መዝሙረ ዳዊት Psalm

ወያሌዕሎሙ ለየዋሃን በአድኅኖቱ፤
ይትሜክሑ ጻድቃን በክብሩ፤
ወይትኃሠዩ በዲበ ምስካቢሆሙ።

ወንጌል Gospel

፳፬. ወኀሊፎሙ አርዳኢሁ ለዮሐንስ አኀዘ ይበሎሙ ለሕዝብ በእንተ ዮሐንስ መጥምቅ፦ ምንተኑ ወፃእክሙ ገዳመ ትርአዩ? ብርዐኑ ዘይትሐወስ እምነፋስ? ፳፭. ወምንተኑመ ወፃእክሙ ትርአዩ? ብእሴኑ ዘርሱይ በቀጠንት አልባስ? ናሁ እለሰ ርሱያን አልባሰ ክብር ውስተ አብያተ ንገሥት ሀለዉ። ፳፮. ወምንተኑመ ወፃእክሙ ትርአዩ? ነቢየኑ? እወ እብለክ፥ ወየዐቢ እምነቢይ። ፳፯. ዝውእቱ ዘበእንቲአሁ ተጽሕፈ፦ ናሁ፥ አነ እፌኑ መልአክየ ቅድመ ገጽከ ዘይጸይሕ ፍኖተከ በቅድሜከ። ፳፰. አማን እብለክሙ፥ ኢይትነሣእ እምትውልደ አንስት ዘየዐቢ እምዮሐንስ መጥምቅ ወኢመኑሂ፤ ወበመንግሥተ እግዚአብሔርሰ ዘይንእሶ የዐብዮ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ውሉድኒ ተአዘዙ ለአዝማዲክሙ በእግዚእነ እስመ ጽድቅ ውእቱ ዝንቱ። ፪. ወቀዳሚ ትእዛዝ በውስተ ሥርዓት፦ አክብር አባከ ወእመከ። ፫. ከመ ሠናየ ይኩንከ ወይኑኅ መዋዕሊከ በዲበ ምድር። ፬. አበውኒ ኢታስተቍጥዑ ውሉደክሙ፥ አላ ሐፅኑ ወገሥጹ በትምህርተ እግዚአበሔር። ፭. ነባሪኒ ተአዘዙ ለአጋእዝቲክሙ እለ ይኴንኑክሙ ሥጋክሙ በፍርሀት ወበረዓድ፥ ወበልብ ስፉሕ ከመ ዘለክርስቶስ። ፮. ወአኮ ከመ ዘያደሉ ለዐይነ ሰብእ፥ አላ ከመ አግብርተ ክርስቶስ እንዘ ትገብሩ ፈቃደ ለእግዚአብሔር። ፯. ወበኵሉ ነፍስክሙ ተቀነዩ ሎሙ በአፍቅሮ ከመ ዘለእግዚአብሔር፥ ወአኮ ከመ ዘለሰብእ። ፰. እንዘ ታአምሩ ከመ ኵሉ ዘገብረ ሠናየ ይትዐሰይ በኀበ እግዚአብሔር እመኒ ነባሪ ወእመኒ አግዓዚ። ፱. ወአጋእዝትኒ ዕሩየ ግበሩ ሎሙ እንዘ ታቈርሩ መዓተክሙ፥ ወተኀድጉ ሎሙ አበሳሆሙ፥ ታአምሩ ከመ ብክሙ እግዚአ በሰማያት ዘኢያደሉ ለገጽ።

ዘካልእ መልእክት Universal Epistle

፲፮. ወንሕነሰ አእመርነ ወአመነ እንተቦ ፍቅረ እግዚአብሔር ምስሌነ። እግዚአብሔርሰ ፍቅር ውእቱ ወዘኒ ነበረ በተፋቅሮ ምስለ እግዚአብር ይነብር ወእግዚአብሔር ምስሌሁ። ፲፯. ወበዝንቱ ትትፌጸም ተፋቅሮ ምስሌነ ከመ ንርከብ ገጸ በዕለተ ደይን በኀቤሁ፥ እስመ በከመ ኮነ ውእቱ ኮነ ንሕነኒ ውስተ ዝንቱ ዓለም። ፲፰. ወእልቦ ፍርሀት ውስተ ተፋቅሮ አላ ተፋቅሮሰ ፍጽምት አፍአ ታወፅኣ ለፍርሀት። እስመ ፍርሀትሰ መቅሠፍት ባቲ ወዘሰ ይፈርህ ኢኮነ ፍጹመ በተፋቅሮ። ፲፱. ወንሕነኒ ንትፋቀር በበይናቲነ ወናፍቅሮ ለእግዚአብሔር እስመ ውእቱ ቀደመ አፍቅሮተነ። ፳. ወእመሰቦ ዘይብል፦ አፈቅሮ ለእግዚአብሔር፥ ወይጸልእ ቢጾ፥ ሐሳዊ ውእቱ። እስመ ዘይፈቅሮ ለቢጹ ዘይሬኢ ለእግዚአብሔርኒ ያፈቅሮ ወዘሰ ኢያፈቅር ቢጾ ዘይሬኢ እፎ እንከ ይክል አፍቅሮቶ ለእግዚአብሔር ዘኢይሬኢ። ፳፩. ወዝንቱ ትእዛዝ ብነ እምኔሁ ከመ ዘያፈቅሮ ለእግዚአብሔር ያፍቅር ቢጾ።

ግብረ ሃዋርያት Acts

፩. ወበጺሓ ፊስጦስ ቂሳርያ ጐንደየ ሠሉሰ መዋዕለ ወእምዝ ዐርገ ኢየሩሳሌም። ፪. ወዖድዎ ሊቃነ ካህናት ወዐበይተ አይሁድ ወነገርዎ በእንተ ጳውሎስ። ፫. ወሰአልዎ ከመ ይጸግዎሙ ከመ ይልአክ ያምጽእዎ ለዓውድ ዘኢየሩሳሌም። ወእሙንቱሰ ፈቀዱ ከመ ይሑሩ ህየ ወበፍኖት ይቅትልዎ። ፬. ወአውሥኦሙ ከመ የዐቅብዎ ለጳውሎስ በቂሳርያ ወከመ የሐውር ለሊሁ ፍጡነ ህየ። ፭. ወይቤሎሙ ለአይሁድ፦ እለ ትክሉ እምውስቴትክሙ ረዱ ትትዋቀሡ ምስለ ውእቱ ብእሲ ዘአስተዋደይክምዎ። ፮. ወነቢሮ ኀቤሆሙ ሰሙነ መዋዕለ አው ዐሡረ ወረደ ቂሳርያ ወበሳኒታ ነበረ ዓውደ ወአዘዘ ያምጽእዎ ለጳውሎስ። ፯. ወቀሪቦ ጳውሎስ አስተዋደይዎ አይሁድ እለ ወረዱ እምኢየሩሳሌም ብዙኀ ጌጋየ ወክቡደ በዘኢይክሉ በጺሖቶ። ፰. ወእንዘ ይወቅሥ ሎሙ ጳሎውስ ወይብል፦ አልቦ ዘአበስኩ ላዕለሂ ኦሪቶሙ ለአይሁድ ወኢዲበ ምኵራቦሙ ወኢለነጋሢ።

ስንክሳር Synaxarium

ሚናስ ሐራ ሰማያዊ
ወገብረ ክርስቶስ ዲያቆን

መዝሙር Psalm

ወኢሰምዑኒ ሕዝብየ ቃልየ፤
ወእስራኤልኒ ኢያፅምኡኒ፤
ወፈነውኩ ሎሙ በከመ ምግባሮሙ።

ወንጌል Gospel

፵፭. ወአንሰ እስመ ጽድቀ እነግር ወኢተአምኑኒ። ፵፮. መኑ እምኔክሙ ዘይዛለፈኒ በእንተ ኀጢአት ወእመሰ አነ ጽድቀ እነግር ለምንት ኢተአምኑኒ? ፵፯. ዘሰ እምእግዚአብሔር ውእቱ ቃለ እግዚአብሔር ይሰምዕ። ወበእንተ ዝንቱ አንትሙሰ ኢትሰምዑኒ እስመ ኢኮንክሙ እምእግዚአብሔር። ፵፰. ወተሰጥውዎ አይሁድ ወይቤልዎ፦ አኮኑ ሠናየ ንቤለከ ከመ ሳምራዊ አንተ ወጋኔነ ብከ? ፵፱. ወአውሥአ እግዚእ ኢየሱስ ወይቤሎሙ፦ አንሰ ጋኔነ አልብየ ወባሕቱ አከብር አባየ ወአንትሙሰ ታስተሐቅሩኒ። ፶. አንሰ ኢየኀሥሥ ተድላ ለርእስየ፥ ሀሎ ዘየኀሥሥ ወዘሂ ይኴንን። ዘየአምን በወልድ ቦ ሕይወት ዘለዓለም።

