ እለ ሰምዑ መኑ እንከ ይክል ድኂነ። ወይቤሎሙ ዘበኀበ ሰብእ ይሰአን በኀበ እግዚአብሔር ይትከሀል።

ቅዳሴ Liturgy :

ዘዮሐንስ ወልደ ነጐድጓድ (ሃቤከ)

Show/Hide ናይ ምሸት/ሰርክ ( Vesper )

መዝሙረ ዳዊት Psalm

መዝ 101 : 13 - 14 [English][ትግርኛ]

ተንሥእ እግዚኦ ወተሣሃላ ለጽዮን ፤
እስመ ጊዜሃ ውእቱ ከመ ትሠሃላ ወበጽሐ ዕድሜሃ ፤
እስመ ሠምሩ አግብቲከ እበኒሃ።

 

ወንጌል Gospel

ሉቃ 19 : 39 - 44 [English][ትግርኛ]

ወቦ እምፈሪሳውያን እለ ይቤልዎ በማእከለ ሕዝብ፤ ሊቅ ገሥጾሙ ለአርዳኢከ። ወአውሥኦሙ ወይቤሎሙ እብለክሙ ለእመ አርመሙ እሉ፤ እሎንቱ አእባን ይኬልሑ። ወበጺሖ ርእያ ለሀገር ወበከየ ላዕሌሃ። ወይቤላ ሶበ ተአምሪ ዮም ሰላመኪ፤ አንቲኒ ወባሕቱ እምይእዜሰ ተሰወረ እምአዕይንትኪ። ወይበጽሐኪ መዋዕል አመ የዐግቱኪ ፀርኪ ወይትዐየኑኪ ወየኀጽሩኪ ወያስተጋብኡኪ እምኵልሄ። ወይነፅኁኪ ወለውሉድኪኒ ምስሌኪ ወኢየኀድጉ እብነ ዲበ እብን በውስቴተኪ። እስመ ኢያእመርኪ መዋዕለ ሣህልኪ።

 

ዘመነ ዮሃንስ Readings for Thursday

መጋቢት 19, 2016 ብግእዝ Mar 28, 2024 ብፈረንጅ

Show/Hide ናይ ንግሆ ( Matin )

መዝሙረ ዳዊት Psalm

መዝ 14 : 2 - 3 [English][ትግርኛ]

ዘየሐውር በንጹሕ ወይገብር ጽድቀ፤
ወዘይነብብ ጸድቀ በልቡ፤
ወዘኢጓሕለወ በልሳኑ።

 

ወንጌል Gospel

ማቴ 25 : 14 - 23 [English][ትግርኛ]

እስመ ከመ ብእሲ ዘይነግድ ወጸውዐ አግብርቲሁ ወወሀቦሙ ንዋዮ ይትገበሩ ቦቱ። ቦ ለዘወሀቦ ኃምስተ መክሊተ፤ ወቦ ለዘወሀቦ ክልኤተ መክሊተ፤ ወቦ ለዘወሀቦ አሐደ መክሊተ። ወለለአሐዱ እምኔሆሙ በአምጣነ ይክሉ ወሀቦሙ፤ ወነገደ በጊዜሃ። ወሖረ ዝኩ ዘኃምሰ መክሊተ ነሥአ ወተገበረ ቦንቱ ወረብሐ ካልእተ ኃምሰ መክሊተ። ወከማሁ ዘሂ ክልኤተ ረብሐ ካልእተ ክልኤተ። ወዘአሐተሰ ነሥአ ኀለፈ ወከረየ ምድረ ወኀብአ ወርቀ እግዚኡ። ወእምድኅረ ብዙኅ መዋዕል አተወ እግዚኦሙ ለእልኩ አግብርት ወተሓሰበ ምስሌሆሙ። ወቀርበ ዘኃምሰ መካልየ ነሥአ ወአምጽአ ካልእተ ኃምሰ መካልየ እንዘ ይብል እግዚኦ ኃምሰ መካልየ ወሀብከኒ ወናሁ ኃምሰ ካልእተ ረባሕኩ። ወይቤሎ እግዚኡ ኦገብር ኄር ወምእመን በሕዳጥ ኮንከ ምእመነ ውስተ ብዙኅ እሠይመከ ባእ ውስተ ትፍሥሕተ እግዚእከ። ወመጽአ ዘክልኤተኒ መክሊተ ነሥአ ወይቤ እግዚኦ አኮሁ ክልኤተ መካልየ ወሀብከኒ ናሁ ክልኤተ ካልእተ መካልየ እለ ረባሕኩ። ወይቤሎ እግዚኡ ኦገብር ኄር ወምእመን በሕዳጥ ኮንከ ምእመነ ውስተ ብዙኅ እሠይመከ ባእ ውስተ ፍሥሓሁ ለእግዚእከ።

 

Show/Hide ናይ ቅዳሴ ( Liturgy )

መልእክተ ጳውሎስ Pauline Epistle

ሮሜ 16 : 1 - 16 [English][ትግርኛ]

አማኅፀንኩክሙ ፌቤንሃ እኅተነ እንተ ትትለአክ ለቤተ ክርስቲያን ዘክንክርኤስ። ትትወከፍዋ በእግዚእነ በከመ ይደልዎሙ ለቅዱሳን ወሥርዕዋ ውስተ ዘፈቀድክሙ ትካዝክሙ እስመ አስለጠት ለብዙኃን ወሊተኒ። አምኁ ጵርስቅላሃ ወአቂላሃ እላ ኀብሩ ምስሌየ በግብረ እግዚእ ኢየሱስ ክርስቶስ። እለ መጠዉ ክሳዶሙ በእንተ ነፍስየ። ወአኮ አነ ባሕቲትየ ዘአአኵቶሙ። ዓዲ ኵሎሙ አብያተ ክርስቲያናት ዘአሕዛብ። ወአምኁ ማኅበረ እለ ውስተ ቤቶሙ። ወአምኁ ኤጴኔጦን እኁየ ዘውአቱ ጥንቶሙ ለእስያ በክርስቶስ። አምኁ ማርያም እንተ ብዙኃ ሰርሐት ለክሙ። አምኁ አንድሮኒቆን ወዩልያን እለ አዝማድየ ወተፄወዉ ምስሌየ። ወየአምር ዎሙ ሐዋርያት ከመ ቀደሙኒ ተልእኩ ለክርስቶስ። አምኁ አንጵልያጦን እኁየ በክርስቶስ። አምኁ ኢሩባኖን ዘነኀብር በግብረ ክርስቶስ ወስጣክን እኁየ። አምኁ ኤጤሌን ኅሩየ በክርስቶስ። አምኅዎሙ ለእለ አርስጠቦሉ። አምኁ ሄሮድዮና ዘአዝማድየ። አምኁ እለ እመውስተ ቤተ ንርቀሱ እለ በክርስቶስ። አምኁ እለ ጥሬፌና ወጢሮፎሳ እለ ጻመዉ በእግዚእነ። አምኁ ጴርሲዳ እኅተነ እንተ ብዙኃ ጻመወት በእግዚእነ። አምኁ ሩፎን ኅሩዮ ለእግዚእነ ወእሞ ወሊተኒ እምየ። አምኁ አሰንቀሪጦን ወአፍላሶንጣ ወሄርሜን ወጰጥሮባን ወሄርማን ወአኀዊነ እለ ምስሌሆሙ። አምኁ ፍሌጎን ወዩልያ ወኔርያ ወእኅቶ ወአልንጦን ወኵሎሙ ቅዱሳነ እለ ምስሌሆሙ። ወተአምኁ በበይናቲክሙ በአምኃ ቅድሳት ወአምኁክሙ ኵሉ አብያተ ክርስቲያናቲሁ ለክርስቶስ።

 

ዘካልእ መልእክት Universal Epistle

3ይ ዮሐ 1 : 9 - ፍም [English][ትግርኛ]

ወጸሐፍኩ ለቤተ ክርስቲያን ወአቅደምኩ ወባሕቱ ዲዮጥራፊስ ዘይፈቅድ ይኩን ሊቀ ላዕሌሆሙ ኢይሰጠወነ። ወበእንተ ዝንቱ አመ መጻእኩ አነ አዜክር ሎሙ ምግባሮ ዘይገብር እስመ ኢየአክሎ ዘይነብብ ንባበ እኩየ ላዕሌነ እስከ ኢይትቀበሎሙ ለአኀዊነ፤ ወለእለኒ ይፈቅዱ ተቀብሎቶሙ ይከልእ ወያወፅኦሙ ዓዲ እምቤተ ክርስቲያን። ኦ እኁየ ኢትኩን ከመ ገባሬ እኪት አላ ከመ ገባሬ ሠናይት፤ እስመ ገባሬ ሠናይት እምእግዚአብሔር ውእቱ ወገባሬ እኪትሰ ኢይሬእዮ ለእግዚአብሔር። ወበእንተኒ ድሜጥሮስ ስምዐ ኮነ ኵሉ ወለሊሃኒ ጽድቅ። ወንሕነኒ ስምዐ ኮነ ሎቱ ወታአምሩ ከመ ርትዕት ይእቲ ስምዕነ። ወብዙኅ ብየ ዘእጽሕፍ ለከ አላ ኢይፈቅድ በማየ ሕመት ወበቀለም እጽሕፍ ለከ። አላ እትአመን ባሕቱ ከመ ፍጡነ እሬእየከ ወእትናገረከ አፈ በአፍ። ሰላም ለከ ወይኤምኁከ አኀዊነ ወአምኅ ቢጸነ በበአስማቲሆሙ። መልአት መልእክተ ዮሐንስ ሣልሲት፤ ወስብሐት ለእግዚአብሔር አሜን።