ቅዳሴ Liturgy :

መዝሙረ ዳዊት Psalm

ከመ እንግር ፈቃደከ መከርኩ አምላኪየ፤
ወሕግከኒ በማእከለ ከርሥየ፤
ዜኖኩ ጽድቀከ በማኅበር ዓቢይ።

ወንጌል Gospel

፴፪. ወይቤሎሙ እግዚእ ኢየሱስ፦ አማን አማን እብለክሙ፥ አኮ ሙሴ ዘወሀበክሙ ውእተ ኅብስተ እምሰማይ፥ አላ አቡየ ወሀበክሙ ኅብስተ ጽድቅ እመሰማይ። ፴፫. እስመ ኅብስቱ ለእግዚአብሔር ውእቱ ዘወረደ እምሰማይ ወይሁብ ሕይወተ ዘለዓለም። ፴፬. ወይቤልዎ፦ እግዚኦ፥ ሀበነ በኵሉ ጊዜ እምውእቱ ኅበስት። ፴፭. ወይቤሎሙ እግዚእ ኢየሱስ፦ አነ ውእቱ ኅብስተ ሕይወት፤ ወዘይመጽእ ኀቤየ ኢይርኅብ፤ ወዘሂ የአምን ብየ ኢይጸምእ ለዝሉፉ። ፴፮. ወእቤለክሙ ባሕቱ ርኢክሙኒሂ ወኢአመንክሙኒ። ፴፯. ወኵሉ ዘወሀበኒ አቡየ ይመጽእ ኀቤየ፥ ወለዘሂ መጽአ ኀቤየ ኢይሰድዶ ወኢያውፅኦ አፍኣ። ፴፰. እስመ አኮ ዘወረድኩ እምሰማይ ከመ እግበር ፈቃድየ ዘእንበለ ፈቃዶ ለዘፈነወኒ። ፴፱. ወዝንቱ ውእቱ ፈቃዱ ለዘፈነወኒ አብ ከመ ኵሉ ዘወሀበኒ ኢይትኅጐል እምኔሆሙ ወኢአሐዱሂ አላ አነ አነሥኦ በደኃሪት ዕለት። ፵. ወዝንቱ ውእቱ ፈቃዱ ለአቡየ፥ ከመ ኵሉ ዘርእዮ ለወልድ ወአምነ ቦቱ፥ ይረክብ ሕይወተ ዘለዓለም፥ ወአነ አነሥኦ በደኃሪት ዕለት። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

ወአዝማድየኒ ቀብጹኒ ወተናከሩኒ፤
ወተኀየሉኒ እለ የኃሥሥዋ ለነፍስየ፤
ወእለኒ ይፈቅዱ ሕማምየ ነበቡ ከንቶ።

ወንጌል Gospel

፳. ወበዊኦሙ ቤተ፥ መጽኡ ካዕበ አሕዛብ ብዙኃን እስከ ኢያበውሕዎ ይብላዕ እክለ። ፳፩. ወሰሚዖሙ አዝማዲሁ መጽኡ የአኀዝዎ፦ እስመ አብደ፤ ይቤልዎ። ፳፪. ወጸሐፍትኒ እለ ወረዱ እምኢየሩሳሌም ይቤሉ፦ ብዔል ዜቡል አኀዞ ወበመልአኮሙ ለአጋንንት ያዎፅኦሙ ለአጋንንት። ፳፫. ወጸውዖሙ እግዚእ ኢየሱስ ወመሰለ ሎሙ ወይቤሎሙ፦ እፎ ይክል ሰይጣን ለሰይጣን አውፅኦቶ። ፳፬. ወመንግሥትኒ ዘበበይናቲሃ ትትናፈቅ ኢትቀውም ይእቲ መንግሥት። ፳፭. ወእመኒ ቤት ተናፈቀት በበይናቲሃ ኢትቀውም ይእቲ ቤት። ፳፮. ወሰይጣንሂ ለእመ ተንሥአ በበይናቲሁ ወተናፈቀ ኢይቀውም፤ ማኅለቅተ ይረክብ። ፳፯. ወአልቦ ዘይክል በዊአ ቤተ ኀያል ወበርብሮተ ንዋዩ ለእመ ኢቀደመ አሲሮቶ ለኀያል ወእምዝ ይበረብሮ ቤቶ። ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፩. ወርቱዕሰ አንትሙ ጽኑዓን ትጹርዎሙ ድካሞሙ ለስኡናን፥ ወኢናድሉ ለርእስነ። ፪. ወኵልነ ናድሉ ለጽድቅ ወለግብር ሠናይ በዘይትሐነጽ ቢጽነ። ፫. ክርስቶስኒ አኮ ለርእሱ ዘአድለወ። ዳእሙ በከመ ይብል መጽሐፍ፦ ትዕይርቶሙ ለእለ ይትዔየሩከ ወድቀ ላዕሌየ። ፬. ወኵሉ ዘተጽሕፈ ለተግሣጸ ዚአነ ተጽሕፈ፥ ከመ በትዕግሥትነ ወበተወክሎ መጻሕፍት ንርከብ ተስፋነ። ፭. ወእግዚአብሔር አምላከ ትፍሥሕት ወአቡሃ ለምሕረት የሀበነ ነሐሊ ዘዘዚአሁ ለኵልነ በእንተ ኢየሱስ ክርስቶስ። ፮. ከመ ኵልነ ኅቡረ በአሐዱ አፍ ንሰብሖ ለእግዚአብሔር በኢየሱስ ክርስቶስ እግዚእነ። ፯. ወይእዜኒ ተወከፉ ቢጸክሙ እስመ ክርስቶስ ተወክፈክሙ ውስተ ስብሓተ እግዚአብሔር።

ዘካልእ መልእክት Universal Epistle

፲፬. ወእመሰቦ ዘተዐየሩክሙ በእንተ ስሙ ለክርስቶስ ብፁዓን አንትሙ እስመ ስብሐቲሁ ወኀይሉ ለእግዚአብሔር ወመንፈሱ ያዕርፍ ላዕሌክሙ። ፲፭. አልቦ ዘየሐምም እምውስቴትክሙ አው ከመ ቀታሊ አው ከመ ሰራቂ አው ከመ ዘእኩይ ምግባሩ አው ከመ ዘባዕደ ያፈቅር ወይፈቱ። ፲፮. ወእመሰ ከመ ክርስቲይናዊ ኢትኅፈሩ አላ ሰብሕዎ ለእግዚአብሔር በዝንቱ ስም። ፲፯. እስመ በጽሐ ጊዜሁ ለፍዳ ዘያቀድም እምነ ቤቱ ለእግዚአብሔር። ወእመሰ ኮነ እምኀቤነ አቅድሞቱ ምንተ እንከ ይከውን ደኃሪቶሙ ለእለ ይክሕድዎ ለወንጌሉ ለእግዚአብሔር? ፲፰. ወሶበ ጻድቅ እምዕፁብ ይድኅን፥ ኃጥእ ወዐማፂ በአይቴ ያስትርኢ ሀለዎ? ፲፱. ወእለኒ የሐምሙ በእንተ ፈቃዱ ለእግዚአብሔር ያማኅፅኑ ነፍሶሙ ኀበ ምእመን ፈጣሪ በገቢረ ሠናይ። ኦ አኃውየ ብቍዑኒ።

ግብረ ሃዋርያት Acts

፲፯. ወይከውን እምድኅረዝ ይቤ እግዚአብሔር እሰውጥ እምነ መንፈስየ ዲበ ኵሉ ዘሥጋ ወይትኔበዩ ደቂቅክሙ ወአዋልዲክሙ ወወራዙቲክሙ ራእየ ይሬእዩ። ወሊቃውንቲክሙ ሕልመ የሐልሙ። ፲፰. ወላዕለ አግብርትየ ወአእማትየ እሰውጥ እምነ መንፈስየ ይእተ አሚረ ወይትኔበዩ። ፲፱. ወእሁብ ትእምርተ በሰማይ በላዕሉ ወመንክረ በምድር በታሕቱ። ደመ ወእሳተ ወጢሰ። ፳. ፀሐይኒ ይጸልም ወወርኅኒ ደመ ይከውን ዘእንበለ ትብጻሕ ዕለተ እግዚአብሔር ዓባይ ወግርምት። ፳፩. ወኵሉ ዘጸውዐ ስመ እግዚአብሔር ይድኅን።

ስንክሳር Synaxarium

አቡናፍር ገዳማዊ
ወአስተርአዮ መልአክ ለዮሴፍ በሕልም

መዝሙር Psalm

ወአንሰ እሴብሕ ለኀይልከ፤
ወእትፌሣሕ በጽባሕ በምሕረትከ፤
እስመ ኮንከኒ ምስካይየ።

ወንጌል Gospel

፳፬. ወጸውዕዎ ዳግመ ለውእቱ ብእሲ ዕዉር ወይቤልዎ፦ ሑር ሀብ ስብሓተ ለእግዚአብሔር፤ ንሕነሰ ናአምር ከመ ኃጥእ ውእቱ ዝብእሲ። ፳፭. ወአውሥአ ውእቱ ብእሲ ወይቤሎሙ፦ ኢየአምር ለእመ ኃጥእ ውእቱ፥ ወአሐተ ባሕቱ አአምር ከመ ዕዉር አነ ወይእዜ እሬኢ። ፳፮. ወይቤልዎ ካዕበ፦ ምንተ ገብረ ለከ? ወእፎ ከሠተከ አዕይንቲከ? ፳፯. ወአውሥአ ወይቤሎሙ፦ ነገርኩክሙ ወኢትሰምዑ፥ ምንተ እንከ ካዕበ ትፈቅዱ ትስምዑ? አንትሙሂ አርዳኢሁኑ ትኩኑ ትፈቅዱ? ፳፰. ወጸአልዎ ወይቤልዎ፦ አንተ ኩን ረድኦ ሎቱ፥ ወንሕነሰ አርዳኢሁ ለሙሴ ንሕነ። ፳፱. ወንሕነ ናአምር ከመ ለሙሴ ተናገሮ እግዚአብሔር ወለዝንቱሰ ኢናአምሮ እምአይቴ ውእቱ። ዘየአምን በወልድ ቦ ሕይወት ዘለዓለም።

ቅዳሴ Liturgy :

መዝሙረ ዳዊት Psalm

ኀተወ አፍሐም እምኔሁ፤
አጽነነ ሰማያተ ወወረደ፤
ወቆባር ታሕተ እገሪሁ።

ወንጌል Gospel

፮. ወይቤሎሙ እግዚእ ኢየሱስ፦ አውርዱ መሣግሪክሙ ኀበ ይምነ ሐመር ወትረክቡ ብዙኅ። (ወይቤልዎ፦ ሰራሕነ ኵላ ሌሊተ ወአልቦ ዘረከብነ ወኢምንተኒ ወበቃልከሰ ናወርድ።) ወአውሪዶሙ እንከ ስእኑ ስሒበ እምብዝኀ ዓሣት ዘተሠግረ። ፯. ወይቤሎ ለጴጥሮስ ዝኩ ካልእ ረድእ ዘያፈቅሮ እግዚእ ኢየሱስ፦ እግዚእነ ውእቱ። ወሰሚዖ ስምዖን ጴጥሮስ ከመ እግዚእነ ውእቱ ቀነተ ውስተ ሐቌሁ ዘይትዐጸፍ እስመ ዕራቁ ውእቱ ወተወረወ ውስተ ባሕር። ፰. ወካልኣንሰ አርዳእ በሐመር በጽሑ እስመ ኢኮኑ ርሑቃነ እምድር ዘእንበለ መጠነ ክልኤ ምእት በእመት። ወሖሩ እንዘ ይስሕቡ መሣግሪሆሙ ዘውስቴቶን ዓሣት። ፱. ወወሪዶሙ ምድረ ረከቡ ፍሕመ ብቍጸ ወዓሣ ዲቤሁ ወኅብስተ ሥሩዐ። ፲. ወይቤሎሙ እግዚእ ኢየሱስ፦ አምጽኡ እምዓሣት ዘአኀዝክሙ ይእዜ። ፲፩. ወዐርገ ስምዖን ጴጥሮስ ወሰሐበ መሥገርተ ውስተ ምድር ወምሉእ ውእቱ ዓሣት ዓበይት ምእት ወኀምሳ ወሠለስቱ ወእንዘ መጠነዝ ብዝኁ ኢተሰጠ መሥገርቱ። ፲፪. ወይቤሎሙ እግዚእ ኢየሱስ፦ ንዑ ንምሳሕ። ወአልቦ ዘተኀበለ እምአርዳኢሁ ይስአሎ ወይበሎ፦ መኑ አንተ? እስመ አእመሩ ከመ እግዚእነ ውእቱ። ፲፫. ወመጽአ እግዚእ ኢየሱስ ወነሥአ ኅብስተ ወወሀቦሙ ወዓሣሁኒ ከማሁ። ፲፬. ወሣልሱ ዝንቱ እንዘ ያስተርአዮሙ እግዚእ ኢየሱስ ለአርዳኢሁ ተንሢኦ እምነ ምዉታን። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

ኃይልየኒ ወዝክርየኒ እግዚአብሔር፤
ወውእቱ ኮነኒ መድኃንየ፤
ቃለ ትፍሥሕት ውስተ አብያቲሆሙ ለጻድቃን።

ወንጌል Gospel

፳፩. ወሰሚዖሙ አዝማዲሁ መጽኡ የአኀዝዎ፦ እስመ አብደ፤ ይቤልዎ። ፳፪. ወጸሐፍትኒ እለ ወረዱ እምኢየሩሳሌም ይቤሉ፦ ብዔል ዜቡል አኀዞ ወበመልአኮሙ ለአጋንንት ያዎፅኦሙ ለአጋንንት። ፳፫. ወጸውዖሙ እግዚእ ኢየሱስ ወመሰለ ሎሙ ወይቤሎሙ፦ እፎ ይክል ሰይጣን ለሰይጣን አውፅኦቶ። ፳፬. ወመንግሥትኒ ዘበበይናቲሃ ትትናፈቅ ኢትቀውም ይእቲ መንግሥት። ፳፭. ወእመኒ ቤት ተናፈቀት በበይናቲሃ ኢትቀውም ይእቲ ቤት። ፳፮. ወሰይጣንሂ ለእመ ተንሥአ በበይናቲሁ ወተናፈቀ ኢይቀውም፤ ማኅለቅተ ይረክብ። ፳፯. ወአልቦ ዘይክል በዊአ ቤተ ኀያል ወበርብሮተ ንዋዩ ለእመ ኢቀደመ አሲሮቶ ለኀያል ወእምዝ ይበረብሮ ቤቶ። ፳፰. አማን እብለክሙ፥ ኵሉ ኀጢአት ወፅርፈት ይትኀደግ ለእጓለ እመሕያው። ፳፱. ወዘሰ ፀረፈ ዲበ መንፈስ ቅዱስ ኢይትኀደግ ሎቱ ለዓለም ወይትኴነን በደይን ለዝሉፉ። ፴. እስመ ይቤሉ፦ ጋኔን ርኩስ አኀዞ። ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፯. ወዘኒ ዘይፀመድ ከመ ይርከብ ሲሳዮ? መኑ ዘይተክል ወይነ ወኢይበልዕ ቀምሖ? ወመኑ ዘይሬዒ መርዔተ ወኢይሰቲ ሐሊቦ? ፰. ቦኑ ለአድልዎ ለሰብእ እብል፥ አኮኑ ኦሪትኒ ይቤ ከመዝ? ፱. መጽሐፈ ሙሴ ይብል፦ ኢትፍፅሞአ አፋሁ ለላህም ሶበ ታከይድ እክለ። ላሕምኑ እንከ አጽሀቆ ለእግዚአብሔር ዘዘንተ ይጽሕፍ? ፲. ወሚመ በእንቲአነኑ እንጋ ይቤ? ወበእንቲአነ ጸሐፈ እስመ ርቱዕ ዘኒ የሐርስ እንዘ ይሴፎ ምርካቦ የሐርስ። ወዘኒ ያከይድ እክለ እንዘ ይሴፎ ምርካቦ ያከይድ። ፲፩. ወእመሰ ንሕነ ዘራዕነ ለክሙ ዘመንፈስ ቅዱስ ዓቢይኑ ውእቱ ሶበ ንሕነ ነአርር ለክሙ ዘሥጋ ሰብእ። ፲፪. ወእመሰ ባዕድ ይቀድመነ በሢመተ ዚአነ ለሊክሙ ታአምሩ ዘይኄይስክሙ። ወአንሰ ዘኒ ኢፈቀድክዎ ወባሕቱ በኵሉ እትዔገሥ ከመ ኢያዕቅፍ ትምህርቶ ለክርስቶስ።