 

ግብረ ሃዋርያት Acts

ግብ ሐዋ 11 : 1 - 10 [English][ትግርኛ]

ወሰምዑ ሐዋርያት ወቢጾሙሂ እለ ብሔረ ይሁዳ ከመ ተወክፉ አሕዛብ ቃለ እግዚአብሔር። ወአመ ዓርገ ጴጥሮስ ኢየሩሳሌም ተዋቀሥዎ ቢጹ እለ እምአይሁድ ወይቤልዎ ቦእከ ኀበ ዕዳው እለ ኢኮኑ ግዙራነ ወበላዕከ ምስሌሆሙ። ወአኀዘ ጴጥሮስ ይንግሮሙ እምጥንቱ ወይቤሎሙ። እንዘ ሀለውኩ ሀገረ ኢዮጴ እንዘ እጼሊ ደንገፅኩ ወርኢኩ ከመ ዘሞጣሕት ዓቢይ ዘይወርድ እምሰማይ ወእኁዝ በአርባዕቱ ጽነፊሁ ወመጽአ መንገሌየ። ወነጸርኩ ወርኢኩ በውስቴቱ እንስሳ ወአርዌ ገዳም ወአዕዋፈ ሰማይ። ወሰማዕኩ ቃለ ዘይቤለኒ ተንሥእ ጴጥሮስ ኅርድ ወብላዕ። ወእቤ ሓሰ እግዚኦ ግሙራ ኢቦአ ርኵስ ውስተ አፉየ ዘኢኮነ ንጹሐ። ወይቤለኒ ዳግመ ቃል እምሰማይ ዘእግዚአብሔር አንጽሐ አንተ ኢታስተራኵስ። ወከመዝ ይቤለኒ ሥልሰ ወተሠውጠ ካዕበ ኵሉ ውስተ ሰማይ።

 

ስንክሳር Synaxarium

አርስጦቦሎስ ዘእም ፸ወ፪ አርድእት
እስክንድሮስ
ወእለእስክንድሮስ
ወአጋቢሁ
ወኒሞላ
ወሁንስጣ
ወዲዮናስዮስ
ወተላስዮስ
ወአስከናፍር

 

መዝሙር Psalm

መዝ 94 : 6 - 7 [English][ትግርኛ]

ንዑ ንስግድ ወንግነይ ሎቱ ፤
ወንብኪ ቅድመ እግዚአብሔር ዘውእቱ ፈጠረነ ፤
እስመ ውእቱ አምላክነ።

 

ወንጌል Gospel

ሉቃ 21 : 20 - ፍም [English][ትግርኛ]

ወአመ ርኢክሙ የዓግትዋ ሠራዊት ለኢየሩሳሌም አእምሩ ከመ በጽሐ ሙስናሃ። ወይእተ አሚረ እለ ውስተ ይሁዳ ይጐዩ ውስተ አድባር ወእለሂ ማእከለ ይወፅኡ እምኔሃ ወእለሂ ውስተ በሓውርቲሃ ኢይበውእዋ። እስመ ዕድሜሃ ውእቱ በዘይትቤቀልዋ ከመ ይብጻሕ ኵሉ ዘጽሑፍ ላዕሌሃ። ወባሕቱ አሌ ሎን ለፅኑሳት ወለእለ የሐፅና በውእቱ መዋዕል እስመ ይከውን ዓቢይ ምንዳቤ ዲበ ምድር ወመቅሠፍት ውስተ ዝንቱ ሕዝብ። ወይወድቁ በኲናት ወይፄወዉ ውስተ ኵሉ አሕዛብ ወይከይድዋ አሕዛብ ለኢየሩሳሌም እስከ ይበጽሕ ዕድሜሆሙ ለአሕዛብ። ወይከውን ተአምር ውስተ ፀሓይ ወወርኅ ወከዋክብትኒ ይወድቁ እምሰማይ ዲበ ምድር ወይትመነደቡ አሕዛብ ወየኀስሩ ወባሕርኒ ትደምፅ ወትትከወስ። ወትወፅእ ነፍሰ ዕጓለ እመሕያው እምፍርሀት ወእምትሕዝብት ዘይመጽእ ለዓለም እስመ ይትከወስ ኃይለ ሰማያት ይእተ አሚረ። አሜሃ ይሬእይዎ ለወልደ ዕጓለ እመሕያው ይመጽእ በደመና ሰማይ ምስለ ኃይል ብዙኅ ወስብሓት። ወአመ ኮነ ዝንቱ ኵሉ ስግዱ ወአንሥኡ ርእሰክሙ እስመ በጽሐ ዘያድኅነክሙ። ወመሰለ ሎሙ ወይቤሎሙ እምከመ ርኢክምዋ ለበለስ ወለኵሉ ዕፀው ከመ ሠረጹ አእምሩ ከመ አልጸቀ ማእረር። ከማሁ አንትሙኒ እምከመ ርኢክሙ ከመ ኮነ ዝንቱ አእምሩ ከመ በጽሐት መንግሥተ እግዚአብሔር። አሜን እብለክሙ ከመ ኢተኀልፍ ዛቲ ትውልድ እስከ ይከውን ዝንቱ ኵሉ። ሰማይ ወምድር የኀልፍ ወቃልየሰ ኢየኀልፍ። ዑቁ ርእሰክሙ ኢታክብዱ ልበክሙ በስታይ ወበፈጊዕ ወበሐልዮ መንበርት ወትበጽሐክሙ ይእቲ ዕለት ግብተ። ከመ መሥገርት እንተ ትወርድ ዲበ ኵሎሙ እለ ይነብሩ ዲበ ምድር። ትግሁ እንከ በኵሉ ጊዜ ከመ ትክሀሉ አምስጦ በጸሎትክሙ እምነ ኵሉ ዝንቱ ዘይመጽእ ወትቁሙ ቅድሜሁ ለወልደ ዕጓለ እመሕያው። ወኮነ መዓልተ ይሜህር በምኵራብ፤ ወሌሊተ ይወፅእ ወይበይት ውስተ ደብር ዘስሙ ኤሌዎን። ወኵሉ ሕዝብ ይገይሡ ኀቤሁ ውስተ ምኵራብ ያፅምእዎ ቃሎ።

ቅዳሴ Liturgy :

ዘአበዊነ ሐዋርያት(ዘበደሃሪ)

Show/Hide ናይ ምሸት/ሰርክ ( Vesper )

መዝሙረ ዳዊት Psalm

መዝ 36 : 21 - 22 [English][ትግርኛ]

ይትሌቃሕ ኃጥእ ወኢይፈዲ ፤
ጻድቅሰ ይምሕር ወይሁብ ፤
እስመ እለ ይባርክዎ ይወርስዋ ለምድር።

 

ወንጌል Gospel

ማቴ 18 : 23 - ፍም [English][ትግርኛ]

በእንተዝ ትመስል መንግሥተ ሰማያት ብእሴ ንጉሠ ዘፈቀደ ይግበር ሐሳበ ምስለ አግብርቲሁ። ወእንዘ ይትሓሰብ አምጽኡ ሎቱ አሐደ ዘይፈዲ እልፈ መካልየ። ወኀጢኦ ዘይፈዲ አዘዘ እግዚኡ ይሢጥዎ ምስለ ብእሲቱ ወምስለ ውሉዱ ወኵሎ ዘቦ እስከ ይፈዲ። ወወድቀ እንከ ውእቱ ገብር ወሰገደ እንዘ ይብል እግዚኦ ተዐገሠኒ ወኵሎ እፈድየከ። ወመሐሮ እግዚኡ ለውእቱ ገብር ወፈትሖ ወዕዳሁኒ ኀደገ ሎቱ፤ ዘሂ ዘይፈድዮ። ወወፂኦ ውእቱ ገብር ረከበ አሐደ ገብረ እምነ አብያጺሁ ዘይፈድዮ ምእተ ዲናረ፤ ወአኀዞ ወሐነቆ እንዘ ይብል ኀበኒ ዘትፈድየኒ። ወወድቀ ውእቱ ገብረ እግዚኡ ወአስተብቍዖ እንዘ ይብል። ተዐገሠኒ ወኵሎ እፈድየከ። ወአበዮ ወሖረ ወአሞቅሖ እስከ ይፈድዮ። ወርእዮሙ አብያጺሁ ዘከመ ረሰዮ ተከዙ ጥቀ ወሐዊሮሙ ነገርዎ ለእግዚኦሙ ኵሎ ዘከመ ኮነ። ወእምዝ ጸውዖ እግዚኡ ወይቤሎ። ገብር እኩይ ኵሎ ዕዳ ኀደጉ ለከ እስመ አስተብቋዕከኒ። አኮሁ መፍትው አንተሂ ትምሐር ቢጸከ በከመ አነ መሐርኩከ። ወተምዕዐ እግዚኡ ወመጠዎ ለእለ ይኴንኑ እስከ አመ ይስልጥ ኵሎ ዘይፈድዮ። ከማሁኬ አቡየኒ ሰማያዊ ይገብር ለክሙ እመ ኢኀደግሙ አበሳሆሙ ለቢጽክሙ እምኵሉ ልብክሙ።

 