ዘካልእ መልእክት Universal Epistle

፳፩. እለ ላዕለ እዴሁ አመነ በእግዚአብሔር ዘአንሥኦ እምውታን ወስብሐተ ወሀቦ። ወይእዜኒ ሃይማኖትክሙ ወተስፋክሙ ይኩን በእግዚአብሔር። ፳፪. አንጽሑ ነፍሳቲክሙ በትእዛዙ ለጽድቅ ከመ ታፍቅሩ ካልኣኒክሙ እንዘ ኢትናፍቁ በምልአ ልብክሙ። ተፋቀሩ ዘበጽድቅ በበይናቲክሙ ጽፉቀ። ፳፫. ከመ ሰብእ እለ ተወልዱ ፍጹመ አኮ እምዘርዕ ዘይደመሰስ አላ እምዘ ኢይጠፍእ በትእዛዙ ለእግዚአብሔር ዘሀለወ ለዝሉፉ። ፳፬. እስመ፦ ኵሉ ዘሥጋ ከመ ሣዕር፥ ወኵሉ ክብሩ ከመ ፍሬ ሣዕር፥ ዘእምከመ የብሰ ሣዕር ይትነገፍ ፍሬሁ። ፳፭. ወቃሉሰ ለእግዚአብሔር ይነብር ለዓለም። ወዝንቱ ውእቱ ቃሉ ዘነገርናክሙ።

ግብረ ሃዋርያት Acts

፰. እፎኑ እንከ ንሰምዖሙ ይነብቡ በነገረ ኵሉ በሐውርቲነ እንዘ ፍጥረትነ? ፱. ጰርቴ፥ ወሜድ፥ ወኢላሜጤ፥ ወእለኒ ይነብሩ ማእከለ አፍላግ፥ ይሁዳ፥ ወቀጳዶቅያ፥ ወፎኖጦስ፥ ወእስያ። ፲. ወፍርግያ፥ ወጱንፍልያ፥ ወግብፅ፥ ወደወለ ልብያ ወእለሂ እምቀርኔን፥ ወእለሂ መጽኡ እምሮሜ፥ አይሁድ ወፈላስያን። ፲፩. ወእለ እምቀርጤስ ወዓረብ፥ ወናሁ ንሰምዖሙ ይነብቡ በነገረ በሐውርቲነ ዕበያቲሁ ለእግዚአብሔር። ፲፪. ወደንገፁ ኵሎሙ ወኃጥኡ ዘይብሉ ወዘይነብቡ ወተባህሉ በበይናቲሆሙ፦ ምንትኑ እንጋ ዝ? ፲፫. ወመንፈቆሙስ ሰሐቅዎሙ ወይብሉ፦ እሉስ ፃዕፈ ጸግቡ ወሰክሩ።

ስንክሳር Synaxarium

አባ ለትፁን
ወጰላሞን
ወአባ ገሪማ ዘመደራ
ወአኮራን
ወበርተሎሜዎስ
ወእለ እስክንድርያ
ወእለ እስክንድሮስ ሰማዕታት
ወዮሴፍ
ወአርሲማ ጻድቅት

መዝሙር Psalm

ክቡር ሞቱ ለጻድቅ በቅድመ እግዚአብሔር፤
እግዚኦ አነ ገብርከ፤
ገብርከ ወልደ አመትከ።

ወንጌል Gospel

፭. ወይቤልዎ ሐዋርያት ለእግዚእነ፦ ወስከነ ሃይማኖተ። ፮. ወይቤሎሙ እግዚእ ኢየሱስ፦ እመ ብክሙ ሃይማኖተ መጠነ ኅጠተ ስናፔ ወትብልዋ ለዛቲ ሰግላ ተመልኂ እምሥርውኪ ወተተከሊ ውስተ ባሕር ትትኤዘዝ ለክሙ። ፯. መኑ እምኔክሙ ዘቦ ገብረ ሐረሳዌ ወእመኒ ኖላዌ አቲዎ እምወፍሩ ይብሎኑ፦ ዕረግ ርፍቅ። ፰. አኮኑ ይብሎ፦ አስተዳሉ ሊተ ዘእዴረር ወቅንት ወመጥወኒ እስከ እቦልዕ ወእሰቲ ወእምዝ ብላዕ ወስተይ አንተሂ? ፱. ቦኑ እንጋ ምዝጋና ለውእቱ ገብር ለእመ ገብረ ዘአዘዞ እግዚኡ ግብሮ? ፲. ከማሁኬ አንትሙኒ ኵሎ ገቢረክሙ ዘአዘዝኩክሙ በሉ፦ አግብርት ፅሩዓን ንሕነ ወዘይደልወነ ለገቢር ገበርነ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

እኍኒ ኢያድኅን እኅዋሁ ወኢያድኅን ሰብእ፤
ወኢይሁብ ለእግዚአብሔር ቤዛሁ፤
ወኢተውላጠ ሤጠ ነፍሱ።

ወንጌል Gospel

፴፩. ይእተ አሚረ ዘሀሎ ውስተ ናሕስ ወንዋዩ ውስተ ቤት ኢይረድ ይንሣእ። ወዘሂ ገዳመ ሀሎ ኢይግባእ ድኅሬሁ። ፴፪. ተዘከርዋ ለብእሲተ ሎጥ። ፴፫. እስመ ዘይፈቅድ ያድኅና ለነፍሱ ይገድፋ፥ ወዘሰ ገደፋ ለነፍሱ በእንቲአየ ያሐይዋ። ፴፬. እብለክሙ በይእቲ ሌሊት ክልኤቱ ይሰክቡ ውስተ አሐቲ ዐራት፥ አሐደ ይነሥኡ ወካልኦ የኀድጉ። ፴፭. ወክልኤቲ የኀርጻ ውስተ አሐቲ ማኅረጽ፤ አሐተ ይነሥኡ ወካልእታ የኀድጉ። ፴፮. ወክልኤቱ ይሄልዉ ውስተ አሀዱ ገረህት፤ አሐደ ይነሥኡ ወካልኦ የኀድጉ። ፴፯. ወአውሥኡ ወይቤልዎ፦ በአይቴኑ እግዚኦ? ወይቤሎሙ፦ ኀበ ሀሎ ገደላ ህየ ይትጋብኡ አንስርት። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ወአንሰ ምኑን ኢያእመርኩ፤
ወኮንኩ ከመ እንስሳ በኀቤከ፤
ወአንሰ ዘልፈ ምስሌከ።

ወንጌል Gospel

፲. ወይቤልዎ አይሁድ ለዘሐይወ፦ ሰንበት ውእቱ ዮም፥ ወኢይከውነከ ወትጹር ዐራተከ። ፲፩. ወአውሥአ ወይቤሎሙ፦ ዘአሕየወኒ ውእቱ ይቤለኒ፦ ጹር ዐራተከ ወሑር። ፲፪. ወተስእልዎ ወይቤልዎ አይሁድ፦ መኑ ውእቱ ብእሲሁ ዘይቤለከ፦ ተንሥእ ወጹር ዐራተከ ወሑር? ፲፫. ወውእቱሰ ዘሐይወ ኢያእመረ መኑ ውእቱ ዘአሕየዎ እስመ ተሰወረ እግዚእ ኢየሱስ ማእከለ ብዙኃን ሰብእ እለ ሀለዉ በውእቱ መካን። ፲፬. ወእምዝ ረከቦ እግዚእ ኢየሱስ ለውእቱ ዘሐይወ በምኵራብ ወይቤሎ፦ ናሁኬ ሐየውከ፥ ዑቅ ኢተአብስ ዳግመ ከመ ዘየአኪ እምዝ ኢይርከብከ። ፲፭. ወሖረ ውእቱ ብእሲ ወነገሮሙ ለአይሁድ ከመ እግዚእ ኢየሱስ ውእቱ ዘአሕየዎ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፰. ወይእዜሰ ኅድግዋ ለመዓት ወለቍጥዓ ወለእከይ ወለፅርፈት ወነገረ ኀፍረት፥ ኢይጻእ እምአፉክሙ። ፱. ወኢተሐስዉ ቢጸክሙ፥ ዳእሙ ኅድግዎ ለብሉይ ብእሲ ምስለ ምግባሩ። ፲. ወልበስዎ ለሐዲስ ብእሲ ዘይኄይስ በአእምሮ አምሳለ ፈጣሪሁ። ፲፩. ዘአልቦ በኀቤሁ አይሁዳዊ፥ ወኢአረማዊ፥ ኢግዙር ወኢቈላፍ፥ ኢሐቃል፥ ወሀገሪት ኢነባሪ፥ ወአግዓዚ፥ ዘእንበለ በኵሉ ወኀበ ኵሉ ክርስቶስ። ፲፪. ልበስዎ እንከ ከመ ኅሩያነ እግዚአብሔር ቅዱሳን ወፍቁራን በምሕረት፥ ወበተሣህሎ፥ ወበኂሩት፥ ወትሑት ልብ፥ በየውሀት፥ ወበትዕግሥት። ፲፫. ጹርዎሙ ለቢጽክሙ ወተጻገዉ በበይናቲክሙ፥ ኅድጉ ለቢጽክሙ ዘተሓየስክምዎሙ፥ ከመ ክርስቶስ ጸገወክሙ ከማሁ አንትሙሂ ግበሩ።

ዘካልእ መልእክት Universal Epistle

፱. ናሁኬ አእመርነ ከመ እግዚአብሔር ይክል አድኅኖቶሙ እምነ መንሱት ለጻድቃን። ወለኃጥኣንሰ ዕለተ ደይን ትጸንሖሙ ለተጽዕሮ። ፲. ወፈድፋደሰ ለእለ ይተልውዋ ድኅሬሃ ለፍትወቶሙ ወያጌምንዎ ለሥጋሆሙ ወያስተሐቅርዎ ለፈጣሪሆሙ። ኅቡላን ወዝሉፋን እለ ኢይደነግፁ ከመ ይፅርፉ ላዕለ ስብሐቲሁ። ፲፩. ዘውእቱ ኀበ መላእክት እለ ልዑላን እሙንቱ እምኔሆሙ በኀይል ወበጽንዕ ወኢይክሉ ተዐግሦ ከመ ያብጽሑ ላዕሌሆሙ ዳይነ ፅርፈቶሙ። ፲፪. ውእቶሙኬ ከመ እንስሳ ዘአልቦ ቃል ዘይትወለድ ለሙስና ወለተሰርዎ እስመ ይፀርፉ ላዕለ ዘኢያአምሩ ለሕርትምናሆሙ፥ ወሎሙ በሙስናሆሙ ዐስበ ዐመፃ። ፲፫. ወአስተሐወዝዋ ለተደልዎ ስታየ ዕለቶሙ ወይበልዑ እንዘ ሕብቁቃን ወርኩሳን እለ ኢይጸግቡ ወይትጐሐለዉ በፍቅሮሙ ወይትሜክሑ ለቢጾሙ ከመ ዘሠናይ ምግባሮሙ። ፲፬. ወምሉእ ውስተ አዕይንቲሆሙ ዝሙት ወኀጢአት እንተ አልባቲ ዘይገሀግሃ። ወይደነግፁ ነፍሰ ሰብእ እለ ስጡሕ ልቦሙ ወትዕግልት ምግባሮሙ ወየኀድጉ መርገመ ለውሉዶሙ።

ግብረ ሃዋርያት Acts

፭. ወቀንኡ አይሁድ ላዕሌሆሙ ወአስተጋብኡ ሰብአ ምሥያጥ ቢጽ እኩያን ወበጽሑ ወሆክዋ ለሀገር ወኀሠሥዎሙ ወደበዩ ቤተ ኢያሶን ወፈቀዱ ያውፅእዎሙ ኀበ ሕዝብ። ፮. ወኀጢኦሙ ሰሐብዎ ለኢያሶን ወለቢጹሂ እለ ሀለዉ ህየ። ወወሰድዎሙ ኀበ መኳንንት እንዘ የዐወይዉ ወይብሉ፦ እሉ እሙንቱ እለ የሀውክዋ ለዓለም ወመጽኡ ዝየኒ። ፯. ወተወክፎሙ ዝኢያሶን ወእሙንቱ ይገብሩ ማዕሌተ ቄሳር ወይሜህሩ ካልአ ሕገ ወይቤሉ ኢየሱስ ካልእ ንጉሥ። ፰. ወተሀውከ ሕዝብ ወመኳንንት ዘንተ ሰሚዖሙ። ፱. ወብዙኀ ተሐልዮሙ እምኀበ ኢያሶን ወእምኀበ ቢጹ ኀደግዎሙ። ፲. ወቢጾሙሰ ፈነውዎሙ በሌሊት ለጳውሎስ ወለሲላስ ውስተ ቤርያ። ወቦኡ ምኵራበ አይሁድ። ፲፩. ወእሙንቱ ይኄይሱ እምእለ በተሰሎንቄ ወተወክፉ ቃሎሙ በኵሉ ትፍሥሕት። ወኵሎ አሚረ የኀሥሡ በውስተ መጻሕፍት ለእመ ከማሁ ውእቱ። ፲፪. ወብዙኃን እምውስቱቶሙ እለ አምኑ ወአንስትኒ ብዙኃት አረማውያት ኄራት ወዕደውኒ ብዙኃን።

ስንክሳር Synaxarium

ዲምያኖስ ሊቀ ጳጳሳት
ወኤስድሮስ ሰማዕት

መዝሙር Psalm

ሰርከ ወነግሀ ወመዐልተ እነግር፤
ወአየድዕ ወኢሰምዑኒ ቃልየ፤
አድኅና በሰላም ለነፍስየ እምእለ ይትቃረኑኒ።

ወንጌል Gospel

፲፭. ወእመኒ አበሰ ለከ እኁከ፥ ሑር ወገሥጾ በባሕቲትክሙ አንተ ወውእቱ፤ ወእመ ሰምዐከ፥ ረባሕከ እኅዋከ። ፲፮. ወእመሰ ኢሰምዐከ፥ ንሣእ ምስሌከ በዳግም አሐደ አው ክልኤ ከመ በአፈ ክልኤ ወሠለስቱ ሰማዕት ይቁም ኵሉ ቃል። ፲፯. ወእመሰ ኢሰምዖሙ ሎሙሂ፥ ንግር ለቤተ ክርስቲያን፤ ወእመሰ ለቤተ ክርስቲያንሂ ኢሰምዓ፥ ይኩንከ ከመ አረሚ ወመጸብሓዊ። ፲፰. አማን እብለክሙ፥ ዘአሰርክሙ በምድር ይከውን እሱረ በሰማያት፥ ወዘፈታሕክሙ በምድር ፍቱሐ ይከውን በሰማያት። ፲፱. ወዓዲ እብለክሙ ለእመ ኀብሩ ክልኤቱ እምኔክሙ በውስተ ምድር በእንተ ኵሉ ግብር ዘሰአሎ ይትገበር ሎሙ በኀበ አቡየ ዘበሰማያት። ፳. እስመ ኀበ ሀለዉ ክልኤቱ ወሠለስቱ ጉቡኣን በስምየ፥ ህየ ሀለውኩ አነ ማእከሎሙ። ፳፩. ወእምዝ ቀርቡ ኀቤሁ ጴጥሮስ ወይቤሎ፦ እግዚኦ፥ ስፍነ እመ አበሰ ላዕሌየ እኁየ እኅድግ ሎቱ? እስከ ስብዕኑ? ፳፪. ወይቤሎ እግዚእ ኢየሱስ፦ ኢይብለከ እስከ ስብዕ፥ አለ ዓዲ እስከ ሰብዓ በበ ስብዕ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወዘይነብብ ጽድቀ በልቡ፤
ወዘኢጓሕለወ በልሳኑ፤
ወዘኢገብረ እኩየ ዲበ ቢጹ።