ዘመነ ዮሃንስ Readings for Friday

መጋቢት 20, 2016 ብግእዝ Mar 29, 2024 ብፈረንጅ

Show/Hide ናይ ንግሆ ( Matin )

መዝሙረ ዳዊት Psalm

መዝ 96 : 8 - 9 [English][ትግርኛ]

ወተኃሥያ አዋልደ ይሁዳ፤
በእንተ ፍትሕከ እግዚኦ፤
እስመ አንተ እግዚአብሔር ባሕቲትከ ልዑል ዲበ ኵሉ ምድር።

 

ወንጌል Gospel

ዮሐ 11 : 14 - 30 [English][ትግርኛ]

ወእምዝ ይቤሎሙ እግዚእ ኢየሱስ ገሃደ አልዓዛር ሞተ። ወአንሰ እትፌሣሕ በእንቲአክሙ እስመ ኢሀሎኩ ህየ ከመ ትእመኑ። ወባሕቱ ንሑር ኀቤሁ። ወይቤሎሙ ቶማስ ዘይብልዎ ዲድሞስ ለቢጹ ለአርዳእ ንሑርኬ ንሕነኒ ከመ ንሙት ምስሌሁ። ወሖረ እግዚእ ኢየሱስ ቢታንያ ወበጺሖ ህየ ረከቦ ዘወድአ ረቡዐ መዋዕለ እምዘ ተቀብረ። ወቢታንያሰ ቅርብት ይእቲ ለኢየሩሳሌም መጠነ ዐሠርቱ ወኀምስቱ። ወብዙኃን እምነ አይሁድ እለ ሖሩ ኀበ ማርያም ወማርታ ከመ ያላቅስዎን በእንተ እኁሆን። ወሶበ ሰምዐት ማርታ ከመ መጽአ እግዚእ ኢየሱስ ወፅአት ወተቀበለቶ ወማርያሰ ነበረት ቤተ። ወትቤሎ ማርታ ለእግዚእ ኢየሱስ እግዚእየ ሶበሰ ሀሎከ ዝየ እምኢሞተ እኁየ። ወይእዜኒ አአምር ከመ ዘሰአልኮ ለእግዚአብሔር ይሁበከ እግዚአብሔር። ወይቤላ እግዚእ ኢየሱስ እኁኪሰ ይትነሣእ። ወትቤሎ ማርታ አአምር ከመ ይትነሣእ አመ ትንሣኤ ምዉታን በደኃሪት ዕለት። ወይቤላ እግዚእ ኢየሱስ አነ ውእቱ ትንሣኤ ወሕይወት። ዘየአምን ብየ እመኒ ሞተ የሐዩ ወኵሉ ዘሕያው ወየአምን ብየ ኢይመውት ለዓለመ። ተአምኒኑ ዘንተ። ወትቤሎ እወ እግዚኦ አንሰ አአምን ከመ አንተ ውእቱ ክርስቶስ ወልደ እግዚአብሔር ዘይመጽእ ውስተ ዓለም። ወዘንተ ብሂላ ሖረት ወጸውዐታ ለማርያም እኅታ ጽምሚተ ወትቤላ ናሁ መጽአ ሊቅነ ወይጼውዐኪ። ወሶበ ሰምዐት ተንሥአት ፍጡነ ወሖረት ኀቤሁ። ወዓዲሁ ኢቦአ እግዚእ ኢየሱስ ውስተ ሀገር አላ ሀሎ ውስተ ብሔር ኀበ ተቀበለቶ ማርታ።

 

Show/Hide ናይ ቅዳሴ ( Liturgy )

መልእክተ ጳውሎስ Pauline Epistle

ፊሊጲ 1 : 19 - ፍም [English][ትግርኛ]

ወአነ አአምር ከመ ዛቲ ግብር ታበጽሐኒ ኀበ ሕይወት በጸሎትክሙ፤ ወበሀብተ መንፈሱ ለኢየሱስ ክርስቶስ። በከመ ተሰፈውኩ ወተወከልኩ ከመ ኢይትኀፈር ወኢበምንትኒ ዳእሙ ገሃደ በፍሥሐ መንፈስ ከመ ዘልፈ ወይእዜኒ ዕበዩ ለክርስቶስ በሥጋየ እመኒ በሕይወትየ ወእመኒ በሞትየ። አንሰ እመኒ ሐየውኩ ለክርስቶስ ወእመኒ ሞትኩ ርቡሕ ሊተ። ወለእመኒ ሐየውኩ በሥጋየ ከመ እፍረይ በምግባርየ። ወኀጣእኩ ዘአኀሪ ለነፍስየ እምእሉ ክልኤቱ ዘያጽህቀኒ ፈቂዶቶሙ። እፈቱሰ እፍልስ ወአሀሉ ኀበ ክርስቶስ። ወፈድፋደ ይኄይስ ወይደሉ ሊተ ዝንቱ። ከመ አሀሉ ዓዲ በሕይወተ ሥጋየ ርቱዕ በእንቲአክሙ። ወእትአመን አእሚርየ ዘንተ ከመ እነብር ወእሄሉ ለተልዕሎ ዚአክሙ ወለፍሥሐ ሃይማኖትክሙ። ከመ ይዕበይ ክብርክሙ በላዕሌየ በኢየሱስ ክርስቶስ በምጽአተ ዚአየ ካዕበ ኀቤክሙ። ወበዘይደሉ ለትምህርተ ክርስቶስ ይኩን ዳእሙ ግብርክሙ ወለእመ መጻእኩ ኀቤክሙ እሬኢ ዘንተ። ወእመኒ እንዘ ኢሀሎኩ እሰምዕ በላዕሌክሙ ከመ ትቀውሙ በአሐዱ መንፈስ ወበአሐዱ ነፍስ ወእንዘ ትትጋደሉ በጻማ ሃይማኖተ ወንጌል። ወእንዘ ኢያንቀለቅሉክሙ በምንትኒ እለ ይትቃወሙነ ከመ ይትዐወቅ ሕርትምናሆሙ ወለክሙሰ ሕይወት። ወዘንተኒ እግዚአብሔር ጸገወክሙ ወአኮ ዳእሙ ከመ ትእመኑ ቦቱ አላ ዓዲ ከመሂ ትሕመሙ በእንቲአሁ። ወከማሁ ክመ ትትጋደሉ ዘከመ ርኢክሙኒ ኪያየ ወሰማዕክሙ በእንቲአየ።

 

ዘካልእ መልእክት Universal Epistle

ያዕ 3 : 1 - 7 [English][ትግርኛ]

ወኢይኩኑ እምውስቴትክሙ ብዙኃን መምህራን። አኀዊነ ተአምሩ ከመ እንተ ተዐቢ ደይነ ንነሥእ። እስመ ብዙኀ ንስሕት ኵልነ። ወዘሰ ኢይስሕት በቃሉ ፍጹም ውእቱ ወይክል ወድየ ልጓም ለኵሉ ሥጋሁ። ወናሁ ለአፍራስኒ ንወዲ ሎቶን ልጓመ ውስተ አፉሆን ከመ ኦሆ ይበላነ ወንመይጦን ኵሎ ሥጋሆን። ወናሁ አሕማርኒ ዘመጠነዝ አካሎን ወበኃይለ ነፋስ ይትነድአ ወይትመየጣ ወይመይጦን ብእሲ በሐዳፍ እንዘ መጠነዝ ናእሱ ወያበውኦን ውስተ መርሶ ኀበ ፈቀደ። ከማሁ ልሳንኒ ንስቲት አባል ይእቲ ወታመጽእ ዐቢያተ። ወናሁ እሳትኒ ንስቲት ጥቀ ዘመጠነዝ ዖመ ታውዒ። ወልሳንኒ እሳት ይእቲ ለዓለም ዘዐመፃ። ወናሁ ልሳንኒ ንስቲት ተፈጥረት ውስተ ነፍስትነ ወታረምፆ ለሥጋነ ወትሎሉ ክቡተ ፍጥረተነ ወታውዒ ጥቀ እምገሃነም። እስመ ኵሉ ፍጥረተ አራዊትኒ አዕዋፍኒ ወዘይትሐወስኒ ውስተ ባሕር ወእንስሳኒ ይገርር ለፍጥረተ እጓለ እመሕይው።

 

ግብረ ሃዋርያት Acts

ግብ ሐዋ 24 : 10 - 21 [English][ትግርኛ]

ወቀጸቦ መልአክ ለጳውሎስ ከመ ይትናገር። ወይቤ ጳውሎስ አነ አአምር እምብዙኅ ዐመታት መኰንኖሙ አንተ ለዝ ሕዝብ ወተአምር ግዕዞሙ ወተኀሥሦቶሙ። ወይእዜኒ እነግረከ ተፈሢሕየ ቅሥትየ። ዘሀለወከ ታእምር ከመ ኢየአከል ዐሡረ ወሰኑየ ዕለተ እምዘ ዐረጉ ኢየሩሳሌም እስግድ። ወኢረከቡኒ እንዘ እትዋቀሥ ኢበምኵራብ ወኢመስለ መኑሂ ወኢእንዘ አሀውክ ሕዝበ በቤተ መቅደስ ወኢበሀገር። ወኢይክሉ አብጽሖተ በኵሉ ዘያስተዋድዩኒ በቅድሜከ። ወባሕቱ አአምነከ እንበይነ ዘይብሉኒ ይሜህር ካሕደ ወአንሰ አመልኮ ለእግዚአብሔር እንዘ እትአመን በኵሉ ግብር ዘጽሑፍ ውስተ ኦሪት ወነቢያት። ወእሴፈዎ ለእግዚአብሔር ከመ እሙንቱ ይትአመኑ ከመ ሀለዎሙ ይትነሥኡ ምዉታን ጻድቃን ወኃጥአን። ከማሁ አነሂ እትአመኖ ለእግዚአብሔር በጥቡዕ ልብ በቅድመ እግዚአብሔር ወበቅድመ ሰብእ በኵሉ ጊዜ። ወእምድኅረ ብዙኅ መዋዕል ወዐመታት መጻእኩ ለኀበ ሕዝብየ ከመ እግበር ምጽዋተ ወመሥዋዕተ። ወረከቡኒ እሙንቱ በምኵራብ እንዘ አነጽሕ ርእስየ ወኢረከቡኒ እንዘ እትገአዝ ወእትላኰይ ወአልቦ ዘሆኩ ሕዝበ። ወሀለዉ አይሁድ እለ መጽኡ እምእስያ ወይእዜኒ ግብር ኀቤከ ይምጽኡ ከመ ያስተዋድዩኒ። ወእመ አኮ ነዮሙ እሉሂ ይንግሩ ጽድቀ እመቦ ዘሰምዑ ዘአበስኩ ኦነ ወእመኒቦ ዘርእዩ ዘገፋዕኩ በዘአምጽኡኒ ኀበ ምኵናን ዘኃቤከ በዘአልቦ እኩይ። ወኢአሐቲኒ ትምህርት ዘመሀርኩ ዳእሙ በብሂለ የሐይዉ ምዉታን ዘረከበኒ ዝ ተኰንኖ በኀቤከ ዮም።

 

ስንክሳር Synaxarium

አስጦራጦኒቃ ወማህበራኒሃ ፹፻ ወ፳ወ፭ ሰማዕታት
ወሚካኤል ሊቀ ጳጳሳት
ወአስቀራን
ወትንሣኤ አልአዛር

 

መዝሙር Psalm

መዝ 3 : 4 - 5 [English][ትግርኛ]

ወሰምዐኒ እምደብረ መቅደሱ ፤
አንሰ ሰከብኩ ወኖምኩ ፤
ወተንሣእኩ እስመ እግዚአብሔር አንሥአኒ።

 

ወንጌል Gospel

ዮሐ 11 : 31 - 46 [English][ትግርኛ]

ወሶበ ርእይዋ ለማርያም አይሁድ እለ ሀለዉ ምስሌሃ ውስተ ቤት እለ ያላቅስዋ፤ ከመ ተንሥአት ፍጡነ ወወፅአት ተለውዋ፤ ወመሰሎሙ ዘተሐውር ኀበ መቃብሩ ትብክዮ በህየ። ወሶበ በጽሐት ማርያም ኀበ እግዚእ ኢየሱስ ወርእየቶ ሰገደት ሎቱ ታሕተ እገሪሁ። ወትቤሎ እግዚእየ ሶበሰ ሀሎከ ዝየ እምኢሞተ እኁየ። ወሶበ ርእያ እግዚእ ኢየሱስ እንዘ ትበኪ ወአይሁድኒ እለ መጽኡ ምስሌሃ ከመ ይበክዩ ገዐረ በመንፈሱ ወሆከ ርእሶ። ወይቤ አይቴ ቀበርክምዎ። ወይቤልዎ እግዚኦ ነዓ ወትርኦይ። ወአንብዐ እግዚእ ኢየሱስ። ወይቤሉ ኢየሁድ ርእዩ መጠነ ያፈቅሮ። ወቦ እምውስቴቶሙ እለ ይቤሉ እምኢክህለኑ ዝንቱ ዘከሠተ አዕይንተ ዕዉራን ከመ ይግበር በዘ ኢይመውት ዝንቱኒ። ወካዕበ ተከዘ በልቡ እግዚእ ኢየሱስ ወሖረ ኀበ መቃብሩ ወበአት ውእቱ ወክዱን እብን ዲቤሁ። ወይቤሎሙ እግዚእ ኢየሱስ አእትትዋ ለእብን። ወትቤሎ ማርታ እኅቱ ለዘሞተ እግዚእየ ወድአ ጼአ እስመ ረቡዐ ኮነ ዮም። ወይቤላ እግዚእ ኢየሱስ ኢይቤለኪኑ ከመ እመ ተአመንኪ ትሬእዪ ስብሓተ እግዚአብሔር። ወአእተትዋ ለእብን። ወአንሥአ አዕይንቲሁ እግዚእ ኢየሱስ ላዕለ ወይቤ አአኵተከ አባ እስመ ሰማዕከኒ። ወአንሰ አአምር ከመ ዘልፈ ትሰምዐኒ ወባሕቱ በእንተ እለ ይቀውሙ ሰብእ እብል ከመ ይእመኑ ከመ አንተ ፈነውከኒ። ወዘንተ ብሂሎ ከልሐ በዓቢይ ቃል ወይቤ አልዓዛር ነዓ ፃእ አፍአ። ወወፅአ ውእቱ ምዉት እንዛ ግኑዝ ወእሱር እደዊሁ ወእገሪሁ ወገጹኒ ጥብሉል በሰበን። ወይቤሎሙ እግዚእ ኢየሱስ ፍትሕዎኬ እንከሰ ወኅድግዎ ይሑር። ወብዙኃን እምአይሁድ እለ መጽኡ ኀበ ማርያም ወማርታ ርእዮሙ ዘገብረ እግዚእ ኢየሱስ አምኑ ቦቱ። ወቦ እምውስቴቶሙ እለ ሖሩ ኀበ ፈሪሳውያን ወአስተዋደይዎ ወነገርዎሙ ኵሎ ዘገብረ እግዚእ ኢየሱስ።

ቅዳሴ Liturgy :

ዘዮሐንስ ወልደ ነጐድጓድ (ሃቤከ) ዓዲ ዘቄርሎስ

Show/Hide ናይ ምሸት/ሰርክ ( Vesper )

መዝሙረ ዳዊት Psalm

መዝ 73 : 4 - 5 [English][ትግርኛ]

ወተዘኃሩ ጸላእትከ በማእከለ በዓልከ ፤
ወረሰዩ ትእምርቶሙ ትእምርተ ዘኢያእመሩ ፤
ከመ ዘውስተ ላዕላይ ፍኖት።

 

ወንጌል Gospel

ዮሐ 11 : 47 - 54 [English][ትግርኛ]

ወአስተጋብእዎሙ ሊቃነ ካህናት ወፈሪሳውያን ለዐውድ ወይቤልዎሙ ምንተ ንሬሲ። ናሁ ዝንቱ ብእሲ ብዙኀ ተአምረ ይገብር። ወእመኒ ኀደግናሁ ከመዝ ኵሉ የአምን ቦቱ ወይመጽኡ ሰብአ ሮሜ ወይነሥኡነ ብሔረነ ወሕዝበነኒ። ወይቤሎሙ አሐዱ እምኔሆሙ ዘስሙ ቀያፋ ሊቀ ካህናት ዘእብሬቱ ይእቲ ዓመት። አንትሙሰ ኢታአምሩ ወኢምንተኒ ወኢሂ ትመክሩ። ይኄይሰነ አሐደ ብእሴ ንቅትል ወይሙት ህየንተ ሕዝብ እምይትሐጐል ኵሉ ሕዝብ። ወዘንተሰ አኮ እምኀቤሁ ዘይቤ አላ እስመ ሊቀ ካህናት ውእቱ ወእብሬቱ ይእቲ ዓመት ተነበየ እስመ ሀለዎ ለእግዚእ ኢየሱስ ይሙት በእንተ ኵሉ ሕዝብ። ወአኮ በእንተ ሕዝብ ባሕቲቶሙ አላ ከመ ያስተጋብኦሙ ለውሉደ እግዚአብሔር እለ ተዘርዉ አሐተኔ። ወእምይእቲ ዕለት ተማከሩ ሊቃነ ካህናት ከመ ይቅትልዎ። ወኢያንሶሰወ እንከ እግዚእ ኢየሱስ ገሃደ ማእከለ አይሁድ አላ ሖረ ኀበ ሀገር እንተ ትሰመይ ሀገረ ኤፍሬም እንተ ቀርበት ለበድው ወነበረ ህየ ምስለ አርዳኢሁ።

 

ዘመነ ዮሃንስ Readings for Saturday

መጋቢት 21, 2016 ብግእዝ Mar 30, 2024 ብፈረንጅ

Show/Hide ናይ ንግሆ ( Matin )

መዝሙረ ዳዊት Psalm

መዝ 50 : 9 - 10 [English][ትግርኛ]

ሚጥ ገጸከ እምኃጢአትየ ፤
ወደምስስ ሊተ ኵሎ አበሳየ ፤
ልበ ንጹሐ ፍጥር ሊተ እግዚኦ።
 

ወንጌል Gospel

ዮሐ 12 : 1 - 11 [English][ትግርኛ]