ወንጌል Gospel

፵፱. ወአውሥአ ዮሐንስ ወይቤሎ፦ ሊቅ፥ ቦዘርኢነ እንዘ ያወፅእ አጋንንተ በስምከ ወከላእናሁ እስመ ኢተለወከ ምስሌነ። ፶. ወይቤሎሙ እግዚእ ኢየሱስ፦ ኢትክልእዎ፥ እምከመ ኢኮነ ዕድውክሙ ዘምስሌክሙ ውእቱ። ፶፩. ወተፈጺሞ መዋዕለ ዕርገቱ አጽንዐ ውእቱኒ ገጾ ለሐዊረ ኢየሩሳሌም። ፶፪. ወፈነወ ሐዋርያተ ቅድመ ገጹ ወሐዊሮሙ ቦኡ ሀገረ ሳምር ከመ ያስተደልዉ ሎቱ። ፶፫. ወኢተወክፍዎሙ፥ እስመ ኅሉፍ ገጾሙ ለኢየሩሳሌም። ፶፬. ወርእዮሙ አርዳኢሁ ያዕቆብ ወዮሐንስ ይቤልዎ፦ እግዚኦ፥ ትፈቅድኑ ንበል ይረድ እሳት እምሰማይ ወያጥፍኦሙ በከመ ገብረ ኤልያስ? ፶፭. ወተመይጦሙ ወገሠጾሙ ወይቤሎሙ፦ ኢተአምሩኑ ዘአይ መንፈስ አንትሙ። ፶፮. እስመ ኢመጽአ ወልደ እጓል እመሕያው ከመ ያጥፍእ ነፍሳተ ሰብእ፥ ዘእንበለ ከመ ያሕዩ፤ ወሖሩ ካልእተ ሀገረ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ጸግቡ ደቂቆሙ ወኀደጉ ትራፋቲሆሙ ለሕፃናቲሆሙ፤
ወአንሰ በጽድቅከ እሬኢ ገጸከ፤
ወእጸግብ በርእየ ስብሐቲከ።

ወንጌል Gospel

፲፭. ወአዘዞሙ ወይቤሎሙ፦ ዑቁ ወተዓቀቡ እምነ ብሑአ ፈሪሳውያን ወእምነ ብሑአ ሄሮድስ። ፲፮. ወሐለዩ በበይናቲሆሙ ወይቤሉ፦ እስመሁ እንጋ ኅብስተ ኢነሣእነ ይብለነ። ፲፯. ወአእመሮሙ እግዚእ ኢየሱስ ወይቤሎሙ፦ ምንተኑ ትሔልዩ በልብክሙ እስመ ኅብስትኑ አልብክሙ? ዓዲኑ ኢታአምሩ ወኢትሌብዉ? ልብክሙኑ ጽሉል? ፲፰. አዕይንተ ብክሙ ወኢትሬእዩ ወእዘነ ብክሙ ወኢትሰምዑ ወኢትዜከሩኑ። ፲፱. ዘአመ ኃምስ ኅብስተ ፈተትኩ ለኀምሳ ምእት ብእሲ ወሚመጠነ አግሐሥክሙ አክፋረ ዘመልአ ፍተታተ ዘተርፈ? ወይቤልዎ፦ ዐሠርተ ወክልኤተ። ፳. ወይቤሎሙ፦ አመኬ ሰብዑ ኅብስተ ለአርብዓ ምእት ሚመጠነ አግሐሥክሙ አስፋሪዳተ ዘመልአ ፍተታተ ዘተርፈ? ወይቤልዎ፦ ሰብዑ። ፳፩. ወይቤሎሙ፦ እፎ እንከ ዘኢትሌብዉ? ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፩. እምጳውሎስ ወስልዋኖስ ወጢሞቴዎስ ለቤተ ክርስቲያን ዘተሰሎንቄ በእግዚአብሔር አቡነ ወእግዚእነ ኢየሱስ ክርስቶስ። ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ። ፪. ናአኵቶ ለእግዚአብሔር ዘልፈ በእንቲአክሙ ወንዜከረክሙ ወትረ በጸሎትነ። ፫. ወንዜከር ግብረ ሃይማኖትክሙ ወጻማ ፍቅርክሙ ወትዕግሥተ ተስፋክሙ በእግዚእነ ኢየሱስ ክርስቶስ በቅድመ እግዚአብሔር አቡነ። ፬. ወነአምር ኦአኀውየ ፍቁራን ዘከመ ኀረየክሙ እግዚአብሔር። ፭. እስመ ኢኮነ ትምህርትነ ኀቤክሙ በነገር ባሕቲቱ ዓዲ በኀይልኒ ወበመንፈስ ቅዱስ ወበስኢል ምእመን። ወአንትሙሂ ታአምሩ ዘከመ ኮነ በኀቤክሙ በእንቲአክሙ። ፮. ወአንትሙሂ ኪያነ ተመሰልክሙ ወተወከፍክሙ ቃለ እግዚእነ፥ በብዙኅ ሕማም ምስለ ፍሥሐ መንፈስ ቅዱስ። ፯. ወኮንክምዎሙ አርአያ ለእለ አምኑ ኵሎሙ እለ በመቄዶንያ ወአካይይ። ፰. እስመ እምኀቤክሙ ተምህሩ ቃለ እግዚእነ ወሰምዑ ወአኮ በመቄዶንያ ወአካይያ ባሕቲቱ ዓዲ በኵሉ በሐውርት ተሰምዐት ሃይማኖትክሙ በእግዚአብሔር፥ ወኢንፈቅድ ንሕነ ምንትኒ ንንግር በእንቲአክሙ። ፱. ለሊሆሙ ያአምሩ ዘከመ ቦእነ ኀቤክሙ ወዘከመ ተመየጥክሙ ኀበ እግዚአብሔር እምአምልኮ ጣዖት ከመ ትትቀነዩ ለአምላክ ሕያው ወጻድቅ። ፲. እንዘ ትሴፈውዎ ለወልዱ እምሰማያት፥ ዘአንሥኦ እሙታን ኢየሱስ ወውእቱ ይድኅነነ እመንሱት ዘይመጽእ።

ዘካልእ መልእክት Universal Epistle

፲፬. ጸሐፍኩ ለክሙ አበው፥ እስመ አእመርክምዎ ለቀዳማዊ፤ ጸሐፍኩ ለክሙ ወራዙት እስመ ጽኑዓን አንትሙ፥ ወቃለ እግዚአብሔር ይነብር ኀቤክሙ ወሞእክምዎ ለእኩይ። ፲፭. ኢታፍቅርዎ ለዓለም ወኢዘሀሎ ውስተ ዓለም። ወዘሰ አፍቀሮ ለዓለም ኢሀሎ ፍቅረ እግዚአብሔር ኀቤሁ። ፲፮. እስመ ኵሎ ዘሀሎ ውስተ ዓለም፥ ፍትወቱ ለሥጋ፥ ወፍትወቱ ለዐይን፥ ወስራሑ ለመንበርት፥ ኢኮነ ዝንቱ እምኀበ አብ አላ እምዓለም ውእቱ። ፲፯. ወዓለምኒ የኀልፍ ወፍትወቱኒ ወዘሰ ይገብር ፍትወቶ ለእግዚአብሔር ይነብር ለዓለም። ፲፰. ደቂቅየ ዛቲ ሰዓት ደኃሪት ይእቲ ወበከመ ሰማዕክሙ ከመ ይመጽእ ሐሳዌ መሲሕ ወይእዜኒ ኮኑ ብዙኃን ሐሳውያነ መሲሕ። ወበዝንቱ አእመርነ ከመ ደኃሪት ሰዓት ይእቲ። ፲፱. እስመ እምኔነ ወፅኡ እለ ኢኮኑ ባሕቱ እምኔነ፥ ወሶበሰ እምኔነ እሙንቱ እምነበሩ ምስሌነ። ወባሕቱ ከመ ይትዐወቁ ከመ ኢኮኑ ኵሎሙ እምኔነ።

ግብረ ሃዋርያት Acts

፲፩. ወዐቢየ ኀይለ ይገብር እግዚአብሔር በእደዊሁ ለጳውሎስ። ፲፪. ወይወስዱ እምጽንፈ ልብሱ ወሰበኑ መቲሮሙ ወያነብሩ ዲበ ድዉያን ወየሐይዉ ወአጋንንት እኩያን ይወፅኡ። ፲፫. ወቦ እለ አኀዙ እምአይሁድ እለ የዓውዱ ወይረቅዩ ወይጼውዑ ሎሙ ለአጋንንት እኩያን በስመ እግዚእነ ኢየሱስ ወይቤልዎሙ፦ ናምሕለክሙ በስሙ ለኢየሱስ ዘጳውሎስ ይሜህር በስሙ። ፲፬. ወእሉ እለ ከመዝ ይገብሩ አይሁድ እሙንቱ ደቂቀ ሊቀ ካህናት ዘስሙ አስቄዋ ወሰብዐቱ እሙንቱ። ፲፭. ወተሠጥዎሙ ውእቱ ጋኔን እኩይ ወይቤሎሙ፦ በኢየሱስኒ አአምን ወለጳውሎስኒ አአምሮ። አንትሙ እንከ መኑ አንትሙ? ፲፮. ወአብደ ላዕሌሆሙ ውእቱ ዘጋኔን እኩይ ወኀየሎሙ ወሞኦሙ ወኦቍሰሎሙ ወፈቅኦሙ ወሰደዶሙ እምውእቱ ቤት። ፲፯. ወተሰምዐ ዝነገር በኀበ ኵሎሙ አይሁድ ወአረሚ እለ ይነብሩ ኤፌሶን ወፈርሁ ኵሎሙ ወአዕበዩ ስመ እግዚእነ ኢየሱስ።

ስንክሳር Synaxarium

ጊዮርጊስ ሰማዕት
ወብሶይ
ወአርሶፎኒስ
ወአስኪርዮን

መዝሙር Psalm

እስመ አድኀና ለነፍስየ እሞት፤
ወለአዕይንትየኒ እምአንብዕ፤
ወለእገርየኒ እምዳኅፅ።

ወንጌል Gospel

፴፭. ወእንዘ ይትናገር ምስሌሃ መጽኡ ኀበ መጋቤ ምኵራብ ወይቤለዎ፦ ወለትከሰ ሞተት፥ ወኢታጻምዎ እንከ ለሊቅ። ፴፮. ወሰሚዖ እግዚእ ኢየሱስ እንዘ ይትናገርዎ ይቤሎ ለመጋቤ ምኵራብ፦ ኢትፍራህ፥ ተአመን ዳእሙ። ፴፯. ወከልአ አልቦ ዘይትልዎ ዘእንበለ ጴጥሮስ ወያዕቆብ ወዮሐንስ እኁሁ ለያዕቆብ። ፴፰. ወቦአ ቤቶ ለመጋቤ ምኵራብ ወረከቦሙ ይትሀወኩ ወይበክዩ ወያዐወይዉ ብዙኀ። ፴፱. ወቦአ ወይቤሎሙ፦ ለምንት ትትሀወኩ ወትበክዩ? ኢሞተት ሕፃንሰ አላ ትነውም። ፵. ወሠሐቅዎ። ወእምዝ ሰደደ ኵሎ ወነሥኦሙ ለአቡሃ ወለእማ ለሕፃን ወእለ ምስሌሆሙ ወቦአ ኀበ ሀለወት ሕፃን። ፵፩. ወአኀዛ እዴሃ ለሕፃን ወይቤላ፦ ጣቢታ ቁሚ፤ ተንሥኢ ወለትየ፥ ብሂል በትርጓሜሁ። ፵፪. ወተንሥአት ሶቤሃ ይእቲ ወለት ወአንሶሰወት ወዐሠርቱ ወክልኤቱ ክረምታ። ወደንገፁ ሶቤሃ ዐቢየ ድንጋፄ። ፵፫. ወገሠጾሙ ብዙኀ ከመ አልቦ ዘየአምር ዘንተ ወአዘዘ የሀብዋ ዘትበልዕ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

እስመ ኪያከ ተወከለት ነፍስየ፤
ወተወከልኩ በጽላሎተ ክነፊከ፤
እስከ ተኃልፍ ኃጢአት።

ወንጌል Gospel

፲፰. ወመጽኡ ኀቤሁ ሰዱቃውያን እለ ይብሉ አልቦ ትንሣኤ ምዉታን። ወተስእልዎ ወይቤልዎ፦ ፲፱. ሊቅ፥ ሙሴ ጸሐፈ ለነ፦ ለእመቦ ዘሞተ እኁሁ ወኀደገ ብእሲቶ ወአልቦ ውሉደ፥ እኁሁ ያውስባ ለብእሲቱ ወያቅም ዘርዐ ለእኁሁ። ፳. ሀለዉ እንከ ሰብዐቱ አኀው ወአውሰበ ዘይልህቅ ብእሲተ ወሞተ እንዘ አልቦ ውሉደ። ፳፩. ወአውሰባ ካልኡኒ ወሞተ እንዘ አልቦ ውሉደ፥ ወሣልሱኒ ከማሁ። ፳፪. ወእስከ ሰብዐቲሆሙ አውሰብዋ ወኢኀደጉ ውሉደ፥ ወድኅረ ኵሎሙ ሞተት ይእቲ ብእሲት። ፳፫. አመ የሐይዉ እንከ ምዉታን፥ ለመኑ እምኔሆሙ ትከውኖ ብእሲተ? እስመ ሰብዐቲሆሙ አውሰብዋ። ፳፬. ወአውሥአ እግዚእ ኢየሱስ ወይቤሎሙ፦ አኮኑ በእንተ ዝንቱ ትስሕቱ፥ በኢያእምሮ መጻሕፍት፥ ወኢኀይለ እግዚአብሔር? ፳፭. አመሰ የሐይዉ ምዉታን ኢይወስቡ ወኢይትዋሰቡ አላ ከመ መላእክተ እግዚአብሔር እሙንቱ በሰማያት። ፳፮. ወከመሰ የሐይዉ ምዉታን ኢያንበብክሙኑ በውስተ መጽሐፈ ሙሴ ዘይቤሎ እግዚአብሔር በኀበ ዕፀ ጳጦስ እንዘ ይብል፦ አነ ውእቱ እግዚአብሔር አምላክከ፥ አምለከ አብርሃም፥ ወአምላከ ይስሐቅ፥ ወአምላከ ያዕቆብ? ፳፯. ኢኮነኬ አምላከ ምዉታን አላ አምላከ ሕያዋን ውእቱ። ወአንትሙሰ ብዙኀ ትጌግዩ። ዘቦ እዝን ሰሚዐ ለይስማዕ።

መዝሙረ ዳዊት Psalm

እማዕምቅ ጸዋዕኩከ እግዚኦ፤
እግዚኦ ስምዐኒ ቃልየ፤
ወይኩን ዕዝንከ ዘያጸምእ ቃለ ስእለትየ።
 

ወንጌል Gospel

፲፪. ኵሎኬ ዘትፈቅዱ ይግበሩ ለክሙ ሰብእ፥ ከማሁ ግበሩ ሎሙ አንትሙኒ፤ እስመ ከማሁ ኦሪትኒ ወነቢያትኒ። ፲፫. ባኡ እንተ ጸባብ አንቀጽ፤ እስመ ረኃብ አንቀጽ ወስፍሕት ፍኖት እንተ ትወስድ ውስተ ኃጕል፤ ወብዙኃን እሙንቱ እለ ይበውኡ ውስቴታ። ፲፬. ጥቀ ጸባብ አንቀጽ ወጽዕቅት ፍኖት እንተ ትወስድ ውስተ ሕይወት፤ ወውኁዳን እሙንቱ እለ ይበውእዋ። ፲፭. ተዐቀቡኬ እምሐሳውያን ነቢያት እለ ይመጽኡ ኀቤክሙ በአልባሰ አባግዕ፥ ወእንተ ውስጦሙሰ ተኵላት መሠጥ እሙንቱ። ፲፮. ወእምፍሬሆሙ ታአምርዎሙ፤ ይቀሥሙሁ እምአሥዋክ አስካለ፥ ወእምአሜከላ በለሰ? ፲፯. ከማሁኬ ኵሉ ዕፅ ሠናይ ፍሬ ሠናየ ይፈሪ፥ ወእኩይሰ ዕፅ ፍሬ እኩየ ይፈሪ። ፲፰. ኢይክል ዕፅ ሠናይ ፍሬ እኩየ ፈርየ፥ ወኢ ዕፅ እኩይ ፍሬ ሠናየ ፈርየ። ፲፱. ኵሎ ዕፅ ዘኢይፈሪ ፍሬ ሠናየ ይገዝምዎ ወውስተ እሳት ይወድይዎ። ፳. ወእምፍሬሆሙ እንከ ታአምርዎሙ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፳፮. ወይእዜኒ አኀዊነ? ሶበ ትትጋብኡ ኵልክሙ ብክሙ መዝሙረ ወብክሙ ትምህርተ ዘከሠተ አበይኖ ዘነገረ በሐውርት ወዘምድራሳት። ወኵሎ በዘትትሐነጹ ግበሩ ለበቍዔት። ፳፯. ወእመኒቦ ዘይነብብ በነገረ በሐውርት በበክልኤቱ ወበበሠለስቱ ዝኒ በዝኀ። ወለይትናገሩ በበአሐዱ ወይትፈከር ሎቱ ካልእ። ፳፰. ወእመሰ አልቦ ዘይተረጕም ለያርምም በቤተ ክርስቲያን ዝኩ ዘይትናገር በነገረ በሐውርት። ወይትናገር በዘማእከሌሁ ወማእከለ እግዚአብሔር። ፳፱. ወነቢያትኒ ይትናገሩ በበክልኤቱ ወበበሠለስቱ ከመ ይትዐወቅ ለቤተ ክርስቲያን ቃሎሙ። ፴. ወእመሰቦ ለዘአስተርአዮ ወተከሥተ ሎቱ እንዘ ንቡር ለያርምም ቀዳማዊ። ፴፩. እስመ ይትከሀለክሙ ትትነበዩ ኵልክሙ በበአሐዱ ከመሕ ኵሉ ይትመሀር ወከመ ኵሉ ይትፌሣሕ። ፴፪. እስመ መንፈስ ነቢያት ይትኤዘዝ ለነቢያት። ፴፫. እስመ ኢኮነ እግዚአብሔር አምላከ ሀከክ ዘእንበለ አምላከ ሰላም፥ በከመ ይትገበር በኵሉ ቤተ ክርስቲያኖሙ ለቅዱሳን።