ወእምዝ ሖረ እግዚእ ኢየሱስ እምቅድመ ሰዱስ መዋዕል ዘፋሲካ ወበጽሐ ቢታንያ ኀበ ሀሎ አልዓዛር ዘአንሥኦ እምነ ምዉታን። ወገብሩ ሎቱ ምሳሐ በህየ ወማርታ ትሜጥዎሙ ወአልዓዛር አሐዱ ውእቱ እምእለ ይረፍቁ ምስሌሁ። ወማርያሰ ነሥአት ዕፍረተ ልጥረ ዘናርዱ ጵስጥቂስ ዘዕፁብ ሤጡ። ወቀብአቶ እገሪሁ ለእግዚእ ኢየሱስ ወመዝመዘቶ በሥዕርታ። ወመልአ ቤተ መዐዛሁ ለውእቱ ዕፍረት። ወይቤ ይሁዳ ስምዖን አስቆሮታዊ አሐዱ እምአርዳኢሁ ዘሀለዎ ያግብኦ። ለምንት ኢሤጥዎ ለዝንቱ ዕፍረተ በሠለስቱ ምእት ዲናር ወየሀብዎ ለነዳያን። ወዘይቤ ከመዝ አኮ ዘያጽህቅዎ ነዳያን አላ እስመ ሰራቂ ውእቱ ወአስክሬነ የዐቅብ ወይነሥእ እምዘ ይትወደይ ውስቴቱ። ወይቤሎ እግዚእ ኢየሱስ ኅድጋ ትዕቀቦ ለዕለተ ቀበርየ። ወነዳያንሰ በኵሉ ጊዜ ሀለዉ ምስሌክሙ ወኪያየሰ አኮ በኵሉ ጊዜ ዘትረክቡኒ። ወብዙኃን እምነ አይሁድ እለ አእመሩ ከመ ሀሎ እግዚእ ኢየሱስ ህየ ወሖሩ ኀቤሁ ወአኮ በእንተ እግዚእ ኢየሱስ ባሕቲቱ ዘሖሩ ዳእሙ ከመ ይርአይዎ ለአልዓዛርሂ ዘአንሥኦ እግዚእ ኢየሱስ እምዉታን። ወተማከሩ ሊቃነ ካህናት ከመ ይቅትልዎ ለአልዓዛር። እስመ ብዙኃን እምውስተ አይሁድ የሐውሩ በእንቲአሁ ወየአምኑ በእግዚእ ኢየሱስ።

 

Show/Hide ናይ ቅዳሴ ( Liturgy )

መልእክተ ጳውሎስ Pauline Epistle

ኤፌ 2 : 13 - ፍም [English][ትግርኛ]

ወይእዜሰ ባሕቱ አንትሙ እለ ትካት ርሑቃን ቀረብክሙ በደሙ ለክርስቶስ። እስመ ውእቱ ሰላምነ ዘረሰዮሙ አሐደ ለክልኤሆሙ ወነሠተ አረፍተ ማእከል እንተ ጽልእ በሥጋሁ። ወሰዐረ ሕገ ትእዛዝ በሥርዓቱ ከመ ይረስዩሙ አሐደ ብእሴ ሐዲሰ ለክልኤሆሙ ወገብረ ሰላመ። ወአብጽሖሙ ለክልኤሆሙ በአሐዱ ሥጋሁ ለኀበ እግዚአብሔር በመስቀሉ ወለጽልእ ቀተሎ ቦቱ። ወመጽአ ወወሀበነ ሰላመ ለርሑቃን ወሰላመ ለቅሩባን። እስመ ውእቱ መርሐነ ወአቅረበነ ለክልኤቱ ለኀበ አቡሁ በመንፈስ ቅዱስ። እምይእዜሰ ኢኮንክሙ ነግደ ወፈላሴ አላ አንትሙ ሰብአ ሀገሪቶሙ ለቅዱሳን ወሰብአ ቤቱ ለእግዚአብሔር። እስመ ተሐነጽክሙ ዲበ መሠረተ ሐዋርያት ወነቢያት እንዘ ክርስቶስ ርእስ ማዕዘንተ ሕንጻ። ዘቦቱ የኀድር ኵሉ ሕንጻ ወይጸንዕ ጽርሐ መቅደሱ ለእግዚአብሔር። ወአንትሙሂ ቦቱ ተሐነጽክሙ ማኅደረ እግዚአብሔር በመንፈስ ቅዱስ።

 

ዘካልእ መልእክት Universal Epistle

1ይ ዮሐ 3 : 17 - ፍም [English][ትግርኛ]

ወበዝንቱ አእመርናሁ ለተፋቅሮ እስመ ውእቱ መጠወ ነፍሶ በእንቲአነ ወንሕነኒ ይደልወኒ ንመጡ ነፍሰነ በእንተ ቢጽነ። ወዘቦቱ መንበርተ ዝንቱ ዓለም ወይሬኢ ቢጾ ጽኑሰ ወየዐጹ ምሕረቶ እምኔሁ እፎ ይነብር ፍቅረ እግዘእብሔር ላዕሌሁ። ደቀቅየ ኢንትፋቀር በቃል ወበልሳን ዘእንበለ በምግባር ወበጽድቅ። ወበዝንቱ ነአምር ከመ እምጽድቅ ንሕነ። ወንሕነሰ ቅድሜሁ ናመክሮ ለልብነ። ወእመሰ ያርሰሐስሐነ ልብኒ እምአበሳነ ወያዐብዮ እግዚአብሔር ለልብነ ወየአምር ኵሎ። አኀዊነ እመሰ ኢቀለየነ ልብነ ገጽ ብነ ኀበ እግዚአብሔር። ወዘሂ ሰአልናሁ ንነሥእ እምኀቤሁ እስመ ትእዛዞ ነዐቅብ ወንገብር ዘይኤድሞ ቅድሜሁ። ወዛቲ ይእቲ ትእዛዙ ከመ ንእመን በወልዱ እግዚእ ኢየሱስ ክርስቶስ ወንትፋቀር በበይናቲነ በከመ ወሀበነ ትእዛዞ። ወዘሰ የዐቅብ ትእዛዞ ቦቱ ይነብር ወውእቱኒ ቦቱ። ወበዝንቱ ነአምር ከመ ይነብር ምስሌነ እምነ መንፈሱ ቅዱስ ዘወሀበነ።

 

ግብረ ሃዋርያት Acts

ግብ ሐዋ 25 : 1 - 8 [English][ትግርኛ]

ወበጺሖ ፊስጦስ ቂሣርያ ጐንደየ ሠሉሰ መዋዕለ ወእምዝ ዐርገ ኢየሩሳሌም። ወዖድዎ ሊቃነ ካህናት ወዐበይተ አይሁድ ወነገርዎ በእንተ ጳውሎስ። ወሰአልዎ ከመ ይጸግዎሙ ከመ ይልአክ ያምጽእዎ ለዐውድ ዘኢየሩሳሌም። ወእሙንቱሰ ፈቀዱ ከመ ይሑሩ ህየ ወበፍኖት ይቅትልዎ። ወአውሥኦሙ ከመ የዐቅብዎ ለጳውሎስ በቂሣርያ ወከመ የሐውር ለሊሁ ፍጡነ ህየ። ወይቤሎሙ ለአይሁድ እለ ትክሉ እምውስቴትክሙ ረዱ ትትዋቀሡ ምስለ ውእቱ ብእሲ ዘአስተዋደይክምዎ። ወነቢሮ ኀቤሆሙ ሰሙነ መዋዕለ አው ዐሡረ ወረደ ቂሣርያ ወበሳኒታ ነበረ ዐውደ ወአዘዘ ያምጽእዎ ለጳውሎስ። ወቀሪቦ ጳውሎስ አስተዋደይዎ አይሁድ እለ ወረዱ እምኢየሩሳሌም ብዙኀ ጌጋየ ወክቡደ በዘኢይክሉ በጺሖቶ። ወእንዘ ይወቅሥ ሎሙ ጳሎውስ ወይብል አልቦ ዘአበስኩ ላዕለሂ ኦሪቶሙ ለአይሁድ ወኢ ዲበ ምኵራቦሙ ወኢ ለነጋሢ።

 

ስንክሳር Synaxarium

ተዝካረ በዓላ ለእግዝእትነ ማርያም
ወማቱሳላ
ወጢሞቴዎስ ሰማዕት
ወቴዎድሮስ
ወተቀብዖተ እግዚእነ ዕፍረተ

 

መዝሙር Psalm

መዝ 37 : 19 - 20 [English][ትግርኛ]

ወበዝኁ እለ በዐመፃ ይጸልኡኒ ፤
እለ ይፈድዩኒ እኪተ ህየንተ ሠናይት ፤
ወያስተዋድዩኒ በተሊወ ጽድቅ።

 

ወንጌል Gospel

ዮሐ 11 : 46 - 53 [English][ትግርኛ]

ወቦ እምውስቴቶሙ እለ ሖሩ ኀበ ፈሪሳውያን ወአስተዋደይዎ ወነገርዎሙ ኵሎ ዘገብረ እግዚእ ኢየሱስ። ወአስተጋብእዎሙ ሊቃነ ካህናት ወፈሪሳውያን ለዐውድ ወይቤልዎሙ ምንተ ንሬሲ። ናሁ ዝንቱ ብእሲ ብዙኀ ተአምረ ይገብር። ወእመኒ ኀደግናሁ ከመዝ ኵሉ የአምን ቦቱ ወይመጽኡ ሰብአ ሮሜ ወይነሥኡነ ብሔረነ ወሕዝበነኒ። ወይቤሎሙ አሐዱ እምኔሆሙ ዘስሙ ቀያፋ ሊቀ ካህናት ዘእብሬቱ ይእቲ ዓመት። አንትሙሰ ኢታአምሩ ወኢምንተኒ ወኢሂ ትመክሩ። ይኄይሰነ አሐደ ብእሴ ንቅትል ወይሙት ህየንተ ሕዝብ እምይትሐጐል ኵሉ ሕዝብ። ወዘንተሰ አኮ እምኀቤሁ ዘይቤ አላ እስመ ሊቀ ካህናት ውእቱ ወእብሬቱ ይእቲ ዓመት ተነበየ እስመ ሀለዎ ለእግዚእ ኢየሱስ ይሙት በእንተ ኵሉ ሕዝብ። ወአኮ በእንተ ሕዝብ ባሕቲቶሙ አላ ከመ ያስተጋብኦሙ ለውሉደ እግዚአብሔር እለ ተዘርዉ አሐተኔ። ወእምይእቲ ዕለት ተማከሩ ሊቃነ ካህናት ከመ ይቅትልዎ።

ቅዳሴ Liturgy :

ዘእግዚእነ(ነአኩተከ) ዓዲ ዘእግዝእትነ ማርያም(ጐሥዓ)

Show/Hide ናይ ምሸት/ሰርክ ( Vesper )

መዝሙረ ዳዊት Psalm

መዝ 74 : 4 - 5 [English][ትግርኛ]

ወእለሂ ይኤብሱ ኢያንሥኡ ቀርኖሙ ፤
ወኢያንሥኡ ቀርኖሙ ውስተ አርያም ፤
ወኢይንብቡ ዓመፃ ላዕለ እግዚአብሔር።
 

ወንጌል Gospel

ሉቃ 19 : 28 - 40 [English][ትግርኛ]

ወዘንተ ብሂሎ አመልአ ቅድመ መዓርገ ኢየሩሳሌም። ወሶበ በጽሐ ቤተ ፋጌ ወቢታንያ ኀበ ደብር ዘስሙ ኤሌዎን ፈነወ ክልኤተ እምአርዳኢሁ። ወይቤሎሙ ሑሩ ሀገረ ዘቅድሜክሙ ወበዊአክሙ ትረክቡ ዕዋለ እሱረ ዘአተጽዕኖ ሰብእ ወፍትሕዎ ወአምጽእዎ ሊተ። ወእመቦ ዘይቤለክሙ ለምንት ትፈትሑ ትበሉ እግዚኡ ይፈቅዶ። ወሐዊሮሙ እለ ተፈነዉ ረከቡ በከመ ይቤሎሙ። ወፈትሑ ዕዋለ ወእንዘ ይፈትሑ ዕዋለ ይቤልዎሙ አጋእዝቲሁ ለምንት ትፈትሕዎ ለዕዋል። ወይቤሎ እግዚኡ ይፈቅዶ። ወነሥእዎ ወወሰድዎ ኀበ እግዚእ ኢየሱስ ወረሐኑ አልባሲሆሙ ዲበ ዕዋል ወአጽዐንዎ ለእግዚእ ኢየሱስ። ወእንዘ የሐውሩ ይነፅፉ አልባሲሆሙ በፍኖት። ወበጺሖሙ ኀበ ምውራደ ዐቀብ ዘደብረ ዘይት አኀዙ ኵሎሙ አርዳኢሁ ይትፈሥሑ ወይሴብሕዎ ለእግዚአብሔር በዓቢይ ቃል በእንተ ኵሎ ዘርእዩ ኃይል። እንዘ ይብሉ ቡሩክ ዘይመጽእ በስመ እግዚአብሔር። ቡሩክ ንጉሠ እስራኤል ሰላም በሰማይ ወስብሓት በአርያም። ወቦ እምፈሪሳውያን እለ ይቤልዎ በማእከለ ሕዝብ፤ ሊቅ ገሥጾሙ ለአርዳኢከ። ወአውሥኦሙ ወይቤሎሙ እብለክሙ ለእመ አርመሙ እሉ፤ እሎንቱ አእባን ይኬልሑ።

 

ዘመነ ዮሃንስ Readings for Sunday

መጋቢት 22, 2016 ብግእዝ Mar 31, 2024 ብፈረንጅ

Show/Hide ናይ ንግሆ ( Matin )

መዝሙረ ዳዊት Psalm

መዝ 134 : 20 - 21 [English][ትግርኛ]

እለ ትፈርህዎ ለእግዚአብሔር ባርክዎ ለእግዚአብሔር፤
ቡሩክ እግዚአብሔር በጽዮን፤
ዘየሠድር ውስተ ኢየሩሳሌም።
 

ወንጌል Gospel

ማቴ 21 : 6 - 11 [English][ትግርኛ]

ወሐዊሮሙ አርዳኢሁ ገብሩ በከመ አዘዞሙ እግዚእ ኢየሱስ። ወአምጽኡ እድግተ ወዕዋለ ወረሐኑ አልባሲሆሙ ላዕሌሆን ወተጽዕነ እግዚእ ኢየሱስ ዲቤሆሙ። ወዘይበዝኅ ሕዝብ ነፀፉ አልባሲሆሙ ውስተ ፍኖት፤ ወካልአንሂ መተሩ አዕጹቀ እምውስተ ዕፀው ወይነፅፉ ውስተ ፍኖት። ወሕዝብሰ እለ የሐውሩ ቅድሜሁ ወእለሂ ይተልዉ ይጸርኁ እንዘ ይብሉ። ሆሳዕና ለወልደ ዳዊት። ቡሩክ ዘይመጽእ በስመ እግዚአብሔር። ሆሳዕና በአርያም። ወበዊኦ እግዚእ ኢየሱስ ኢየሩሳሌም ተሀውከት ኵላ ሀገር እንዘ ትብል መኑ ውእቱ ዝንቱ። ወይቤሉ አሕዛብ ዝ ውእቱ እግዚእ ኢየሱስ ነቢይ ዘእምናዝሬት ዘገሊላ።

 

Show/Hide ናይ ቅዳሴ ( Liturgy )

መልእክተ ጳውሎስ Pauline Epistle

1ይ ቆሮ 4 : 1 - 9 [English][ትግርኛ]

ከመዝኬ የሐሊ ሰብእ በእንቲአነ ከመ አግብርተ ክርስቶስ ንሕነ፤ ወከመ መገብተ ሥርዐቱ ለእግዚአብሔር። ወበዝየ እንከ ይትፈቀድ ከመ ይትረከብ ኄር ወምእመን እመገብት። ወሊተሰ ኀሳር ውእቱ ተወድሶ በኀቤክሙ ለእመ ታጸድቁኒ ወለእመኒ ያእኵቱኒ ከመ ኄር በኀበ ሰብእ መዋቲ። ወለልየ ኢይፈትሕ ለርእስየ። ወአልቦ ዘያርሰሐስሐኒ ወኢዘይትዐወቀኒ ወባሕቱ በዝየ ኢያጸድቅ ርእስየ እስመ እግዚአብሔር የሐትተኒ። ወለምንትኑ ተሐትቱ ይእዜ ዘእንበለ ይብጻሕ ጊዜሁ። እስመ ይመጽእ እግዚእነ ወያበርህ ኅቡአተ ዘውስተ ጽልመት ወይከሥት ሕሊናተ ልብ። ውእተ አሚረ ይነሥእ ኵሉ ዕሤቶ እምኀበ እግዚአብሔር። ወዘኒ ሕማመ ነሣእነ አነሂ ወአጵሎስሂ በእንቲአክሙ አኀዊነ ከመ ትትመሀሩ አንትሙሂ ወኢትፃኡ እምቃለ መጻሕፍት ከመ ኢትትዐበዩ ላዕለ ቢጽክሙ። መኑ የሐትተከ ወምንተ ኮነከ ዘትዜኃር ወትትዔበይ፤ ብከኑ ዘኢነሣእከ እምካልእከ። ወእመ ዘብከ ነሣእከ እምካልእከ ለምንትኑ ትዜሀር ወትትዔበይ ከመ ዘኢነሥአ። ወቦኑ ጸገብክሙ ወብዕልክሙ ወነገሥክሙ ዘእንበሌነ ወርቱዕሰ ንሕነኒ ንንግሥ ምስሌክሙ እመ መለክሙ ወነገሥክሙ።

 

ዘካልእ መልእክት Universal Epistle

2ይ ዮሐ 1 : 8 - ፍም [English][ትግርኛ]

ዑቁ ርእሰክሙ ኢትሕጐሉ ዘገበርክሙ አላ ከመ ዐስበ ፍጹመ ትንሥኡ። ኵሉ ዘይናፍቅ ወኢይነብር በትምህርቱ ለክርስቶስ ኢሀሎ እግዚአብሔር ምስሌሁ። ወዘሰ ይነብር በትምህርቱ ለክርስቶስ በአብ ወበወልድ ሀሎ። ወዘኒ ይመጽእ ኀቤክሙ ወዘንተ ትምህርተ ኢያመጽእ ኢታብእዎ ቤተክሙ ወባሐሂ ጥቀ ኢትበልዎ። እስመ ዘይቤሎ ባሐ ይሳተፎ በምግባሩ እኩይ። ወብዙኅ ብየ ዘእጽሕፍ ለክሙ ወኢፈቀድኩ በክርታስ ወበማየ ሕመት እስመ እትአመን ከመ እመጽእ ኀቤክሙ ወአፈ በአፍ እትናገረክሙ ከመ ፍጹመ ይኩን ፍሥሓክሙ። ይኤምኁኪ ደቂቀ እኅትኪ ኅሪት። ሞገስ ወተፋቅሮ ምስሌክሙ። አሜን። መልአት መልእክተ ዮሐንስ ዳግሚት፤ ወስብሐት ለእግዚአብሔር አሜን።