ዘካልእ መልእክት Universal Epistle

፩. ወዛቲ ይእቲ አኀውየ ዳግሚትየ ዘጸሐፍኩ ለክሙ መጽሐፈ ከመ አንሥእክሙ በዘክሮ ወትዕቅብዋ በልብክሙ ለጽድቅ። ፪. ወከመ ትዘከሩ ቃለ ነቢያት ቀደምት ቅዱሳን ዘይቤሉ ወትእዛዘ እግዚእነ ወመድኀኒነ ኢየሱስ ክርስቶስ ዘአዘዘ ለነ ለሐዋርያት። ፫. ወዘንተኒ ቅድሙ አእምሮ ከመ ሀለዎሙ ይምጽኡ በደኃሪ መዋዕል መስተአብዳን ለአስተአብዶ። እለ የሐውሩ በፍትወተ ልቦሙ፥ ፬. ወይብሉ፦ አይቴ ውእቱ ቃሉ ዘይቤ ከመ ሀለዎ ይምጻእ? ናሁ እምአመሰ አበዊነ ቀደምት ሞቱ እስመ ኵሉ ግብር ሀለወ በከመ ሀሎ እምፍጥረተ ዓለም። ፭. ወኢያእመርዎ ለዝንቱ በፈቃዶሙ ከመ ሰማያትኒ ተፈጥራ እምትካት ወምድርኒ እምነ ማይ ወበማይ ጸንዐት በቃለ እግዚአብሔር። ፮. ወዓለመ ትካትኒ ቦቱ አጥፍአ በማየ አይኅ። ፯. ወይእዜኒ ሰማይ ወምድር በውእቱ ቃል ዝጉባን እሙንቱ ለእሳት ወዕቁባን እስከ ዕለተ ደይን ወድምሳሴ ኃጥኣን ሰብእ።

ግብረ ሃዋርያት Acts

፴፰. አእምሩ እንከ አኃዊነ ከመ በእንቲአሁ ይትኀደግ ለክሙ ኃጢአትክሙ ዘአሰፈወክሙ። ፴፱. እምኵሉ ዘተስእነክሙ ጸዲቀ በሕገ ኦሪተ ሙሴ ወቦቱሰ ኵሉ ዘአምነ ይጸድቅ። ፵. ዑቁ እንከ ኢይርከብክሙ ቃለ ነቢይ፦ ፵፩. ናሁ ርእዩ እለ ታስተሐቅሩ ወአንክሩ ወትማስኑ እስመ አነ እገብር ግብረ በመዋዕሊክሙ ዘኢተአምንዎ ለእመቦ ዘነገረክሙ። ፵፪. ወአስተብቍዕዎሙ ከመ ይንግሩ ዘንተ ነገረ በካልእት ሰንበት። ፵፫. ወወፂኦሙ እምኵራብ ተለውዎሙ ብዙኃን እምአይሁድ ወእምፈላስያን ወኄራቶሙ ለጳውሎስ ወለበርናባስ ወነገርዎሙ ወአምኑ ወተመይጡ በጸጋ እግዚአብሔር።

ስንክሳር Synaxarium

ኤልሳዕ ነቢይ
ወአርጣል ሰማዕት
ወሚናስ ዘንስር

መዝሙር Psalm

ግሩም ምክሩ እምእጓለ እመሕያው፤
ዘይሬስያ ለባሕር የብሰ፤
ወበተከዚ የኀልፉ በእግር።

ወንጌል Gospel

፳፫. ወይቤሎሙ፦ ግብር ትብሉኒ ዛተ ምሳሌ፦ ዐቃቤ ሥራይ ፈውስ ርእሰከ ኵሎ ዘሰማዕነ ዘገበርከ በቅፍርናሆም ግበር በዝየኒ ወበሀገርከ። ፳፬. ወይቤሎሙ፦ አማን እብለክሙ፥ ኢይከብር ነቢይ በሀገሩ። ፳፭. አማን እብለክሙ፥ ብዙኃት መበለታት ሀለዋ በውስተ እስራኤል በመዋዕለ ኤልያስ አመ ተዐጽወ ሰማይ ሠለስተ ዐመተ ወስድስተ አውራኀ አመ ኮነ ረኃብ ዓቢይ ውስተ ኵሉ ምድር። ፳፮. ወኢተፈነወ ኤልያስ ወኢኀበ አሐቲ እምኔሆን ዘእንበለ በሰራጵታ ዘሲዶና ኀበ ብእሲት መበለት። ፳፯. ወብዙኃን እለ ለምጽ ሀለዉ በውስተ እስራኤል አመ ኤልሳዕ ነቢይ ወኢነጽሐ አሐዱሂ እምኔሆሙ ዘእንበለ ንዕማን ሶርያዊ። ፳፰. ወተምዑ ኵሎሙ በምኵራብ ሰሚዖሙ ዘንተ። ፳፱. ወተንሥኡ ወአውፅእዎ አፍአ እምሀገር ወወሰድዎ ውስተ ሕፅነ ደብር ዘተነድቀት ላዕሌሁ ሀገሮሙ ከመ ያጽድፍዎ። ፴. ወውእቱሰ ኀለፈ እንተ ማእከሎሙ ወሖረ። ፴፩. ወወረደ ቅፍርናሆም ሀገረ ገሊላ ወመሀሮሙ በሰንበት። ፴፪. ወያነክሩ ምህሮቶ እስመ በትእዛዝ ውእቱ ቃሉ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ደብረ ጽዮን ዘአፍቀረ፤
ሐነፀ መቅደሶ በአርያም፤
ወሣረራ ውስተ ምድር ዘለዓለም።
 

ወንጌል Gospel

፩. ወፈጺሞ ነጊሮቶሙ ቃሎ ለሕዝብ ቦአ ቅፍርናሆም። ፪. ወሀሎ አሐዱ መስፍን ወገብሩ ይደዊ ወአልጸቀ ይሙት ወክቡር ውእቱ በኀቤሁ። ፫. ወሰሚዖ በእንተ እግዚእ ኢየሱስ ለአከ ኀቤሁ ረበናተ አይሁድ ወአስተብቍዕዎ ከመ ይምጻእ ወያሕዩ ሎቱ ቍልዔሁ። ፬. ወመጽኡ ኀበ እግዚእ ኢየሱስ ወአስተብቍዕዎ ወይቤልዎ፦ ፍጡነ ረድ እስመ ይደልዎ ትግበር ሎቱ ዘንተ። ፭. እስመ ያፈቅር ሕዝበነ ወምኵራበኒ ውእቱ ሐነጸ ለነ። ፮. ወሖረ እግዚእ ኢየሱስ ምስሌሆሙ ወአልጺቆ ኀበ ቤቱ ለአከ አዕርክቲሁ ውእቱ መስፍን ኀቤሁ እንዘ ይብል፦ እግዚኦ፥ ኢትጻሙ እስመ ኢይደልወኒ ከመ ትባእ ታሕተ ጠፈረ ቤትየ። ፯. ወለሊየኒ ኢይደልወኒ እምጻእ ኀቤከ፥ ወባሕቱ አዝዝ በቃልከ ወየሐዩ ቍልዔዮ። ፰. እስመ አነሂ ብእሲ መኰንን አነ፥ ወብየ ወዐልተ ወእብሎ ለዝንቱ፦ ሑር፥ ወየሐውር፤ ወለካልኡ፦ ነዓ፥ ወይመጽእ፤ ወለገብርየኒ ግበር ከመዝ ወይገብር። ፱. ወሰሚዖ እግዚእ ኢየሱስ አንከሮ ወተመይጦ ይቤሎሙ ለሕዝብ እለ ተለውዎ፦ ኢረከብኩ ዘከመዝ ይትአመን በውስተ እስራኤል። ፲. ወአቲዎሙ እለ ተፈነዉ ረከብዎ ለገብሩ በዘሐይወ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።