 

ግብረ ሃዋርያት Acts

ግብ ሐዋ 28 : 24 - 29 [English][ትግርኛ]

ወቦ እለሂ አምንዎ ወመንፈቆሙሰ አበይዎ። ወእንዘ ኢየኀብሩ ተመይጡ እምኀቤሁ። ወይቤሎሙ ጳውሎስ ከመዝ አማን ይቤ መንፈስ ቅዱስ በቃለ ኢሳይያስ ነቢይ ለአበዊነ እንዘ ይብል። ሑር ኀበ ዝንቱ ሕዝብ ወበሎ ሰሚዐ ትሰምዑ ወኢትሌብዉ ወርእየ ትሬእዩ ወኢታአምሩ። እስመ ገዝፈ ልቦሙ ለዝንቱ ሕዝብ ወድንቅወ ሰምዑ በእዘኒሆሙ ወከደኑ አዕይንቲሆሙ ከመ ኢይርአዩ በአዕይንቲሆሙ ወኢይስምዑ በእዘኒሆሙ ወኢይለብዉ በልቦሙ ወኢይትመየጡ ኀቤየ ወኢይሣሀሎሙ። አእምሩ እንከ ከመ ለአሕዛብ ትከውን ዛቲ ሕይወት እንተ እምኀበ እግዚአብሔር ወእሙንቱ እለ ይሰምዕዎ። ወይሌብዉ ወይትኤዘዙ ሎቱ። ወዘንተ ሶበ ይብሎሙ ወፅኡ አይሁድ ወሖሩ እንዘ ይትገዐዙ በበይናቲሆሙ ፈድፋደ።

 

ስንክሳር Synaxarium

መንፈሳዊ ቄርሎስ
ወበአቱ ለእግዚእነ ኢየሩሳሌም በተጽዕኖ እድግት ወዕዋላ

 

መዝሙር Psalm

መዝ 131 : 17 - 18 [English][ትግርኛ]

ወበህየ አበቍል ቀርነ ለዳዊት ፤
ወአስተዳሉ ማኅቶተ ለመሲሕየ ፤
ወአለብሶሙ ኀፍረተ ለጸላእቱ።

 

ወንጌል Gospel

ማር 11 : 1 - 11 [English][ትግርኛ]

ወአልጺቆሙ ለኢየሩሳሌም በቤተ ፋጌ ወበቢታንያ በኀበ ደብረ ዘይት ፈነወ ክልኤተ እምአርዳኢሁ። ወይቤሎሙ ሑሩ ውስተ ሀገር እንተ ቅድሜክሙ ወበዊአክሙ ትረክቡ ሶቤሃ ዕዋለ እሱረ ዘኢተጽእኖ ሰብእ ዲቤሁ ፍትሕዎ ወእምጽእዎ ሊተ። ወለእመቦ ዘይቤለክሙ ምንተ ትገብሩ በሉ እግዚኡ ይፈቅዶ ወሶቤሃ ካዕበ ይፌንዎ ዝየ። ወሖሩ ወረከቡ ዕዋለ እሱረ ኀበ አንቀጽ ኀበ ዕደዋት ወፈትሕዎ። ወይቤልዎሙ እለ ይቀውሙ ህየ ምንተ ትገብሩ ዘትፈትሑ ዕዋለ። ወይቤልዎሙ በከመ አዘዞሙ እግዚእ ኢየሱስ ወኀደግዎሙ። ወወሰድዎ ለዕዋል ኀበ እግዚእ ኢየሱስ ወረሐኑ ላዕሌሁ አልባሲሆሙ ወአጽዕንዎ። ወብዙኃን እለ ነፀፉ ቈጽለ መቲሮሙ እምዕፀው ወቦ እለ ነፀፉ አልባሲሆሙ ውስተ ፍኖት። ወእለሂ ይመርሑ ወእለሂ ይተልዉ ይኬልሑ ወይብሉ ሆሳዕና ቡሩክ ዘይመጽእ በስመ እግዚአብሔር። ወቡርክት እንተ ትመጽእ መንግሥት በስመ እግዚአብሔር እንተ አቡነ ዳዊት ሆሳዕና በአርያም። ወቦአ እግዚእ ኢየሱስ ኢየሩሳሌም ኀበ ቤተ መቅደስ። ወርእዮ ኵሎ ሶበ መስየ ሖረ ቢታንያ ምስለ ዐሠርቱ ወክልኤቱ።

ቅዳሴ Liturgy :

ዘቄርሎስ

Show/Hide ናይ ምሸት/ሰርክ ( Vesper )

መዝሙረ ዳዊት Psalm

መዝ 146 : 1 - 2 [English][ትግርኛ]

ትሴብሖ ኢየሩሳሌም ለእግዚአብሔር ፤
ወሰብሕዮ ለአምላክኪ ጽዮን ፤
እስመ አፅናዐ መናሥግተ ኆኃትኪ።

 

ወንጌል Gospel

ዮሐ 12 : 12 - 19 [English][ትግርኛ]

ወበሳኒታ ሰብእ ብዙኃን እለ መጽኡ ለበዓል፤ ሶበ ሰምዑ ከመ ይመጽእ እግዚእ ኢየሱስ ኢየሩሳሌም። ነሥኡ ጸበርተ ተመርት ዘበቀልት ወተቀበልዎ ወፂኦሙ እንዘ ይጸርኁ ወይብሉ። ሆሳዕና ቡሩክ ዘይመጽእ በስመ እግዚአብሔር ወንጉሦሙ ለእሥራኤል። ወረከበ እግዚእ ኢየሱስ ዕዋለ አድግ ወተጽዕነ ዲቤሃ በከመ ጽሑፍ። ኢትፍርሂ ወለተ ጽዮን ነዋ ንጉሥኪ ይመጽእ እንዘ ይጼዐን ዲበ ዕዋለ አድግ። ወቀዲሙሰ አያእመሩ አርዳኢሁ ዘንተ ዘእነበለ አመ ተሰብሐ እግዚእ ኢየሱስ አሜሃ ተዘከሩ ከመ ጽሑፍ ዝንቱ በእንቲአሁ። ወከመዝ ገብሩ ሎቱ። ወሰማዕተ ኮንዎ እሙንቱ ሕዝብ እለ ሀለዉ ምስሌሁ ከመ ጸውዖ ለአልዓዛር እመቃብር ወአንሥኦ እምነ ምዉታን። ወበእንተ ዝንቱ ተቀበልዎ እሙንቱ ሰብእ እስመ ሰምዑ ዘገብረ ዘንተ ተአምረ። ወይቤሉ ፈሪሳውያን በበይናቲሆሙ ትሬእዩኑ ከመ አልቦ ዘትበቍዑ ወኢምንተኒ። ናሁ ኵሉ ዓለም ተለዎ ድኅሬሁ።

 



Show/Hide መዝሙር ( Hymn )

መዝሙር

God is great! - በ፭ ፤ አምላኩሰ ለአዳም ለዕረፍት ሰንበተ ሠራዕከ ወይቤልዎ አይሁድ በአይ ስልጣን ትገብር ዘንተ ወይቤሎሙ ኢየሱስ አነኒ እገብር አንትሙኒ እመኑ ለግብርየ ወይቤሎሙ አነ ውእቱ እግዚአ ለሰንበት አግዚአ ውእቱ ለሰንበት ወልድ ዋሕድ ወይቤሎሙ ብዉሕ ሊተ እኅድግ ኃጢአተ በዲበ ምድር እስብክ ግዕዛነ ወእክሥት አዕይንተ ዕውራን አቡየ ፈነወኒ ።

ሰላም

በሰንበት ወረቀ ምድረ ወገብረ ፅቡረ አሕየወ ዕውረ ሃሌ ሉያ ፤ ሃሌ ሉያ ፤ ሃሌ ሉያ ይትፌስሑ ጻድቃን ወብዙኅ ሰላም ሎሙኒ ፀሐየ ጽድቅ ሠረቀ ሎሙ።

 

Show/Hide ናይ ቅዳሴ ( Liturgy )

መልእክተ ጳውሎስ Pauline Epistle

ዕብ 12 : 11 - 17 [English][ትግርኛ][ልሙድ]

ኵሉ ተግሣጽ ኢይመስል ትፍሥሕተ በጊዜሁ ዳእሙ ሐዘን ውእቱ። ወድኅረሰ ትፈሪ ሰላመ ለእለ ተገሠጹ ወተዐስዮሙ ጽድቀ። ወበእንተዝ አርትዑ እደ ፅውስተ ወእገረ ፅቡሳተ። ወግበሩ መንኰራኵረ ርቱዐ ለእገሪክሙ ከመ ይሕየው ሕንካሴክሙ ወኢትትዓቀፉ። ወሩጹ ኀበ ሰላም ምስለ ኵሉ ወኢትኅድጉ ቅድሳቲክሙ ወዘእንበሌሁሰ አልቦ ዘይርእዮ ለእግዚአብሔር። አስተሐይጹ አልቦ ዘያሰትት ጸጋ እግዚአብሔር ወአልቦ ዘይትረከብ ሥርው መሪር እንተ ታሠርጽ ሕማመ እንተ ታስሕቶሙ ወታረኵሶሙ ለብዙኃን። አልቦ ዘይከውን ዘማዌ ወርኩሰ ከመ ዔሳው ዘሤጠ ብኵርናሁ በአሐዱ መብልዕ። ታአምሩ ከመ ድኅሬሃ ፈቀደ ይረስ በረከተ ወአውፅእዎ እስመ ተስእኖ ወኀጥአ ፍኖተ በዘይኔስሕ ወኀሠሣ እንዘ ይበኪ።

 

ዘካልእ መልእክት Universal Epistle

ያዕ 5 : 14 - ፍም [English][ትግርኛ][ልሙድ]

ወእመቦ ዘይደዊ እምኔክሙ ለይጸውዕ ቀሳውስተ እለ ቤተ ክርስቲያን ወይጸልዩ ላዕሌሁ ወይቅብእዎ ቅብአ ጸሎት በስሙ ልእግዚእነ። ወጸሎተ ሃይማኖት ያሐይዎ ለድውይ ወያነሥኦ እግዚአብሔር ወእመኒ ቦቱ ኃጢአት ይትኀደግ ሎቱ። ተአመኑ በበይናቲክሙ ኃጢአተክሙ ወጸልዩ ላዕለ ቢጽክሙ ከመ ትሕየዉ። ብዙኀ ትረድእ ጸሎቱ ለጻድቅ ትክል ወታሰልጥ። ኤልያስ ዘከማነ ሰብእ ውእቱ ወዘከመ ነሐምም የሐምም ወጸሎተ ጸለየ ከመ ኢይዝንም ዝናም ወኢዘንመ ውስተ ምድር ሰለስተ ዓመተ ወስድስተ አውራኀ። ወካዕበ ጸለየ ከመ ይዝንም ወወሀበ ሰማይ ዝናሞ ወምድርኒ አብቈለት ፍሬሃ። አኀዊነ እመቦ ዘስሕተ እምኔክሙ እምጽድቅ። ወእመቦ ዘሜጦ እምነ ጌጋዩ። ለያእምር ከመ ዘሜጦ እምጌጋዩ አድኀነ ርእሶ እምነ ሞት ወከደኖን ለብዙኃት ኃጣውኢሁ። ተፈጸመት መልእክተ ያዕቆብ ሐዋርያ፡ እኅሁ ለእግዚእነ ኢየሱስ ክርስቶስ፡ ወስብሐት ለእግዚአብሔር አሜን።

 

ግብረ ሃዋርያት Acts

ግብ ሐዋ 3 : 1 - 12 [English][ትግርኛ][ልሙድ]

ወዓርጉ ምኵራበ ጴጥርስ ወዮሐንስ ጊዜ ተሱዓት ለጸሎት። ወሀሎ ብእሲ ዘፅዉሰ እገሪሁ ተወልደ ከማሁ እምከርሠ እሙ። ወይጸውርዎ ኵሎ ዕለተ ወያነብርዎ ኆኅተ ምኵራብ እንተ ስማ ኦርያ ከመ ይሰአል ምጽዋተ በኀበ እለ ይበውኡ ምኵራበ። ወርእዮሙ ለጴጥሮስ ወለዮሐንስ ይበውኡ ምኵራበ ወሲእሎሙ የሀብዎ ምጽዋተ ፤ ወተመይጥዎ ጴጥሮስ ወዮሐንስ ኀቤሁ ወይቤልዎ ተመየጥ መንገሌነ። ወነጸረ ኀቤሆሙ። ወተሰፈወ የሀብዎ ምጽዋተ። ወይቤሎ ጴጥሮስ ወርቅሰ ወብሩር አልብየ ወእምዘብየሰ እሁበከ። ናሁ በስሙ ለኢየስስ ክርስቶስ ናዝራዊ ተንሥእ ወሑር። ወአኀዞ በእዴሁ ዘየማነ ወአንሥኦ ወተንሥአ ሰቤሃ። ወጸንዓ እገሪሁ ወሐቌሁ። ወሖረ ምስሌሆሙ እንዘ ይሠግር ወቦአ ምኵራበ ወአእኰተ እግዚአብሔርሃ። ወርእይዎ ኵሎሙ ሕዝብ እንዘ የሐውር ወያአኵት እግዚአብሔርሃ። ወአእመርዎ ከመ ውእቱ ዘይነብር ኆኅተ ምኵራብ እንተ ስማ ኦርያ ወይስእል ወደንገፁ ወአንከሩ በእንተ ዘኮነ ተኣምር ላዕሌሁ። ወእንዘ ይእኅዝዎሙ ለጴጥሮስ ወለዮሐንስ ሮጹ ኵሉ ሕዝብ ኀቤሆሙ ኀበ ሕዋረ ሰሎሞን ድንጉፃኒሆሙ። ወሶበ ርእዮሙ ጴጥሮስ ለሕዝብ ወይቤሎሙ አንትሙ ሰብአ እስራኤል ምንትኑ ታነክሩ ዘንተ ወኪያነኒ ምንትኑ ትኔጽሩነ። ከመ ዘበኃይልነ ወከመ ዘበጽድቅነ ረሰይናሁ ለዝንቱ ከመ ይሑር በእገሪሁ፤ አልቦኬ።

 

መዝሙር Psalm

መዝ 6 : 2 - 3 [English][ትግርኛ][ልሙድ]

ተሣሀለኒ እግዚኦ እስመ ድውይ አነ ፤
ወፈውሰኒ እስመ ተሀውከ አዕጽምትየ ፤
ወነፍስየኒ ተሀውከት ፈድፋደ።

 

ወንጌል Gospel

ዮሐ 5 : 1 - 18 [English][ትግርኛ][ልሙድ]

ወእምድረዝ ኮነ በበዓሎሙ ለአይሁድ ዐርገ ኢየሱስ ኢየሩሳሌም። ወቦ ውስተ ኢየሩሳሌም ምጥማቃት ዘጵሩጳጥቄ ዘውእቱ ቀላየ አባግዕ ብሂል ወይቤልዋ ስማ በዕብራይስጥ ቤተ ሳይዳ ወባቲ ኃምስቱ ሕዋራት። ወህየ ይሰክቡ ብዙኃን ድዉያን ዕዉራን ወሐንከሳን ወይቡሳን ወይጸንሑ ሁከተ ማይ። እስመ መልአከ እግዚአብሔር በጊዜ ይወርድ ውስተ ምጥማቃት ወየሀውኮ ለማይ ወዘይወርድ ቀዲሙ እምድኅረ ሁከተ ማይ ወይትኀፀብ የሐዩ እምኵሉ ደዌ ዘቦ። ወሀሎ ህየ አሐዱ ብእሲ ዘሠላሳ ወሰመንቱ ዓመት እምዘ ደወየ። ወኪያሁ ርእዮ ኢየሱስ ይሰክብ ወአእመረ ከመ ጐንደየ ውስተ ደዌሁ ወይቤሎ ትፈቅድኑ ትሕየው። ወአወሥአ ውእቱ ድዉይ ወይቤሎ እወ እግዚኦ አላ ሰብአ አልብየ ከመ ሶበ ይትሀወክ ማይ ያውርደኒ ውስተ ምጥማቃት ወሶበ ጊዜ እመጽእ አነ ባዕድ ይቀድመኒ ወሪደ። ወይቤሎ ኢየሱስ ተንሥእ ወንሣእ ዐራተከ ወሑር። ወሐይወ ሶቤሃ ውእቱ ብእሲ ወነሥአ ዐራቶ ወሖረ። ወሰንበት አሜሃ ይእቲ ዕለት። ወይቤልዎ አይሁድ ለዘሐይወ ሰንበት ውእቱ ዮም ወኢይከውነከ ትጹር ዐራተከ። ወአውሥአ ወይቤሎሙ ዘአሕየወኒ ውእቱ ይቤለኒ ጹር ዐራተከ ወሑር። ወተስእልዎ ወይቤልዎ መኑ ውእቱ ብእሲሁ ዘይቤለከ ጹር ዐራተከ ወሑር። ወውእቱሰ ዘሐይወ ኢያእመረ መኑ ውእቱ ዘአሕየዎ እስመ ተሰወረ ኢየሱስ ማእከለ ብዙኃን ሰብእ እለ ሀለዉ በውእቱ መካን። ወእምዝ ረከቦ ኢየሱስ ለውእቱ ዘሐይወ በምኵራብ ወይቤሎ ናሁኬ ሐየውከ ዑቅ ኢተአብስ ዳግመ ከመ ዘየአኪ እምዝ ኢይርከብከ። ወሖረ ውእቱ ብእሲ ወነገሮሙ ለአይሁድ ከመ ኢየሱስ ውእቱ ዘአሕየዎ። ወበእንተ ዝንቱ ይሰድድዎ አይሁድ ለኢየሱስ ወየኀሥሡ ይቅትልዎ እስመ ከመዝ ይገብር በሰንበት። ወአውሥአ ኢየሱስ ወይቤሎሙ አቡየሂ እስከ ይእዜ ይገብር ወአነሂ እገብር። ወበእንተ ዝንቱ ፈድፋደ የኀሥሡ አይሁድ ይቅትልዎ። እስመአኮ ከመ ሰንበተ ባሕቲቶ ዘይስዕር ዳእሙ ዓዲ አባሁ ይሬስዮ ለእግዚአብሔር ወያዔሪ ርእሶ ምስለ እግዚአብሔር።

ቅዳሴ Liturgy :

ዘዮሐንስ ወልደ ነጐድጓድ (ሃቤከ)